بسم الله والصلاة والسلام على رسول الله

اولا احب اعرفكم على نفسي انا من سكان الرياض وموظف والحال مستور
العمر 27 وواوصف نفسي بعد التجربه اللي راح اذكرها باني متعجل في الامور بشكل غريب جدا
انا خطبت وحده تقرب لي من طرف الوالد الله يحفضه ويخليه لنا ذخر انشالله وقبل مااخطبها كنت حاط للمراأه بشكل عام تقدير كبير في نفسي ولازال هذا الشي موجود ولله الحمد وكنت كل ماافكر في الزواج اعاهد نفسي على اني ارضي الله في زوجتي ولاابخل عنها باي شي لامن ناحية مشاعر او من ناحية حب ولامن ناحية جنس او من الناحيه الماديه او غيره.
وكنت لما اتكلم مع الشباب في الدوام يسموني الحبيب ويسموني عنتر زمانه
وكنت حاط صوره للزواج ومغلفها بقلب احمر
طبعا اثنين من الشباب في الدوام متزوجين وانا عزوبي وكنت كل مااتكلم عن موضوع الزواج واني مستعد اوفر لزوجتي كل سبل الراحة والحب والحنان كانوا يضحكون علي ويقولون راح تندم بعدين وراح تشوف كلامنا بعد سنه وحده من زواجك او بعد شهر العسل وكنت اطنش كلامهم واقول انتم ماتعرفون تحبون
المهم هذا ماهو موضوع طرحي

