السلام عليكم ورحمة الله وبركاته ...
قريت تقريبا كل مواضيعك .. انا والله مو بعادتي اشجع على الطلاق..
لكن انتي حالة استثنائية .. حياتك معاه جحيم لا يطاق.. بسالك بالله عليك .. شو تنتظرين منه ؟ شو الي تتوقعينه بيتغير؟!
مايصلي .. سكير عربيد .. هاجرك .. مايسال في عياله .. سمعته رايحة فيها ..
انتي على شو خايفه ؟؟! على عيالك الي اساسا مايسال فيهم ؟
صدقيني لما يكبرون عيالك ان شاء الله ويفهمون .. ويستوعبون الجحيم الي هم عايشين فيه .. بينقدون عليك .. بيقولون ليش ماتطلقتي من الاساس..
عيالك لما يكبرون ان شاء الله .. البنات بيتزوجون .. بيلهون بحياتهم .. الاولاد بيطلعون .. وبيشوفون حياتهم .. انتي من لك ؟! اذا من الحين لا اهل ولا زوج ولا اهل زوج .. ؟! كلهم مو مستعدين يساعدون في حل مشكلتك ... كلن يتهرب من كلمة طلاق...!!
الطلاق ماحلل الا لسبب... وانتي اول وحدة تحتاجين للطلاق ... فيه راحة لك ولعيالك ..
انتي مو خسرانة شي.. وظيفة ولله الحمد عندك .. وجمال واخلاق.. !! وصبرتي.. كثير اكثر من اللازم ..
على هالصبر ماراح يجي يوم بتقولين ليتني صبرت .. وليتني عطيت فرصة .. !!
انسان مايستحق انسانه مثلك ..
اهلك ماردهم بيتقبلون الفكرة ..
دام سمعته خربانة .. محد بيقول والله انها صبرت ... بيقولون تستاهل هي الي جنت على نفسها .. محد قال لها تسكت عنه..
انا مادري انتي في اي بلد عايشة .. وشو قوانينكم ..
بس كل شي واضح انتي مظلومة .. مظلومة حيل.. نصيحة مني.. من اخت لك .. طالبي بالطلاق قبل ما يتبلى عليك .. ويسود عيشتك اكثر..
عيالك ماردهم بيتفهمون .. دخيلك.. خليهم يشوفون حياة طبيعية .. بعيدة عن هالمشاكل .. خليهم على الاقل ليا تطلقتو يشوفون ابوهم من بعيد لبعيد .. يمكن يحترمونه ..
ماتدرين لو ظلو معاه .. الله لايقوله .. واحد من ابنائك يصير مثله .. ويستسهل الخمر وغيره ..
طلبتك يالغلا تحركي وتصرفي.. لا تعتمدين لا على اهلك ولا على اهله ... ولا تعيشين على امل بان زوجك ممكن يتغير...
زوجك يبيله صفعه على وجهه .. يمكن يحس ويصحى ..
تحركي قبل لا تقضين على عمرك وحياتك ... وعيشي باقي حياتك وانتي بخير ونعمة وصحة وعافيه ...
محد بيضيع فيها الا انتي ..
صلي استخارة بكل امورك .. اذا انتي مترددة حيل.. وان شاء الله اتمنى من كل قلبي تنحل كل امورك ..
مشاكلي كلها اتهون قدام مشكلتك .. ومع هذا جتني فترة طلبت الطلاق فيها ..!!
ارجوك يالغلا تصرفي تحركي .. بأي طريقة بس خذي حقك منه .. قبل مايطيح الفاس على الراس ويتبلى عليك .. ويتهمك باي طريقة ..
واذا شفتيه بحالة سكر.. صوريه فيديو من غير ماينتبه لك .. خليه يشوف نفسه ثاني يوم لما يصحى .. عل وعسى يكره نفسه ..
وبنفس الوقت خلي التصوير دليل عليه .. لان مايندرى شو نوايا زوجك ..
الله يعينك والله مادري شقول.. بس قلبي معاك .. وارجوك طمنيني.. واتمنى اسمع بانك خذتي خطوة ايجابية قوية ..
الله يصلح امورك ويعز من شانك ومقدارك ..
دمتي بود ..
أم وداد
__________________
ربنا هب لنا من أزواجنا و ذرياتنا قرة أعين واجعلنا للمتقين إماما
أرجوكم ادعو لي ..بإن ربي يجمع بيني وبين زوجي على خير
إلى زوجي ..إلى مقلتي.. إلى فؤادي...إلى بسمتي... إلى دمعتي... إلى حياتي وروحي... إلى عشيقي، حبيبي، فارسي، أميري، إلى القلب والكيان... والحب والهيام...
الـعزيـــــــــــــــز بو وداد..
أحبــــــــــــك ...
23-10-2007, 07:28 PM
ضوابط المشاركة
العرض العادي
