السلام عليكم ورحمه الله وبركااته
كيف حالك اختي
احب ردودك واحبك في الله وتعجبني حكمتك وربي يتمم عليك
واعتبرك اختي وودي بتوجيهك ونصيحتك
مشكلتي زوجي وكذبه اللي مااله حد وعدم المبالاه وتحمل المسؤوليه
ياقلبي اذا طلبته حاجه مايرفض يقول طيب وهو يكذب ومو ناويه اساسا ينفذها
مره تعبت من هالشغله
مثلا
بعد زواجي اكتشفت ان اثاث شقتي اثاث حرمته بس انه لبس الكنبات ومن هالشغلات
وان كل جماعتهم يدرون ان هذا شرط حرمته انه مايساويها فيني نهائي
طبعا انا عرفت من الناس ومن شكل الاثاث والمكيفات قديمه والسخان انفجر علي
وسالته هذي الاغراض مستعمله قال لا وجلس يهاوش انتي ترخين اذنك للحريم
طبعا سكت لين مرت سنه وربي اراد انه ينكشف وقال لي بعظمه لسانه ان الاثاث اثاث زوجته
طبعا بكيت بشكل هستيري كسرت كل شي قدامي انقهرت حسيت اني مو حرمه زيها تذكرت ضحك الحريم علي وغمزاتهم لبعض بغيت انجلط
حلفت اذا ماباع هالاثاث وكمل بيتي اني لاعلم اهلي وافضحه وماعاد اقعد عنده
طبعا خاف ووعدني خير
جلس اسبوع وعقب قلت يالله ابي ازين بيتي قال ليه وش فيه نقص قلت بس فضلة حرمتك مابيها
قال ومن قال انه اثاث حرمتي قلت انت قال لا ماقلته
بغيت افجر فيه جلست اصيح قلت خلاص طلقني ورب الكعبه اني بنت حرام لو جلست بذمتك
يوم شافني صدق جاده حلف بالله انه شهر واحد ويصلح لي كل اللي ابيه
اخذني للمحلات واخترت كنب حتي اخذت قطعه من القماش ومره فرحت وكان حاجه روعه
كنت مره مبسوطه
طبعا رفض يدفع عربون بالمحل انا قرصني قلبي وشكيت بالوضع
قال للعامل تجي بكره تاخذ مقاسات المجلس وتبدي واعطيك عربون
ووداني لاهلي انام عندهم من بكره رجعت قلت وصل العامل قال ايه واخذ المقاس وقال 15 يوم ويطلع الكنب انا شكيت بالوضع
قلت دفعت عربون قال ايه وعقب بيوم سالته كم اخذو عربون قال قالو مو لازم
عرفت انه كنسل السالفه قلت مافيه محل يشتغل بدون عربون قال لا امزح عطيته
عرفت ان السالفه كذب دقيت ع المحل وسالته قال راح العامل لكم واخذ المقاس ورفض يعطيه عربون
وعقب قال بمر عليكم ولاعاد رجع
سالته عن السالفه قال خلاص بيطلعونه ع الموعد مر شهر وانا اقول راعين المحل ماجابو الكنب ماصار تفصيل قال شكلهم نصابين لو رحت لهم بتهاوش معهم وبسحب فلوسي عشان يسكتني مده اطول واقول لا لاتروح قلت خلاص روح لهم واسحب العربون ونفصل عند غيره
رجع دق علي قال انا عند حقين المحل طلعو مغيرين اللون اللي اخترتيه ويبوني اخذه غصب عيال الكلب
تهاوشت معهم وقلت تعوضوني وتفصلون لي غيره ويطلع خلال اسبوعين ووافقو واخترت لك لون ثاني
قلت لا انا ابي اختار وجلس يجيني باسلوب ماتثقين في ذوقي ومن هالقبيل صور لي كتالوج وارسل الصوره كلمته قلت خلاص موافقه طبعا طقت روحي من كذبه قلت يفصل احسن من يجلس يسحب فيني
مع انه مو اللي كان نفسي فيه
طبعا طلع الكنب وعقبها اثث لي غرفه ثانيه ووقف
يعني بس تفصيل كنب بدرن اكسسورات بدون ثريات بيتي حوسه
لي سنه من طلعت من الشقه ماقدرت اعزم احد ختي اغلب قرايبي ارسلو هديه بيتي وهم مادخلوه
وحنا عندنا اللي يسكن بيت جديد يسوي نزاله عشاء وكلا يجيه ويجيب له هديه
انا تعبت منه كل مره يطلع لي بكذبه شكل يوديني المحلات اختار وعقب يالف قصه علي
انا اكتشف كذبه وهو مايدري اني عرفت واسوي نفسي مو فاهمه
اخر كذبه يقول مقدم لك شغاله سريلالنكيه وعطاني اسم المكتب نفس المكتب الي جاب لزوجته وامه منه
دقيت ع المكتب قال ماقدم علينا اخر شغاله توها جايه لكم من شهر قصده شغاله زوجته
طبعا قلت انا علي وجه ولاده والمكتب بيلعب علينا ومو جايبها بدري
وانا وحده قريبتي زوجها يجيب شغالات وخلال شهرين عطني الفيزا والفلوس وهي تجيب لنا
قال وفلوسي اللي بالمكتب يااربي ع الكذب تعبت قلت ياخي اسحبها ولا لاجت بيعها
قال وعد بعد شهر ان ماجت سحبنا فلوسنا
طيب هو اساسا ماقدم لي وياليته يقول لا اذا طلبته
هو يعرف انه لو قال لا ماله حق لانه كل طلباتي ضروريه ولازم ينفذها
عشان كذا يختصر السالفه ويماطل
تكفين عطيني حل تدمرت منه لا مصروف زي الناس ولابيت فيه اثاث كله ترقيع احس اني عايشه ع الهامش
حتي وضيفتي يقول اعطيت ملفك لخويي ويدور لك وظيفه ولقيت ملفي بالسياره ولااعطاه لاحد
كله عشان طلبته ادخل لغه قال مو لازن انتي بتتوظفين بدون لغه الرجال واعدني
انا باقي كم شعر واولد واحس هالادمي ماينفع معه الذوق
قلت لاولدت وجاء بياخذني للبيت بقول مانيب راجعه لحد مااكمل بيتي بجلس عند اهلس وعطني من يومك ساعتين اكمل بيتي ولا خلني اخيس عند اهلي لحد ماتعرف وش حقوق لزوجه
وبقول مانيب طالعه الا لحد ماتشتري لي شغاله مو تقدم مابي استقدام
ابيه يبطل كذب وبحط اهلي بالصوره وبعلمهم علي اسلوبه معي
وانه مايبي يصرف علي ك زوجه لها كافه حقوقها
وش رايك بالحل ذا امي تقول من الحين حاولي بالقوه تكملين شغلك وماله داعي تكبرين السالفه ممكن لو شديتي يظبط معك
بس كيف اشد انا مااعرف ازعل ومره يبان علي واتعب وهو ماهمه وهو كذاب بشكل عجيب
انا اقول لو صرت عند اهلي وظغطت عليه بيتفشل لانه يخب يبين انه رجال ومحترم وتهمه صورته عند الناس
تكفين ابي رايك عااجللا