مهره
أنا سأختار رحلة وأسوي فيها كل الاشياء اللي حارمة نفسي منها
بالتأكيد في حدود الحلال..
طبعا مهره شوفي احتياجك النفسي لشو أكثر..

.
.
.

مبتعثة ذكرتيني بأيام الطلاق
سبحان الله أنا عكسكم تماما.. أبدأ أتخلص من الأشياء من قبل فقدها
كان عندي صور لطليقي ولما نزلني في بيت اهلي قالي احرقيها
حرقتها وماترددت..
كان عندي ذكريات كثيرة ورسائل هاتفية والكترونية وصور عياله
كله حذفته قبل وقوع الطلاق الفعلي..
ووزعت جهازي كامل اللي اغلبه مالبسته
عطوارات مكياج ملابس ماخليت شي بمعنى الكلمة
صح وقع الطلاق وبقي الوجع النفسي طويلا
لانها ليست كالاشياء تتخلص منها بضغطة أو بالتوزيع..
ولكن ما استبقيتها وتخلصت منها بآلية التفريغ
اللي صارت معاي عادة!
موضوع النسيان اللي كتبته: d
انسئ الحوارات في المشاكل بتفاصيلها..
وامحي اي معلومة غير مهمة
لدرجة أوقعني في حرج مرة مع صديقتي
قالت لي راح تعمل بحث عن شخصية ادبية وشجعتها ودليتها ع المصادر
وبعد شهور اخترت نفس الشخصية
يالهوي ع الاحراج
الحمدلله عاتبتني البنت وغيرت وطلبت السماح
صديقاتي يخبروني مشاكلهم أعيشها وأبكي معاهم عقب يومين انسى التفاصيل واستبقي العنوان الرئيسي للمشكلة
مثلا خيانة.. زواج زوجها.. الخ بس

فالحمدلله لا استبقي الاشياء التي تزعجني وتضغط علي
افرغها بعون الله تعالى
وهالشي مريحني

__________________
الحمدلله الذي بنعمته تتم الصالحات

أنا بالفعل اخترت وخلاص .. وسبحان الله كان ردي سريعاً دون تفكير

بس لقيتها مناسبة أطرح السؤال على البنات

__________________


اللهم طِيبَ الأثر .. وحُسْنَ الرحيل.

فكوهة ..

انا محتاجة الصراحة نصائح عن طريقة تربية ولدي ..
راح افتح موضوع .. عشان احتاج برضو مساعدة الاخوان ..

باستفيد من كلامك فعلا ^_^

الي في عمر ولدي 7 سنوات و ما فوق ..
الصراحة ماعرف كيف أربيهم .. ماشية معاهم عالبركة ..
أعامله كأنه صاحبي او اخوي الصغير

على حسب مهره
اذا كانت التكلفه متساويه
اختار الرحله
ام اذا الرحلهزقصيره وماتكلف كثير
اختار الذهب
علشان ابيعه واسافر فيه رحله محرزه

الرحلة مدتها أسبوع .. أعتقد بتكلّف أكثر.

بس المفاضلة مب على أساس السعر الأرخص أو الأغلى .. لكن على أساس شو الأهم أو الأحلى أو الأوقع في نفسج.

__________________


اللهم طِيبَ الأثر .. وحُسْنَ الرحيل.

كلمته قبل شوية و قلت له ..
ابغى أقص شعرك و اخففه زي بابا ..

قالي ماماااااااااااااا ..
ما ابغاااااااااااااااا ..

قلت له ..
انت بنت !
حرمة زي ماما !

شعرك كذا طويل ؟
يقول لي ما ابغى اقصه أصحابي يضحكوا
و شكلي مو حلو يصير

بس بجد راح أقص له ..
لكن في اجازة الترمين ان شاءالله ..

بعد صلاة الظهر بنروح السينما انا واولادي الكبار ..
زوجي وولدي الصغير ما راح يجو معنا ..
ما احب السينما مع زوجي .. دائما يناااام

__________________
🌾🌾 ! اللهم لا تعلق قلبي بسواك .. ولا تقربني ممن لا يخافك في ! 🌾🌾

حلو.

