رد : ضغوطات العمل ... الاخ جذيلها المحك/ روح
شوفي الوقت اللي أعطيه لأولادي الثلاثة ، في الأيام الحالية :
- الوسطاني يصحى قبل الفجر و يصحيني .. اعطيه أي شي ياكله أو يشربه و اتركه قدام التلفزيون
يلعب مع نفسه في غرفة الألعاب ( أدري إنه التلفزيون غير صحي ، لكن مستحيل أصير مثالية
معهم 100 بالمية
) و أصلا أسمعه يقاتل نفسه ، و يلعب مع حاله .. و لو يبغى شي ، يجي يقول لي ..
- خلالها ، الصغير يرضع و أحضنه وقتها و ألعب بشعره و خدوده و هو نايم ..
ما يهون علي أتركه و أروح العمل ، فأجلس معاه أطول فترة ممكنة قبل لا أقوم اصلي الفجر
و ابدأ أجهز الكبير للمدرسة و اجهز حالي و الوسطاني ..
- اصلي الفجر ، و الشغالة تقوم .. لو عندي وقت و صاحية من بدري ( أحمم و أروش الصغير بسررررعة ..
و أغير له حفاضته و أشوف ملتهب أو لأ .. و أعمل تشييك إنه كل شي تمام و خلاص أعطيه للشغالة
مع ملابسه و تلبسه و تشيله ..
أوري لها ، هنا السريلاك ، هنا الموز و البرتقال ، هنا الشوربة ، و أقول لها لا تستني لحد ما يبكي و يجوع ..
كل شوية أعطيه كذا و كذا .. و أعرف إنه أكل مضبوط الشغالة اهتمت فيه من ( كمية اللي يخرجه
الله يعزك
)
قبل لا يجي السواق ، لو فيه وقت .. أشيل الصغنون و أطيره في السماء و ألعبه و أخرجه للحوش لو
دقيقتين عشان يتشمس و يشم هواء نظيف ..
و لما أرجع من الشغل ، أول شي اعمله .. أخده من يد الشغالة و اغسل وجهه عشان يتنشط و أرضعه
و أرقده فوق السرير ، و ألعبه .. بعدين الشغالة تاخده مني عشان ارتاح و اصلي و أشوف بقية الأشغال ..
.
.
الكبير ، لازم أعوده يعتمد على حاله خلاص .. علمته يتروش و يتحمم بنفسه .. لا يعتمد علي ..
أصحيه الصبح ، و اجهز له شنطته و ساندويتشه و مصروفه و حليب بالكاكاو ..
و أقول له ادخل اتروش ، و يصحى طبعا نعسان و متنكد ، أخاصمه و اصرخ عليه بعض الأحيان ..
بعد ما يرجع من المدرسة ، في السيارة يجلس يحكي لي عن المدرسة و عن أصحابه و عن الأساتذة
و عن حصة البدنية ، و أسأله أنا مرات لو كان ساكت .. إيش اشتريت اليوم ؟ شفت فلان ؟
الأستاذ إيش قالكم اليوم ؟ ... إلخ
ولدي هذا .. ماشاء الله بالع راديو ، كلامه كثييييييييييييير ..
مرات أقول له بس ( ايوة ، أهاااااا .. من جد ؟ طيب )
مرات لو مالي مزاج .. أقول له ( خلاص ، خليك ساكت شوي .. تعبانة ) ..
يتعبني في الأكل ، أحس إني مقصرة معاه لإنه وقتي مع اللي أصغر منه أكثر شي ..
يا دووووب وقتي معاه في السيارة و نحن راجعين ..
يساعدني في البيت الله يسعده لما اطلب منه أي شي ..
دايما أوصيه على أخوانه ، إنه يكون حنون عليهم و لا يضربهم ..
لما يناموا الصغار في العصر ، أقول له جيب الكتب و تعال أذاكر لك ..
أذاكر له في الوقت اللي أنا أكون جالسة و أخلص أشغالي حقة العمل ، أو أكون بأجهز الأكل ..
أو في الوقت اللي أبغى أجلس فيه شوي و ما اعمل اي شي ..
أخليه يحل واجب الرياضيات عالأقل ، و يكتب في دفتر ( لغتي ) ..
القران الصراحة ما يمديني أراجع له ، و ما عندي وقت ..
حريصة على مادة التوحيد و الفقه ..
و إني أشرح له الدرس قبل لا يروح حصة التوحيد و الفقه .. عشان يفهم مع الأستاذ ..
دحين صرت أخليه يصلي فرض واحد في اليوم ..
و من يومين صرت اهتم و أحرص .. و أخليه يشوفني أتواضأ و يصلي معايا المغرب ..
لما كان أولى بتدائي كنت بس بالكلام مرات ، أقول له ( متى تصلي ؟ )
( لما تصير سنة تانية تصلي 2 ، و سنة تالتة تصلي 3 ، سنة رابعة تصلي 4 و سنة خامسة تصلي كله )
.
.
الوسطاني ، متعب في كل شي ..
أخده معايا العمل ، نفطر أنا و هو سوى ،، أخليه يلعب شوي ثم أخده للحضانة ..
نرجع البيت ، أغير له ملابسه و حفاضته .. أنا أأكله ، و أجهز أكله ..
متعب و عنيد ، أحاول امسك أعصابي عليه .. يرفض إنه الشغالة تعمل له أي شي
كل شي يبغاني أنا أعمله له ،، ما يخليني أنام ، و لا أكل ، و لا شيييييييييي ..
اشتريت كتابين عشان اتعلم كيف أتعامل مع شخصيته ، لإنه المسكين ياكل ضرب مني بعض الأحيان
لإنه يستفزني كثيييييييييييييير ، و عنيد و متعب جدا .. و يعدم لي كل شي في البيت ..
كلمت اخصائية تربية و قالت لي ، هذا الطفل اهتمي فيه مضبووووووط ،، لإنه ذكي ماشاء الله
و إنه هو فاهمك أكثر ما انت فاهمته ، و الدليل إنه عارفك و عارف كيف يستفزك و إيش الأشياء اللي تشد
انتباهك له ، و قالت لا تضربيه ، و لو اهتميتي فيه ، بيكون له مستقبل رائع بإذن الله لإنه طفل ذكي جدا
ماشاء الله .. قلت لها يتعبني ، قالت لا تقولي كذا و تراه يفهممممم ..
.
.
ولدي الصغير صحي .. ^_^
بالنسبة للعمل ، أكتب إيش بأعمل في العمل .. و الوقت اللي أعطيه لنفسي ..