السلام عليكم

اثنين صارلهم 8 ايام متزوجين .......مرض الزوج بالافلونزا .....مو افلونزا الطيور او الخنازير لا سامح الله لا افلونزلا عاديه برد يعني وبشكل بسيط

نامو وهو قال لها :حاسس اني مريض وشكل االافلونزا راح تصيدني .......صحت الصبح فتحت عيونها ما في زوجها جنبها

نزلت تحت ما في احد في البيت غير انا وهو وامه .....نزلت لاقته ماخذ فراش ونايم جنب امه ؟؟؟


الزوجه الجديده على طلبات الزوج وما عدها معرفه بفن التعامل مع الزوج واحتياجاته ومن هالامور لانها كانت طالبه ووالدتها لم تعلمها اي شي كان همها الاول والاخير دراستها وتفوقها في الجامعه

سألته ..لماذا تركتني ونزلت عند امك وانا عروسه في ايامي الاولى ؟؟؟

نهرها وقال لها امي احتضنتي وعملتلي كمادات مو مثلك نايمه وما تدرين عني شي ....سكتت ولم ترد عليه وكان هذا اليوم هو يوم زيارة اهلها لها

جاءت الخاله لتسأل لماذا انتي عابسه ووجهك مو منور مثل اي وحده عروسه ....قالت لها تعبانه لا غير

بعد الزواج بشهر او اقل ...كانوا بشقتهم ولسا ما مجهزين كل شي .....كان يريد قميص يروح فيه الدوام ولسا ما في في البيت كوايه ....قالها ليش ما كويتي القميص قالتله انا شسوي ما عدنا كوايه قال لها هذا ردك ما تقدري تقولي كلام احسن وبزعل ويضل طول اليوم ما يتكلم معاها

وموقف الزوج هو الزعلان وهو اللي مو عاجبه .......شنو رأيكم ؟؟؟هل هو هذا موقف الرجل والزوج الذي يجب ان يصبر على زوجته لانها لم تتعلم بعد ما هو المطلوب منها ؟؟او انه لازم الوحده تكون من اول يوم تعرف كل كبيره وصغيره حتى تتجنب هالمواقف التي من الصعب نسيانها لانها من المفروض تكون احلى ايام العمر



اريد ارائكم بكل صراحه

طيب السؤال هل يجب على الزوجه ان تتعلم كل مايحب زوجها خلال 5 او 6 سنوات

يعني نحن نشوف موظفات ذكيات ويديرون عملهم بمهنيه فائقه ولاينسون شي ويتم تدريبهم

خلال اسبوع او 3 اسابيع تقريبا يعرفون كل شي عن الوظيفه والزوجه مرات بعد 5 سنوات لاتعرف شي

عن اطباع زوجها ولا الاشياء اللى يحبها مع انه يقولها كم مره يعني مجرد لامبالاه او تطنيش

بعض الزوجات لاتفهم زوجها وطلباته حتى لو قالها كم مره مثل ماتفهم وظيفتها بعد اسبوع من عملها

طبعا الرجل يحب يعامل بالحنان وعلى انه طفل كبير ويحب انك ادلعينه وتهتمين فيه واكيد البنت

تقرأ هذه الاشياء قبل الزواج ولكن طبعا ماتسويها الا بعد مايطفش الزوج او يدور عليها خارج البيت

ماريد اكون متحامل على المرأه ولكن هذا الحاصل في كثير من الاحيان وبنفس الوقت يجب على

الرجل التغافل ومسامحه الزوجه في نسيانها للكثير من الامور خصوصا اذا كانت بأول الحياه

ومايسوي من الحبه قبه مثل مايقولون لين ماكل واحد يتفهم شخصيه الثاني عدل

واقترح على الزوجه كتابة الاشياء اللى يحبها زوجها احسن لكي لاتنساها ولحظات المرض

من اللحظات اللى يحب يشعر كل انسان بالاهتمام من قبل الغير والرعايه والحنان على الزوجه

ماتفوت هذه اللحظات بالاهمال لأنه لو وقفت معاه واغمرته بالعنايه والاهتمام بتمتلك قلبه بالطريقه

هذي ... وهذا رأيي بكل صراحه وبالتوفيق ومبرووك على الزواج

تحياتي

يعني الان البنت ماعندهاااا كوااية ايش الي حصل يعني
لية ما يجبلهاااا في الوقت الي مسووي زعلاان فية !!!!!!
عجيب امرررة

مافية زووجة متعلمة وخااالصة من بيت اهلهااا
لأنة للاسف الامهااات ماعندهم وقت حتى تعلم بنتهااا
ايش السبب ما ادري ؟
والزوج كماان ما عندة وقت حتى يصبر عليهاااا ؟؟
طيب ايش تسوي البنت مسكينة
مافي احد فااضي يعلمهااا ولا احد متقبل اخطأهااا
معليش يعني مارااح تطير الدنيااا لو ما كوتلة مرررة قميص
ماهي رااح تكويلة طوول العمر <<<<يصبر الله يعاافية

