(هل اطلب الطلاق بسبب اختلافاتنا ؟)
السلام عليكم ورحمة الله وبركاته

اناعضوه متابعة يوميا لكم لكن مشاركتي قليله سجلت معاكم قبل سنه ونص لمشكله زوجيه أيضا وماقصرتو معاي والاخت نور الايمان الله يذكرها بالخير وقفت معاي كثير وساعدتني ..

باختصار انا محتاره جدا في حياتي وابي آراء حكيمة بتكلم باختصار قد مااقدر وعلى نقاط علشان تكون الصوره واضحه ، انا لجأت لكم بعد ما فاض فيني وتعبت جدا ماعندي شخص اشكي له ماعندي خوات وصديقاتي مااحب اخبرهم باسراري وتفاصيلي ولا لقيت تجاوب وامي تتعب كثير وتزعل .

1- انا كنت مخطوبه من شخص قبل زوجي حبيته كثير وحبني بس حصلت أمور وتركني وانجرحت جرح كبير وبعد 4 سنوات كنت رافضه الزواج تماما تزوجت .
2-تزوجت من سنتين وعمري كان 29 زوجي منفصل من غير أطفال وفيه كل الصفات الكويسه علشان كذا حاولت اقنع نفسي وتوكلت على الله .لكن من اول زواجنا خابت الامال كنت احس في شي غريب بالبدايه ظل يستهزأ فيني يحسسني اني غبيه ومااعرف شي وانا لي شخصيتي ومكانتي باهلي وعملي وبعد الزواج ب4 شهور اكتشفت انه يخوني مع اكثر من وحده وللأسف اكتشفت هالشي في الوقت اللي المفروض ثاني يوم بروح اعمل عمليه تلقيح لانه زوجي كانت عنده مشكله بسيطه بالانجاب والان انحلت خلاص وصار ممكن يصير الحمل طبيعي وقلنا خل نستغل الوقت بسبب اعمارنا يعني كنت اروح اخذ الابر وهو يتغزل وكلام مقرف جدا وحتى كلام فيني . انهرت وتعبت كثير والعمليه طبعا فشلت . اعتذر وبكي واعطا وعود وانا اعرفه اذا يوعد مايخلف ابدا سامحته لاني كنت بأول زواجي وعطيته وعطيت نفسي فرصه.
3- بعدها صار مايتقبل مني كلمه او راي او انتقاد او سؤال أي شي يقول اني احقق معاه وابي منه تقرير مفصل عن حياته وللعلم حتى لو سؤال عادي جدا كنت حاسه انه يعتقد انه انكسرت صورته قدامي وهو رجل قيادي قوي ومحترم جدا بين الناس وبوسط اهله وعمله.
4- بعدها الله عطانا ورحنا الحج وانصلح الحال الى حد ما وعملت عمليه أطفال انابيب بعد الحج وقف معاي كثير وفشلت العمليه تعبت نفسيتي اشوي بس انا قويه وتجاوزت الألم وعلى الرغم من معاناتي من موضوع الأطفال وموضوع خيانته عشت فتره في شكوك وأفكار والم لكن حاول يثبت لي انه خلاص ماعنده شي و قدرت اتجاوز هالشي مع اني خايفه جدا من المستقبل وبصراحه أتوقع منه أي صدمه او جرح،، مافي إحساس بالأمان ابدا.
5- الان اللي قتلني انه حصلت مشكله بينا بسبب انه حالته الماديه كويسه فأهله مستغلينه كثير حتى عشاهم وغداهم يجيبه لهم لحد عندهم كأنه خادم لهم وهم عايله كبيره ابوه متزوج ثنتين فمجرد قلت راي انه يعزز الإحساس بالمسئوليه عند كل اخوانه واخواته خاصه انه معظهم متزوجين الاخوان موظفين وزوجاتهم وأيضا الاخوات زعل وعصب قلت له هذا راي وانت حر وبالعكس اهلك لازم تخدمهم والله يشهد اني معاه في كل شي وواقفه معاه ومع اهله واحسب نفسي وحده منهم وهو عادي ينتقد اهلي او اخواني مااقوله شي . ظلمني وقال اني فتانه واني اكره امه وأهله وهالشي خطأ طبعا انا تربيتي مستحيل تسمح لي اني امنع زوجي يساعد اهله وامه .
6- بعد المشكله تكلمنا في أمور كثير وحصل زعل بينا وقالي كلام جدا جارح أشياء خاصه عن علاقته الخاصه بطليقته وانا من اول ماتزوجنا احس أمور كثير تصير بين الزوجين ماتصير بينا وحتى اذا اقرب منه يتحاشي يقبلني وهالشي يضايقني ويجرحني كثير والله مو عارفه من وين أتكلم وش أقول يقول انه ريحتي ما يحبها ولو تطلع حبه صغيره يتقزز وانا انسانه جدا نظيفه ومرتبه واهتم بكل شي وبكل التفاصيل بالعكس هو اللي عادي يظل يومين ما ياخذ شاور وكثير ينام حتى من غير ما يغسل اسنانه وانا مااقدر يقرب مني وهو كذا لكن ما عمري جرحته .
7- من كل هذا بديت اكرهه مو طايقه حتى اشوف وجهه ندمانه اني تزوجته كثير وابكي على حالي محتاره ومو عارفه شنو العمل انا ماابي انام معاه بنفس الغرفه فصرت انام بغرفه ثانيه حاول يصالحني اكثر من مره بس مو متقبلته ابدا وبديت اجهز غرفتي في بيت ابوي افكر خلاص اني انتقل واروح بيت اهلي مااقدر حتى اقرب منه أخاف يختنق من ريحتي زي مايقول . انا اللي الكل يمدح فيني وفي عطوري وملابسي وكل شي زوجي العزيز مو عاجبه شي فيني ولا قط مدح شي فيني .صارحته اذا ما تحبني الحياه مش بالجبر والغصب بنسحب وبتفهم .