من كم شهر رحت أنا ومهرة .. رحنا السينما وبعدين تغدينا وبعدين تسوقنا .. كثير انبسطنا .. والبنت كانت مستانسة لأن كنا طالعين بروحنا.

وسبحان الله توها من يومين تقول إنها تبا تروح السينما .. ووعدتها اوديها.


have fun

__________________


اللهم طِيبَ الأثر .. وحُسْنَ الرحيل.

مهره ردك كثير شدني
ماخفيك أحس أني أم رتيبة كثير
أحبهم وأعطيهم بس ماعندي نشاطات تشد العيال أكثر

خبريني مهره
شو انشطتج مع عيالج ؟
كيف تختارين الافلام ؟!
وتتوقعين تحب السينما بنت بعمر 5 سنوات ؟!
وتراني ماعرف للسينما
حجز مسبق ولا روح واشتري تذكرة وخلاص

__________________
الحمدلله الذي بنعمته تتم الصالحات

والله حتى أنا يا فوفو .. أحس نفسي بعد مقصرة.

غالباً نوديهم يلعبون في المول .. وفي الشتا نوديهم الحديقة أو الكورنيش يركبون سياكل .. بس بصراحة الحدايق بالذات تكون مزعجة جداً أيام الإجازات بسبب الزحمة الزايدة! .. عشان جذي غالباً ما أحب أروح في الويك إند .. أما الإجازات الكبيرة فنروح نص الأسبوع لأن الوضع يكون أرحم شوي.


من حوالي ثلاث سنوات فكرت في نادي الفروسية .. بس ما كانوا يقبلون الأولاد تحت عمر الثمان سنوات .. والحين سلطان قرّب على عشر وبعدني ما وديته!!

كنت متحمسة كثير لفكرة الفروسية .. بس هو الله يهديه ما كان مجاريني وما كنت أحسه مهتم كثير ... بس أخيراً قلت خليني أوديه من باب التجربة ويشوف كيف الوضع وبعدين يقرر إذا بيستمر أو لا.

المضحك إني لما كلمته آخر مرة عن الموضوع مهرة هي اللي نطت وقالت: انا ابا اركب حصان


الخيار الثاني هو السباحة .. واليوم تحديداً كنت أكلم ابوهم عن اجازة الصيف وقلت له عن المسابح اللي في الفنادق وإني ناوية اخذهم ونروح بدون ما أضطر أنتظره يرجع من دوامه عشان هو اللي يودينا .. ووافق.

وفي بعد الحديقة المائية .. بس بعد مضطرة أنتظر لين الجو يحمى شوي.


المتاحف ما يحبونها .. ولما ولدي يروح رحلة مدرسية إلى متحف يرجع متضايق ويقول: ملل ومب حلو!!!!



بخصوص السينما .. فهذي كانت المرة الأولى اللي اسويها مع مهرة .. وبصراحة ما كان عندي أساس معين أختار على أساسه سوى إنه يكون فيلم أطفال .. ويومها كان معروض فيلمين .. أنا اخترت واحد بس مهرة بغت الثاني .. كان فيلم بورورو .. وفعلاً طلع حلو وممتع.

بنت الخمس سنوات بتتحمل السينما إذا كان الفيلم مشوق وجاذبها .. وهذا للأسف ما تقدرين تعرفينه إلا لما تتورطين فعلاً وتدخلين القاعة .. لأنها لما راحت مع أبوها رجع متضايق منها وقال تمت تتحرقص ما تبا تيلس .. لكن معاي تمت مكانها ومتابعة الأحداث باهتمام .. ولما سألتها قالت: الفيلم مال بابا ما كان حلو .... أهم شي دخليها الحمام قبل بداية الفيلم

بخصوص الحجز .. طبعاً في الحجز العادي أبو طابور .. وفي إمكانية للحجز عن طريق النت .. سينما فوكس ونوفو وجراند موفرين هالخدمة .. بس احنا عيال أبو طابور ترا

__________________


اللهم طِيبَ الأثر .. وحُسْنَ الرحيل.