الموضوع اني كلمت اختي تخطب لي وحده جميله وهاديه ومن ناس طيبين
وهذا اللي حصل
خطبت لي بنت بنت عمي وهم ناس طيبين ولاراح احصل احسن منهم
بعد الكلام اللي انتوا عارفينه والاسئله عني
قالوا البنت موافقه وامها موافقه بس شرطت البنت انها تشوف صوره لي وشرطت اني مااكون بخيل او عصبي
صورت وارسلت الصور شافت خشتي واعجبتها
وقالوا خلوه يجي مع ابوه يخطبها ويشوفها اذا بتعجبه او لا وهذا اللي حصل
رحت انا والوالد وخطبناها من ابوها وقال الديباجه اللي عارفينها هل هو يصلي عطني رقم مديرك في الدوام وراح سال عني في المسجد
وفي نفس اليوم دخلت اشوفها طبعا دخلت انا واخوها اللي هو اقدر اقول صديقي في العزايم دايم سواليف انا وياه
وكان زعلان مره ومتضايق اني بااشوف اخته مع الذكر انهم من عائلة محافضه جدا
ودخلت وكنت منحرج جدا جدا وشفت البنت واعجبتني
وسالتها سوال وهنا بدت معاناتي الحقيقيه وعذابي اللي اسال الله ان تكون نهايته قريبه
السوأل كان بعد ماسالتها كم سوال عن الدراسه وعن متى تبغى يكون حفل الزفاف اذا الله كتب نصيب
وسوألي كان " عندك اسأله تبغين تسأليني عنها " وكنت متحمس للاجابه عن اسألتها
وتفاجأت بانها قالت لا
قمت والتفت على اخوها وقلت له لطف الجو اشوي قال هاذي اختي وهاذا فلان اللي ازعجتونا فيه (يمون)
المهم انا استحيت وقلت يله اجل نطلع قال يله وقمت بسرعه ابي اطلع مع العلم اني لابس شراب وبيتهم رخام وبغيت اسفط على وجهي بس الله ستر
ولمحتها بطرف عيني تغير وجهها وكشرت " تحسب انها مااعجبتني "
لحقني اخوها على طول وسالني ان شاء الله اعجبتك وبتتزوج عليها
كل ذا خوف اني اشوف اخته ولااتزوجها
المهم قلت اكيد اخت فلان وماتعجبني كبر راسه
من بكره دقت امها على اختي ونفس السوال تساله ودقت اختي وكنت توني طالع من المسجد مصلي الجمعه
واجبتها بنفس الاجابه اكيد اعجبتني وقالت اكيد تبيها قلت ايه اكيد ابيها
من بكره اتصل علي ابوها وانا في الدوام وقال لي الحين انت شفت البنت اعجبتك ولا لا
قلت اكيد اعجبتني
هنا بدا ابليس يلعب في عبي
قلت البنت فيها شي ومو مصدقين اني ابغاها
وسكت وماقلت شي
بعد فتره بدا الاتفاق على المهر والزواج ومتى راح نحدد الملكة ومن خلافه
صارت مشكله بسيطه على الزواج ومن راح يتحمل التكاليف وكلمني ابوها وهزاءني شوي على موضوع الدراهم
وقلت له انا مستعد لكل شي تطلبه
جا وقت التحليل ومتحمس رايح من الساعه 6 الصبح للشميسي وقلت لابوها اذا انت مشغول انا برجعهم فرحان بتركب معي قال لا لا ويوم حللنا وتطاقيت انا وواحد في المستشفى جاي الساعة 8 ويقول انا اول واحد جاي هنا وعندي شغل مشوني قبل الناس وهو ماجا الا متاخر والباقين ساكتين وانقهرت ونطيت في حلقه وقلت ماتروه
ماتروه = ماتروح
المهم ماراح ومشوني ثاني واحد
الزبده يوم خلصت وطلعت وفصخت الشماغ ودعست متوجه للبيت قام ابوها دق قال ماودي اثقل عليك بس رجع البنت وامها للبيت
