السلام عليكم و رحمة الله وبركاته


ما ادري اذا تتذكروني ومشاكلي مع اهل زوجي وزوجي

الحمدلله ولدت بأول طفل لي ولي 3 شهور تقريبا والدة

بعد معاناة وتعب نفسي وجسدي شديد في الشهور الاخيرة من حملي وبعد حكاية حادث زوجي لمن كنا مسافرين

طبعا سارت مشاكل حتى وانا في النفاس عند اهلي تعبانة واللي جنني وكسر قلبي لمن اخد ولدي مني وشخط وسافر بيه على مدينة اهلو

( طبعا انا ساكنة في مدينة غير عن مدينة اهلي )
وهو لسا رضيع وانا ماخلصت اربعيني

تقريبا 3 اسابيع وهو بعيد عني ولدي اتجننت فيها طبعا ولا واحد منهم لا ابو زوجي ولا ام زوجي ادخلوا وحاولوا يصلحوا الموضوع

ما قالوا حرام رضيع محتاج امو ، محتاج يرضع من صدر امو ، سكوت فظيع من عندهم

وكان حبيبي ولدي تعبان وعندو اكزيما وقتها حتى نحنا حاولنا نصلح ونتصل على الاب يقفل السماعه في وجهه اخويا الكبير
مافي احترام ولا تقدير

انتهت المشكلة دي
الحمدلله طلعت من عند اهل زوجي ونقلت لشقة جديدة طبعا جمب اهل زوجي وهي عمارة ابو زوجي بس اخدت شقة وسكنت فيها

رجعت عادي ازورهم بس مآخذة موقف منهم ، كلامي معاهم شويا واقف اجاوب واتكلم على قد السؤال ،
بعض الاحيان انسى واكون على طبيعتي وارجع عادي ، بس لمن ارجع بيتي وافكر الوم نفسي المفروض ما اضحك كثير معاهم ، ما اتكلم ووووو

لاني تعبت منهم وحتى امي تعبت تعب نفسي وجسدي واخويا الكبير اتهان بسببهم حسبي الله ونعم الوكيل حرقوا اعصابنا

طبعا هما عادي ولا كأنو سار شي ولا هما يمثلوا ما ادري وضحك ومزح معايا واذا في شي ناقصني ومدري ايش ، بس اخته الكبيرة شويا باين تصرفاتها انها ماتطيقني ، وطز وماهمتني و عسى يطق عرق فيها كمان 😁

مشكلتي

انهم متعلقين بولدي طبعا بما انه اول حفيد في العآئلة ويحبوه وميتيين فيه من صغيرهم لكبيرهم طايريين فيه ، انا ماعندي مانع وشي حلو ماشاءالله

مشكلتي انهم ياخدوه من الضهر او بعض الاحيان العصر لحد الساعه 10 او 11 الليل وبعض الاحيان 12 وبعدين يجيبوه عندي

ودا الشي مزعلني ومضايقني مره ولدي مايقعد معايا وما اشبع منه ، يادوبك يجيبوه على موعد نوم ولدي خلاص ، يعني ما اقدر العب معاه واضحك معاه واناغيه

بعض الاحيان ترسل لي امه انها بترسل احد عشان ياخد ولدي وبعض الاحيان تحطني قدام الامر الواقع بدون ماتخبرني قبلها

اول مارجعت بيتي طبعا ماكانوا يطلبوه يعنني مستحييين 😌 لمن زرتهم قلت لخالتي ، في اي وقت وحشكم ولدي تقدروا تاخذوه وتطلبوه

ندمت على كلامي لانهم اتمادوا


لاتقولوا رضيع ويرضع مني كيف سمحت لهم لان المدة اللي اخدو فيها زوجي 3 الاسابيع طبعا اتعود على الحليب الصناعي وحليبي طبعا بدأ يقل ويجف

( طبعا دي مشكلة ثانيه واتمنى ارجع ارضعوا طبيعي وبحاول بس مايرضع الحمدلله ) 😭

والشيء الثاني اللي مزعجني تدخلاتهم واخاف دا الشي يتطور لمن يكبر واعلم ولدي واربيه وهما يدخلوا في تربيتي ودا الشي اللي ماراح اسمحلهم

مثلا ، عشان الحساسية والاكزيما اللي في ولدي ، اكتشف انهم يستخدموا كريم ثاني ليه وانا ماشية على كلام وعلاج الدكتور ، وممكن دا سبب في ان الاكزيما ماتخف عند ولدي
يروحوا للصيدليه ويسألوا الصيدلاني ويشتروه

