عايز ارجع احترم نفسي - منتدى عالم الأسرة والمجتمع

17-04-2010, 09:16 AM

شاب بلا احلام

عضو جديد

تاريخ التسجيل: Apr 2010

المشاركات: 1

عايز ارجع احترم نفسي

مش عارف ابدأ منين
انا عمري ما بعترف بسهولة ولا حتي مع نفسي بس حاسس اني عايز حد يفهمني
ويحس اني مش وحش اوي زي ما بعمل انا جوايا صراع كبير بين انسان طيب وكان محترم وبين انسان ميستحقش حتي يعيش لان اللي عملته في سني اللي هو 24 سنه محدش عمله يمكن في حياته كلها

حكايتي ابداها من البداية
من وانا صغير اوي طموحي اني ابقي مهندس يمكن من وانا لسه في اول سنين تعليمي
اهلي اغنياء ومبخلوش عليا بأي حاجه
ومع ذلك والدي كان حازم عليا احيانا وانا في اعدادي مثلا لما بلعب كورة مع صحابي كان ممنوع
مش عارف هو خايف عليا ولا لأ
بس حتي صحابي مكنش ليا غير اللي معايا في الفصل
بس مع ذلك كنت الاول دايما
وناجح بتفوق
وكانوا دايما يقولوا لي يا مهندس من وانا في اعدادي
وصلت لاولي ثانوي واتقلبت حياتي
صحيت علي بكاء والدتي وحاسس اني دايخ والدنيا بتلف بيا من الصدمه
لقيت والدي فجأه اتوفي
من اليوم دا وانا بقيت انسان تاني خالص
بقيت اعرف مقعدش في المدرسة واروح مع صحابي اشرب سجاير
ياااه كنت حاسس اني راجل اوي بالطريقة دي
واحيانا المدرسة بما انها خاصة وتعليم بيبقي في اهتمام بالطلاب فكانو بيبعتوا ريبورت لوالدتي بغيابي المتكرر
واني مش ملتزم
وامي كانت طيبة جدا ولازالت
عمرها ما حاسبتني علي حاجه حتي لو غلط
كانت بتحبني يمكن اكتر من اخواتي ودا اللي شايفة انا
وطبعا بعد كل دا سقطت سقوط ذريع
في الثانويه العامة
وبالعافية لما نجحت وملقتش طبعا اي صعوبة
اتقدم لي في جامعه من اكبر جامعات الوطن العربي واسمك متخرج منها يكفي انك تبقي في اي وظيفة
حتي لو كان في ناس يستحقوها اجدر منك
وفي تخصص الهندسة برضو اللي انا بحبه
اول سنة ليا في الجامعة كنت حاسس اني وحيد
صحابي مش معايا
معرفش حد
بس سريعا سريعا من اول اسبوع اتاقلمت مع الوضع واتعرفت علي صاحب
بدأوا يزيدوا واحده واحده لحد ما كونت شلة كبيرة
احيانا كنت بزهق من اخلاق بعضهم اللي عاملين زي القطة المغمضة
ولكن قربي بيزيد للي زيي
اللي محدش بيحكمه زي ما بيقولوا
عرفت القهاوي والشيشة وكنت مخلص اول سنه كلية وانا بعرف الف او (( ارول )) سجاير حشيش زي ما بنقول بطريقتنا احنا الشباب مع بعضنا
برجع الفجر ومحدش بيكلمني انا خلاص بقيت راجل
تانية جامعة طبعا مينفعش اروح الجامعة بالعربية والسواق كده زي الطفل
والدتي اشترت ليا عربية غاليه جدا وحتي الدكاتره في الجامعة دي مش راكبين اللي في نص ثمنها
وعلاقاتي مع الصحاب بتزيد احيانا بعرف شباب عشان المصالح
كانوا بيوصلوني للي انا عايزه وانا برضو بوصلهم للي عايزينه
بدأت في مرحلة تانية اتعاطي الابر بس كنت خايف يحصلي ادمان فبطلت بسرعة
اتعلمت حاجات كتير اوي في السنتين دول في الجامعة
اتعلمت لما اكون ماشي في الشارع افرمل بالعربية وادخل اي بنت معايا
واقضي معاها وقت وخلاص
وطلب مننا مشروع في الكلية اللي بصراحه مكنتش بقصر فيها وبنجح ويمكن امي سكته عشان مش شايفة اي تقصير
وكان في التيم ورك اللي بنعمل المشروع دا بنت معرفش ازاي علقتني بيها
هي كانت جميلة ومش زي معظم البنات اللي في الجامعة من ناحية اللبس
يعني من اول نظره تقدر تقولوا عليها محترمه
المهم كنا بنروح شركة اتصالات كبيرة وبندرس حاجات عندهم بتكليف من الجامعة وفي الوقت دا كنت اتعلقت بيها
وبسرعه بسرعه اعترفت لها وهي كمان ملقتش منها اي رفض
ودخلنا تالت سنة جامعة بس هي بدأت تعاملني بالاسلوب اللي المفروض امي كانت تعاملني بيه
يعني دايما تقولي بتخرج فين وبتروح فين مع صحابك
وعشان خاطري متتأخرش برا
ولما تسوق علي مهلك لانك متهور جدا
واحمد اللي معانا في الجامعة ليه بتمشي معاه دا مش كويس وبعدين دا بيسقط كل سنة ؟
قلت لها ببساطة انك مش من حقك تدخلي في حياتي بالطريقة دي وانا مبحبش التعامل يكون كده ولازم تثق فيا
