بسم الله و الصلاة و السلام على رسول الله و على اله و صحبه اجمعين ،،،


اليوم بلغتني والدتي ان اهل البنت اللي خاطبينها اتصلوا و بلغونا بالموافقه و لله الحمد ، و طبعا بحكم ان العادات و التقاليد تختلف من منطقه لأخرى فأنا من الرياض و البنت من الرياض و حسب فهمي البسيط لهذي الامور بحكم اني اكبر اخواني و ما عندي أخوات بنات الا اخر العنقود و توها صغيره ~ المفروض ان الوالد يتصل على ابو البنت و يطلب اننا نسيّر عليهم و نتقهوا و نطلب البنت بشكل رسمي .

ما علينا ، سؤالي هو :

عند الشوفه الشرعيه ، ما هي البروتوكولات المتبعه عند اهل الرياض او بالعامي ابي اعرف الطريقه بالضبط ؟

ثانياً بالنسبه للهديه ، ابي منكم اذا ما عليكم كلافه لستة اقتراحات .



و قبل كل هذا ابي دعواتكم لي بالتوفيق و طبعا شاكر لكم مقدما .

اول شيء ألف مبروك :14:

بعدين تونا على زيارتك انت والوالد لان طلب البنت بشكل رسمي يتم بعد الشوفه الشرعيه والقبول منها ومنك واذا تم القبول تجون تطلبونها بشكل رسمي

في البدايه انت بتروح لوحدك وبتتقهوى مع ابوها واخوانها واكيد بيسألك عن بعض الاسأله حتى لو كان عارف اجوبتها مسبقا
مثل مرتاح بشغلك وين بتسكنون لو كتب ربي
مين مناسبين
يعني اسأله خاصه مع سواليف عامه
وبعد كذا بتدخل البنت

والقلب عندها يقول طق طق طق عاد ماادري انتو يالرجال مثلنا تقولون طق طق والا احنا اللي قلوبنا تطق طيران من الخوف ههههههههه
وبتسلم عاد هي وانت عاد قلها كيف الحال واسألها عن دراستها اذا تدرس او وظيفتها اذا موظفه او كيف جلسة البيت اذا عاطله

من ناحية الهديه ماادري والله احنا عادة في مجتمعنا مايجيب الخاطب هدية عند الشوفه الشرعيه

انا شفت مواضيع في المنتدى عن الهديه اللي يجيبها الخاطب في الشوفه الشرعيه بس احس ان اهل نجد ما يتقبلون هالفكره يعني ابو البنت بيقول ليه يجيب هديه وهو ماصار زوجها ولا حتى خطيبها !!

طبعا هذا اعتقادي او تفسيري التوقعي للشيء هذا

بس اذا مصر تجيبها ماادري يمكن خاتم او ساعه بس انا وانا بنت مستصعبه ان اللي يجي يشوف البنت اللي خطبها الشوفه الشرعيه ومعاه هديه

ويمكن في هذا الموضوع يفيدك غيري لان ماعندي خلفيه عنه لان ماعندنا احد يهدي خطيبته وقت الشوفه الشرعيه

واي استفسارات اخوي انا حاضره

بالتوفيق :14:

الي يصير عندنا ان الاب والخاطب يروحون يخطبون رسمي بعد الموافقه المبدئيه وبعدها تصير الشوفه بطلب منك

مع جوجو انا في انك ماتاخذ هديه معاك بس ممكن تدخل بصينية شوكولاته حلوه

العادات تختلف والافضل انك تشاور الوالده الله يخليها لكم

ماشاء الله .. الله يوفقك ويتمم امورك بخير ..


ابد تروح تتقهوى عندهم واذا ارتاحوا لك دخلوا البنت عليك .. تشوفه وتشوفك واذا بتكلمها
تقدر تكلمها ..

وبعدها تطلع وتروح للوالدة وتقولها ان البنت مناسبة ان شاء الله .. وترد الوالده عليهم وبعدها يجي دور
الرجال بتحديد يوم الملكة ..

الف مبروك حبيب قلبي