انا اخر شي كلمته قلت له اني مااقدر في أعيش هالعيشه خاصه انه بعد شهر واشوي خلاص راح يسافر يعمل في بلد ثاني وراح اشوفه في الأسبوع يومين بس.
وزوجي كان مخلي عندي مبلغ كبير لان كنا مقررين نعمل عمليه أطفال انابيب بعد شهر بس قلت له ماابي وبرجع له اليوم الفلوس وكنا مقررين نسافر بعد أسبوع نغير جو قلت له ماابي اروح مكان وطلبت منه يلغي الحجز .


مو عارفه شنو الحل الأفضل اتركه او أحاول اصبر نفسي على هالعيشه ؟؟
(تم التعديل ليتناسب مع المضمون)

من بداية موضوعك حتى نهايته لديك مشكلتين واضحين

الاولى خدمته لاهله
نصيحه شجعيه على ذلك لانه من البر وما فعلتيه بمعاتبته هو ما جلب لكي ظنه وسوء معاملته لك

الثانيه
جرحك منه عندما قال عن الريحه

نصيحتي ووجهة نظري
الموضوع لا يستحق الانفصال
هناك من يرمي الحجر في البئر ليسمع ارتطامها
فهو يريد ردة فعل ولم يقصد الاساءه باذن الله
اي مجرد نرفزه لا تدعين شي مثل هذا يجعلك تفكرين في الطلاق

اسعي لحصول الحمل وحاولي اكثر من مره فان الله قادر على ان يرزقك بطفل يملأ حياتك سعاده ورضئ
ولا تنسين اتغيرين للطفل البامبرز عند راس زوجك حتى يعرف الريحه وقتها طبعا من باب المزح

الله يرزقك من واسع فضله عاجلا وليس آجل

ماحصل الا الخير ان شاء الله

عودته لك وطلبه الرضا منك
دليل على ان لك مكانه عنده
وحريص جدا على علاقتكم
كما انه له إيجابيات

اما عن غضبه وكلامه اللي ينرفزك
فهناك اشياء واجب لفت الانتباه اليها
الانسان عندما يغضب ، هو لايفول الحقيقة بقدر مايعمد استفزازك
والإنسان لايستطيع العيش بعيدا عن انفعالاته ومنها الغضب رغم انه يجب عليه السيطرة
لكن في ذات اللحظة ليس الجميع بقادر

اقول لك عودي،فليس الرجال جميعهم كزوجك حريص على لم شملكم وهذه ميزة عظيمة ان وجدت في شريك الحياة
جميل ان تجد انسان لا يفرط فيك

اصلح الله ذات بينكم وهدى قلوبكم وسخركم لبعض

حبيبتي اكسبي اهله نصيحه مني لك
اذكر مره كان بيطلقني زوجي وقال من محاسنك انك تعاملي اهلي وخاصا(امه) تعامل واقي جدا
مع العلم امه احبها لانها انسانه فيها دين واحب تجيني بيتي باستمرار وابر بها لوجه الله كنها امي