واذا جيت اتكلم واقول لا كريمنا احسن ووو

مره ام زوجي حاولت انها تغير حليب ولدي طبعا ولدي ياخد حليب منخفض التحسس
وتبغى تجرب حليب عادي طبعا ماسمحت لها وهاجمتها بشراسة شويا بس بأدب
بعدين قالتلي صادقة دامه مرتاح على الحليب اجل خلاص ماله داعي نغير له الحليب

قد مره جلست معاها في لحظة صفا ونتكلم عن الرضاعة الطبيعية وكنت معاها وقتها صادقة واقولها كان يرضع مني طبيعي وصناعي بس كنت اعطيه كل يوم صدري
ويرضع وقد ايش تعبت وعانيت من الرضاعه والامها وكنت اقلها الرضاعه تحتاج صبر وجهد الحمدلله على كل حال وهي كانت تتكلم معي عادي وتقولي الا صادقة

بعدين الاقيها تلدعني وتلسعني وتحرجني بالكلام قدام ابو زوجي وزوجي وامها وابوها
انو سبب تعب ولدي انو مايرضع وهو ولد الرضاعة كده نفخة على الفاضي وجلست تكررها اكثر من مره وتجلس تتكلم انها رضعت عيالها سنتين رضاعه كاملة طبيعية ووووو

طبعا انا ارد عليها بس رد كأنو عادي بس ردي موجهه لها

او لمن امها تكلمني عن اشياء اسويها لولدي ، تنصحني تقوم هيا ترد وتعصب على امها لااا ماياخذ لااا هو كذا طيب ، مايحتاج

طبعا انا ارد واقول الا ياجدتي انا اسويله كذا واعطيه كذا وافعله كذا والحمدلله طيب وبخير
وهي تسكت مو عاجبها كلامي

ابغى افهمها انو دا ولدي في الاخير وانا اشوف المناسب ليه ايش اعطيه وايش اسويله
وانتي مالك صلاحية نهآئيا ،

ومرة اكتشفت انها اخدت ولدي وخرجوه راحو مطعم واخذو ولدي بدون ما ادري !!
ولا حتى زوجي كان يدري طبعا زعلت وفهمت زوجي انو هالشيء مايتكرر ، لو اتكرر راح يكون لي تصرف ثاني

وحتى ابو زوجي بس نادرا جيت اسوي او اقول يقول لااا ومدري ايش

وحتى اذا دوبهم جووو من سفر وانا مثلا مشغولة او ارفع البيت يجي زوجي يقولي يلا امي مشتاقة للولد البسي واجهزي عشان نروحلهم

اقول له طيب انا مشغولة مو شايف البيت حايس ، مو معقولة اسيب اللي في يدي واخلي الدنيا تضرب بس عشان مشتاقين للولد وانا تتعطل اشغالي عادي ، قلت له طيب بقوم اجهز الولد واروشه وارضعه ورووح لهم
وهو يزعل ليش ما اجي معاه !! ويقولي خلاص لاتطلبيني انزلك عند اهلك عشان بكون مشغول !!

او كمان انا بديت اتعرف على ناس وصحبات في مدينة اهل زوجي وكل مره بقول له اول ما اكمل بيتي راح اعزم فلانة وعلانه وصحبتي ووو
يقولي طيب كمان اعزمي امي او اعزمي اخواتي ، انا دا الشي يضايقني وما ارد عليه
ما ابغاهم يتداخلوا معايا ومع الناس اللي بديت اتعرف عليهم

كيف افهم زوجي دا الشي !

دي الاشياء اللي مضايقتني ، ابغى احط حدود من دحين كل مره ارجع عادي واخد على راسي ، دي المره خلاص اتلدعت منهم كثير ازيتهم طالتني وطالت اهلي ، ما ابغى غلطاتي تتكرر ثاني معاهم ، وما ابغى ارجع عادي معاهم قولوا حقودة ، قولوا شرانية مفترية عادي بس والله تعبت منهم وابغى اتجنبهم ، يكفي تدخلات امو قبل

