السلام عليكم ورحمه الله وبركاته

اخوي البليغ واختي سيده الموقف بعد ثقتي في الله عز وجل اثق في ان لرأيكم بالغ الاثر في نفسي
ترددت كثير في أن ابث شكواي لكن الله وحده من يعلم ماحل بي ..

راح اتكلم بالعاميه لبساطتها ولكي يصل المعنى بشكل اوضح ..

ماادري كيف ابدا بس بكتب اللي في بالي وممكن تسألوني اللي يخطر ببالكم ويوضح لكم مقصدي

حاليا انا لي سنتين متخرجه وجالسه بالبيت تخصصي ممتاز وانا طموحه جدا اعطيت ملفي لزوجي يبحث لي عن عمل ولا اهتم لي كان يكذب علي في انه يبحث لي واكتشفت انه مايبحث لي طنشت الموضوع وسبحان الله جتني فرصة تدريب في مستشفى كبير وانا ماسعيت لها طبعا مااقدر اوصف مدى فرحتي فيها وخصوصا كنت هالفتره مكتئبه جداا طبعا استشرته ووافق مباشره بدون تردد قلت له تدريب وبدون راتب ولمدة شهر فقط قال مو مشكله براحتك ..

طبعا المستشفى على طريق دوامه جيت قلت له اذا رحت من بيوديني قال انا طبعا لانك ع طريقي مره فرحت لان ودي اقرب منه اكثر لما بدأت اباشر التدريب تجهزت وجيت قلت له توديني قال لا روحي مع السواق اصلا انا غيرت طريقي وهذا الطريق زحمه انصدمت منه قلت طيب هذا اول يوم لي تعال معاي وشوف الوضع جلس يضحك قال ماتبين اتدرب مكانك روحي مع السواق وهو محرمك اصلا انا مو خروف اودي واجيبك

طبعا والله مافيه بينا شي يستدعي هالكلام انا بصراحه رديت عليه قلت انا بنت رجال ولاني بحاجتك ولابحاجه سواقك محرم لي انا اقدر اوقف كلا عند حده وعيالي هم محرمي والله لايحيجني لك لا اليوم ولابكره وطلعت وانا زعلانه مره ...

رحت للدوام طلع مختلط مره التدريب واللي يدربني واحد لما جيت اول يوم كل البنات اللي معها ابوها واخوها او زوجها عجزت اتحمل الموقف لما دخلت باوراقي بلحالي والله بكيت لين خلاص تدمرت كان صعب علي هالموقف حسيت اني امشي بدون ملابس الكل اكلني بعيونه يمكن انا من القهر حسيت بكذا تمنيته معاي ويوريهم انه مهتم وانا احس بالامان اكثر بعد

رجعت اليوم الاول ولاسالني وش صلحتي ثاني يوم قال كيف دوامك قلت حلو ويدربني واحد والمكتب فيه ثلاث موظفات وموظفين قال كويس اذا اعجبك الدوام عطيني اسم اللي دربك او مسؤول التوظيف وانا اتوسط لك انك تتوظفين عندهم ،،، ولا حسيت بكلامه اي غيره او خوف علي وخصوصا اول مره اتدرب واول مره ادخل مكان مختلط كذا

المساله طبعا ممكن يجي في بالكم ثقه لكن هي للاسف ماهي كذا وعندي كذا موقف حصل لي ..

مره كنا طالعين انا وياه لموعد عندي بالمستشفى وانا لبسي نقاب وعبايه عاديه ولااحط مكياج لاطلعت او اتكلف باليوم ذا لبست نقابي عادي وزي العاده وهو دايم يقول تلثمي وتظبطي لاطلعتي لاتمشين جنبي كذا وامشي زين بثقل ..
طلعنا وخلصنا الموعد قال بجيب اغراض ل اهلي من السوق قلت نزلني بالبيت وعقب روح كنت مصلحه عمليه وتعبانه قال لا تروحين معاي قلت اوك وقفنا عند الاشاره وكان فيه زحمه مره قطع نقابي من وجهي قال ياتكشفين ياحطي لثمه انا حسيت انه مو رجال الناس جنبنا قلت حرام عليك يطالعون الناس فينا جبت لنا الشبهه قال بلاش تخلف ورجعيه حطي لثمه

تلثمت وكنت معصبه جينا عند السوق وقال انزلي وحلفت ماانزل وزعل مني قلت لايمكن امشي والناس تناظر فيني كذا انا مااحب الفت نظر احد قال اصلا مااحد درى عنك انتي تفكيرك قذر ..

