:*

بقول لك شيء بسيط:
كل البنات إلي كانوا يشتغلون ويكرفون في بيوت أهلهم بعد الزواج يكونو ستات بيوت ناجحات
وبيوتهم تلق من النظافة وشغلهم وطبخهم تمام التمام ورجالهم مبسوطين ومنبهرين فيهم

وأغلب الدلوعات في بيوت أهلهم حدهم شهرين ثلاث وبعدها تبدأ تطالب الزوج بخادمه
وبيتها غير نظيف والطبخ ماتدبره وأنواع الإحراج مع الرجال وأهله وأمها بس تطبخ
وترسل لها
وزوجها تلاقيه كاره الساعة إلي تزوجها فيها

فأنتِ حددي أي نوع تبغي تكوني...؟؟

وما أنكر فيه دلوعات بس بعد الزواج طلعت مواهبهم وكانوا قد المسؤولية بس نادرات

:*

__________________

حبيبتي الام تبي بناتها يعتمدون على النفسهم ترها راضيه عنك من داخل قلبه بس الامهات كذا وانا وحده منهم
صدقيني بتدعين الامك اذا رحتي ان شالله لبيت زوجك وان شالله يكون في اقرب فرصه
في بيت اهلك بينتقدونك بس ماتكونين محرجه من شي زين والا شين بس بيت الزوج لا
اعتبريها دوره تدريبيه وبالمجان
والاهم تريحين امك وهذا من برك فيها
لكن مشكلتنا في الاجازه ماتدرين من اللي صاحي واللي نايم المطبخ محيوس طول اليوم نبطشيات
بس الله يهدي الجميع
على فكره البيت اللي مافيه بنات كنه قبر ماله طعم
الله يخليك لامك ويخليها لك وتفرح فيك عن قريب

__________________
سبحان الله وبحمده ..سبحان الله العظيم

يابعدي أنتي
تراني أعرف كل شيء الحمدلله من كنت صغيرة يدي بيد أمي وهي معترفه بعد
ودي خواتي يتحركون من دون ما أقول لهم يعني يحسن على دمهن شوي.
أمين يأرب. أبشري أحب لك على راسها تسلمين يالغالية

__________________
ما نال أحدٌ من الفضلِ في مالٍ أو جاهٍ أو علمٍ شيئًا بكسب يده، لكن الأمر كله لله، يُقدّم من يشاء بفضله، ويؤخّر من يشاء بعدله.

أهلين خيتو سيدة الموقف.
نفس كلام أمي وتتواعد تقول غير ربي يرزقك بواحد يحب الطبخ لأنك ماتحبينه.
ماعندي مشكلة أطبخ بس لو أحد ينظف بعدي ياسلام ، أما أطبخ و أنظف هذا والله تعب ،أحس الطاقة استهلكوها ،ودي بخواتي يساعدوني من غير أمر وتعاهدات

__________________
ما نال أحدٌ من الفضلِ في مالٍ أو جاهٍ أو علمٍ شيئًا بكسب يده، لكن الأمر كله لله، يُقدّم من يشاء بفضله، ويؤخّر من يشاء بعدله.

الإجازه نعمه لمن يحسن إستغلال وقته

ونقمه لمن يذهب وقته دون الإستفاده منه


سهركم للصباح شي أكيد يظايق الأهل

على الأقل للفجر

وأهم شي تستغلون وقتكم بالفائده

وشغل البيت بالعكس يشغل الوقت

وأنصحك لاتتظايقين من شغل البيت وربي راح تعرفين قيمته بعدين

الله يهدي الجميع

__________________
الله يصبرني على فراقكم يا أهلي
الله يجمعني معكم بالقريب العاجل

طبعاً بالأول و الأخير يهمني رضا أمي.
أبشرك مريحتها الحمدلله.
حالياً أمي مسافرة والله جنوني مائبون يساعدوني و إذا هاوشتهن
مافيه احترام خاصه أختي إلي بالثانوي ملسونة '؛ شكيتها لابوي قال تعجبني كبرتها
اليوم صراحة ماتحملت ضربتها و أخذت الجوال منها وحلفت ماتمسكه.
الله يصلحهن وترجع أمي بالسلامه.
مشكورة خيتو على دعواتك بارك الله فيك.