معليش يمكن كلامي ملخبط عشاني اكتب من الجوال ، والله يعطيكم العافية

ليش نقول حقوده وشرانيه وانتي مأذيتي أحد وماطالبتي الابحق
بالنسبه لولدك وقت اخذهم طويل مرا
واذا انتي ساكته معناته انك راضيه
من رايي انك تصرفينهم مو دايم تعطينهم على طول
واذا اخذوه شوي بعد ساعه او ساعتين حد اقصى روحي خوذيه بدون لاتشاورينهم
واذا قالو خليه او شي قولي مشتاقة له بلعبه واطلعي خليهم يتكلمو لين يشبعو
هم اذا شافو منك حزم وفعل وثقه بنفسك وتصرفك خلاص بيحترموك وماراح يستهينو فيك
على فكره احسك محتاجه تطوير لشخصيتك اكثر انصحك تدخلي دورات اذا امكن او اقري للدكتوره ناعمه واسمعي للدكتور ابراهيم ااخليفي بتقدير الذات باذن الله بتستفيدي كثير

لا ابدا انا ماسكت ، اول وثاني مره استغربت وقلت يلا ماعليه
وبما أن دوام زوجي 3 اسابيع يغيب عني عشان الشغل
و 3 اسابيع اجازة

حاولت اذا تطلب مني الولد وترسل لي على الواتس اجهزه

اشوف الرسالة وما افتحها وما ارد الين العصر
كنت مشغولة او نايمة

اما اذا ارسلت لي احد عشان ياخذه بدون ماتخبرني قبلها
طبعا هالحركة تنزفزني اقوم ارجع الشخص المرسول
واقول غريبة مااعطيتوني خبر انكم جايين تاخذوه
ولسا ماصحي من نومه او لسا مافضيت عشان اجهزه
وقت ما اخلص ارسل لكم تاخذوه
ويروح الشخص بدون ماياخذوه

بس لمن جاء زوجي طبعا كانت ترسل لي ع الجوال انها بتاخذه
او بعض الاحيان ماترسل لي ترسل لزوجي
وحتى زوجي شاف انو هالشيء طبيعي لازم يروح
ودا الشي مضايقني احسه كأنو واجب عليا

لمن في يوم رسلت لزوجي انها ماتحب تاخذ الولد ونحنا متضايقين
طبها زوجي رسلها لا عادي مو مضايقين وعادي
طبعا قالي بعد مارسلها ، انا بكل برود قلت ليش في احد قال شي ، انت قلت شي قال لا ومشيت عنه وسكت
لاني قبلها بيوم الولد كان عندهم ولأول مره رسلت لها خالتي اذا ممكن ترسليلي ولدي
طبعا ماردت ، لحد ماخليت زوجي يروج ويجيبه ! وكان وقتها بتدخل الساعه على 12 !!

انا قلت حلو بدأت تحس وتفهم ، بس زوجي الله يهديه خرب عليا
مسك جوالي وراسل امه من جوالي انه متى بتاخذو الولد ، الولد جاهز عشان تاخذوه
بعدها غضبت وزعلت عليه وقلت لو سمحت لا عاد اشوفك ماسك جوالي ولا عاد تكرر الحركة
انقهرت وقتها انقهرت وهو سكت وماعلق
هو يبغى علاقتي ترجع بأمه واهله زي اول قبل المشاكل وانا معاهم عادي بس يبغى اكثر من كذا
بعدين فهمته انو الوضع مو عاجبني ما يمديني اجلس مع ولدي كثير يجيبوه وقت نومي ونومه
قالي طيب قوليلهم بس هو مايدخل مايبغى يبين لهم شي او ينبهم

بحاول اطور من نفسي عذاري واتغير للأحسن
بس مدري احس نفسي مو قادرة احس مهما ثقفت
نفسي وطورتها احس عادي مايبين علي

ناعمة ياكثر ماقريت لها حتى وانا بنت قبل مااتزوج


بس احس رجعت بشخصية وبقوة لهم غير عن اول
وهما عادي معي بس احس شويا اخته وامه ، لمن تجيها فرصة تبدع فيها وتعطيني ماتقصر
بالكلام او بالحركات بس من تحت لتحت

احسها بعض الاحيان تنافسني في حب ولدي او تغار تبغى تعلق ولدي فيها بالقوة
مدري ممكن اكون غلطانه

مره الولد جلس يبكي مصروع مو راضي يسكت شاله عمي وعمته وخالتي ماسكت
قمت قلت هاتي خالتي اسكته شويا واهديه اعطتني هو شلته وسميت عليه وقعدت اتكلم معاه
ضحك شويا وسكت علق عمي لخالتي بمزح بأنه نسيها وماسارت تعرف له
قامت ردت على طووول بلا وحاولت تاخذه مني عشان تثبت لنا انه يحبها ويسكت معاها ويهدأ