وحاجه ثانيه دايم كل مشاويري مع السواق حتى لو انه موجود اطلع مع السواق وارجع براحتي ولايدق ولايدورني احيان اكون بااستراحه مع خوالي يدق علي يقول خلي السواق يرجع ابيه بشغل وانتي تعالي مع اي احد ..

انا ماادري هو مايغار هو مايحبني عشان كذا ماهمه هو مسحور ولايعي بتصرفاته؟؟

سبب اني حاطه احتمال السحر ان زوجته على مشارف الستين وكبيره مره واذا طلعت لو رايحه مكان قريب عند البيت ماينام ولايجلس لين تجي ويواصل معها بالجوال ويخاف عليها ويرفض انها تروح لااستراحات بعيده وانا اصلا مايسأل وين رايحه

سبق وناقشته قلت خاف ربك فيني ودور علي تراي بذمتك لاتضيعني قال انا بعطيك حريه قلت ذي ماهي حريه دق ع السواق وشوف وينه حسسهن انك وراي

والله كلا طمع فيني السواقين نظراتهم لي تخوف المحلات اللي حوالي البيت حفظوني انا اللي اخلص اموري كلها المستوصف اروح له السوق اغراض عيالي كل شي شغل الرجال اقوم فيه حتى اذا خرب شي عندي يدق علي يقول البسي عبايتك واطلعي دخليهم ولاخلصو حاسبيهم

تحطمت وصرت اخاف ع نفسي من الحرام ماهو مبرر لي سلوكه لكن احس بالنقص وربي احس كانه يعرضني ع الرجال مقهوره نفسي احس انه يخاف علي

اذا طلعت اروح وارجع 11 او 1 كلها مثل بعض ولايدق ينام وهو مايدري انا فيه ولا لا ؟؟

واذا سواقي مو فيه ولاتعبان وقلت له بطلع قال خلاص دبري نفسك شوفي اي سواق وروحي
انا لو ذي شخصيته مع الكل كان بقول انسان واثق ولاهو فاهم الدنيا كيف الحين ماشيه ويحسب الكل ع نيته
لكن المصيبه انه بس معاي انا

بناته يدورهم وحرمته ينجن اذا تاخرت ولايسمح لها تنام خارج البيت لااي سبب انا انام عند اي احد عمات جيران اهلي خالاتي واتوقع لو بقول بنام عند صديقاتي مايمانع؟؟
اذا تاخرت برى البيت يقول بدال ماتجين وتتعبين السواق نامي ويجيك الصباح

تكفون ابي حل ؟؟

وعندي حاجات ثانيه نفسي اتكلم فيها ماتخص الغيره بس تراكمات لحاجات قديمه جالسه تنهش فيني الحين

معلومات عنه

كبير
عاقل لايدخن ولايشرب ولااي حاجه زي كذا
متزوج
عيونه زايغه مايفوت اي امرأه تمشي من جنبه
يحب يدخل فجاه اذا فيه حريم عشان يشوفهم تقريبا اغلب جماعته حافظ شكلهم والكل يعرف بطبعه القذر هذا
علاقات مالاحظت عليه اي شي
يشوف افلام بس من فتره ل فتره
مرح في بعض الاحيان
مسوف وماسك من ناحية الماده
يصلي ويصوم بكثره مايفوت قيام الليل ولاالسنن ابداا
كثير الكذب والاهمال في امور البيت
حنون وحساس
متعلق في عيالي مره ..
من كلامه ونظراته احسه يحبني مره بس افعاله ماتساعد
اي استفسار انا حاظره