وفي سنة رابعة واخيرا فاضلنا سنه ونتخرج
حكيت لامي عليها واتقدمت وخطبتها
واتخرجت بتقدير عالي وهي كمان
وعلي طول الجامعة عينتنا في شركة من اكبر شركات الاتصالات وبمرتب كبير
والحقيقة طول السنين الخمسة مبطلتش الغلطات اللي كنت بعملها بس كانت بطريقة اقل نوعاً ما
المهم بعد تخرجنا علي طول زي ما كنا متفقين ومفيش اي مشاكل
اتجوزت انا والبنت اللي بحبها ( زميلتي ) في شهر سبتمبر اللي فات
وهو شهر واحد كنت معاها وبعدها بدأت تعرفني علي حقيقتي
سهر كل يوم خميس وبرجع الجمعة الصبح وانا شبه سكران
دايما كانت بتتكلم معايا وبتحاول .
كانت دايما تقولي اني حكون سبب في تدمير بيتنا
لحد ما جيت في يوم وقفة عيد الاضحي اللي فات كنت سهران مع صحابي سهره خاصة
وكان في بنات بس ربنا يشهد اني عمري ما خنت مراتي وروحت البيت وانا شبه فاقد تركيزي
كانت هي صاحية وطلبت اني انام معاها وهي لاول مره من يوم جوازنا قالت لي احنا جه الوقت اللي لازم نتكلم فيه
ضربتها واخدت اللي انا عايزه واستسلمت للنوم
وقمت الصبح وهي مش في البيت
كلمتها علي تليفونها وكانت عند اهلها طلبت منها انها ترجع وهي رفضت
رحت عند اهلها والشر جوايا كأنها ارتكبت جريمة
وطبعا العيد كان والدها عازم اخواته ووالدتها برضو والفيلا عندهم يعني كانت كلها عائلتهم
وانا داخل بصوت عالي وبقول لأمها هي فين ؟
والدها جه وقعد معايا وجابها وجاب عمها وكلمتها قلت لها يلا اركبي العربية وحنرجع علي البيت نتفاهم مع بعض بطريقتنا
رفضت
قمت ماسكها من شعرها وضربتها بالقلم
حاول والدها انه يتدخل فدفعته في صدره وهي وقتها قالت لي طلقني !
قلت لها انا حذلك وبعدين حطلقك وكنا متفقين اننا في عقد الزواج في مؤخر طلاق بالرغم انها مش محتاجه اساسا لفلوس
بس انا حطيته وبسعر عالي كمان لأنها حتبقي شريكتي طول العمر
فقولت لها والمؤخر مش حتشوفيه لو جيتي لي راكعه
قاام والدها طردني وقالي احنا اللي حنديلك فلوس ونخليك تطلقها .. حسيت باهانة كبيرة جدا طبعا
ورحت علي بيت امي اللي لاحظت طبعا اني عامل كارثه
ولما قعدت اتكلم معاها وحكيت لها كل حاجه حصلت
قالت لي لو طلبت الطلاق منها مش حلومها لانك انت اللي غلطان
قلت لها حترجع يعني حترجع لانه مش بمزاجها
بس طول الوقت دا كنت في شغلي مقصر جامد ومبخرجش غير من بيتي لبيت امي
وبصراحه اشتقت لها وحسيت ان اللي عملته دا غلطه كبيره جدا وبدات احاول اصلحها
رحت لوالدها في شركته ومتوقع انه يطردني
لكنه كسفني باحترامه واعتذرت له وقمت بوست راسه وطلبت منه معاد عشان ارجع اصلح اللي عملته دا
وهو فضل يتكلم معايا ويقولي اني لما اجي حيعرف ليه بس هو سامحني !!
وعلي كلامه يعني انه مش بيسامح اي حد يمد ايده علي بنته لانه ذات نفسه معملهاش
وفعلا روحت وجت زوجتي واتكلمت معاها واتاسفت لها ولأمها عن اللي عملته
وقلت لهم موافق باي حاجه تطلبوها وتقولوا عليها وحنفذها
وقاموا اهلها وسابونا نتكلم مع بعض
وهي صدمتني بكلامها لما قالت لي حرجع لك بشرط
اجمع اهلها كلهم من اعمامها وخلاتها واولادهم وكل الافراد اللي كانوا في العيد !!
وكمان اهلي واخواتي
وابوس ايديها ورجليها قدام الكل
انا ضحكت اول ما قالت الكلام دا
قلت لها يعني انتي عايزه تعاقبيني ؟
قالت لي لا دا ابسط حاجه انت عملتها فيا
واذا مكنتش حتقبل بالكلام دا عشاني فانت حتقبله عشان ابنك اللي في بطني
ولأول مره اعرف انها حامل مني في الشهر التاني
ومحاولتش ارد عليها بس مشيت يوميها وانا تايه
وبسترجع حياتي كلها زي كاني بتفرج علي فيلم
وليه عملت في نفسي كده من صغري
وليه مراتي عايزه تهينني قدام كل الناس بالطريقة دي
اتكلمت مع اقرب اتنين ليا وبيفهموني وهما اخواتي البنات الاتنين
الاولي قالت لي ان مراتي بتحبني ولو غير الكلام دا فكانت اصرت عالطلاق
والتانية قالت لي انت لو بتحبها حتعمل كده وزي ما اهنتها قدام الكل يبقي تعتذر قدام الكل
اما والدتي فهي علي موقفها مني
وقالت لي اني دايما بضيع اي حاجه في ايديا

