الضعيف لا يغفر، فالمغفرة شيمة القوي.
أما انا يا خاله بيتا ، فاعاني اني ومثل ما يقولون بالعامي" اذا أقفيت ما أعود"
خاله بيتا" أسامح واسامح واسامح لغاية ما أوصل مرحلة يقول لي قلبي فيها بس كفاية عذبتيني، بعدها ما عاد أسامح لين ادخل القبر ، وهذا ثاني اكبر عيوبي
ليش ما سامح سالت نفسي ولقيت الجواب في شي واحد" اني لما انجرح منهم ما اعاتبهم، ولا أزعل ، ابلع وامشيها، رغم انهم يدرون ومع ذلك لما يشوفون ردة فعلي كذا يطنشوني، وتتكرر الإهانات ، لغاية ما اصل مرحلة وانفجر واخسرهم لرضاي وباقتناع تام وما اندم عليهم، ولا افكر في يوم من الايام ارجع لهم او يرجعون
الناس اللي اتكلم عنهم مو صديقات او زميلات او أقارب بعيد ، لا يا خاله بيتا ، الناس قريبين مني
اختي قطعتها من 9 سنوات وماني ندمانه ولا افكر ارجعل لها
أخوي قطعته من سنوااااات، وجرحه لي بل خذلانه لي ما يمسحه الا قبري ، أخوي هذا أعلنتها بوجهه ووجه امي اني متبريه منه ليوم الدين وما أتشرف بأخوته وجرحه يا خاله ما يمسحه شي لدرجة اكتب لك الحين ونزلت دمعتي
زوجة أخي كانت صديقة عمري، والآن ما يعنيني وجودها في حياتي وعالمي
من كثر صدماتي صرت انتقي اصدقاءي بدقة شديدة جداً جداً، وكل الناس عندي ما يهموني!
زوجي احاول افهمه هالصفة فيني، وكم مره اقوله" ترى بيجي يوم ممكن تخسرني للأبد، فكن رفيقاً بي او على الاقل خفف جروك لي خاصة انك تشوفني شخصية صامتة"
وفي حياتي الكثير اللي حطيت عليهم x ، وغصباً عني يا خاله ، والله العظيم غصباً عني
الليلة كانت اخر ردة فعل للناس قررت الغيهم من حياتي، وبالفعل طلعوا قبل شوي مصدومين!
على فكرة يا خاله بيتا ، ما اتلاسن مع احد ولا اتلفظ يعني باختصار انا شخصية هادءة جداً جداً، ومو شاطرة في الرد في المواقف ، لكن اذا وصلت حدي اصبح لبوة مجروحة وشرسة وهذا نادر جداً ما يحدث!! لكنه في النهاية يحدث !!
لا تقولين يا خالة بيتا اني ضعيفة، لاني ما احس اني ضعيفة ، ووالله الذي لا اله الا هو ان بعضهم ما زال يحاول معي بالرسائل عشان ارجع او أسامح حتى لكن حتى ما ارد، انقهر لاني كنت بين يدينهم سهلة لكن كانوا يشوفون تحملي لاساءتهم ضعف،
اللي تضايقني مو في اللي طلعتهم من حياتي، لا، اللي مضايقني هو اني ودي انفجر وأخذ حقي اول بأول عشان ما أوصل لمرحلة الطير اللي اذا اطلقه صاحبه يحسبه بيرجع، انا ما ارجع ما ارجع لو شيصير .
وين المشكلة؟ وخاصة اني مقتنعه باللي سويته وما اتغير،
الحياة عندي اما ان تكون صادقاً معي او وجودك اريح لي
افضفض يا خاله بيتا فلا تقسي علي