تعبت ياهاجر رايحة وياية ابي استقر .. عارفة كم سفرة سافرت من عيد رمضان الى الآن؟ 6 .. 4 منهم البحرين .. ولو يعملون الخطوبة الاسبوع الجاي بيصير 5 مرات . زوجي مل ومعاه حق .. انا عندي امور كثير مأجلتها انتظر نخلص من ملكة اخوي .. ابي اسجل في الجم وابي اتابع مع الدكتورة عشان ناوية اعمل عملية انابيب .. والله يا هاجر ان كتب بناتي ماجلدتهم للحين .. 😢

ليش مايراعوني ؟ الحين لو امهم او اختهم او خالتهم تيصيدها ظرف راح يختارون وقت يناسبها .. شمعنى انا لا ؟

هم تعذروا ان هالاسبوع مايقدرون يعملون حفلة في بيتهم لأن شوفي السبب .. لان ام جارهم متوفية من كم يوم .. عزاهم مش في بيت الجار هذا .. قالو لو في مكان غير البيت معليه .. قلت لهم شوفوا القاعة اللي تبونها .. او تبون في بيتنا حياكم البيت بيتكم .. تبون الخميس تبون الجمعة حاضرين لكم .. مارضوا ولا عطوا سبب مقنع .. قالو خلاص نلغي الحفل ..

على طاري الشبكة مادري اضحك ولا ابكي .. البنت ما اشترت شبكة تقول بتاخذ حق العرس .. هاذي اول مرة اسمع فيها .. عندنا الوحدة تلبس شبكتها في حفلة الخطوبة .. مهرهم من زمان ارسلناه لهم عشان تتجهز .. ماعرف ايش فكرتهم بالضبط ..

تعرفين ياهاجر شكثر صرفنا ودفعنا عرابين لحجوزات الخطوبة لهالاسبوع حسب الاتفاق الاول .. يجون قبلها ب3 ايام يقولون بنخليه الاسبوع الجاي ..
لو تدرين امس شكثر اتصلت في المحلات عشان الغي حجوزات وفيه طلبيات ماتنلغي فمضطرة اخذ الطلبات واتصرف فيها ..

وايد تكلمت .. 😪

ما عليه فشيتي قلبك
من كلامك يا اما ما معاهم فما يبغوا يتكلفوا او ما كنتم حازمين كفاية

ذكريتني في حفلة خطوبتي توفي عم ابي قبلها بيويمين و اهل زوجي رفضوا ياجلوا خصوصا انهم اهلهم قدموا من مدن بعيدة فعملنا الخطبة عند اهل امي
عذرناهم الصراحة متكلفين و احنا بعد تكلفنا

__________________

احس صار سوء تفاهم من ناحية الفلوس .. احنا كنا بنعطي مهر بقيمة كذا .. اخوي قال نعطيهمنزيد المهر 10 الاف ريال ونقول لهم شامل تكاليف الحفلة.. وقلنا لهم هالكلام .. يمكن مافهموا.. لان يوم خواتي يودون المهر سألت امهم حفلة الخطوبة عليكم ولا علينا ؟ قالت اختي عليكم .. كان المفروض تقول المهر شامل مصاريف الخطبة .. لكن اساسا اخوي من قبل قال هالكلام لخطيبته .. فالظاهر هم استخسروا يعملون حفلة بمهر بنتهم.. لما قالت لي اختي عن سؤال الام .. قلت لها معليه خلوا الموضوع مثل ماهو واحنا بنساهم بعد في الحفلة عشان لا يحسون ان صارت الحفلة كاملة من مهر البنت .. وماله داعي نتصل ونفهمهم ونحرجهم.. هم من يوم الخطبة قبل مانعطيهم المهر قالو انهم بيسون حفلة صغيرة في البيت .. اول قالو عزموا 50 من صوبكم و 50 من صوبنا .. بعدين قالو بس 25 عزموا من صوبكم.. البنت ماسوت مسرح ولا بتجيب مصورة .. ولا حجزوا دي جي .. رحت انا حجزت وقلت لهم بنجيب دي جي .. توزيعات الحلو والمالح انا وصيت عليها .. وتوزيعات الذكرى انا اخذت .. وطبعت على علب الكلينكس اسامي العروسين.. فوق هذا قلت يوم الحفلة بعطيهم 4 الاف او 5 الاف ريال بقول لهم مساهمة في المصاريف اللي اساسا ماتسوا .. بوفيه ل 50 شخص وايجار كراسي بس .. حسيتهم ماسكين شوي مايبون يصرفون ..

صح كلامك احنا مب حازمين .. انا وكلت اختي مهمة التفاق مع ام العروس بما اني في دولة ثانية وصعب الاتصال كل شوي .. اختي يمكن شوي مش عارفة تتفاهم معاهم تقول امها تفاجئني بمواضيعها ماعرف ارد ..

مريم
يعني البنت بتسوي ملكتها بدون ما تلبس شبكة؟!!
إيه دا؟!
ما علييييش
لازم يبدأ دورك وتاخذين وضعية الخالة القشرا!
لو مجلدة دفاتر بناتك قلت ما عليش
بس واضح إن أهل العروس دبرتهم دبرة حرمه

__________________
.
هناك من يتذمر لأن للورد شوكاً، و هناك من يتفاءل لأن مع الورد شوك.

اي والله انا متفاجئة جدا جدا ليش ما اخذت شبكة ..
والله ماقصرنا بمهرها .. والله انه ضعف مهري .. واكثر من مهور خواتي بوايد ..
اختها قبل شهر ملكتها عطوها مهر اقل من مهر عروسنا . بس ايش .. هم اعطوا مبلغ منفصل لمصاريف الخطوبة ..
احنا عطيناها مهر اكثر من مهر اختها من ضمنه المصاريف .. غلطة العمر .. 😪

بصير الخالة القشرا .. انا اوريك فيهم

سالخير
كيف الحال
فرحانه الجو تغير و الدنيا امطرت
يا حبي للمطر

شوكة ترى الاكشن يحلي المكان خخخخ
مو مكان هادئ لا اكشن و لا شئ

كان المفروض نفصل المهر عن تكاليف الحفلة .. بس هذا اللي صار ..

الله يرحم امي .. لو انها موجودة ماصارت لخبطة .. انا استحي اكلم ام البنت وافهمها واختي تستحي ..
مع ان احنا كل خطوة نقوم بها نشاور الكبار ونسأل ايش المفروض يصير .. لكن الاخطاء واردة ..
انا وخواتي حفلات خطوبتنا كانت من مهورنا .. ولا عمرنا فكرنا ان لازم اهل الزوج يدفعونها .. متعارف بعايلتنا حفلة الخطوبة صغيرة على اهل العروس .. والحفلة الكبيرة على اهل المعرس .. وانا بنفسي قلت امها هالشي لما رحنا نخطب .. لو انها قالت لي ان الحفلتين علينا ماكنا بنرفض وكنا عرفنا نفصل المهر عن المصاريف.. بس هي سكتت ماقالت شي ..