حابه اوضح نقطه زوجته كانت علاقتها فيه سيئه قبل مايتزوج عليها طبعا الشاهد كلامها وكلام الناس وكلامه هو شخصيا
كل هالاطراف بما فيهم هي متفقين انه كان مجننها ولايسمع لها كلمه

هي تبرر حاله اول انه مسحور من امه وخواته وانه انفك السحر عنه بعد ماملك لي بكم شهر
امه وخواته قالو ان زوجته ساحرته وهي سبب مشاكلهم ونكدهم لان خواته اغلبهم حياتهم مشاكل ووحده من خواته على مشارف ال40 وتطلقت ثلاث مرات وكل الامر يكون الشبهه على زوجته
اول طلاق ل اخته راحت زوجته تودي هدايا لبيتها وترتب اغراضها وبعدها بيومين طلقها
ثاني طلاق راحت وزارت اهل الولد ونفس الحكايه طلق اخت زوجي
اول حالتين كانت قبل زواجي واقرت زوجه زوجي انها فعلا راحت لااهل اخت زوجي وكلها تصدف انها تتطلق وهي تحلف انها مالها صلاح في طلاق اخته
ثالث حاله كانت قبل 7 شهور اخذت اخت زوجي مهرها وقضت وتحدد الزواج وصارت الملكه قبل الزواج بخمس ايام وكانت في بيت زوجي وتحت اشراف زوجته

وجيتها وكانت خايفه وزعلانه قلت وش فيك قالت اخاف تتطلق ويتهموني بعد ويقولون حطيت لها شي ولا اني انا السبب قلت وش يخوفك قالت لاني انا اللي سويت قهوة الرياجيل وزوجي شافني وبالعاده اللي تسويها الشغاله قلت ماعليك منهم اذا انتي على نياتك ربي بينصرك

وقبل زواج اخته بيوم اعتذر الرجال وقال انه تعبان وبالمستشفى وقال بنأجل الزواج وتم تاجيل الزواج ع اساس انه تعبان وبالاخير طلع كذاب ولاهو تعبان ولاشي وقبل كم شهر تطلقت؟؟!!

انا مااتهمها بشكل مباشر تصرفاتها جداا مريبه واهل زوجي اخواته سبق وطلبو مني لبس لزوجي ولبس لي وقالو نبي نحسن علاقته فيك ونفك عنه عمل زوجته ؟؟!!

انا احترت منهم كلا يتهم الثاني بالسحر وكل وحده تحلف انها ماسحرته

انا مسكت زوجي وقلت ياخي انت قد صار معاك شي غريب كلا يتهمك بالسحر قال ابدا انا بعد ماملكت عليك بكم شهر كنت اصلي العصر وطلعت من المسجد وحسيت بنفضه قويه ودوخه وتمسكت بالجدار وحسيت بشي نزل مني يعني زي احد كان جواي وطلع يقول حسيت اني خفيف كاني بطير يقول ورجعت لبيتي وكاني اول مره اشوفهم وندمت على كل لحظه قسيت معاهم فيها قلت طيب يعني ايش تتوقع هاللي جاك

قال يااما خواتي كانو ساحرين لي عشان اكره حرمتي وعيالي وانفك او فيه واحد كان حاسدني علي كل شي وكان امس متوفي وبذاك اليوم صليت عليه الظهر وجتني هالحاله العصر

قلت طيب يمكن زوجتك مسويه شي قال لايمكن تمشي بالطريق ذاا؟؟

انا محتاره في امري ولاادري هل صح اني اربط حياتنا ومشاكلنا بالسحر او غلط كذا وسوست ياعالم

غير كذا بيتي اللي جهزه واشرف عليه زوجته واثاثي كان كله اثاث بيتها بس ملبس اقمشه ثانيه وكانت في بيتي يوم زواجي العصر لانها كانت تبخر زوجي وتلبسه وبيوم زواجي الساعه 1 كذا جانا عشاء مع ولده من بيت اهله طبعا كل هالامور اكتشفتها منه بس بعد زواجي بسنه قالي عن كل شي بس طبعا هو ماهو شاك في شي ابد

انا نقلت لبيت جنب اهله ومن سكنته فيه حمام( اعزكم الله) فيه ريحه كريهه كسرناه ورجعنا صلحناه الا ان فيه ريحه لاتطاق لدرجه قافلته ولايمكن افتحهه كانها ريحه حاجه معفنه او شي ميت

ماادري احيان اشك فيها واحيان ارحمها واحسها مسكينه

انتظركم بفارغ الصبر مليت من وضعي..