اما حكااية انة ينزل لوالدتة علشاان عندة انفلونزااا علشاان تحضنة
خيرررررررر<<<<< الاخ بيـــــــــــــبي ولسى في اللفة
هي متأكدة انهاا تزوجت رجل ام طفل ؟؟
وكان وفرر على نفسة النزلة وقاالهاا ياحبيبتي ابغااك تهتمي فيني
انااا تعبااان وكان ماقصرت معااة البنت جديدة على التعاامل مع الرجل
المفروض يصبر عليهاااا مو كذااا

لاحوول ولاقوة الابالله
الله يصلح احوااالهم يااارب

__________________

صراحه هذي أشياء بديهيه .. انا زوجي مرض بانفلونزا خامس يوم من بعد زواجنا .. واهتميت فيه .. وسويت له عصير برتقال مع ليمون .. يعني لو اهيا مرضت .. جان تحسست وقومت القيامه لانه ما اهتم فيها .. مع انه هوا عريس كمان .. وبالنسبه للي يقول المفروض يقول لها .. اهتمي فيني .. فعفواً .. الواحد يحب يشوف الاهتمام النابع من الحب .. مو المصطنع ..

اما سالفه القميص مو من حقه .. لو اهوا موفر الجهاز .. نقول اوكي .. بس هم مو موفره ويتشرط .. ما يصير

عفوااا على اية مافية مشكلة
البنت صغيررة ومن الغلط انة تقااارني نفسك فيهاااا
لأنة انتي تربيتي على شي وهي على شي
تجي تقوولي من خااامس يووم سويتلة عصيرررر
طيب ايش المطلوووب الظبط ؟؟؟؟
انا هنااا اناقش وضع البنت لا وضعك مع زوجك والعصيرر ؟؟؟
اتمنى قبل ما نعمل مقااارنااات بين وضعك مع زوجك
ووضعها مع زوجهاااا

اتمنى نفهم ايش المشكلة بالظبط البنت ميـــــــــــــــح في التعاامل مع زوجهااا
الا تستحق الصبررررر وفي بناات كثر يجهلوون التعاامل مع الرجاال عاامة
وزوجهاا خاااصة

__________________

يا أختي كلام الأخت jorey واضح إنت ما ركزتي معاها

قالت ( انا زوجي مرض بانفلونزا خامس يوم من بعد زواجنا .. واهتميت فيه ) هذا زبدة الكلام وما لنا دخل بعصير وطعمية

شي طبيعي وفطري إن المرأة تخاف على زوجها إذا مرض حتى لو إنهم في أيام الملكة

الشي هذا ما يحتاج تعليم ودورات ومدرسة

التربية ما هي عذر أحد يتحجج فيه وإلا أكثرنا راح يتحجج إنه أهله ما ربوه على الأشياء البديهية

تخيلي إنك عروس في أول يوم ومصابة بإنفلونزا (إنفلونزا مو جرح صغير) وزوجك شايفك تعبانة ولا هو معبرك ايش شعورك؟ بتقولين هو مو متعلم؟ميح؟

ما في شي اسمه ميح هذا تعامل انساني ما يحتاج تعليم خصوصا مع أقرب الناس لك

بالضبط هذا الي ابي اوصله .. انها اشياء بديهيه .. ما يحتاج تعليم .. انا تزوجت صغيره 19 سنه ومحد علمني على اي شي ابداً تعلمت كل شي من المنتديات .. بعد الزواج .. بس صراحه المرض محد علمني ايااه لا منتدى ولا ام .. لانه شي بديهي جداً .. انك تهتمني بمن تحبي .. هل من المعقول ان الام تروح تقول لبنتها اذا مرض زوجك روحي لميه ولا حسسيه بالحنان ؟ طبعاً لا .. لانه شي بديهي جداً جداً ما يحتاج تعليم .. بالفطره .. وأروجو من الاخت دايمند .. قراءه ردي جيداً .. مره أخرى

المفروض تهتم وتسأل عنه في مرضه على الأقل .. بس بعد ليش ما ياخذ لها العذر

أكيد اهي قلبها عليه وتفكر فيه بس ما أظهرت مشاعرها أو ما عرفت كيف تعبر عن أهتمامها

وهذي مشكلة كثييييييييير من الناس انهم ما يعرفون يترجمون شعورهم إلى أعمال

يو مكن البنت ما حد كان يعملها كذا في بيت اهلها .. مو متعودة والي مو متعود يشوف هالشي ماله معنى

حدهم يودونها المستشفى ويصرفون لها الدواء وتجلس لحالها في سريرها لين تطيب

لأنهم في فكرهم هي كبيرة وتعرف تصرف نفسها .. ويمكن هي بعد قالت لنفسها هالشي

اهو كبير وإذا محتاج شي بيتكلم ومو طفل عشان كذا يعرف يصرف نفسه

ويمكن لسه ما تعودت عليه وتستحي منه وما تعرف ايش الاشياء الي ترضيه أو الي تضايقه

و المرأة بشكل عام في ايامها الاولى دايما تتسأل اعمل كذا والا لا ..

