انهد حيلي من كثر التفكير
ولدي الكبير من سنة جنني يبي يتزوج ثانية.. والمصيبة مختار البنت ومنتهي..ويبيني أخطب له وأزوجه.. لا حول ولا قوة إلا بالله..

حاولت أصرف نظره بكل الطرق (نصيجة شد لين زعل غضب ) مافي فايدة..
عشان أثنيه قلت له ترضي زوجتك بمية ألف قال تم...هو اللي عجزني.

سنة وأنا كاتمة بقلبي ومن أسبوع خبرت أبوه وقلت له الزواج هذا مايتم شوف ابنك واتصرف معاه....

أبوه جلس معه خمس ساعات قافلين الباب مدري وش يقولون..
آخرتها الولد نزل بيته وزوجي قال لي زوجيه لا تحاولين... تراه مقرر وخالص..

ماعنده أي أسباب والله زوجته ماينقصها شي عشان يجيب عليها حرمة... يبي يعدد وبس...

يقول البنت لمحها في بيتي ودخلت قلبه ويبيها بالحلال...مع إنه بيتي طابق الحريم منفصل عن طابق الرجال مدري كيف شافها ...

يقول مابينه وبينها أي علاقة ولا يعرف دربها.. البنت محترمة و أهلها ناس محترمين..والناس ينشروا ماينعاب فيهم شي..واللي يبيها ماتنقص ولا تزيد عن زوجته في شي..

بالله قولوا لي كيف أطلع من هالمصيبة؟؟
كيف أخرب بيت ولدي بإيدي؟
نفسيتي دمار.. كل ما أشوف زوجته قلبي ينقبض وأشفق عليها...






مستجدات الرد 194

http://www.66n.com/forums/showpost.p...7&postcount=19


مستجدات -الرد207-

http://www.66n.com/forums/showpost.p...&postcount=207

مرحباً أختي

يقول من أعرفه جيداً

ذات يوم أصريت على الزواج من ثانية مع العلم أن زوجتي من أروع النساء في كل شئ... ولكن شئ وأريد تجربته

وكان أبي متراخي ويقول لي حياتك إفعل ماتريد

ولولا وقفة أمي ضدي بكل قوة وحزم وإلا لتزوجت

حتى أنها قالت لي... لوتزوجت لنت ولدي ولا أعرفك ولاتدخل لي بيت


وبعد مرور سنين ... يقول الرجل

لولا وقفة أمي في ذلك الوقت لخسرت زوجتي الأولى وربما الثانية وتدهورت حياتي

مع العلم أن زوجته إلى الآن لاتعلم بهذه القصة تماماً ... بل وربما قد يحدث بينها وبين والدته بعض الزعل الخفيف بعض الأحيان



أعانك الله

الله يعطيكي العافيه على اهتمامك بزوجة ابنك الاولى وباهتمامك بابنك

انا ودي اعرف كيف حددتي الرضاوة ب 100 الف؟

هل ترضيكي انتي ال100 الف وزوجك يتزوج عليكي؟ ام كيف حسبتيها؟

وكم سنة له متزوج وهل عنده اطفال ؟

وكم عمره ؟

هو مدلل وفاتحها الله عليه من الرزق صح ؟

هو التعدد مو شرط انه مضر ويخرب بيته الأولي

ولكن طريقته (لمحتها في البيت وعجبتني ) تدل انه زواج شهوة وحب تغيير ليس الا وفورة شباب وتوفر فلوس في يده وعايش في نعيم مع زوجته (مع شوية منغصات) فقال خليني اجعل الخير خيرين

هذاني متزوج ومسيطر عليها وفيه فترات غبت عن البيت وماعندها مشكلة فخليها تعتبر وقت وجودي عند الزوجة الثانية وكأني في انتداب او في العمل او في كشتة مع اصحابي

وديّتها تزعل كم يوم ومع ال 100 الف مصيرها بترضى وتهدأ

الخلاصة :

عليكي بعد الاستخارة والتوكل على الله تطبيق رد اخوي (الرسمي) بكامله فهو اعطاكي حل وافي وكافي وواقعي

ادخل موضوعك اكتب واتعوذ من ابليس واطلع
وبرجع ياكلني قلبي وادخل ثاني
ماعتقد ردي بيكون فاصل ويحل مشكلتك واظن ان الي بكتبه اكيد تكلمتي فيه مع ولدك
اخاف اني اقطع رزق بنت الناس وهذا شرع ربي ... واخاف انها بعد تنظلم معاه او تنظلم زوجته الحالية
لان هذا حال التعدد في ذا الوقت
ولكن اسمحي لي اقولك رايي بما اني كنت زوجة ثانية
ورايي ماله دخل بفشل تجربتي ... ولا له دخل بموقفي من التعدد سواء كنت موافقه او معترضة

اختي اعتقد هذا الموضوع يحتاج الى الحزم منك ومن والده
اذا فكرته عن الزوجة الثانية وحدة شافها بس ودخلت مزاجه فهو ماعنده اي فكرة ولا يصلح وليس مؤهل ابدا

