السلام عليكم و رحمة الله و بركاته

اعتذر عن غيابي عن المنتدى انشغلت بطفلي و بسبب وفاة والدي رحمه الله وحالة الاكتئاب التي مريت فيها الحمدلله على كل حال

مشكلتي ارجو منكم حلها

قبل اسبوع حدثت مشكله بيني و بين زوجي وهي انه يعزم بشكل يومي اصحابه وعاملين معاه
انا لا ارفض العزيمه

ولاكن والله تعبت لانها بشكل يومي كل يوم
وانا ماعندي خادمه عندي طفل ومايمشي

واصحى من الظهر واتعب وانا اعبي الفطور واطبخ اكثر من خمسة اصناف

وعندما اخبرته ان يجعلها يوم بعد يوم رفض و زعل وجلس فتره مايكلمني

وبعدها تراضينا

وقبل اسبوع صارت مشكله خليت طفلي يرضع حليبه ودخلت الغرفه قبل المغرب ب دقيقه

ومديت ظهري عالسرير وكنت تعبانه جدا ومزكمه وسخونه داخليه

وجاء زوجي من برا وشاف طفلي معاه حبه منديل يلعب فيها

وخش علي بالغرفه وهزاني وانا ماقدرت امسك نفسي قلت له طيب انت داخل وشفته ليه ماتشيله منه

تعبانه ومديت ظهري شوي وقال لي من وش تعبتي من كثر طبخك
انا انقهرت قلت ليش مين الي جالس يطبخ و يغسل الصحون
ويغسل الملابس و يكوي وينظف البيت

قالي انتي بس عالواتس اب ومهمله الولد؟؟

انا عصبت مررره قلت له طيب بكره شوف من الي يطبخ لك

وسكتنا

وطلعت التمره و القهوه وفطرنا وطلع يصلي وانا صليت

ورجع وقلت له اطلع الفطور قالي مابغى

عرفت انه زعل

طبعا انا قبلها ارسلت له اني ابي ازور اهلي صارلي شهر عنهم

وهما جنبي قريبين مني

ورحت اريح جسمي وااكل طفلي وانومه

واغسل باقي الصحون وانظف و ابخر

وقلت له توديني لاهلي مارد عليه

ورجعت كررتها مره ثانيه توديني لهم

وقالي روحي بسرعه اللبسي وفكيني منك

وتخيلو حطني عند اهلي ولمن جات الساعه 2 الليل

ارسلت له تمر تاخذنا مارد
وجلست ارسل و ارسل ومايرد ابدااا مطنشنا

وصار لي عند اهلي اسبوع

لاعندي مصروف لي ولولدي
ولا عندي ملابس لولدي اخذت له بس اثنين غيار

وارسلت له كذا مره مايرد مطنشني نهايا

وش الحل اهلي اعرفو بس رفضت انهم يدخلو

احترت ساعدوووني مادري وش ناوي عليه

استلفي مبلغ من اي احد حتى لو صديقه لك دبري فيها مصروفك ومصروف ولدك واتركي زوجك لين يطيح اللي براسه ، اصلاً هو ماله وجه يحاسب انتي مو مقصره .. وما يرد ع اتصالاتك لانه مو عارف وش يبرر به غيابه وعدم اتصاله او رده عليكي.. وكل ريال صرفتيه ع ولدك خذيه منه بعدين اذا طاح الحطب .
انبسطي عند اهلك وخليه مرده يجي ويحاول الصلح.
بس انتبهي لكلامك معه وتصرفاتك لانه بيحاول يصيد عليكي غلطه او كلمه ويمسكها ويخليها سبب له يزعل عليها.

او انك تكلمين امه اتصلي عليها واعطيها السالفه من إلى
وقوليلها انك تبغين مصروف لولدك وملابس لك ولولدك . او اخ كبير له او ابوه كلمي اي احد مو معقوله يختفي كذا . يزعل بكيفه بس يجيب مصروف وملابس الله لا يهينه .

__________________
استغفر الله العظيم وأتوب إليه .. سبحان الله ..الحمد لله.. الله أكبر

الله يهدي بالك اختي انتي اجمل ويرحم والدك ويسكنه فسيح جناته
بس اكتبي لزوجك رسالة انك جايي مع اخوكي تاخدي اغراض لك ولطفلك وشوفي ردة فعله ان كان بجاوبك او لاء


بس كنت بتمنى من زوجك مهما وصلت المشاكل بينك وبينه
ما المفروض يطنش عن مصرف الطفل او حتى ما يرد على رسائلك بجلب الملابس لطفلكم

هل زوجك زعله طويل او هيدي اول مرة
حاولتي تتصلي اتصال من دون كتابة رسائل
اختي اتصلي فيه من اي هاتف ولازم تتواصلوا لتحلوا مشكلتكن
ما معقول تنحل وانتوا بعاد عن بعض
واذا ما لقيتي انو عم يتجاوب عندها لازم يتدخل احد اخوانك
اسأل الله ان ييسر لك امرك ويفرج همك
احترامي

__________________





اللهم إني أستودعك ديني و نفسي وأهلي وزوجي
وأولادي وأحبتي فاحفظهم يا من لا تضيع ودائعه

عظم الله أجرك و الله يرحم الوالد ويجعله في جنات النعيم ..