طبعا بيتهم في الجهه الثانيه من الرياض من بيتنا طبعا مو من المستشفى
ماصدقت خبر كنه قايل لي خلاص خذها وادعس بيتكم
المهم رجعتهم واول ماركبت ماسلمت حتى وجلست اسولف انا وامها شوي واحنا راجعين في الطريق سمعتها تقول "يمه شكله يسرع "
ونزلوا ورجعت وانا اشاهق من الفرحه
تحددت الملكه وكان يوم جمعه في وسط ايام الدراسه "وقتهم بايخ"
ويوم دخلت جاي اول المعازيم وابوي الله يهديه فضيحه قلبه على لسانه مثلي
قال قدام ابوها "انا قايل له اننا تونا مبكرين لاكن الله يهديه مطلعنا ذا المخروش "
انا وجهي ماقمط ابد وابوها يناظرني ويضحك وانا وجهي كنه طماطه مقسومه نصفين
المهم جو عمانها وعيال عمي اللي هم خوالها وجدها وانا اخواني كلهم مسافرين يدرسون ومافيه الا اخو واحد
وفرحان فيه
المهم تملكت وانا كنت جايب لها هديه اي باد وتعليقه وحاطها في كرتون حق الهدايا وكنت ناوي اعطيهياه بعد مااتملك يعني بعد ماتهدا الامور ويلهون في العشاء
مادريت الا ابوي منادي اخوها اللي كان مكشر وقال له اقول شف فلان يبي يعطي اختك هديه رح خله يدخل
انا اقول في نفسي مايجي واحد لابس حزام ناسف ويحضني وافتك
المهم دخلت ويوم دخلت صراحة شفت بنت ثانية غير اللي شفتها وكانت مستحيه مره مره مره ومن قوة الحيا صارت تنفخ لانها مسكينه ماتدري وشلون تتصرف
انا خفت قلت وشذا اللي تنافخ واخوها الشاطح استحى وقام وقلت في نفسي هذا اللي مكشر اثرها مهجدتك
اني واي
انا يوم جلست معها اشوي مو اعجبت فيها الا حبيتها ماشالله الله يحفظها ويخليها لي
حبيتها من قلب مع انها كانت تنفخ بس اعجبني كل شي فيها شكلها وسواليفها وتفكيرها وطريقه ردها علي
المهم خذت رقمها وعطيتها رقمي وقلت لها اتصلي علي باي وقت قالت اوكي
مر اسبوع ولااتصلت قلت خلني اتصل عليها
اتصلت ردت سولفنا اشوي وسكرنا
جا بكره مااتصلت واتصلت انا ونفس الشي دردشنا وسكرنا
استمر الموضوع الى يوم الثلاثاء اتصلت عليها وهي كاانها ماهيب ملهوفه علي مجرد انها ترد
جا الاربعاء انا تضايقت قلت شكل عندها علم او انها مغصوبه على الزواج او انها تحب لها شخص ثاني
وابليس ماقصر انواع التهيئات
قمت وارسلت لها على الواتس اب رساله وكنت معصب وماثمنت كلامي وجرحت البنت
اشوف في الواتس اب وقت دخولها وخروجها ومسكينه كانت تدخل وتطلع كل خمس الا عشر ثواني تحتريني اكتب شي
وهي مو عارفه ترد ولاعارفه تتصرف
بعد ماارسلت لها كم كلمه قاسيه قفلت ورحت العب بلاي ستيشن
يوم جا بكره الا ابوها متصل على ابوي ويتكلم في موضوع الدراهم حقت الزفاف "يجس النبض عند ابوي هل انا قلت له ولا لا"
نسيت اذكر ان مكالمتي الاخيره لها اللي كانت يوم الثلاثاء قلت لها انا بعطيك قلبي بس لازم تصونينه واهم شي عند اهلك
وفهموا الشي هذا على انه اختبار لها وهل هي راح تقول لاهلها عن مشاكلنا او لا
