السلام عليكم و رحمة الله و بركاتة ..
اول شي جدا اشكر القائمين على المنتدى لاني على كثر ما دورت على قسم خاص بالمقبلين على الزواج و يكون فيه نصايح مفيدة مالقيت غير في منتداكم ..
نبدا بقصتي الصغيرة ..
احتاج نصيحتكم في عدة امور ..
في منتصف الفصل الدراسي من السنة اللي راحت تقدم لخطبتي واحد من العيلة بس من بعيد ..
امه كانت تجينا في المناسبات بس حاليا هيا نقلت برى السعودية ..
اخواته عزموني انا و اختي و مرة اخوي عندهم و اليوم اللي بعده خطبوني ..
اول ما امي كلمتني على الموضوع قلتلها اكيد لا انا صغيرة و ما ابغا ارتبط حاليا و الفكرة كانت بالنسبة لي مضحكة ..
بعدها جاتني اختي اللي اكبر مني و تحاورت معاي و انه ليش رفضت و جلسنا نتكلم كثير لمن اقتنعت شوي انه ممكن استمر في الموضوع بما انه ما رح يسير شي قريب يعني بعد سنة او سنة و نصف ..
و ردولهم بالموافقه بعد عناء طويل معي لاني كنت مترددة شوي ايوا شوي لا ..!
طيب نجي للخطيب هوا اكبر مني بتسع سنين تقريبا و انا فارق العمر ما عندي مشكلة معاه لاني من اول ابغا فارق العمر اللي بيني و بين زوجي بين 5 و 10 سنين ..عشان يكون ناضج و عاقل ..انا عمري 18 و هوا 27
النقطة الثانية راتبه قريب 10" ما شاء الله" الصراحة انا اصلا م اعرف هل يعتبر عالي ولا منخفض ، حالتنا المادية مرتفعة ججدا و لله الحمد فمدري هل راتبه يعيشني عيشه كريمة ولا كيف ..!
ثالث نقطة اككثر شي كان مخليني ارفض ولسا مني مقتنعة به اني اتزوج قبل اختي هيا كلمتني كم مرة بس برضو حسيت انها انانية مني ..


..
الشوفة تمت و الحمدلله على خير هوا كلم بابا على اساس يجي في العيد و نتعرف و كدا بس بابا طبعا رفض لاني من عيلة ملتزمة ..
و حسيت من كلام بابا انه ما رح يتم اي تعارف قبل الخطبة ..
و هنا المشكلة بالنسبة لي ، انا موافقه عليه كشكل و عيلته بس ما اعرفه و ما اعرف طبايعه ما اعرف اذا شخصيته تناسب شخصيتي انا انسانية منطقية جدا و كل شي عندي قابل للنقاش دامه مو منافي للشرع بس الشي دا ما يعجب اخواني و دايما احنا في جدالات لا تنتهي ..
اذا هوا كان له نفس منطق اخواني حيكون التواصل بيننا صعب و ينلغي كل شي من البداية احسن ..
انا ابغا اكلم بابا انه يناديه و اجلس معاهم بنقابي ومو لازم اتكلم بس على الاقل اشوف طريقة كلامه و منطقه و اسلوبه في الكلام ..
طبعا عشان اقنع بابا احتاج شجاعة كبيرة اني اتكلم مع ابوي في موضوع زي كذا و قبل الشجاعة احتاج النقاط اللي حيكلموا فيها ..
ياريت تساعدوني و تعطوني نقاط لو تناقشوا فيها ممكن توضحلي شوي نمط تفكيره ..

و اعتذر على الاطالة ..





تم تعديل العنوان ليتناسب مع مضمون الموضوع

مرحبا بك اختي العزيزة ..

يمكنك معرفة الخطوط العريضة لشخصيته من خلال سؤاله عن مجموعة امور منها :
مؤهله الدراسي الحالي، ما اذا كان يخطط لاكمال دراسته ، ماهي خططه المستقبلية فيما يخص العمل ، ما رايه في عمل المراة ، ماهو السن المفضل لزواج الرجل والمراة مع ذكر الاسباب ، ماهو روتينه في السفر ، هل يفضل السكن مع اهله
ام الاستقلال في مسكن خاص ، هل يحرص على مناسبات الاقارب والجيران ام لا وماهي اسبابه ، هل يقرا وماهي مجالات القراءة التي يفضلها ..

اختاري من هذه الامور مايمكن ان يكشف لك اهم الامور من شخصيته ..

اسال الله لك خير الدنيا والاخرة ..

__________________



احيانا يجب ان نفقد ذواتنا كاملة لكي نستعيدها كاملة ...