:*
أختي الحبيبة فرج الله همك وأعانك وقوى من عزيمتك:
غاليتي شاكرة ومقدرة لثقتك بي وأريد منك الإجابة على بعض الأسئلة إذا تكرمتي:
*كيف هو وضع زوجك وأسرته من الناحية الدينية فما قلتيه لايبشر بالخير
هل بناته وزوجته يغطين وجوههن...؟! أم يكتفين باللثام ..؟!

*هل زوجك من النوع المتحرر...؟!

*ماهو الفكر الذي يتبناه فبعض الرجال للأسف لديهم نوع من التحرر في كل شيء
فهل هو من هذه الشاكلة...؟!

لأني لم أستطع أن جمع بين كونه كثير النوافل والصلاة وبنفس الوقت عديم الغيرة ومطالب
بما يخدش الحياء وغير غيور على محارمه.!!

:*
وهناك نقطة أخرى أنتِ غاضبة وحانقة منه ولذلك بدأت كل مساوئه تتضخم في عينك
وأريدك أن تنظري له بعين الإنصاف وتنصفيه تماماً
أي نعم مقصر لكن لاتنجرفي تحت ميكرسكوب تضخيم العيوب فيزادد نفورك منه وبغضك له
وتقعين في دوامة عواطفك النافرة وتتركين الإحتكام لعقلك

:*

__________________

بصراحه انا فعلا كل ماتعبت اكثر كل ماشفت عيوبه بشكل اكبر انا متاكده انه مو سئ لدرجه لايمكن اني اعيش معاه فيها
لكن انا مظغوطه من اسلوبه
اول طلب شوفي موضوعي اللي كتبته تطلقت،،، واحكمي على اخر مشكله بينا..

اما من ناحيه التحرر بقولك شخصيته واحكمي..

هو معاي انا تحديدا احسه يبي يثبت للكل اني زوجته واني صغيره وانه هو زيه زي الشباب يعني زوجته كبيره وحرمه واضح عليها بعد اكبر من عمرها هو يبي بالعربي يكشخ فيني ..

ماادري هل ذا له دخل بالغيره او عادي هالوضع يعني اقوله الحين انهم حطوني مع واحد يدربني على العمل توقعته بيزعل او يحذرني اقل شي
قال والله شوفي مصلحتك وين وامشي وراها وبعدين مو ماكلك اللي معاك ...

اما من ناحيه زوجته ف هي ماشاءالله متفوقه بالستر ومحتشمه في لبسها مالاحظت عليها شي بالعكس احترم حشمتها واتمنى اكون مثلها
بناتها الصغيره عادي بس متاثره باامها بشكل واضح تحاول تحتشم مثل امها..

الكبيره بعمري ومتزوجه تكشف مع السواق وتطلع وتشتغل مع رجال وتطلع رحلات تبع العمل بلحالها مع رجال وزوجها مايعرف وابوها زوجي يعرف وراضي تمام الرضى..

يعني من باب يقول مابي اكتمها لو ماخليتها تاخذ راحتها قدامي بتخربط من وراي..

انا ماكان معاي كذا اول سنه كان يحذرني من اني اطلب من البقاله بلحالي ويقولي انتبهي وتراه خطر

الحين اطلع واروح واجي واتكلم قدامه في المحلات واطلب واحسه ماهمه ابد لدرجه شككني انه مو زوجي عادي عنده كل شي ..

ماادري هل هي ثقه زايده ولامتحرر مافهمته او مسحور من ناحيتي مايحس تجاهي بشي

انا سبق وشرحت لكم ان اهله امه واخواته طلبو مني اساعدهم بسحره ورفضت وانهم يتهمون زوجته بسحره وهي نفس الحكايه تتهمهم انهم سحروه وزوجوه عليها..