في رجال ما يحبون الاهتمام الزايد والطبطبة .. ورجال العكس فأهي ايش عرفها اهو من اي نوع

عشان كذا الرجل المفروض اهو الي يمسك بيدها ويعينها لأنها في بيته ولسه تعتبر نفسها مو راعية البيت

و موضوع انه يبيها تحس من نفسها ماله معنى اهو خله يحسسها اول ويخبرها وبعدين يعاتبها



واعتقد موضوع كوي القميص ما يي له شي .. شنو ساحرة اهي تكوي من غير كواية

__________________

عادي يا ناس ماصار الا الخير

ممكن تبي تهتم فيه ولكن مستحيه وموب عارفه وش تسوي له، وممكن غلبها النوم وكبرت الوساده.

المهم

اني اقول لشخص اهتم فيني ، ما اتوقع اني اقولها لا لزوجتي ولا لخويي ولا لأمي، انا ما اتكلم عن نفسي ، انا اتكلم بصفتي كـرجل، وكأنسان عايش بها الكون، صحيح لما اشوف احد يحن علي ويخاف علي ويحاتيني بستانس وبقدر ها الشخص، ولكن الشي الي يطلع من الخاطر يكون له طعم.

اما مسأله نقاش الاخوان وهو ميح ومدري ايش، الان لو اي احد فينا يشوف شخص مصاب با الشارع ، لو حادث لا قدر الله ، وش بنسوي، بديهياً بنتصل على الاسعاف وبنحاول نساعد الشخص قدر الامكان، فما بالك با الزوج وزوجته اياً كان المريض منهم.

اوكي فيه اشياء يبي لها تعلم وصبر ، ولكن شخص مريض واهتم فيه مايبي لها نشدة مطوع، انسانياً واحتساباً للأجر.

اما مسأله الكوي والقميص، اوكي هو الي ماجاب ولكن تقدر تقول يا حبيبي والله مافيه مكواه ولا كان بخاطري اكوي لك واظبط اغراضك ولما تصحى تكون جاهزه ولكن للأسف ماكو كوايه، صدقيني وربي لو تقوله ولو انها توها صاحيه من النوم ولا سوت اي شي بيقول خير ياطير قميص ومو مكوي ، وش صاير ، يعني تقدر تفر السالفها كلها بكم كلمه حلوه.

ولكن لا تقولون الكلام الحلو يبي له تعلم وفيه شخص ميح ومدري ايش؟؟؟

ممكن لو اشوف من زوجتي اي تقصير بقولها وبوجههاا وبقولها قولي لي كلام حلو ، واشكريني ، ترى احب الكلام الحلو منك انت، لأنك انتي احلى واغلى شي بحياتي. يعني ممكن حتى الزوج يعلم زوجته هو وش يحب ووش يبي منها وحتى ممكن يعلمها وش لون تتكلم معه ووشلون تسمعه.

موب عيب وراح يلقها من يمينه لشماله، ترى بناتنا وش حليلهن ، ولكن وين القلوب.

الله يوفقنا ويوفقكم.

هذه المشاكل عاديه
وتحصل في اي بنت
يسمونها ملح الحياة الزوجيه
وطبعا ً مافي احد جاء يعرف كل شي
الزواج من اسمها زواج
يعني كل واحد يعطي الثاني
شراكه في الحياة
اذا غلط واحد منهم يجي الثاني يصلحه وتنتهي المشكله
واذا الزوجه كانت غشيمه واهلها ما علموها كيف تتصرف مع زوجها
خلاص الزوج يقوم بهذا الدور ويعلمها
بس مو يجلس طول العمر يعلم فيها , الحليم تكفيه الاشاره
يعني لازم هي تفهمه وتعرف شو يحب وشو يكره وشو الشي الي يضايقه
ولا ليش اسمها زوجه اذا كانت ما تعرف واجباتها تجاه زوجها
والزوج لازم يعني يصبر على غلطات زوجته ومو على كل شي يعصب
حتى لو عصب يرجع ويعتذر , مو عيب انك تعتذر من زوجتك اذا عصب عليها
هذه الحياة الزوجيه فيها حب
حب صادق تعطي الشخص الثاني بدون مقابل
وتسامحه على زلاته
اتمنى للجميع التوفيق في حياتهم