حبيبتي يا موهبة .. اتمنى انج بخير وصحة وعافيه ..

اسمعي حبيبتي .. اذا شفتيه يراسلها .. على طول اشغليه بأي شي .. روحي اجلسي على رجله واخبريه
عن موضوع يجذبه .. يعني مثلا زوجي يحب مواضيع السيارات لو مشغول باهم موضوع بالدنيا بيتركه ..

ناديه وفاجئيه بكعكه لو كاب كيك مكتوب عليه اسمه .. واحضنيه وقولي له كلام حلو ..

وهو يراسلها اطلعي من الغرفة او المكان اللي هو فيه وارسلي له وقاطعيه برساله مكتوب فيه ( احبك ) بعدها
( فديتك ) وانتي تضحكين كأنها مزحه ... واذا طفر قولي له وانتي تضحكين ما دام انك عندي فأنت من حقي وبس
وكيفي اسوي اللي ابيه ( بـــــدلع ) ..

اذا فيج صبر .. انشغلي عنه افتحي النت على لقطات مسرحية او فيديو فكاهي واضحكي ولا كانه هامنك ..

حبيبتي هو ما يهتم لتعبك لانك يمكن كنتي تخلصين امورك بنفسك .. وتعتمدين على نفسك في كل شي ..

نقطة ثانية ومهمة ..

ما دام ان زوجك يحب عياله ... استغلي عياله بالخير طبعا .. علميهم امور مثل : بعض السور القرآنية القصيرة
بعض الادعية والاذكار البسيطة .. علميهم يبوسون راس ابوهم اذا وصل البيت ..
علميهم ينادونك ماما .. وعطيهم الحب علشان يحبونك وزوجك اكيد بيلاحظ هالشي .. زوجك يشوف انه ام عياله
ما تقدر على التربية ولا يأمن عليها في تربية عياله .. فاثبتي له انك الافضل في التربية واخلصي النية لله عز وجل
فمنها تكسبين اجر ومنها تكسبين قلب زوجك ..

مري على بعض من مواضيعي اللي فيها افكار لقضاء وقت مع الزوج والاطفال في البيت وخذي الفكرة وحاولي تطبقينها

وانصحج حبيبتي اذا لقيتي وقت تمرين على موضوع لغة الجسد واتمنى تلقين الفائدة ..

ربي يوفقج ويسعدج ويفرج همج يارب

وارجع واقول لج .. ريحي عمرج وحطي بالج على صحتج
اهتمي بتغذيتج وبالتمارين وقيام الليل والصدقات بمشاركة زوجك والعيال بعد

اذا بتفكرين لو لحظة بتفهمين ان ما في شي يسوى هالتوتر والزعل ... يكفي ان ترضي الله علشان يرضى عنج الكل
ومثل ما قلت لج قبل الزوج ما بيطير .. فاهتمي بنفسج ولاحقة على الزوج خليه على هالحال لأن بالاخير صدقيني
بيمل فلا تتركين له مجال ينفر منك حبوبه ..

ما عليه يالغاليه .. انتي متوتره الحين علشان جذي ما بغيتج تبدئين اي خطوة لين تولدين بالسلامة فالحمل يتعب
النفس والجسد ... اصبري النتيجه ما بتي بين يوم وليله ... نعم انا معاج شي فعلا يقهر .. لكن هذا مب طفل حبوبه
بتسحبين عنه الموبايل .. لازم تسايسينه ... موهبة اذا ما تقدرين لا تضغطين على نفسج ... ركزي على نفسج
صدقيني بيمل وانا ااكد لج .. وبتجين روحج وبتخبرينا انه مل من الوضع معاها .. باذن الله
وحاولي تطبقين الطرق اللي ذكرتها لج ..

اما العيال فهذا طبع كل العيال حبوبه .. ما يشبعون من اللعب فحددي لهم وقت .. عندكم مثلا 15 دقيقه بنلعب فيها
وبعدها خلاص ... خليهم يسمعون ابوهم الاشياء اللي يتعلمونها علشان يعرف الفرق اللي بينك وبين امهم ..
اذا تضايقتي وايد من تصرفه كلميه حبيبتي وعبري بس بهدوء وجديه كلمتين واتركيه

وارجع اقول لج سوي اللي تقدرين عليه لان الوضع ما يساعد انج تضغطين على نفسج وارجوج لا تنسين الدعاء
في قيام الليل عن تجربة والله انها مثل السحر .. واكيد نحن معاج ... ربي يوفقج ويسعدج حبوبه ..