__________________
ما نال أحدٌ من الفضلِ في مالٍ أو جاهٍ أو علمٍ شيئًا بكسب يده، لكن الأمر كله لله، يُقدّم من يشاء بفضله، ويؤخّر من يشاء بعدله.

حبيبتي هل ترانا نلتقي وانا اختك والله في الإجازة اكثر الناس

جدولهم ينحاس صراحة انا وعيالي قبل الإجازة كان نومنا منظم

وكنا ننام باليل ونصحى على آذان الفجر نصلي وخلاص ماعاد فيه
نوم حتى بالظهرية والعصرية ماعاد ننام الا زوجي ياخذ له بعض الأوقات غفوة اما انا وعيالي مواصلين إلين بعد صلاة العشاء

العيال يروحون يصلون العشاء وانا اصلي واجهز لهم عشاهم ونتعشى ونحط روسنا هلكانين

لاكن والله ما يأذن الفجر إلا ونحن مصحصحين ونشيطين وتحس انك شبعان نوم
ونصلي الفجر ونجهز الفطور ونفطر وكل واحد فينا يشوف شغلته

لاكن من يوم اقبلت الإجازة انقلبت الآية نسهر في اليل الين يأذن الفجر ونصلي ونفطر ونحط روسنا نوم

واعدل الساعة على 12 الظهر واصحى واقوم عيالي لصلاة الظهر وانا وياهم في هوشة علشان الصلاة هم بينامون وانا ابغاهم يروحون يصلون احيان الكبير منهم لو سمع الآذان ماشاء الله عليه يصحي إخوانه الباقين ويروح يصلي

وانا كذلك اصلي الظهر وادخل المطبخ اجلس اتأمل فيه شوية وافكر وش اسوي غداء
ولو قررت وش اطبخ ابتدي اجهز الغداء لأن زوجي يجي من دوامه متأخر حدود الساعة 2 ونص وبعد الغداء على البيت تنظيف وترتيب وهم الشباب كل واحد يشوف له شغله يساعدني والله مايقصرون معاي بس فيه شغلات ماينفع تضبطها إلا الأم

وبعض الأوقات عقب صلاة العصر انا انام شوية وهم كمان الين يأذن للمغرب ونصحى بس والله تصحى راسك تحسه بينفجر نوم العصر احسه يجيب المرض

ايام الإجازة تنحاس خصوصا لو جاء احد يزورك او يسهر عندك او حضرت مناسبة تلاقي امورك تتخربط

وكمان لأن ماعندك شئ تقضي وقتك فيه في الصباح تضطر انك تنام ولو نمت في الصباح مايجي اليل إلا وانت مفلل نوم

وخلاص تتعود على كذا احيان يكون عندي مواعيد للمستشفى الساعة 9 الصباح والله إن اكثرها اكنسلها وانام

اما انتي بالنسبة لشغل البيت حاولي إنك ترتبين امورك من بدري

وكمان اخواتك كل وحدة فيهم تاخذ لها شغلة معينه تقوم فيها

يعني وحدة في الكنس والترتيب والثانية فيها الغسيل والثالثة

تغسل المواعين وترتبها والثالثة تساعدك بالطبخ يعني وزعوا الشغل بينكم حتى تخلصون اشغالكم بدري وبنفس الوقت الشغل مايتراكم عل ظهر وحدة منكم

شفت اعمامي اهل زوجي كذا بناتهم ثلاث وحدة منهم عليها الفطور والشاي والقهوة والثانية عليها طبخ الغداء وغسل المواعين والثالثة تكنس وترتب وتغسل الملابس وتنشرها وتصلح لهم العشاء
وماشاء الله عليهم متساعدين مع بعض وعادي اذا كل وحدة منهم حبت تاخذ دور الثانية او تتنازل لها بشغله من الشغل اللي مكلفة فيه متساعدين ومتعاونين والله يوم اروح عندهم إجازة
انهم مايرضون اني ادخل معاهم للمطبخ او اساعدهم بشئ
بكل كلفة وبحلفان عليهم لو بغيت اشتغل معاهم شغله

دائما يرفضون يقولون كفاية عليك اولادك وتعبهم رغم ان عيالي كلهم كبار ماعندي غير البنات صغار

