(( 16 يوم انسان ماهو داري عني .. حيه ولا ميته .. تعبانه ولا صاحيه .. مالك قيمه عندي .. وكلامي هاذا مو من غضب او عصبيه ))

شوف رد الاخ الرسمي و ارجع و نفذ نصايحه

حسب مافهمته من نصايح اخي الرسمي .. انه طنش !!

اذا ماني غلطان .. !!

هي مو عارفه انت ليه مطنشها ؟ وهاجرها ؟
تشوف نفسها مظلووومه

ضروري يجي دور الموجه والمرشد منك

لو ابن سوى غلط وعاقبه والده وهو مو عارف ليش عاقبه ؟

تتوقع يتوب من غلطته ولا يكررها ؟

طالما هو مو عارف ليش عاقبه بيكون زعلان من والده ويكون بقرارة نفسه انه مظلوم
وطبعا بيكون فجوة بينه وبين والده ..وقد يحقد على والده


بالضبط هذا السيناريو اللي بينك وبين زوجتك

والدليل سياسة التطنيش اللي متبعها حاليا ..ماراح تفيدك بشئ بتاتا

يا انك ترسل لها رساله باسباب تطنيشك لها
ولا تقولون هي كبيره وفاهمه
يا ما كبيره وفاهمه بس ماتفهم بالحياة الزوجيه ولا راح تتعلم الا من توجيهات زوجها

التوجيهات ماتكون قول فقط او محاوره فقط وتقول خلاص وجهتها

توجيهاتك لازم تكون قول وفعل
ماينفع قول ومحاوره وحدها
ولا ينفع فعل لوحده زي فعلك الحالي

ارسل لها رساله
((تخرجين من البيت من غير اذني وتطلبين مني الاتصال والسؤال ؟!))

خلها تكون في الصوره وتعرف انك وش تبي ؟
مايصير ياخي كذا ؟

اكتب لها اخطائها في رساله
مو عيب والله ولاينقص من قدرك لو توضح لها

اكتب لها
( الزوجه اللي تقدرني وتطيعني هذي اقدرها وخليها تاج على راسي ..
لكن حركات العناد والخروج من البيت من غير اذني ماتمشي معي
واكرام اهلي من اكرامي وتقديري )

كلام منطقي و سليم

__________________

اعتقد اللي يصير طقطقه بنات يعني كل وحده تطقطق عليك اشوي واتجرب مهاراتها وقدراتها في انك ترضخ وتصالح زوجتك مو مستوعبات حجم المشكله وحجم معاناتك وزوجتك اولهن واضح جدا ان حركاتهم لف ودوران علشان ان تبتدي بالصلح وترجع لنفس الدوامه في ان زوجتك تضع الشروط برايي تطنش وتنتظر اتصال امها فالام اكثر حكمه وتعقل منهم زوجتك الين اليوم تعتقد انك ماتقدر تستغني عنها وانك بترضخ بالنهايه وتستسلم لشروطها واعتقد اللي صعب عليها الموقف ان صديقاتها ( قريباتها) دروا بالموضوع فهي ماتبي تتفشل قدامهم وتخيب توقعاتها عندهم في انك مارضخت وماقبلت شروطها

والله ي اختي .. يتضح لي انها من جد وصلت حدها من الطناش
والهجر ..

والمصيبه انها لسى مصره ع موقفها والعناد ..

لعب دور الضحيه وانها مضلومه ومغلوب ع امرها باين من رسايلها

نصيحه اخينا الرسمي واضحه وصريحه بأن اطنش ولا اتجاوب مع رسايلها ..

اقسم بالله العلي العظيم لا ادري كيف وماذا تريد !