يوم صحيت الخميس دخلت على الواتس اب وبكل برود كتبت لها انا اسف وماكان قصدي اني اقولك مثل هذا الكلام واتصلت عليها وقعدت تبكي وتقول انت جرحتني
انا مااتحملت بغيت ابكي معها وقلت لها من اكون عشان انزل دمعه من عينك وكنت والله جاد وطالعه الكلمه من قلب
المهم راضيتها وقلت لها انا ابغا اجي اشوفك الحين قالت اوكي وبعد مامسحت دموعها الغاليه قلت لها بااخذ هديتك واجي
مريت محل الذهب واشتريت لها ساعه ب 2500 ريال
وتوجهت لبيتهم
دخلت الا البنت عيونها حمرا من البكاء والله اني خجلت من نفسي بشكل ماتتصورونه
ومااعاد ادري وش اقول وقلت لها انا احبك البنت استغربت قالت في نفسها من متى المعرفه عشان تحبني
وانا والله حبيتها من اول نظره بس ابليس طلع ابن ادم من الجنه
المهم
فتحت الهديه واول ماجت عينها على الساعه قالت اوووو
يعني اعجبتها
جلسنا اشوي قالت عندي واجب وابيك تحله لي لانه انقلش
قلت ولايهمك قلت جيبي الااب توب ودخلت تجيبه وتاخرت
يوم رجعت جلست فوق تكاية الكنب ولصقت فيني يعني صار صدرها على راسي انا استغربت من الحركه
لما رفعت راسي وناضرتها عطتني نظره غريبه
زي نظرة اللي حاقد وناوي على شر
ورجع ابليس يلعب في راسي ويقول هذي شكلها ناويه تحط الزعل عاده وكل مره تبغا هديه عشان ترضى
المهم بلعتها وسكت وجلست معها اشوي وهذي اول مره نجلس على راحتنا
البنت حبيتها بكل مافيها واكتشفت انها متعقده من انها قصيره والشي هذا مجننها ومخليها تفقد الثقه بنفسها
وانا اكثر شي معجبني فيها انها قصيره ومع الاخذ والعطاء اكتشفت انها كانت لابسه كعب في الشوفه الشرعيه ولابسه فستان طويل عشان تخفي الكعب يعني الدعوه فيها غش
المهم طلعت من عندها ومن بكره انتضرتها تتصل ولاكن نفس الشي ماحولك احد اتصلت عليها وقلت لها ليه ماتتصلين قالت انا استحي واخاف ادق عليك وانت مشغول
المهم مر اسبوع على هالوضع وانا اترجاها تتصل
بعد اسبوع من الترجي بدت تدخل على الواتس اب وتكتب لي صباح الخير قلت كويس فيه تقدم
واختصر كلامي لاني طولتها
استمر الكلام على هالوضع الين جا ذاك اليوم دخلت على الواتس اب وكتبت لها واشوفها تدخل وتطلع بدون ماترد
قلت حبيبي بدا شغل الحقران وانا ديني ودين اللي يحقرني ولا يواعدني ويسحب
انتضرت انتضرت ولاكن ماردت
كتبت لها انا كنت شاري لك هديه ويوم شفتك مارديتي رحت ورجعتها
قعدت نصف ساعه وردت وقالت ماعليش كنت في المستشفى مع امي وماقدرت ارد عليك
الزبده مشيتها لانها تقول مع امي ومااقدر الومها
قعدنا اسبوع ونفس الشي
كتبت لها في الواتس اب وكنت في الدوام وماردت علي
كتبت لها في الواتس اب كلام عتاب ولاكنه شوي حار واتصلت علي وهي تنفخ زي العاده
قالت انا ماشفت الجوال ولافتحته
قلت لها انا قاعد اشوف وقت الدخول والطلوع غيرت كلامها وقالت ايه شفته بس قلت مابرد عليه الا لما اوصل البيت
المهم انا قلت هاذي شكلها كذابه وبتطقطق على مخي
وزعلت اشوي ورضيت "حليل"
المهم قعدنا يومين ونفس الوضع انا اللي اتصل وادورها