كمان لاتنسين ان الإبن الكبير دائما في وجه المدفع لو فيه اي شغله مانعرف ننادي إلا على اكبر واحد
انا والله قد جننت سلطان لو بغيت اي شئ يجيبونه لي لو كل اولادي عندي مجتمعين ما انادي عليهم هما لا على طول بس ما اعرف غير ياسلطان جيب كذا وشيل كذا وحط كذا وروح محل الفلاني خلاص تعودت والله ماعاد اقدر اغير الطبع هذا كثير اوقات اناديه بعدين اتذكر وانادي على اخوه

يعني انا ام واقول لك لاتواخذين امك ترى والله انها ماتقصد انها تتعبك او تثقل عليك لاكن تعودت عليك صارت ماعاد تعرف تنطق إلا اسمك وماتكلف بالشغل إلاانتي ولا ترى هي تتمنى ان كل بناتها يشتغلون ويتعلمون لطبخ والترتيب والأمور السنعة
الحين حتى لو الله كتب لك بنصيب وتزوجتي وطلعتي من عندها تلاقينها تقول لأخواتك انتم غير عن فلانه اختكم فلانه كانت احسن منكم وتسوي كذا وتعمل كذا وطبخها حلو وترتيبها نظيف ومنسق ليش ماتتعلمون مثلها تلاقينها تمدح فيك وتثني عليك وعلى شغلك وكل شئ تسوينه

فلا تتضايقي ولا تحطي في خاطرك هاذي امك وتحبك و من زود حرصها عليك تبغاك تتعلمين علشان كذا تشد عليك

وترى كل اللي انتي الحين تمرين فيه من شغل وكرف وتدريب ترى الدور جاي على اخواتك
كل وحدة منتظرها دورها عند الوالدة الله يحفظها لكم ويخليها ويطول بعمرها يارب

وصراحة احي امك باين عليها انها ماتحب تدلع البنات وتخليهم
على راحتهم علشان كذا اللي بيتزو ج عندكم محضوض وامه داعية له
وعسى الله يوفقك ويرزقك ابن الحلال وتفرح فيك امك ونفرح فيك احنا اخواتك في المنتدى يارب ياكريم .

__________________
جمال العقل بالفكر
وجمال اللسان بالصمت
وجمال الحال بالإستقامة
وجمال الكلام بالصدق




اشهد ان لا إله إلا الله وأن محمد رسول الله

أهلين و سهلين بنور العين.
أجل الحال من بعضه ؛ صدقتي الحر ومع الحر مافيه أماكن نروح لها.
أمي الله يردها بالسلامة مسافرة برا تحكيني تقول أصحى من 6 الفجر و أنام 9 مساءً.
طلع الخمول والكسل بس بالبيت. ماتنلام حر ومافيه شيء يشجع.
رحمته سلطان والله ؛ ماشاءالله عليه أكيد بيساعدك بس لابد ينقهر من أخوانه تلقينه يقول ياليتني آخر العنقود. * قولي تحسبين الناس مثلك. هههه.
دائم أمي انتي غيرك خواتك مو مثلك وش أسوي !!
يمكن هذه دعوة خوالي تقول أمي كانت ولادتي قبل الفجر وبالشتاء و خوالي يحبون أمي
وكانوا عارفين أنها رايحة للمستشفى تولد " تقول مجتمعين ويدعون يقولون وقت مستجاب
يارب ترزقها بنت وتساعدها لأنها كانت بيت عايلة .
لا يابعدي مو متضايقة منها ، متضايقة من خواتي ماابي أمي تزعل وخاصة انه على قولتها حاسدين عليهن و مايدرون أني تعبت عليهن ؛ ياحظك عندك بنات !!
كنت أتمنى نقضي الصيف بشي يفيدنا دنيا و آخرة اقترحت عليهن نرجع حفظنا للقرآن وأشرح لهن بعض الأحكام. أبوي نبهني قال حرام تكتمين علم و أقرب شيء أهل بيتك.

ألف شكر أم سلطان ردك وتشريفك يسعدني والله وخاصة ماشاءالله ردودك الله يقويك ويكتب لك الأجر. ومشكورة على دعواتك. أصلح الله لك النية و الذرية.

__________________
ما نال أحدٌ من الفضلِ في مالٍ أو جاهٍ أو علمٍ شيئًا بكسب يده، لكن الأمر كله لله، يُقدّم من يشاء بفضله، ويؤخّر من يشاء بعدله.