هي تريد الامان والاحتواء بعد تطنيشك لها
مسكينه احسها ضايعة وماعندها من يعقلها

اذا جات رسايل من قريباتها لاترد

السلام عليكم اخوي MAS
حاولت ادخل عليك خاص لكن ماعرفت

انا حبيت اقول لك شي علشان بنتك اللي جايه بالطريق الله يجعلها قرة عين لك
كتبت رد طوييييل جداً لكن انا من عادتي ما اقول للغير عن اسراري واللي يشوفني يقول ان ماعندي اي مشاكل في دنيتي

لكن ابذكرها باختصار
الوالده مطلقه من يومي صغير والناس ظلمتني ظلم الله لا يوريك لا اخ لا خال لا قريب لا بعيد كلن وجاء ينهش فيني ويظلمني وكنت اكره الوالد من كلام الوالده عنه ولاني محروم منه فما كنت اعرف عنه شي
بعد ماكبرت وصرت اعتمد على نفسي زرته وفهمت كل شي منه والله يرحمه الله توفاه وكنت اتمنى اني عشت عنده ولا عند الوالده الله يحفظها ""لا اسمح احد يقول عنها شي لانها تسوي كل شي بطيب نيه وغيرها مستغل طيبتها""
واثبت لي كل شي بالاوراق والادله ورسايل الجوال

الوالده انلعب عليها ولا كان فيه احد يعلمها الصح من الغلط ويتم تعبية راسها واستغلالها وكانت تصدق الغير وتم الطلاق ولازالت تسمع كلام الغير وتصدق ومنعتنا منه وصار اللي صار من ظلم
والوالد كان مسالم ولا يحب المشاكل وجاته امراض كثيره وتوفاه الله

شفت في زوجتك اشياء تقدر تقول اشوفها عند امي
مافيه احد يوجهها ولا فيه احد يوقفها عند حدها وماخذه راحتها بكل شي ويمكن فيه احد قاعد يستغلها بهذا الشي من خال او اخ او اي احد علشان اسمها او اي مصلحه
وشفت فيك الطيبه ولا تحب المشاكل وتحاول الاصلاح مثل الوالد الله يرحمه

الوالد معروف عند الناس انه ذكي ولا احد يحب يتحرش فيه لانه ياخذ حقه لحكمته وذكائه لكن كان طيب بزياده عند الوالده

حياتنا ضايعه اخواني الكبار واحد مدمن وفقد عقله والثاني مايوقف جواله من البنات والسفريات
لا عندهم مستقبل ولا اي شي وفلوسهم ضايعه على الخراب ومضيعين فلوس الوالده معهم

خواتي لولا الله ثم انا كان الحين ضايعين ولا فيه احد يشوفهم او يهتم فيهم
عشت حياة صعبه وتحملت اشياء مافيه احد بعمري يقدر يتحملها واجري ان شاء الله بالآخره

ابي اتزوج ولاني قادر واخوي اللي اكبر مني متزوج مسيار ولا احد يعرف الا انا علشان يستر على نفسه ولا يطيح بالحرام
والوالده ماترفض الزواج لكن ماتوافق بنفس الوقت وادخل على مواضيعي تعرف مشكلتي بالزواج


ما عندي حلول لزوجتك
لكن
انتبه لبنتك
انتبه لبنتك
انتبه لبنتك
وحط تحت هالكلمتين مليون خط ولا تكون ضعيف
الوالد الله يرحمه كان يضعف اذا كان في الموضوع لنا دخل وكان يحاول يسعدنا وكان يظن اننا سعيدين ومرتاحين
واحلف لك بالله اغلب اصحابه اللي تعرفت عليهم يقولون ماكنا نتوقع ابوك يصير كذا فيه وكنا نظن ان عائلته بتصير افضل عائله بيننا

مهما قالوا لك او حتى بنتك بالمستقبل قالت لك ماتبي تجي عندك او عند امك لا تخليها بحالها ابداً
وخل زيارتك لها اسبوعيه واهتم فيها وثقفها وخلها تقعد مع امك وخواتك وخلها تاخذ من اطباعهم