وتواعدنا على انها بتكلمني في الليل الساعه الفلانيه
انتضرت انتضرت ماحولك احد قمت وارسلت لها على الواتس اب ونفس الشي مسطحه
المهم قلت هلمره بغير وماراح ازعل يمكن اكسر خاطرها واخر شي ردت وقلت وينك قالت وهي تنفخ كنت مشغوله
وقلت لها تعودت خلاص مابزعل
المهم طنشتني زي العاده وغيرت الموضوع
واستمر وضعي اني اتصل عليها وهي ماتسال عني
المهم رحت لها في البيت وجلسنا نسولف وزي العاده سواليفها كانت مجرد ردود مختصره على اسالتي واذا تكرمت وسالت سوال يكون قليل الدسم يعني سطحي
وسولفنا في اليوم اللي جرحتها فيه وقلت لها انا من جد اعتذر لك عن الجرح اللي سببته لك وحبيت راسها
بعد كم يوم اكلمها في التلفون احاول اقنعها تتصل علي وتسال عني احس اني متزوج على الاقل وقلت لها حرام عليك انا اسال عنك ومهتم فيك ومخليك على راحتك ويمكن اني جرحتك "بس حبيت راسك واعتذرت لك"
اتمنى التركيز على هذي النقطه لانها راح تسبب مشكله في اخر القصه
المهم سكرنا وقعدنا كم يوم صارت تدق مره كل ثلاث ايام عن قولت انها اتصلت
بعد اكثر من اسبوع قلت لها بكره انا عازم اخوي وبنت اختي في المطعم الساعه 7
جا بكره وجت زي العاده تقول صباح الخير في الواتس اب قلت لها كلميني اسمع صوتك
قالت بكلمك لما ارجع البيت وكانت الساعة 4 العصر
وهي ترجع الساعه 5
جت الساعه 5 مااتصلت
الساعه 6 ارسلت على الواتس اب وينك ولاكن مافيه رد
جت الساعه 7 ورحت للمطعم طبعا قطوا معنا امي واختي وبنت اختي الثانيه والوالد واخرتها حاسبت ب800 ريال
المهم من الساعه 6 الى الساعه 8 وانا ارسل على الواتس اب او اتصل عليها ابغا اطمن عليها رجعت للبيت ولالا
لانها ترجع في باص وانا صراحة خايف عليها من هالباص
الزبده طنشت الين الساعه 8 ونصف
وكنت توني طالع من المطعم ماعرفت اتعشاء ولاعرفت اسولف واهلي قالوا وش فيه ذا كل ذا عشانه محاسب هالبخيل
ومايدرون اني في الغماره وقلبي مع الركاب
يعني قلبي ماهوب معي
يوم ردت قالت ماعليش كنت في الحمام وماشفت الجوال
معقوله في الحمام من الساعه 5 الين 8 ونصف
والله لوها تسوي عملية شفط دهون كان قد خلصت
المهم جلست اعتب عليها شوي وقلت لها حرام عليك ماقدرت اتهنى بالعشاء
قالت لي بالحرف الواحد " ماعليش زعلتك بس تبي احب راسك عشان ترضى"
انا هنا انهدم كل الحب اللي في قلبي من كلمه وحده حسيت الدنيا ماهيب الدنيا وتحطمت امالي واللي قهرني ان في صوتها نبره غريبه وتذكرت جدها اللي هو عمي لان الصوت اللي طلع كان يشبه صوت حرمته يعني جدتها
المهم قلت لا لاتحبين راسي
وسكرت منها وخذت لفه في الحارة وقسم بالله كنت راجع للبيت ماعرفت الطريق
المهم كتبت لها رسالة وقلت اخيرا اقدر اهنيك واقول لك ان الحب اللي كان لك في قلبي تحول كله لكراهيه
طبعا ارسلته لها في رساله نصيه وماادري ليه مع انه كان بامكاني ارسله لها في الواتس اب
وش تتوقعون قالت

