انا متزوجة من سنتين ونصف عمري 25 سنة زوجي 32 مشكلتي أني حاسة اني أنتهيت مش عارفة أعمل أيه من أربع سنين أتخطبت لزوجي عندي روماتيزم ف رجلي وهو بيشرب مخدرات بياخد ترامادول مرة كان الألم رهيب مفيش مسكن نفع معاه فهو قالي خدي ربع حباية مرة ف مرة أتعودت عليه كنت باخد حباية يوميا من ورا أهلي أول ما أتجوزنا زودت وخدت وشربت معاه حاجات تانية لحد مابقيت مدمنة باخد شريط ونص ترامادول غير الدخان والحاجات التانية بس إلا الخمرا ولا حتي هو

حاولنا نبطل كتير بطلنا كل حاجة الا الترامادول بس بقينا بناخد نص شريط بس ومازال هو بيحاول يبطل لأني مش هقدر أبطل إلا أما أشوف حل لرجلي ده غير ألم الانسحاب رهيب زي الهيروين حياتي كلها قاعدة ف البيت أنا وهو لو نزلنا نشتري حاجة او أروح لأهلي ساعة هو معايا علي طول مش بيشتغل دخله كويس إلي حد ما جالي أكتئاب من حياتي ماليش حد ولا أصحاب ولا أقدر أحكي لأخواتي يتبع

حاسة بوحدة رهيبه حاسة إني مخنوقة ومكتئبة وبموت بالبطئ تعبت من حياتي طلبت أروح لدكتورة نفسية قالي قوليلي مشاكلك وأنا أحلهالك لأنه بيقرأ في علم النفس وتطوير الذات وحاجات دينية حاولت كتير أشكيله مش بيفهمني شايفني تافهة عشان بغير أنه يتفرج علي الكليبات كل مرة يوعدني ويصدمني مش بيحس بيا أبدا اول ما أقفشه بيتفرج عليهم كنت زمان بتخانق بس بقالي فترة بسيبه وأروح أعمل أي حاجة مش بيهون عليه يصالحني وقتها بيسيبني بدموعي بحجة أنه بيستني أني أهدي وأنه بيبقي مخنوق من نفسه أكتر مني عشان ضعف وأنا بقي أولع مش مهم

كتير يسألني أعملك أيه عشان تبقي مبسوطة أقوله أقرأ ف مجال السعادة الزوجية عشان تعرف تسعدني بقاله سنة ماكملش ربع كتاب رغم أنه بيعشق القراءة وكل يوم يقرأ بس في تطوير الذات والدين ويقولي أنا مش محتاج أقرأ انا لو ظبطت نفسي وخلصت وبدأت جدولي هعرف أسعدك وبقاله سنة مش عارف يبدأ بس أهو بيحاول موقف كل حياتنا حتي الفسح لحد مايبطل أنا زنبي أيه مش حاسة معاه بالأمان رغم ان كل تصرفاته بتدل علي حبه الا عدم إهتمامه بالحاجات اللي ذكرتها وسفر أختي كمان مأثر جامد علي نفسيتي سافرت سوريا وبقالنا أكتر من أسبوع مش عارفين نكلمها فراقها وجع قلبي تعبني أوي بالذات أما أشوف دموع أمي وهي بتقول نفسي أسمع صوتها

دايما بقيت مكتئبة وببكي بحرقة وأنا لوحدي ولو زوجي وأهلي معايا أروح أبكي ف مكان تاني لأني مش حابة حد يشوفني كده وساعات قبل النوم أبكي حتي وأنا بصلي وبدعي مابقتش عايزة ولا قادرة أعمل حاجة حتي نفسي أهملتها بقيت عاملة زي العجوز محتاج حد يمسك إيده عشان يقدر يتحرك حاسة جوايا أني منتهية مستنية الموت بس مرعوبة لأني ليا ذنوب بصلي قيام الليل وأقرأ قرآن وأذكر الله دايما بس برضه مخنوقة سفر أختي سوريا ومانعرفش عنها حاجة من أكتر من أسبوع فراقها دمرني وجع قلبي أوي بالذات أما أشوف أمي بدموعها وتقول نفسي أسمع صوتها بموت من جوايا أحنا بنصلي وبنحاول نتقي الله علي أد مانقدر ولسه بنحاول مش عارفة أعمل ايه أرجوكم ساعدوني ماليش غيركم بعد الله محتاجة لكم اوي وربنا يجازيكم خير

