أخي الفاضل علي أنا أشوف إن إسراف زوجتك بسيط ولايذكر ومع الوقت تقدر توجهها وتنصحها بطريقة جميلة ومحببة لنفسها أخي الفاضل علبة الآيس كريم وكاس العصير و12 ريال و20 ريال أهون من فستان تلبسه ليلة وحده في عرس احدى قريباتها وعقبها ترميه بخزانة الملابس قيمته فوق 3000 آلاف ريال وأهون من إنها تجاري بلأسواق مع كل راتب شهر ي ورى صرعات الموضة للأسف هناك بعض النساء مسرفات ومبذرات لأقصى حد يعني تحد زوجها يتسلف مع الناس ويتدين علشان حضرتها تطلع كشخة قدام صاحباتها وأهلها وإنها مرفهة وماناقصها شئ وكل مانزل شئ جديد بالسوق تبغى تشتريه ولا تسوي فيها لزوجها سالفة وحنا ياإخوان عندنا الأسعار صارت نار كل شئ زاد أقل شئ 3% صار عندنا إستغلال وجشع بطريقة بشعة إذا كان علبة الببسي صارت بريال ونص وحبة الدجاج 15 ريال هاذا وش نسميه طبعا هاذا من خلاف باقي المواد الإستهلاكية
أنا أذكر زمان عام 1422 كنا ننزل السوق ناخذ أغراض المطبخ كان مايتعدى سعرها كلها 1000ريال وكان يجي نهاية الشهر الثاني وباقي بعض الأغراض ماخلصت كلها لاكن الحين في الوقت الحاضر 2000 ريال ماتكفي لو رحنا بناخذ أغراض للبيت الملابس صارت غالية والأدوات الكهربائية مثلها ولا أدوات البناء كيس الإسمنت من 14 ريال وصل سعره 20 ريال مرة واحدة الحديد كان الطن 1700 ريال وأرتفع إلين وصل 5000 آلاف ريال والخضار والفواكه أذكر مرة وصل سعر كرتون الطماطم 100ريال وسمعت قبل فترة إن المخابز تلمح بأنها تريد أن ترفع أسعار كيس الخبز من ريال إلى ريالين وكمان حتى زيوت السيارات إرتفعت أسعارها ولاننسى الأضاحي والذبايح كم وصلت أسعارها وجاء نظام ساهر كمل الناقص حالف علينا إلا ندفع له فاتورة خاصة مع فواتير الإتصالات والكهرباء والمياه ولا يدبلها علينا وش نسوي التجار كل ماشموا خبر زيادة في الرواتب ولا منحة حكوا روسهم لها وشافوا لها طريق ولا العماله إللي بالمحلات أما هم أسعارهم لحالها غير أرسلت ولدي يجيب واحد بروست كان سعره من أول 22 ريال ولما إبني جاء يحاسب أعطاه مبلغ 50 ريال ورجع له العامل منها 26 ريال وأخذ 24 ريال بزيادة 2ريالين سأله ولدي قال له صديق ليش فلوس ناقص ريالين رد عليه هاذا سعر جديد أنت سعودي الهين يجي آخر شهر كثير فلوس
هاذا طبعا يوم المكرمة الملكية
وإ ستمر السعر على ماهو عليه للوقت الحالي وإلى الله المشتكى السلع في الخارج رجعت لسعرها الأساسي وحنا عندنا كل ماجاء لها تطير بزيادة
لاشباب وشابات أعرسوا بسبب التكاليف الباهضه والبطاله ولا إللي متزوجين إ رتاحوا و لاقوا لهم قيمة بيت العمر وسكنوافيه براحة وإستقرار و مايوفره من راتبه حطه قوت لعصافيره الصغار و سيارته إيجار ينتهي بالتمليك
يقسط إلين عقب خمس سنوات وعقبها يمتلكها وقسطها إللي كان يقسطه فيها بعد الخمس سنوات يشيله من الراتب بدل مايوفره يجلس يصلح فيه خراباتها وردد ياليل ما أطولك .
فالحقيقة ياخوي متع زوجتك وأستمتع معاها ولو نجري في الدنيا هاذي جري الوحوش غير رزقنا مانحوش وهاذي زوجتك وبكرة بتصير أم عيالك إسعدها إذا الله منعم عليك ومادام إنها تاكل الشئ ولاترمية الله يعطيها الصحة والعافية وتنال على ذلك الاجر والثواب كما قال رسولنا الكريم عليه أفضل الصلاة والسلام عن الثواب والأجر في هاذا الإطعام و هناك حديث شريف بذلك ولا كنه لايحضرني الآن و لا كن لو هي مسرفة في طبخها تطبخ شئ زايد عن حدكم وترميه أو تشتري الشئ وماتاكله وترميه أو تتركه حتى يفسد فعليك أن تنبهها وتنصحها وتوجهها بالطريقة الصحيحة والزوجة ماتطلب من زوجها يشتري لها المشروب و الوجبة إللي تحبها إلا إنها تبغى تحس بقدرها وقيمتها وغلاوتها عنده هي ماتقصد إحراجك أو تثقل عليك بطلباتهاأو قصدها تبذر بالفلوس لا هي تعودت إنها عند أهلها لو نفسها في شئ كانت تطلبه من أهلها بس بعد ماتزوجت فمالها غيرك أنت تلبي لها رغباتها وطلباتها ويمكن لو حست فيك إنك متضايق من طلباتها تصير ماعاد تطلبك أي شئ وحتى لو جبته لها بنفسك تقول لك ما أبغاه ولا أحبه لأن نفسها إنكسرت وإنسدت من تلميحاتك لها ويمكن تطلب من أهلها يجيبون لها إللي هي ترغبه و تحبه وأنت بكل تأكيد ماراح يرضيك مثل هالتصرف وأهلها إيش بيقولوا عنك لو عرفوا بالسالفة إذا زوجتك تطلبك هالأشياء بالأسبوع مرة جيبها لها لأنها في الأسبو ع مرة واحدة معقولة ولأجل عين تكرم مدينة بارك الله فيك وأعتذر عن الإطالة في مشاركتي وأسأل الله أن يسعدك أنت وزوجتك ويوفقكم في حياتكم و يرزقكم الذرية الصالحة اللهم آمين .
__________________
جمال العقل بالفكر
وجمال اللسان بالصمت
وجمال الحال بالإستقامة
وجمال الكلام بالصدق
اشهد ان لا إله إلا الله وأن محمد رسول الله