ااااااه يااا نعومة
الحال من بعضه
لكن من شاف مصيبة غيره هانت عليه مصيبته ... الله يعينج

خذيلج لفة في موضوعي في قسم ساعدوني .. وشوفي شو يرد علي أبوحكيم يمكن شي ينفعج

بس كل يوم من العصر لليل .. كثير
وين تقدرين تربين ؟ والا تنظمين وجباته والا تضبطين وقت نومه

انتي فتحتلهم الباب على مصراعيه إنهم يسوون للولد اللي يريدونه

تعرفين مااعرف لو بتنفع معاج هالحيل .. مع اني اشوف لازم حل جذري
- ارسلي الولد مع مرضعه حليب . ولا تكثرين ومن يخلص بيخبرونج او يطلبون . قوليلهم هاتوه ارضعه
- ان طلبوه قولي من افضى اجيبه لكم . وسيري معاه و اقعدي ساعتين وتعذري باي شي وخذيه معاج
- ممكن كل يوم عالساعه 9 تخبريهم انك تريديه .. عشان تريدي تضبطي وقت نومه .. وتحماي ردة فعلهم
- ممكن بس مااعرف من صحة المعلومة .. تقولين لهم الحليب الصناعي يزيد الاكزيما فاريد ارضعه من صدري . ممكن على بعد المغرب تاخذيه بحجة الرضاعه

بس لازم يوقف الأمر الحين .. قبل ليزيد الطين بله
وزوجج فهميه أنك أم وما تقدري تتحملي بعد الولد أكثر من نص اليوم .... تكلمي بالمشاعر

والا مرة ارسلي الولد .. و انتي بعد المغرب روحي لهم و خذي ولدج وضمييييه وسويه لقاء سنة ماشفتيه
وياااحبيبي مشتاااقتلك .. ماقدرت اتحمل بعدك وجيت لك
وانتي جالسة معاهم لا تخلينهم ياخذون راحتهم عالاخر .. خلج صاحبة القرار .. أذا سوو شي ما يعجبج قولي لا لا تعلموه جي
و ان عطوم مرضعه قولي لا ابا ارضعه من صدري . خذيه ونظفيه

حاسة نفسي أم الشر وانا انصح

لكن والله الواحد يحط كل أمله بعياله .. ويفرغ نفسه لهم .. ويريد ينجز أعظم مشروع بحياته فيهم
فكيف يقدر وهو مقيد

الحمدلله على كل حال اميرة

الله يكون في عونك
اليوم الصباح قريت موضوعك في قسم ساعدني

لاتعوريلي قلبي ، شوفيني بجاهد عشان ارضع طبيعي مره ثانية بس ولدي رافض نهائيا
يبكي بكى شديد وانا عيوني تدمع مقهورة
قريت معلومة والدكاترة خبروني ، الرضاعة الطبيعية سبحان الله تخفف من الاكزيما

ياويلهم من ربنا زوجي واهله لمن اخذ مني ولدي وهو رضيع وانا في النفاس وسافر بيه

ضحكتيني اميرة
انا ارسل ولدي بطوله بدون حليب او رضعة ، جايبيين لولدي كل شي
ملابس ، حليب ، رضاعات ، كل شي

انا بكل بساطة اقدر اقولهم بالفم المليان لاااا ، واحدد لهم ساعة او ساعتين في اليوم
مالهم شي عندي ، وقت ما اخذ زوجي ولدي مني محد منهم سأل فيا وكان قلبه علي ورحمني
، مافكروا فيني ، ولا رفعوا سماعة حتى !!وقالوا حرام، او سألوا فيني
ام ولدها يحتاجها ، يرضع منها دوبها والدة وتعبانة ، فجعوني في ولدي حسبي الله ونعم الوكيل
عشان كذا انا كمان قلبي مو كبير عشان اعطيهم ولدي كل الوقت دا
بس عارفة انو امه مابيعجبها الوضع ومابتسكت بتبدأ تتمشكل وتدخل زوجي
وانا حاليا من استقليت عنهم ووضعي مستقر انا وزوجي وحلوين مع بعض
مالي خلق لمشاكل الحريم ،


انا في بعض المواقف ببين لها انا و زوجي صاحبيين الرأي والقرار في موضوع ولدنا
ماتدخل ابدا ، هي عليها تنصح وجزاها الله خير

انا حاليا افكر انو ابدأ بالتدريج
يوم عن يوم اقلل وقت جلوس ولدي عندهم لحد ما احدد لهم ساعه او ساعتين في اليوم
انا كذا شايفة ، ؟ ايش رأيك