انا عايش فترة ومستحقر نفسي
حطلع اعمل عمرة انا ووالدتي الاسبوع الجاي يمكن ربنا يغفر لي

مراتي دلوقتي في شهرها السادس
وبتمني ارجع لها بس مش عشان البيبي اللي حيجيني منها
عشان انا حقيقي غلطت وبعترف اني مستهلهاش
بس خلاص انا دلوقتي عايز ارجع لنفسي وارجع احــــترم نفسي وارجع لمراتي
بس شرطها دا قــاتلني

سامحوني طولت في الكلام
بس اعترافي كان لازم دا اطلعه عشان معملش في نفسي حاجه
وكمان عشان معنديش الشجاعة اعترفه غير لحد ميعرفنيش

17-04-2010, 10:39 AM

الغالب

عضو نشيط جدا

تاريخ التسجيل: Sep 2007

المشاركات: 279

أيوه تعتذر لها وقدام الكل وتبوس رأسها وهذا من حقها عكيكقصس ‏
ت
بس تبوس أرجولها فلا والله لو على رقبتي ولو كنت غلطان

__________________
سبحان الله وبحمده سبحان الله العظيم

17-04-2010, 01:04 PM

غارقة في همي

عضو نشيط جدا

تاريخ التسجيل: Dec 2005

المشاركات: 555

الله يهديك يا رب

بطل حكاية العند فيك
ليش تكابر !!
عندك زوجة محترمة حافظتك وحافظة نفسها عن كل شي
لا تضيعها من ايدك حتى لو كانت مصرة ع الطلاق سوا المستحيل عشان ترجعها
لأنك أهنتها ومديت ايدك عليها ...حرام !
وبعدين محد يحترم الرجب اللي يمد ايده ع زوجته
عطاها فرصة تنسى فيها ولو طولت المدة وبعدين لما تهدا كلمها
حتى لو بعد ما تولد بالسلامة
بالتوفيق

__________________
الظلال تمد ايديها لنا !
هل يا ترى تكون ارفق علينا من الضوء؟

17-04-2010, 04:30 PM

مس ماربل

عضو مثالي

تاريخ التسجيل: Oct 2006

المشاركات: 242

لازم تتنازل وتعتذر لها قدام الكل وتبوس يدها وهي اكيد ما راح ترضى انك تبوس رجولها
انت اهنتها قدامهم مو بس بالكلام بالضرب كمان
الله يهديك
شكلها بنت كويسه لا تضيعها من يدك
الله يهدي من خلق

ضوابط المشاركة
لا تستطيع إضافة مواضيع جديدة لا تستطيع الرد على المواضيع لا تستطيع إرفاق ملفات لا تستطيع تعديل مشاركاتك BB code متاحة الابتسامات متاحة كود [IMG] متاحة كود HTML معطلة قوانين المنتدى

روابط سريعه