السلام عليكم ورحمه الله وبركاته

اخوي الصغير عمره 14 سنة ماعمره ذاق طعام صحي أعتقد طوال حياته
وأنا كأخ كبير دائماً يومياً أعطيه محاضرات صحية بشتى الأساليب ولا نفع معه !
ينصت ويقول طيب ولا يسوي شي !
ان سمع ان الاكلة هذي صحيّة على طول يتقرف منها وهو أصلاً ماعمره ذاقها !!!!
ان سمع ان الاكلة هذي مضرة يستانس وياكلها
وجهه كله بثور وحبوب ورؤوس سوداء وهالات سوداء والعيون مائلة الى الاحمرار شوي
نحيف جداً وبالنسبة لطوله فلي يقربون له الي بسنه كلهم اطول منه
باختصار مظهره غير صحي من فوق لتحت
ويكره البيض والتونة والفواكة والخضراوات واكلات كثيرة صحية وهو ماعمره ذاقها !!

احسه مو طبيعي
هل يعاني من مرض ؟ وهل يحتاج الى التشخيص عند الطبيب ؟
وش الحل معه عشان ياكل زين وينتبه لصحته تعبت معه ؟

عندي ولدي الي عمره خمس سنوات .. زي كذا ما ياكل شي ..
الصراحة .. بديت اخلي ابوه يغصبه عالاكل .. لو يشذوق الاكل اول مرة عالاقل
لدرجة انه ممكن ابوه يضربه و انا ما اتدخل ..

تعبني و مستحيل يذوق اي اكلة .. و لو ذوقته يبكي و يستفرغ الله يعزك
و يهرب و يعمل مناحة

صرت اخلي ابوه يلطشه و غصب عنه ياكل ..

اول مرة من اسبوعين بديت معاه كذا .. عمل ولدي حركات و كانه بينخنق و يستفرغ
و صياح و بكا ..

ابوه لطشه .. و بعدها صار ياكل و هو ساكت ..
ما استخدمت سلاح ابوه و ضرب ابوه له غير بعد ماتعبني و دخلناه المستشفى كم مرة
عشان ياخد مغذي من اانحف كان يتعب ..

.
.

بس اخوك كبير ..

مافي غير انه امك تجبره عالاكل .. وتمنع عنه المصروف او الخروج ..
و انت شوف ايش يحب اخوك و اعمله له كمغريات عشان ياكل اي اكلة صحية

الوجبه مع العيله محفز لكل الأبناء حتى ياكلون من الأكل الصحي ... الجمعة ووجود على الأقل 2 أو 3 من العائله على السفرة يتشاركوا الوجبه شي يفتح النفس لأغلب الناس
حتى حفيدي اللي عمره لسه ما صار سنتين تختلف شهيته للأكل لما ياكل لحاله عن لما نكون معاه ..
نقعد بالساعة والساعتين واحنا كل شوي نعرض عليه الأكل ويرفض ويسوي مثل ولدك يا عصاميه يستفرغ ويبكي .. لكن بمجرد ما نحط الكل لنا ونجلس ونبدأ ناكل يجي هو يطلب ... صحيح انه مرات يتأخر وما يطلب الا لما نكون تقريبا خلصنا ( نفسه عزيزة الأخ ) لكنه بالنهاية ياكل بإرادته وبشهيه .

أخوك يمر بفترة مراهقة أخي صاحب الموضوع فتقدر تستعمل معاه أساليب تحفيز تناسبه ... هو أكيد يهتم بأن يكون بمظهر رجولي وجسم قوي .. ولو ما كان كذلك فألخقه بأحد نوادي الرياضه وراح تلاقي أنه المدرب أقنعه بكل سهوله بفائدة الأكل الصحي لأنه بيضرب على الوتر الحساس واللي هو عضلاته وقوته ومظهره كرجل .

ابني عمره 16 سنه .. صحيح انه جسمه وضعه ماشي حاله لكن ما تقدر تعتبره من ذوي العضلات ولا كان يحب الأكل الصحي ولما التحق بنادي الرياضه رجع لي يطلب بروتين ولحم وحليب وموز ... لكن خلك حذر وشوف النادي قبل يروح أخوك وتأكد من انه المدرب ما يشجع على البروتينات الصناعية والمواد اللي يستعملوها بعض الرياضيين لتضخيم حجم عضلاتهم