ولاشي طنش عش تنتعش
هكونا ماتاتا سيب الماضي اللي يغيض
المهم قعدت 3 ايام ولااتصلت ولاعبرتني
كان يوم اربعا وكنت تاكي انا والمدير وواحد من الشباب نلعب مانوبولي على الايباد حق المدير
وارسلت لها في الواتس اب قلت معاك الين يوم السبت اذا ماشفت تغيير فيك وشفت انك تهتمين لزوجك وتعدين له الف حساب راح اروح لمحكمة الانكحه واطلقك
طبعا جاوبت بكل برود وقالت انت اصلا مقصر معاي والاشياء اللي تعطينياها تمن علي فيها والرسول موصيك انك تصرف علي بالمعروف ومعنى الكلام اني اتمنن عليها وان مقصر ماديا وانا والله داري انها ماتقصد هالكلام لاكنها ماتدري وش ترد علي وبايش تبرر موقفها
قلت لها يافلانه انا ماقد منيت عليك بشي وماقصرت عنك بشي بس انت اللي تهينيين كرامتي وتسوين حركات تستفزيني وتحسبين بااسكت لك ولاكن معاك الين السبت وانا شاورت اهلي كلهم وقالوا لي الحل الوحيد اللي هو الانفصال
وانا والله ماشاورت احد ولااحد درا عني ماغير يضيق صدري في الليل الين اسمع صوتها في النهار
ردت وقالت مادامك شاورت اهلك كمل اجرائك (يعني طلق يابوزق مااحد درا عنك)
المهم رديت وقلت لاتنسين ان هذا قرارك
ردت علي وحسيت انها ضايق صدرها وقالت لاتنسا انك طرف رئيسي في الموضوع
قلت حصل خير وبيعوضك ربي بواحد ادلخ مني
اني واي
زعلت لمدة اسبوع ونصف او اقل والله ماادري بس من كثر مااحبها والله اني احس اليوم سنه
المهم مرت الايام والشباب اللي معاي في القسم ماصدقوا خبر اني تمشكلت معها مسكوني ويله احنا قلنا لك واحنا قلنا لك
الزبده جا واحد وهو مديري المباشر واقدر اسميه اخ لم تلده امي وقال لي انت السبب تدلعها وتتصل عليها كانك ملهوف قلت ياخي احب البنت قال ايه البنات ماينفع معهم الا تسحب عليهم وهم يجونك زي الحلاوه امسح ارقامها وامسحها من الواتس اب وهي بتجيك الزبده نفذت كلامه وقعدت ساعه وحده وضاق صدري من جد وقعدت ادور رقمها في الجوال وماحصلته لاني متوصي حاذف حتى الرسائل
المهم اعترفت اني خيخه عند البنت هذي وشكل هذا الشي اللي بيفرقنا عن بعض
تضايقت لمدة اسبوع ونصف لين امس اللي هو يوم الاثنين وكنت ماخذ اجازه الاثنين والثلاثاء من ضيقت الصدر
قبل ماامشي الاحد جاني مديري المباشر وقال لاتقعد توسوس لحالك وتتصل عليها ترا ياويلك "ياحبني له بس"
المهم الاثنين كان عندنا حفله لان اخوي بيروح يدرس برا ووالله اني ماقدرت احضر من ضيقت الصدر دقيت عليه وزعل علي وقلت والله لوك اللي في بالي
المهم رحت متضايق لدرجة ان كل من شافني يسالني من اللي مات
الزبده دخلت الصومعه حقتي الصومعه =العرين=الملحق=المزبله
وجلست اعد اللمبات اشوي وقلت ليه ماادخل على النت واكتب في قوقل زعلان على زوجتي
كتبت ومادريت الا طلع لي هالمنتدى الله يجزا اللي سواه الف خير
وطحت على طول على موضوع الاخ ليش كذا
واكتشتفت ان قصته مثل قصتي ونفس اعمار الشخصيات الاساسية الزوج 27 والزوجه 18
وقريت كل الردود 15 صفحه وسجلت في المنتدى عشان ارد على الموضوع ولاكن حصلته مغلق
جلست افكر طول الليل وقمت كتبت دستور مملكة زواجنا وكتبت فيه كل اللي في خاطري واللي مضيق صدري منها واكتشفت ان الحركات اللي تسويها كلها ماهي الا حيا x حيا وان عمرها اللي هو 18 عمر صعب على الفتاه خصوصا ان اهلها من النووع اللي صاكين على بنتهم ماتعرف الا ابوها واخوها
وبعد تحليل الوضع اكتشفت اني غلطان مليون في الميه ((من وجهة نظري اللي دايم غلط))
ولولا خصوصية دستور مملكة زواجنا ولاكان حطيته هنا وانا مخطط انها هي ايضا تسوي نسخه خاصه فيها وتعطينياها عشان اتبعها
و اليوم بعد ماانتهيت من الدستور ووضعت اخر التعديلات عليه اتصلت على بنت اختي الله يحفضها لانها تعرف الزوجه العزيزه
قلت لها جيبي لي رقم فلانه براضيها وفرحت مسكينه لانها امس شافتني متضايق والعن في الزواج وفي الحريم وفي اللي يدلع حرمته
وقالت مع نفسك ياخالي تزعل وترضا مااحد درا عنك
مع نفسي من جد ماصديقي الا انا
من بلغت وانا مع نفسي
وجابت لي الرقم واتصلت على الميسيز ولاكنها طنشتني
تعودت صار وجهي مغسول بمرق لحم وقلت لها والله اكتشفت ان مالي خاطر عندك زعلت ورضيت ومااحد درا عني
ومن هالكلام اللي والله لو ابسط في الثمامه وابيع الكلمه الحلوه بريال كان الحين صرت ملياردير
ولاكن مافي نتيجه ماردت علي نهائيا
واتصلت مره ولاردت
المهم انا ابغا راي البنات والشباب ويهمني راي المحامي ايضا ابغا ردكم بكل صراحه لانها تساوت معاي وانا احب البنت وماابغا اتركها ولاكن كرامتي صح انها انمسحت لاكن مازال فيها اشوي ابي احافظ عليه
وانا احبها احبها احبها وتسوا عندي الدنيا ومافيها
واسألتي ولامانع من انكم تضيفون النقاط اللي تشوفون انها مهمه

