بسم الله الرحمن الرحيم



صباح أو مساء الخير
انا بصراحة مالي بالمقدمات
بس موضوعي باختصار
طلعات زوجي
شبه يوميا يطلع برا مع أصدقائه طبعا
أنا إلى هنا ماعندي أي مشكلة

بس الأثار اللي جنيتها من مرونتي معاه بهالجانب سلبية جدا

صار مايشوف حاجاتي
وخلانا بآخر القائمة
ولو أيش مايخدمنا وقت وأيام طلعاته
تارك مسؤولياته خصوصا ان نسبة منهم عزابية
والمتزوجين منهم سالفتهم المسيار وع عليهم
واللي يقهرني زيادة
القهوة والشاهي انا اصلحها له ولعيال خلق الله
والصحون والقدور تحوس مطبخي شبه يوميا وهلم جرا
البيت مااقدر اعطيه حقه لأنه أيام الطلعات أروح لاهلي


حصل موقف أمس ماقدرت ابدا اتحمله
كان عندي ألم شديد بأسناني تعبانة ومصدعة من الألم
حاولت أتحمل بس ماقدرت
وكان عنده طلعه راتبه
لما كلمت عليه آخر المغرب يوديني المستوصف
عصب وسواها سالفة
وكل الطريق محاظرة وهواش وانا كنت مصدعة من الألم
ونسيت بطاقتي
فطلبت منه يسحب لي والله رمى علي الفلوس كأني أشحذ منه شحاذة
قمة الإذلال
ولاتحسبون اني قطعته لـ12 مثلا
الساعة 8 طلعت من المستوصف وبدال مايقول سلامات وشخبارك الحين
قعد يقولي انتي ماتراعين الضروف والا طلعة اليوم
واهم شيء الطلعة أهم منكم!!!!
هجم علي هجوم ثاني
بعدها قال انتي ماتشكرين وانا لحقت اتكلم

كلمت امي وقالت فضفضي عليه>>الله المستعان كان يجلس يتطنز ويستهزئ
واشتكيت لأبوي لأول مرة قالي لازم تحتوين المشكلة وإذا تحبين أكلمه أكلمه

ياناس علموني شلون احتوي المشكلة
مو حياة اني اصير قايمة بكل مسؤولياتي ولما احتاج تأجل حاجاتي
ويوم تعبت صرت غلطانه ولا أراعي الضروف
وزيادة لما حولت له الفلوس ارسل لي لاتنسين 150 قيمة ....
آآآخ بس
الوحدة تتزوج علشان تشقى والا علشان أيش بس

استغفر الله

عطوني رايكم طيب

أدخل ابوي وإلا اتكلم معاه على الرغم انه الحين مثل الأعمى ماشاف خطاه والا شسوي

الله يعينك عليه اختي..بصراحه هذي حالة معظم الموظفات مع ازواجهم..

تداركي نفسك من الحين وحطي النقاط على الحروف معاه...

__________________
سبحان الله وبحمده..سبحان الله العظيم..

اهدي حبيبتي و ان شاء الله ما يصير الا كل خير..
بس حبيبتي ترى غلط انك تعلميه ما يصرف عليك فمرضك ودوائك،،
صدقيني والله اعرف كتيير من الموظفات يعلمون ازواجهم هالخصله الذميمة وبالاخير يندمووون وما ينفعهم الندم..
الزوج من واجبه شرعا يصرف عليك وعلى بيته سواء كنت موظفة او لا..
ومن حقك عليه ان ياخذك للطبيب ويشتريلك الدواء من فلوسه..
حبيتي تساعديه ماديا اهلا وسهلا،،ما حبيتي انت حره..ماله حق يستغلك في مالك الشخصي..
تداركي نفسك قبل فوات الاوان..
حبيبتي الرجال اذا تعود على شئ صعب صعب يقلع عنه،،وانت بتتساهلين معاه كتير في مسؤوليته نحو بيته..لازم تتفاهمين معاه وتتناقشون بهدووء حول تقصيره معاكم،،صحيح من حقه انه يطلع مع اصحابه بس مو على حساب تقصيره معاكم
يشتري كل للي لازمكم،وكل حاجياتكم وبعدين يمشي وين ما بده..
لكن حبيبتي ترى كثرة الخروجات الزايدة عن اللزوم احيانا ينتج عنها اشياء انت في غنى عنها،،خللي فبالك انك تحاولين معاه بدون ما يحس انه يجلس اطول مده في البيت،وانت وفريله الجو الحلو والمريح حتى يجد راحته في البقاء معاكم في البيت..
وشوي شوي بتتحسن احوالك ان شاء الله
انت حاولي معاه و اشرحيله كل تقصيره وكل للي بدك ياه يسويه..مرة واثنين وثلاث..
وبعدين اذا كلامك ما جاب نتيجة خلي ابوك يحكي معاه عساه يقتنع حبيبتي..
الله يوفقك ويسعدك يا رب

__________________
استغفر الله لي و للمؤمنين و المومنين ,, الأحياء منهم و الأموات الى يوم الدين

الله يعطيكم العافية ماقصرتوا

هو مو من عوايده يحاسبني
بس علشان (نكدت طلعته) خربها على راسي
وهذا اللي حايس مزاجي

انه حط طلعته وربعه بكفة وانا ومسؤولياته بالكفة الثانية
وجالس يحاسبني على شيء غصب علي

الله يعين يارب