شوفي يا بنت الحلال طبيعة بني آدم ما يملى عينه غير التراب .. زوجك على الرغم من كل اللي تسويه جحدك وقال من كثر طبخك ولا بين بعينه ؟؟ هو يشوف الطبق جاهز قدامه بس ما يدري شلون وصله بهالشكل ..

نفسك إن ما عزيتيها محد بيعزك .. إن ما رحمتيها محد بيرحمك .. وإن ما عملتي لها قدر محد بيقدرك .

قبل كم يوم في موضوع لأخت تقول زوجها ياخذ معاه فطور للإستراحة وحتى ذاك مو مبين بعينه لكن قلت لها احتسبيه أجر تفطير صايم لأنه مو كل شيء عليها كل واحد بيجيب معاه أكله .. أما إنتي وضعك غيير زوجك مريح خلق الله على حسابك ! الأخوان اللي كل يوم يجوون يفطرون عندكم وين حريمهم !!! مسكين حالك والله إنتي شقيانة وحريمهم كل وحدة فيهم تتقلب في الراحة وماعندك شغالة بعد ! حبيبتي احتجي وارفضي هذا الوضع موائد الرحمن اللي كل يوم تقام في بيتك مالها داعي إنتي مسؤولة عن نفسك وزوجك وطفلك وبس !

معليش يمكن هاذي المشكلة في صالحك ومنها عرفتي إن زوجك مهما تجملتي فيه ما راح يثمر وراح يشوفك مقصرة ودام هي خاربة خاربة سوي اللي عليك بس ! عدلي وضعك وحطي النقط ع الحروف .. ولا تتصلي عليه خليه لين الدنيا ترضيه .. وإذا عندك مفتاح لبيتك روحي وخذي ملابس زيادة لطفلك وقت ماهو يكون برا البيت أكيد تعرفي أوقات طلعاته وراح تشوفي سيارته موجودة ولا لا لما توصلي .

وإذا أهلك قريبين منك لا تقطعيهم بالشهر .. خصوصا إذا هم كويسين ومابينك وبينهم مشاكل لا تدفني نفسك بالحياة عشان زوجك .. العمر يخلص وشغل البيت والكرف ما يخلص .. أسرقي وقت لنفسك . يبغالك ترجعي تعيدي أولوياتك .

__________________
فقدتك يا بعد عمري وحبي وأطهر أشواقي، فقدت أيام ما ترجع فقدت البيت واللمة، رحلتي بالفرح كله وبعدك مابقى باقي، وتركتي وحشة الذكرى تجر الروح يا يمه، يا أغلى قلب ودعني ومثله صعب أنا ألاقي، يا أروع من عن الدنيا رحل وأطهر ثرى ضمه ..💔

عجيب يفطر العاملين ... ويعمل هاذي العمله ...
واضح انه يتعمد ان لا يرد عليك ...عشان يفهمك مره ثانيه ما تعدين رغبتك بالذهاب لهم
كانه يقول اشبعي الحين عندهم ..

نصيحه نصيحه

انتي اسكتي
زوجك غلط وغلطته مو بس عليك حتى على اهلك تعتبر اهانه
انه ينزلك عندهم وماعمل لهم حساب وراح يجيبك

بس رماك عندهم
وانتي تقولي مابغاهم يتدخلوا اجل متى بيتدخلوا متى الوقت الي مفروض نعلم اهالينا

بقولك عن مره صارت لي
بس ماكنت ابغى ازور اهلي كنا طالعين مطعم

وجلس متنرفز وحايسنا ويلعن ويسب ويسخط كرهني في عيشتي
بالرغم كان مسافر قبلها اسبوع

وتوه راجع وعازمني وقام يهاوش ويسب وقال مفروض اقلعك لااهلك

قلت ترى ان نزلتني ورميتني بينفتح موضوع ثاني واهلي مابيسكتون لانه غلط في حقهم

واسرع وقال انزلي عند باب بيت اهلي
واخوي بالصدفه كان طالع يصلي وصادفناه عند الباب
وكنت اقوله ابو فلان لاتغلط اعرف اهلي