هل البنت ماديه وتبغا توصل لمرحله انها تطلب وماااقدر ارد لها طلب ؟

هل البنت صغيره ومو عارفه تتصرف زي قصة ليش كذا وزوجته الاخيره ؟

هل انا نشبه وماانعطا وجه زي ماتفضل مديري العزيز ؟

هل انا اخطاأت يوم قلت لها احبك وصارت بايخه وفي غير محلها ؟

هل فيه اطراف خفيه تمشي اجندتها من خلال البنت ؟

هل تتوقعون ان دستور مملكة زواجنا راح يجيب مفعول لو صدقت معاي وتجنبت الامور اللي تضايقني وانا نفس الشي اتجنب الاشياء اللي تضايقها؟ وكيف اقدر اخليها تقتنع فيه وتطبقه

من الغلطان فينا ومن اللي يستاهل يتكفخ ؟

منهو الطرف اللي جالس يحاول يحل المشاكل بيننا ومنهو الطرف اللي جالس يتسبب فيها ؟

هل انا متعجل بشكل مضر للصحة ؟ وخاصة في اني جبت موضوع الطلاق ومالنا شهر ونصف متملكين
عارف اني خيخه بس وش اسوي الحب قطع قلبي؟

==== اهم سوال ====هل البنت هذي راغبه في الزوج ام في الزواج ؟

سوال للشباب
هل البنات ماإلى ديارهم من سبيل يعني مهما فعلت مااقدر ارضيها ؟
مع العلم اني الى الان اقدر النساء واولهم الوالدة الله يحفضها

واذا خطر في بالي سوال بااضيفه بعدين

واسف على الاطاله بس والله من الحره اللي فيني احس ان الحب اللي عايشه مع نفسي من طرف واحد والبنت لها اهتماماتها الاخرى

اضيف نقطه حصلت في اول زياره لها وبعد اتصال ابوها على ابوي عشان يجس النبض وهل اني قايل لاهلي ولا لا
لما جيت عندها وبعد ماعطيتها الهديه سالتها هل اهلك يدرون عن الموضوع اللي صار
تغير وجهها ووكانت تناضر فيني وانا اتكلم ويوم خلصت السوال شالت عيونها وحطتها في الارض وخذت لها 3 ثواني وبعدين رجعت تناضر فيني وقالت لا مااحد يدري وماننسا اني قايل لها في اليوم اللي قبله اهم شي تحفضين كرامتي عند اهلك
وانا اشوف انها كذبت علي بس انا حطيتها في موقف صعب ومالها الا تقول كذا
اتمنى اشوف ردودكم بكل صدق لان المسالة وصلت لمنحنى خطر ومصيري
ياملحني اذا سويت نفسي مثقف

البنت واضح تحبك وتتغلى وعارفه انك ماتتستغني عنها بس انت جرحتها بلطلاق انت تقول كلام وتخرب من النناحيه الثانيه ويمكن قصدها انك لازم تصرفها بيت اهلها اذا مملك شوف اهلها لمح يمكن هم يبون كذا والبنت اعتقد انها تقول لاهلها او صحباتها وانت حاول تتكلم عن مواضيع مهمه يمكن تعطيك مجال وتعرف تفكيرهاا عشان بكذا تتعامل معها ربي يوفقكم

الله يوفقك ياعريس

والله يحييك في المنتدى ويوسع صدرك زي ماوسعت صدري بخفة دمك....اسلوبك موتني ضحككك

بس ياخوي استعجلت بطاري الطلاق....أنصحك تشيله من قاموسك وماتستخدم هالتهديد ابببدااا حتى بعد الزواج
ان شاء الله بيفيدونك باقي الاعضاء....بس ألحين يمقن نايمين ويمكن لا

__________________
سبحانك اللهم وبحمدك, نشهد أن لا إله إلا أنت, نستغفرك ونتوب إليك.

انا من جيت هالمنتدى وانا احس اني بين اهلي واخواني
بس ياسبورتيه مافهمت قصدك اصرفها بيت اهلها ؟
اتمنى تصيغينها بطريقه ثانيه
وعارف اني استعجلت بالطلاق وضايق صدري من هالشي بس بعض الاحيان تسببلي اكتاب لانها توضح لي انها مو مهتمه نهائيا واانا ماجا لتفكيري انها صغيره وماتفهم وحتى مره سالتها اذا كان صعب عليها تتعامل معاي وقلت لها تقدرين تسالين امك وتدخلين على النت وتقرين مواضيع قالت بنبره دفاعيه
من يقول يله ورني وشلون اتعامل معك وطنشت