ليه ماحدش عايز يرد عليا ويساعدني أنا عملت حاجة ده أنا أملي بعد ربنا فيكو

السلام عليكم ورحمة الله وبركاته , وحياك الله أختي الكريمه وشكرا على ثقتك ..
موضوعك متداخل ويحوي عدة قضايا , ولا أتوقع بأن حل مشاكلك عن طريق المنتديات .

- زوجك بحاجة استشارة مركز متخصص بالاستشارات الزوجيه ليحسن علاقته بك
- ولاستشارة نفسية لك لعلاج اكتئابك
- واستشارة دينيه ووعظ لزوجك بخصوص ما يشاهد
- وعلاج لكما نفسي وعضوي لإدمان المهدئات .

اسأل الله لك الشفاء وراحة البال .

مشكور أخي أبو حكيم علي ردك أنا ثقتي فيك من أرائك اللي بشوف فيها الحكمة والعقل وحب مساعدة الناس أنا بجد كنت محتاجة لرد حضرتك وربنا يجازيك خير ويرزقك الفردوس الأعلي بس أنا زوجي رافض اروح لطبيبة نفسية هو راح لطبيب عشان يبطل المخدرات بس قاله لازم مصحة وده أمر مرفوض فبنحاول نبطل بنفسنا الحاجات اللي بناخدها مسكنات مخدرات بس بقت بالنسبة لنا مسكن فقط لتعود الجسم عليها وتبطليها رهيب زي الهيروين ده معروف عندنا ف مصر زوجي بيقولي أحكيلي وأنا اساعدك ومش قادر يفهم أنه مش فاهمني ولا حاسس بيا مفكر نفسه عارف كل حاجة لأنه شاطر ف مجال علم النفس وتطوير الذات ومش مقتنع أنه عشان يسعدني لازم يقرأ او يستشير شايف إن مشكلته المخدرات لو خلص منها هيعيشني مبسوطة مش عارفة أقنعه إزاي أرجوك ساعدني أملي فيك بعد ربنا

بقالنا سنتين بنحاول نبطل أه قللنا جامد بس مابطلناش نهائي وهو موقف كل حياتنا علي تبطيل المخدر مفكرني جماد هستحمل أكتر من كده شايف أنه بيعوضني بالمخدر اللي خلاني أبطله غصب يضعف وقت مايحب ويبطل وقت مايحب وأنا أعمل زيه وخلاص ده محسسني بالذل أوي ومخليني مابصدق يضعف ويرجع يقولي أنتي مش بتقويني ولا بتساعديني اما أحكيله وأشكي دايما يرد بلوم أو انتقاد

أختي الكريمه ..
جزاك الله خيرا على حسن ظنك ودعائك الطيب , ولك بمثل .

زوجك موقف كل شيء بحياتكما على إيقاف المخدرات
بمعنى لا توقف عن مشاهدة المحرمات , ولا تحسين لعلاقته بك
ولا علاج لاكتئابك في الوقت الحاضر .
ذهب لطبيب , والطبيب قال له لا بد من الذهاب لمصحة لعلاج الإدمان
وحاولتم التوقف من تلقاء أنفسكم لمدة سنتين ولم تتوقفوا بشكل نهائي .
هو عاجز عن علاج نفسه , كيف يستطيع معالجتك ؟!
وبنفس الوقت يرفض ذهابك لطبيب ليعالجك .
أنت وزوجك تغرقان ولا بد من العلاج , وأنا لست أكثر من علما من الطبيب
الذي أشار عليه بضرورة الذهاب لمصحه .

يسر الله أمرك .