انا عندي مشكلة ولا ادري وش حلها وبنفس الوقت ماقدر افضفض لحد لاني اعتبرها انكسار و استحقار للذاتي واهانة للنفسي التي كرمها الله.
انا ادرس الكلية واشتغل بوظيفة متواضعه بمرتب 6000 ريال خطبت كثير عند اكثر من 30 بيت عند قبيلتنا ولا احد زوجني وكتب الله لي نصيب وتزوجت وبعد فترة بسيطه جداً حملت زوجتي واختلفنا وطلقتها جابت بنت وحاولت ارجعها ولكن اهلها طلبوا مبلغ وقدرة رضوه ورفضت والى الان جالس اخطب تخيلوا بعد طلاقي خطبت اكثر من 20 بيت. انا طابت نفسي وانقهرت خصوصاً نظرات اهلي وكانهم يشفقون علي الى درجة امي جالسه تكلم المشايخ وتقول ولدي مادري ليش ينرفض ابوي شوي شديد وعصبي وكلامه شوي جارح الى درجه يقول لي انا بحياتي ماشفت مثلك انا معادني بخاطب لك كل شوي يرفضونا اهنت نفسي للي يسوى والي مايسوى
اختي تقول لي لو انا مو اختك وانت خطبتني مراح اوافق لان وظيفتك مش اوكيه وتقول تفكير البنت تبي واحد يدلعها وتبي سوق ومصاريف مو واحد راتبه 6000 بس وضعي المادي ممتاز ساكن بفله ابوي ولله الحمد تاجر وضعنا المادي ممتاز بس ماني عارف ليش الرفض. الحين الحمد الله تخرجت من الكلية وطلعت خارج المملكة ادرس لغة وتوني مخلص اللغة ورجعت للسعودية والى الان مازال الرفض مستمر والمصيبه اني اشوف ناس اقل مني وظايف ومتزوجين وبعضهم راعي شراب وامورهم ماشيه. والمصيبه اني ماشوف فيني عيب و شكلي مقبول وايام كنت خارج السعودية كانوا الطالبات الي معاي يبون يرتبطون فيني بس انا كنت ارفض لاني عارف ان اهلي بيرفضون واكثر الاجانب يقولون لي انت وسيم و ذكي ليش ماتزوجت الى الحين وعمري الحين 27 ومطلق لي اكثر من 3 سنوات شي يقهر وادري بتقولون لي اطلع برا قبيلتك انا ماعرف احد ومستحي اكلم احد من اخوياي لانه بيقول لي وين ربعك وجماعتك وامي ماتعرف احد برا الديرة
تصدقون اني تمنيت اني مو سعودي لاني شفت الاجانب يقابلون بنات وينعجبون فيهم ويتزوجون
لا ابي الحرام وتقتلني نظرات الشفقه من اهلي وهم يحاولون يواسوني وانا بنفجر لاني ماقدر افضفض عند احد احس انها انكسار وبعض قرايبنا ينشدون يقولون ليش العالم يرفضونه اكيد هو خربان او فيه شي. تكفون عطوني حل

(تم تعديل العنوان ليتناسب مع المضمون)

يا أخي الكريم لماذا النظره الدونيه لذات
يمكن نساء قبيلتك اجتمعوا على صفات محدده يبحثون عنها بالرجل

ماذكرته من مزايا فيك شئ طيب ولله الحمد

وكثير من الفتيات يتمنوا يرتبطون برحل عنده لغه ولايحرجها بالمطاعم والكفيهات ك أبسط مثال ..

تحتاج ان ترفع تقديرك لذاتك
وان تقرأ عن مبدأ الاستحقاق

واذا طليقتك ام بنتك فيها الخير

لماذا لاترجعها

افضل من مصاريف مهر جديد وعرس جديد

__________________
اللهم ألهمني الرشد

لا طبعا مو شرط فيك شي
اخوي خطبنا له من 30 او اكثر
الحمدلله مافيه عيب مصلي ويخاف ربه وواصل وشهاده عليا وراتب مرتفع
لكن النصيب
وفيه طلاب لسه يدرسوا حتى بدون راتب بس المكافاه وتزوجوا ولقوا بنات يقبلون فيهم
اكثر استغفار
الزواج رزق مهب على المواصفات
ولا تحسد غيرك ابد على رزقهم
وخل اهلك يستمرون وبتلقى ان شاءالله

(مكانه الأنسب)

__________________
الحمد لله بلا سبب ولا طلب..
الحمد لله في حياتي وبعد مماتي..
الحمد لله دائمآ وأبدا..

أخي الفاضل

ان كان بالامكان ارجاع طليقتك فارجعها ولاتنظر للمبلغ الذي قد تدفع ضعفه في زواج جديد ، فلاتدري لعلّ الله يؤلّف بين قلبيكما ،ويكون هذا الرفض الذي لقيته سبباً لرجوعكما.

وأما ان كنت لاترغب بذلك ، فلاتتحرّج من طلب المساعدة من الاصدقاء فليس شرطاً أن يكون زواجك من قبيلتك، الآن الكثير يبحث من خارج القبيلة بل من خارج المنطقة أحياناً ولاتَحَرُّج في ذلك أبداً.

باستطاعتك الاستعانة باختك او احدى محارمك بالتأكيد لديهن معارف وصديقات، وليس بصحيح ان كل الفتيات يبحثن عن المال ، بل هناك فتيات يبحثن عن الخلق والدين وحسن التعامل.

أخيراً :مايحدث معك طبيعي ويحدث مثله للفتيات هكذا بدون سبب سوى أنّ الله لم يكتب ذلك.

وفقك الله ..

أعتذر عن العودة لكن تذكرت:
في المنتدى هنا قبل مدة كان هناك حديث عن مواقع الزواج الاسلامية ، بامكانك البحث في موقع محافظ وهي مواقع كما ذكر بعض الاخوة محافظة تقوم على اشراف المشائخ ، لعل من يقرأ هذا الرد ويعرف موقع محدد يخبرك به.

اوبالامكان التواصل مع خطابة ثقة .

موفق..

يمكن سبب خلافك مع طليقتك ما يستحق الانفصال والناس عرفوا السبب فما حبوا يوهقون بناتهم معاك

وخصوصا انك تخطب من قبيلتك وعارفين اسباب طلاقك

يعني عشان رضوه تطلق !

__________________
وهل من مصير اخر ؟

خل عندك ثقة بنفسك
واكيد انت عارف ان الزواج قسمة ونصيب
المهم انك تستفيد من الاخطاء اللي حصلت منك في زواجك السابق ولاتكررها
وإذا قدرت ترجع طليقتك يكون أفضل علشان البنت
وإذا ماقدرت ابحث عن بنت الحلال ولاتيئس حتى لو من خارج قبيلتك
والله يوفقك

إن كانت هناك رغبة لديك في إرجاع طليقتك أو هي لديها رغبة أو أن الأمور سلسة بينكما
فأرجو منك التفكير والاستخارة في مسألة إرجاع طليقتك إذا كان سبب الخلاف تافهاً أو يمكن حله بالتنازل

في الصميم !

حاول ارجاع طليقتك !!

__________________
أشهد أن لا إله إلا الله و أشهد أن محمدا رسول الله صلى الله عليه و سلم