انا خايفه ومحتاره ناس عندها السحر سلق بيض ويشكون في بعض وهو وضعه يشكك مع الكل كويس الا معاي انا..

والله انه معدنه نظيف وطيب ويصلي ومحافظ جداا على القراءن وحافظ احاديث كثير ويقوم بالليل يصلي ويدعي من تزوجته مانام ولاليله عن صلاه الليل وكثير الصدقه بس معاي لسانه بذيء ومايزعل يهاوش ويرمي كلام زي السم ويرجع يضحك ويسولف كان شي ماصار لدرجه اشك بعقله انه مو طبيعي..


انا تعبانه نفسيا وهذا الشي خلاني كثيره الجدال معاه ولان اللي نزعل عليه مانقفله وانا اكره هالحركه يعني احب انه اذا غلط يعترف ويغير رايه وهو ابدا مايعترف بغلطته عنده انه يجرحني وينكد علي وعقب يضحك وعادي الوضع هو يشوف ان هذا اعتذار..

انا شخصيتي عكس كذا اذا زعلت منه احب انا نتفاهم مانسكت ونمشي الموضوع اذا مشيته وجت مشكله ثانيه اصير لسه بموضوعنا القديم واجلس اجادل باللي فات

مو حقود بس مااعرف انسى بسهوله..

انتظر ردك بفارغ الصبر

وانتظر راي اخوي البليغ...

:*

شوفي حبيبتي بقولك شيء وأبغاك تفهمينه زين
المرأة الحرة والشريفة وبنت الأصول تحافظ على نفسها وماتنتظر من أي رجل لازوجها ولا أخوها
ولا أبوها أنه يحامي عنها أ ويحافظ عليها ..لذلك وبما أنك حره وبنت أصول أقول لك لاتنتظري منه غيره
أو محافظة ومدام هو معطيك الضوء الأخضر فتأكدي ألف أنه واثق فيك وعارف هو متزوج من...
والرجال ذكي مو غبي شايف أنك بنت رجال وماينخاف عليكِ مو مسألة عدم غيره بس مسألة أنه
متزوج وحدة مو محتاجه من يعلمها أو يحرسها لأنها عن مية رجال

وهذه تعتبر نعمة عظيمة ...ياعزيزتي البيوت تتدمر وتخرب والرقاب تطير بسبب الظن السيء
في الزوجة والشك وعدم الثقه بها
لدرجة أن البعض حابسها ومانعها من كل شيء وحاطها تحت المجهر ليل نهار
لذلك لاتخربي حياتك وتغيري طبع زوجك فيصبح شكاك ويضيق عليكِ وأنت خليك محافظة على
نفسك وعلى سترك وحشمتك وتعاليم دينك وإذا طلب منك أمور تغضب الله مثل الكشف وغيره
لاتطيعيه

أما حكاية السحر ومالسحر فزوجته مثلك غافلة وإلي ينخاف منه هو ذآك الذي يطلب منك
الملابس وخلافه لعمل الأسحار لهذا خذي حذرك من أهله وخليك حريصه وأدعي لهم بالهداية
وحاولي تنكرين هالمنكر بطرق غير مباشرة ولاتؤذيك بحيث تنصحين أخواته نصيحة غير
مباشرة أما بكتيبات أو تأخذينهم معك لحضور محاضرات بهذا الشأن

أما تعامله السيء معك فمرده والله أعلم إلى كونك ربما كثيرة الجدال ولاتعرفين كيف
تتعاملين معه بطريقة ذكية وهادئة وتستغلين أنوثتك وفتنتك وصغر سنك في جعله
يتعامل معك بلطف وهدوء ويلبي لك ماتريدين

وهناك نقطة :ربما لاتعرفينها
الرجال لايعتذروون أو لنقل معظم الرجال لايعتذرون عن أخطائهم وغالباً العلاقة الخاصة
عندهم = أنا آسف وحقك علي
لذلك تعلمي مفاتيح هذا الرجل وأكسبي قلبه

:*

__________________