يعني بعضهم على الشرع اذا ملك يصرف عليها مصروف بيت اهلها وكمان هي ماتخرج الا بمشورتك وهذا الشرع انتا اعرف يمكن كذا قصدها انا جاتني فكره وشوف يمشي معها هذا الحل ولا لا قولها صديقي خطيبته ارسلته هديه مع اخوها وصاحبي متزوج الثاني قالي ياليتني انا خاطب وتفاجانا ايش الهديه وره حمرا بسيطه ورقه غزليه وصاحبي طار من الفرحه وراح علطول اهدلها غيرها يعني شوف شتقول بس يعني لازم ترسم لخطه معتبره انك تغيرها وشوف يمكن يمشي معاها الغيره من بعيد لبعيد وردلي اذا مشت

باختصار البنت صغيرة ولا تدري مالذي لها ومالذي عليها، بعض البنات في هذا الوقت ليس لديهم خبرة في التعامل وفي ردود الفعل وفي القدرة على التقييم، هي صغيرة جداً ولا تعي دورها، لذلك اتمنى أن تقرأ ردودي على الأخ ليش كذا بخصوص تعامله مع خطيبته، حقيقة الأمر متعب بالنسبة لك فأنت تريد كلام وحب وغير ذلك من المشاعر ولديك فهم كبير للحياة ولدور الزوجين وماينبغي أن يكون بينهما، لكنك تصادف بعالم مختلف يحتاج إلى تعامل من نوع آخر، وصدقني لا ألوم البنت فالحياء يتمكن منها ناهيك عن قل التجربة في مثل هذه الأمور، الحل يا أخي الكريم أن تعيد الخارطة الذهنية لتفكيرك،عليك تبدأ من جديد، عليكَ أن تفتح صفحة جديدة مع خطيبتك وتجلس معها جلسة تخبرها ماذا تريد منها وماذا تريد هي منك، وماينبغي بين الزوجين، تعيد البناء من أول، حاول أن تخفف من اجتياح الحب إليك، فأنا لا ألومك ولا اتفهم ذلك الأندفاع العاطفي لديك بحكم أنك شاب يحب أن يعيش حباً حقيقياً ومشاعر جياشة، لكن خذ هذه البنت على أنها أختك الصغيرة التي تحتاج إلى تعامل من نوع خاص، ومع مرور الزمن ستصلح لك، عليك بالصبر، وبالحلم، عدم الغضب، عدم استعجال النتائج، التصرف بعقلانية وواقعية، وفقني الله وإياك أخي الكريم.

__________________
ياصبحِ لاتِقبل !!
عط الليل من وقتك..

ماسوت شي البنت

انت مثل ماقال عنك ابوك

مخروش

عجل الزواج ولا يكثر

مادري هالحركات ترفع الضغط

يعني لمتى رح تتغلى وانت ماقصرت معها

اهديتها هدايا قيمة واهديتها قلبك وكلام معسول وعواطف وكل شي

وهاذي هي جزاتك

لاتقولون البنت صغيره لانه في بنفس عمرها وتصرفاتهم تكون غير

اختي عمرها 19 سنه ومخطوبة وماتسوي هالشي مع خطيبها

يعني الرجال يبي يتزوج لترتاح نفسه ويلاقي المودة والرحمة والطمأنينه

مش داخل حرب داحس والغبراء

عالعموم ماقول الا الله يعينك انا مابي اعطيك رأيي عشان ماتظلمها واعطيها فرصة

بس الاهم انه لازم امها تعرف بالموضوع عشان توعيها وتنصحها عن اهمية تقدير الزوج وتلبي طلبات زوجها شنو يحي وشنو يكره لانه اهم شي بين الازواج الانسجام ثم الانسجااااااام ثم الانسجام

الزوجه في هاذا السن صعب جده التعامل معها لازم تكون صبور وطويل البال ولا تتهور في قرارتك المصيريه

بنسبه لعدم تواصلها معك يمكن يمنعها الحياء او انشغال في البيت او او او عطها فرصه

بنسبه لك خفف شوي من اتصالك عليها في الغالب تكثر المشاكل وقت الملكه بعكس من يقول انها وقت تعارف ومتعه

من الافضل انك تسارع في تحديد موعد لزواج والله يوفق ما بينكم ويهدي الحال