طيب بالتدريج .. بس أفضل حدديلج مدة .. مثلا خلال أسبوعين
لا ترسليه يومين مثلا .. يوم اطلعي مع زوحج مثلا وخذيه معاج
واليوم الثاني .. روحي اي زيارة او حديقة ولا تتركيه عمدهم والافضل ما يعرفون انج برع الا بعد ما يطلبوه

و باقي الايام .. يوم روحي معاه و اقعدوا ساعتي وروحو قولي : الولد الصغير ما يترك أموو ..وبدلع . واريد اضبط وقت نومه
وان جادلت عمتج عادي .. اصري على موقفج و خذيه

و يوم ارسليه متاخر بعد المغرب . او لاقيليلج اي حركة

وخلال هالفترة قولي لزوجك .. والله كثييير اشتاق لولدي . خاطري اشوفه . مااتحمل يبتعد عني
ما يصير كذا نفسي اجلس معاه والعبوا .

شوفي شو يصير معاج

والله انتي شكلج على نياتج ومسالمة .. مع الوقت بتطلع المخالب
أهل ريلج سووا شي ما يسوواا وانتي تعطينهم ولدج

لو مكانج ما اعطيهم غير يوم او يومين بالاسبوع مرة انا معاه و مرة ممكن بروحه ولمده محدده

الله يصبرج

بالنسبة للرضاعه حتى انا ماقدرت اكمل ترضع طبيعي وانقهرت واايد
حاولي تشفطين له عالاقل يشرب شي قبل لينشف للحليب نهائي

مع اني فاهمة انج ترديني يرضع مباشرة منج ..

بصراحة مااقدر استوعب أي صنف من البشر من ياخذ رضيع من امه
ربما يحتاجون تعاملا من نوع اخر

كيفك اميرة ان شاءالله اخبارك تكون حلوة ووضعك اتصلح
انا متابعتك

طبقت فكرتي وبديت بالتدريج بعد ماسافر زوجي لعمله
طبعا 3 اسابيع قلت اتكتك فيها على راحتي

وفعلا بديت على طول اول اسبوع كان طول الوقت ولدي معايا
لان خالتي وعمي كانوا مسافرين
وقلت لزوجي اذا اخواته حابين يشوفوا ولدي الله يحيييهم عندي في اي وقت
خفت اخواته يطلبونه وهم مايعرفوا يتعاملوا مع ولدي
وفعلا سار اللي اتوقعته لانه خالتي كلمتني ارسل ولدي للبنات
قلت لها الله يحييهم عندي في اي وقت يشوفو ولدي
عارضت ماتبغى ومصرة
قلت لها ياخالة مايعرفوا يتصرفوا لو سار لولدي شي
تقول الا يعرفوا بنتها الكبيرة تعرف وانها كانت تساعدها
اصرت عليا ومالقيت نفسي الا وانا وموافقة بقهر وقلت لها الساعه 9 يرجع ولدي
وبعد ماجهزت الولد ولبسته واستنيتهم ومحد جاء ياخذ ولدي
ماعجبهم عشاني حددت لهم وقت معين !!

وبعد مارجعوا خالتي وعمي من السفر طلبوه
كلمتني خالتي واتس تبغاه الضهر
وقلت لها ان شاءالله جايتكم المغرب انا وولدي نسلم عليكم
واستمريت على موقفي
وبعض الاحيان الاقيها ترسل لي الساعه 11 الظهر
تخيلي تاخذ ولدي !!!
ارد عليها واقولها ان شاءالله لمن اجهزه وابشري وووو
دحين ياخدوه العصر الساعه 5 او 5 ونص ويرجعوه بعد المغرب او على صلاة العشاء

مدري كيف كنت قبل اصحى من نومي اجهزلهم ولدي وكأنه اهم شي في يومي
سايبة اشغالي الباقية !!

دحين سارت تسألني قبل ماتخليني قدام الامر الواقع وتكون راسله بنتها او السواق عشان ياخذو ولدي
لانها عرفت خلاص انو راح ارجعهم لحد ما اخلص واجهز ولدي وارسله في الوقت اللي ابغاه

يارب لك الحمد

السلام عليكم ورحمة الله وبركاته ,,,
ماشاء الله تبارك الله نعومه الكريمة تطورات جميلة ،وهم يحبون ولدكِ فلا تجعلي مامر عليك يؤثر سلباً على نفسيتك ..
الله يحفظه لك .