ااااااااخ جيتي على الجرح ..

انا مثلك تمااااما ماااااااا احب هالشي ابدااااااا ,, يمكن اصعب من حالتك برضه
واذا اضطريت فانا احتسب الاجر واعتبره جهاد

لكن في كم سؤال ضروري تجاوبينها :

هل انتي انسانه ناجحه وطموحه ؟\
هل تشيلين هم كل حاجه
هل تبغين كل شي كامل
حساسه ؟؟ اكيد ايه

اذا كانت اجاباتك بنعم فتطمني شعورك طبيعي جدا
لأن باختصار بالك مشغووووول وفي اولويات عندك
خاصة مع الدراسه والغربه
معظم تفكيرك بالدراسه .. وبرضه مرهقه جسديا من شغل البيت
عشان كذا علاقتك مع زوجك تحسين انها تضيع وقتك >>> ادري ان هالكلام غلط بس يحصل لكثير من الزوجات

انا جربت اعيش في الغربه وكانت من اجمل ايام حياتي ,, لكن برضه مالي خلق في هالشي مع زوجي

بس انا اسبابي غير

صحيح كنت مشغولة بالدراسه و شغل البيت وهذا كان له دور بحالتي النفسيه
لكن السبب الرئيسي هو في زوجي نفسه
وفي شخصيته وفي اسلوب حياته

صحيح هو انسان طيب وحبوب لكن للأسف ما احس اني مع رجل بمعنى الكلمه
ما احس اني ضعيفه قدامه ,, ما احس بالامااااان
ليه ؟؟ لأن شخصيته ضعيفه .. ودايما تصير مواقف وينهضم حقه وينهان قدامي . وهو ما يحرك ساكن .. انسان مسالم لأبعد درجه وهااااادئ وما عنده روح الشباب والوناسه والفرفشه .. كل شي جد بجد .. صحيح بينا فرق عمر 7 سنوات .. لكن لما تزوجته كان عمره 27 وبرضه ما كنت احس معاه بأي سعاده ..والله هو ما يقصر معاي حرام الظلم .. ويحبني وانا متأكده من هالشي وانا برضه احبه واساسا تزوجنا عن حب .. لكن بعد الزواج اكتشفت انه كشخصيه لا تصلح كزوج .. لا يتحمل من المسؤوليه الا ربعها .. انا من يتحمل و يشيل هم كل حاجه .. البيت الفواتير التذاكر حجوزات السفر صيانة المنزل ....الخ وبرضه لما كنا فالغربه انا من يحمل هم البحث عن المنزل .. شركات التلفون والستالايت, التلفزيون, االسفاره ,, اخذ الاطفال الى العياده, مكتب العقار,,يووووه والقائمه تطول
يعني باختصار هو دايم مريح باله وانا اللي ماكلتها وكل شي عنده بكره او بعدين لحد ما توصل انه يدفع غرامات تأخير يعني باختصار كسووووووول الله يهديه ..هذي كلها امور قللت من قيمته كرجل في عيني , واصبحت احس اني انا الرجل والمرأه في نفس الوقت وهذا شعور بشع لابعد الحدود ولكن انا مجبوره حتى تسير السفينه .. والله كنت اشوفه احلى واجمل واطيب انسان واحسد نفسي عليه لكن بمرور الوقت اكتشفت اني مو مرتاحه وتعبانه في حياتي وما في اي مجال للتنفيس والوناسه ..وحتى لو حبينا نسافر نغير جو انا من يخطط للرحله من اولها لاخرها ومن ييختار الاماكن السياحيه وحتى المطاعم و وسائل المواصلات .. وهو كأنه عروس ما يشيل هم اي شي كل يوم يسألني وين برنامج اليوم ؟ ومتى حجزتي ؟ وايش اسم الاوتيل ؟؟ بالله عليكم هذي حاله ؟؟ اتمنى مره يفاجئني ويسوي لي مفاجأه ,اي شي اي شي ابي احس اني متزوجه شاب مو شايب ..ابي انبسط ..ابي اضحك من قلب ..للأسف ما اضحك الا مع اخواني واخواتي والا صاحباتي اما حياتي معاه اغلبها صممممممممممت
اقول شرايك نطلع البر .. يقول لأ ما احب البر .. مره طلعنا البر وكرهني فيه مو عارف يسوي حتى الشاهي .. و واضح انه طالع عشان يرضيني يعني هو ماله في الوناسه والتغيير
شرايك نروح الشرقيه يومين ؟؟ يقول يومين ما تسوى !!
هذا ما همني بقد ما همتني شخصيته .. مره ماله احترام بين اهله .. يغلطون عليه و يسكت و وطبعا وصلني الاذى وصارو يغلطون علي لأنهم عارفين انه برضه حيسكت وما راح يرد ويدافع عني وربي يعلم كيف انا مكركتهم و حاشمتهم لكن للأسف هم طبعهم كذا ما يبين فيهم المعروف .. هذا الشي اثر علي كثييييير .. بعد ما كنت معززه مكرمه في بيت ابوي انتقلت بين ناس يهينوني و يجرحوني لاني تزوجت من انسان مو قادر يسوي شي بسبب شخصيته وهيبته المعدومه ..ومع هذا دايما احثه انه يوصلهم وما يقطعهم هذول اهله مهما كان ربي يعطيني على نيتي ان شاءالله
وفوق هذا كله للاسف زوجي مهمل في نفسه و شكله .. الحلاقه مره وحده في الاسبوع واحيانا في الاسبوعين .. فوضوي جدا .. غير مرتب امشي واشيل وراه .. دايما فيه النوم ودايما تعبان هذا غير انه ما يهتم ابدا بنظافته الشخصيه و لا بنظافة الفم والانسان .. يووووه والله ما ودي اقول هالكلام عن زوجي بس انا لاااااازم افضفض ..لنا 9 سنوات زواج وانا سااااكته ومو قادره اتكلم لأن ما ودي احرجه قدام اي مخلوق يظل غالي علي ...وحسيت ان هالمنتدى هو المتنفس الوحيد.. اسفه اختي اذا طولت بموضوعك بس والله ما قدرت امسك نفسي ودي افضفض عشان ارتاح .. وانا مثلك ودي اعرف انا صح ومعاي حق والا غلط .. انا ما انكر حسناته لكن شخصية الرجل هي اهم ما في الرجل ,, الشخصيه تحدد سعادة الحياه الزوجيه والا تعاستها ,, ثم النظافه ,, ارجوكم يا اخوان اهتمو بالنظاااااااااافه ترى المرأه والله تستحي تتكلم في هالموضوع او انها تصارح زوجها بهالشي .. في حدود حمراء بين الزوجين وفي حاجات الواحد اذا تكلم فيها صار لها اثر عكسي فالسكوت افضل.. ادعو لي ان الله يقربني لزوجي و يحببني فيه مثل اول واني ما اشوف عيوبه وانه يتغير للافضل .. تعبت والله تعبت ..
المعذبه

سبحانك اللهم وبحمدك اشهد ان لا اله الا انت استغفرك واتوب اليك