بالتأكيد هو جق من حقوقه .المكفولة شرعا .. ولكن مالنتائج المترتبة على هذا القرار؟؟
هو لا يستوعب حجم الموضوع وهذا دورك انتي وابوه ...
هذه مهمتك توضحنها له
اعطيه الصورة في نقاط كالتالي:

ممكن زوجته تطلب الطلاق وممكن ترمي اولاده .. والعروس الجديدة هل راح تقبل تشيل عياله ولا لا
المشاكل والغيرة بين الطباين ... المصاريف .. الاولاد .. البيتين ..
هذه اذا حملت تبي تحمل ذيك
وهذه ان غيرت فرشها هذيك بتغير
وضحي له الصورة كااااامله
فهمه انها فكرة دخيلة على عائلتكم اذا ماكان في احد من اعمامه او خواله سواها
فهميه ان بنات الناس مو لعبة .. يجي بكرة يقول بطلق فلانه ... تعبت .. مارتحت
اكتشفت اني احب زوجتي .. اولادي تعبو .. زوجتي تعبت ... رحمت الاولى .. فلانه غيرتها صعبة
علانة فيها وعلانه يخطيها

النقاااط كثيرة ومزدحمة في راسي ولكني اشعر انها لاتخفى عليك.. والاكيد انك وابوه ناقشتوها معاه
احنا الحريم ومن غير مانكون مجربات بنعرف حجم المشاكل في التعدد . ولولا الظروف هي الي تجبر الوحدة مارضينا فيه ...
وانتي سيدة فاهمة اسمحي لي استغرب برودك
بالعامي دخلي له الرضا والغضب ... الموضوع ماهي طقة تطق براسه وينفذ
انا اتفق مع الاخ الرسمي
لاتجاريه
اقلها حتى ينضج .. وتنضج الفكرة في راسه جيدا
في مقالات للعودة والدكتور النابلسي وجاسم المطوع والكثيرين غيرهم
ابحثي عن ارائهم في التعدد
ابحثي في مواضيع المنتدى عن مشاكل التعدد وابعثي له
صورا مع التحية وهكذا
انتي اذا وقفتي في وجهه بترتاح نفسيتك وتهدئ اذا قدرتي عواقب رغبته واندفاعه
عجبتيني لما قلتي لابوه هذه الزواجة ماتتم .. اثبتي يااختي ولا تنهزين بسهولة
الموضوع في خراب بيوت وممكن هوما هو قدها
يمكن كلامي مكرر لك ولكن في الاعادة افادة
الله يعينك ويساعدك عليه

ابنك للاسف مو فاهم ولا عارف من التعدد غير انه شرع الله و حلال

لمحها و دخلت مزاجهه ،،،،،،، بنات الناس مو لعبه
باجر يعرف طباعها و تصرفاتها و ما تعجبه و قال بطلق
طلعت مو نفس ما رسمتها و تخيلتها

اوقفي بوجهه بحزم و لا تسمحي له يدمر حياة انسانه مالها ذنب بافكاره
ولا يهدم بيته بيده دام زوجته مو مقصره عليه بشي ولا ناقصها شي

__________________


سبحان الله و بحمده
عدد خلقه و رضى نفسه
و زنه عرشه و مداد كلماته

~♥¤♥¤♥¤♥~

زوجته الاولى اي وحدة فيهم؟

انتي ذكرتي انه فيه من زوجات عيالك الله يحفظهم :

1- تزورك مرتين في الشهر

2- كل شوي ناطة عندك

3- تزورك في الاعياد والمناسبات

4- توك متصالحة معها

ودي اعرف انتي رحمتي اي وحدة فيهم ومارضيتي زوجها يتزوج عليها؟

ابنك لا يعرف ماذا يريد و كما ذكر الأخوة و الأخوات سابقاً يجب الحزم معه و عدم الانسياق وراء رغباته و ميوله و تحقيقها له لأن هذه الرغبات و الميول لن تتوقف عند هذا الحد. و الزواج ليس نزوة و لا رغبة مؤقتة بل هو مسؤولية كبيرة و التعدد له شروط و يبدو أن معظم الشروط لا تنطبق عليه.

حتى لو أصر وأتم الزواج

لاتجعلي نفسك طرف فيه بأي شكل.. تروح السكرة وتجي الفكرة وبعدها الإنسان يدور أحد يحط عليه اللوم عشان يبري نفسه

إذا هي بنت أصول ماراح تقبل فيه إذا جاي بدون أهله

ليش كلمك وكأنه ضامن البنت بترضى بالمناسبة؟

__________________

اختلافي عنك لا يعني اختلافي معك

اخ مثابر اسمح لي أتدخل اظن هيه حطت 100 الف ك شرط تعجيزي له و للاسف وافق و زادها احباط !

قوليله استخير وانتي استخيري ف هالموضوع ان كان خير يتم والا الله يصرف قلبه و عقله عنها و نصيحتي لا تتدخلين ف تزوجيه لأنج ما ذكرتي اي عيب في زوجته.. ومسألة اختياره للبنت بعد غلط لانها بس دخلت مزاجه فلا تتاثمين في الثنتين..

__________________

كم عمر ولدك يا ام دان ؟ وهل يقدر يفتح بيتين ؟ وماموقف زوجتها الاولى ؟