__________________

اتفق مع الأخت الغالية بيتا في كلامها كله وعن تجربة عندنا في البيت نظام وجبة الأكل لما تنحط لازم كل العائلة تجلس على السفرة حتى اللي نايم واللي مريض لازم يقوم ياكل وكمان الأكلات الخفيفة قبل الوجبات عندنا ممنوعة مافيه شئ اسمه تصبيرة كل شئ قبل الوجبات ممنوع بسكوت كيك شيبس فطيرة سندوتش ممنوعة كلها لأنها مثل هالأشياء هي اللي ماتخلي الطفل ياكل ويتغذى زين وانا اعارضها بشدة قبل الوجبات لاكن وقت العصرية مو مشكلة يقدر ياكل الطفل اللي يبغى او مثلا طلعنا برى نتمشى اسمح لهم ينقنقوا شوية واشتري لهم الأشياء اللي يحبونها وياكلونها بوقتهم ويلعبون ومايجي وقت الوجبة إلاوهم جيعانين واحط لهم الوجبة وياكلونها وانتم اهم شئ بالنسبة لأخوك هي اللمة على الأكل والجلوس مع بعض وكمان منع المشروبات الغازية وقت تناول الوجبة استبدلوها باللبن افضل وصحي لكل افراد العائلة وكمان لاتخلونه على كيفة ياكل وجبات سريعة بإستمرار او شيبسات ومقليات واندومي احس ان هاذي الأشياء مافيها فائدة للجسم بالعكس تضعف شهية الإنسان للأكل وكمان خالية من جميع الفوائد وضررها اكبر على صحة الإنسان اخوك ماشاء الله تبارك الله في عمر واحد من اولادي ويفهم انصحوه وفهموه ان الأكلات اللي هو يفضلها تجلب له الأمراض وخلوه يطلع بنفسه على اضرارها الصحية حتى يقتنع خوفوه قولوا له بكرة بتمرض من هالأشياء اللي بتاكلها لا سمح الله فائدتك في صحتك وبدنك

عندي ولدي كان يحب مشروبات الطاقة والغازيات اشترى علبة مشروب طاقة وجابها للبيت وشربها وبعدها انا اخذت منه العلبة وقلت له إقرأ وش التحذير اللي مكتوب عليها عليها تحذيرات كثيرة واقنعته ان هذا شئ يأثر على صحته واستفسرت في النت عن اضرارالمشروبات الغازية واالطاقة وطلعت بلاويها ومشاكلها كثيرة والحين الحمدالله ولدي اقتنع وتركها من حاله بعد ماعرف بأضرارها واستبدلها بالمشروبات الطبيعية انتم فهموا اخوك بالضرر اللي راح يصير له بسبب اهماله للأكل الصحي واقباله على الأشياء اللي تضر بصحته حتى لو اضطريتم تعرضونه على طبيب اخصائي تغذية وتشرحون له حالته ووضعه وهناك الدكتور راح يوضح له اكثر وش بيصير فيه اذا ما اهتم بالأكل الصحي والمفيد وان شاء الله انه راح يسمع كلام الدكتور ونصايحكم ويتبعها بعون الله وربنا يصلحه ويهديه بالنسبة للحبوب اللي بالوجه والله انا كمان اولادي عندهم هالمشكلة واحد عمره14 سنة والثاني 15 سنة وديتهم لدكتور اخصائي جلدية واعطاهم كريم وصابونة يغسلون فيها وجيههم ويحطون الكريم بعدها هو صح خف شوية بس ماراحت الحبوب من وجيههم باقية على خفيف بس هما كمان ماشاء الله تبارك الله وزنهم زايد حبتين وافكر اسجلهم بنادي رياضي على شان وزنهم يخف لأنه احتمال الحبوب تكون بسبب زيادة الوزن لأنها تخف وترجع واحيان تختفي فترة وتطلع مرة ثانية ما ادري هي بسبب زيادة الوزن او حساسية من بعض الأكلات او هو حب شباب الدكتورشخصه حب شباب

الله يعيننا عليهم وعلى مراهقتهم متعبة الحين هم بحاجة لإهتمامنا ورعايتنا اكثر نسأل الله لعيالنا وعيال المسلمين الهداية والصلاح يارب.

__________________
جمال العقل بالفكر
وجمال اللسان بالصمت
وجمال الحال بالإستقامة
وجمال الكلام بالصدق




اشهد ان لا إله إلا الله وأن محمد رسول الله

جميل منك هذا الرقي وأن تهتم لأمر أخيك وتفكر بمصلحته

هذا الفتى ليس بصغير سن
وطالما أنه لم يقتنع فلن يحرك ساكناً
بالإضافة أن التغذية السيئة وضعف البنية ونقص المواد الغذائية اللازمة تجعله يستمر في هذا الطريق وينفر من الوجبات الصحية
وسبحان الله الوجبات الصحية والتغذية الجيدة والإهتمام بالصحة تقوم بنفس العمل وتنفر من الأغذية الرديئة

أرى والله أعلم أن أخاك يحتاج لطبيب مختص في الحال ليعمل له الفحوصات اللازمة ويتدارك ما يمكن تداركه ويصف له بعض المكملات العذائية اللازمة للترميم السريع في هذه الفترة
ويضع له جدول غذائي مناسب لحالته
المهم الإنضباط مع الطبيب

وفقكم الله