وان كان يبالغ مع اهله خليه انتي لك حقوقك توصلك والباقي ماعليك منه دامه ماتقبل منك النصيحة
شفي حبيبتي بالنسبه للتقبيل من الفم واسفه ع هالكلام احيانا تكون ريحه او ضرس مخرب يطلع ريحة وانتي بكرامه وماتشميه بنفسك بس الاخر يشم
كانت لي صديقه كلاس مره ونظافته يضرب فيها المثل ولاتكلمت تطلع ريحه مو صاحيه وخاصا برمضان
استحيت اقولها بس عن جد كنت انقزز لا تكلمت واحاول ما اقرب منها فالاخير حكت لي ان زوجها لايقبلها وتنجرح
وصارحتها وراحت صلحت ضروسها كانت مسببه لها ريحة فضيعه واحيانا يكون عظم الضرس فيه انفكشن مو شرط يكون مخرم
اما بشي انصحك فيه مسك الطهاره الاسود من عند عيد الصمد القرشي يقضي ع اي ريحة مهبلية وخاصا بعد الدوره وانتي بكرامه تنظفي من الداخل مره وحدة تنظيف داخلي بعد كل دوره ونقطه تحطيها لا تكثري
وبعدها يوميا من الخارج قبل الجماع بساعه او اكثر
كذالك احيانا بعض الحريم مايروشون شعورهم كل يوم وانا منهم عشان يتساقط وممكن فروة الراس تطلع ريحه اذا كان الشعر ذهني
استخدمي انجيل برفان الشعر ريحته قويه ويمسك خذيه من سيفورة
ركزي ع هالاشياء وبعدها علميني ىدايم خلي علك بنكهة النعناع بفمك وفي غسولات للفم تخلي ريحتك فرش

الله يسعدك يارب ويسخر لك زوجك

__________________
أقّسَمتِ مِرآراً وُتِكٌرآراً أنَ لآ مكَآنْ للّرحِيل بيَننا وُلكِنْ الرّحيلْ كٌآنْ أصَدقْ ...

برجع ان شاء الله ارد والف شكر

ولكن استوقفني ردك اختي أولا الف شكر يعطيك العافية والله يجعله في ميزان حسناتك

أختي انا اهتم كثير بأسناني وبأكلي وصحيه اسناني لازم مرتين تنظيف بالسنة فرشاتي والمعجون بالشنطة وعلى طول استخدم خيط وغرغره وقبل فتره بسيطه عملت تنظيف عميق للثة وشيكت كل شي اسناني تمام . واستخدم علكه وحتى بخاخ مرات .واكلي مااكل لا بهارات زياده ولا اكلات حاره بالعكس اكلي صحي وخفيف . ومرات اسوي لنفسي خلطه زعفران ومويه وماء ورد وغيره .

اما اهتمامي بنفسي فالحمد لله نظيفه واللي جارحني اني متاكده انه لا فيني ريحه ولا شي بس يمكن هو مايحبني علشان كذا ما يتقبلني ، ثانيا يااختي زوجي ما يقدر على عطور تسبب له صداع نصفي حتى الشاور جل وكريم الجسم مايحبه. اضطريت اخذ لي شاور خفيف وكريمات خفيف بالنسبه لما أكون معاه احط عطر خفيف ويحبه ..شفتي الحاله اللي انا فيها , ويجيب لي هدايا عطور واستخدمها لما بخرج بدونه ،

واللي جرحني انه كان دايم يمدحني ويقولي احب ريحتك الطبيعيه من غير عطر واذا مااحط أي شي لا كريم ولا عطر لو امر جنبه يقولي أي كذا ابيك من غير عطر . واذا يسافر ويرجع اول شي يسويه يجلس يشمشم فيني ..

جلس يرسل لي من الصبح واتفقنا انه نجلس مع بعض ونتكلم قالي اكتب كل شي حابه أقوله وأتمنى جد يتفاعل معي وما يجلس صامت كعادته ..

ادعولي ابي ارتاح مقهوره احس داخلي يغلي من القهر ومو طايقته ودي اقتله

ماتوصل للطلاق ان شاء الله

بس اعتقد ان كرة الزوج للعطور و خصوصا من زوجته له سبب

ممكن زعلان منك بشيء و مايبغى يستثار
ويطنشك
او عنده حساسيه بالانف او الصدر
او عنده خيانات
ماادري يااختي ماابغى اشكك فيه بس
انتي شوفي ايش السبب
وانه يقولك ريحتك مااحبها
اتوقع اكثر شي عاجبه ريحتك ونظافتك
ويبغى يشكك في نفسك
قريت عن نوع من الرجال المقاوم
مايبغى الزوجه تسيطر عليه
و يعيبك بافضل شي فيك
واكثر شي جاذبه
ويقاوم جاذبيتك او حبه لك
اتوقع زوجك من هالنوع

كنت انتظر ردودكم بفارغ الصبر

بس مالقيت تجاوب عموما الف شكر ويعطيكم العافيه

وبعد مااتكلم مع زوجي ونتناقش راح اخبركم بالتفاصيل وأتمنى منكم ردود حكيمة رجاءا

خلاص لا تتعطرين
اذا هذا الحل
لان بالفعل كثير عطور تسبب صداع و صاحبتها ترشرش منها
وبعضها قوية مثل عطور بعض المحلات ماحب ريحتها
اهتمي بالنظافة واتركي العطور

__________________