ونزلت ومامعاي الا لبسه لولدي تغييره وانا لبسي ماينلبس الا للزوج

ودخلت البيت ابكي قال ابوي هاتي جوالك وقفله
وقال الكلام ماعاد معك معي ينزلك بهالشكل اهانه لنا اذا في خاطره شي او انتي مقصره

يدق علي يناديني يدخل معك ووانا بالحق باافصل هذي عاداتنا وتقاليدنا
وزوجي يدق يدق بعد ساعتين
وابوي يقفل ويغلقه نهائي
وانا عندي دوام

قال قومي اوديك السوق والصيدليه تجيبين ملابس لك ولولدك والصيدليه خذي بامبرز وحليب وكل مايحتاج ولدك

ورحت وجبت وصار ابوي يوديني ويحيبني دوامي

وزوجي انهبل عرف ان الي سواه غلط وان الي وراي ناس ماينلعب معهم او يستهان فيهم
راسل ع جوال اخوي ورد اخوي وقال لاعاد تراسلني تبغى شي راسل ابوي

راسل جوال امي باجي اخذك واطنشششه
صار يحيني دوامي ويرسل فطور ومصروف مع العاملات وانا ماادري الا الاكياس والاغراض والفلوس

بعد اسبوع ابوي رد عليه واعطاه موعد وجاء وفهمه ابوي قال يهون علي تطلقها وتنزلها بما يحفظ كرامتنا ولا تنزلها وتتركها ماكان لها كرامه ولا احترام ولا لبيت ابوها احترام

واخذني بعد مااابوي فهمه

والى الحين عنده رعب من حكاية انزل بيت اهلي

يموت مايقولها او يسويها ولا قبل كان كل شوي يقولها

الملخص ياغاليتي هو غلط في حق اهلك

ينزلك ويرميك ولا علم اهلك باالي بخاطره
ولا يسال ولا يدق وانتي ماتدرين وش نواياه

يعني لو نزلك وانتم متفقين ع الزعل كان صح لايتدخلون
بس انتي ماتدرين

غلط غلط

خلي ابوك يتدخل بس يقرصه قرصة تاديب
لا لبس ولا مصروف ولا عبر

يا اختي هو مانزلك بالشارع عند اهلك
اذا راحت السكرة وجت الفكرة
لاتردين عليه خلي تفاهمة مع ابوك
هو شكله يبغاكي تحرمين تروحين لأهلك
حلوة ذي

وانتي مالقيتي تروحين بيت اهلك الى في هالوقت
كان اتفاهمتي معى زوجك وهديتي الامور كم يوم ورحتي براحتك
المشكله ذكرتي انك قلتي لزوجك بشوف من يطبخ لك وهذي الكلمه بالذات اعتبرهازوجك انك بتمني عليه وبعدها طلبتي تروحين
بيت اهلك واصريتي عليه وهنا المشكله
زوجك طبعا راح يقلبها براسه غير واول شي راح يخطر بباله انك ماراح تبيضين وجهه في المستقبل عند الازمات فشلتي بزوجك وكان متعشم بينه وبين نفسه ويمكن تلاقي انها اول تجربه يجربك زوجك فيها وفلشتي فيها
ايش المشكله لوطبختي في هذا الشهر الفضيل لاصحابه وهالمساكين الي عازمهم ورفعتي راس زوجك وكسبتو اجر
اصلا كيف راح يطعمو اكلك وانتي نفسيتك كذا مافيها طيب
وبعدين ماعندك شي اصلا في البيت غير طفل واحد وشوية نضافه
اعرف حريم عندهم خمسه وسته اولاد وماعندها خدامه وقبل الفطور تخرج من بيتها سفرة طويله عريضه عشان يكسبوا اجر في ناس من برى عابرين سبيل فمابالك بالاصدقاء او ناس بيدخلو داخل بيتك تحت سقفك
انتي غلطانه يابنت الحلال وزوجك معه كامل الحق لاشتمك ولامد يده عليك جاب لك كلمه في لحضة غضب وانتي خذلتيه وقومتي الدنيا وماقعديها وفي الاخير قاعده ببيت اهلك تدورين الصرفه

__________________
تمنيت حبـاً يدوم طويـلاً .. فـدام الحب وَ رحل الحبيب.

وهاللي عندهم خمسة و ستة اولاد
كل يوم يطبخون؟
كم ليلة طبختي اختي
وهل كان زوجك يقدر ذلك و يشكرك بكم كلمة؟

__________________

العزايم مره تهد

بعض الرجال يشوفها طباخه ، لكن عشان خاطره أطبخ لعزايمه قبل أجهاضي


الله يهديه و يصلح ما بينكم لازم أهلك يتدخلون خلي الموضوع بين أبوك وزوجك