السلام عليكم
اخواني واخواتي انا مو اول مره اكتب مشكلتي هنا .. سبق وكتبتها مرتين لكن ضاعت المعرفات
ماراح اعيد وازيد لاني تعبانه نفسيا كثير بعطيكم مختصر حياتي على شكل نقاط
متزوجه من 18 سنه عندي أولاد
زوجي سخص مزواج كل شوي له زوجه بالسر والا بالعلن .. اول مرتين تعبت لكن بعدين تقبلت الوضع وصرت اشتغل على نفسي واولادي مرت السنين وهو من وحده للثانيه كملت دراستي وتطورت من نفسي
اولادي ربيتهم احسن تربيه
كان يشتغل ووضعه كويس امن لي شغاله وسواق وبيت كبير ايجاره غالي شوي .. هالاشياء خلت اهله ياخذون مني موقف عداوه على بالهم اني اصرف على اهلي من فلوس ولدهم خصوصا انهم عاشوا حاله ماديه صعبه ويعتبر ولدهم الوحيد اللي بالعايله وضعه كويس
ووجود شغاله وسواق شي غريب عليهم ... وكثير علي انا بنت الناس وصاروا بس يدققوون باي شي يخصني انا واولادي
زوجي متفتح جدا راعي سفريات وروحات واغلب زواجاته من اجنبيات وكانت ام زوجي تشجعه دائما انه يتزوج وان الشرع محلل له اربع
حصل انه مرض مرض مرض نادر اقعده عن الحركه وبوسط حزني طفش زوجي مني بدل مايدعمني ويساعدني
طلقني ورماني انا والأولاد عند اهلي بدون أي مصروف وراح تزوج بنت اصغر منه ب 22 سنه وجابها لاهله اللي طاروا فيها ومابقى أي طريقه يعبرون فيها عن فرحتهم الا وسووها
جلست كم شهر مطلقه ومارتحت انا واولادي عند اهلي وكلمته يرجعني .. ورجعني بشرط انه مالي أي حقوق عليه ولايجلس يتفاهم مع اهلي فقط يجي بسيارته واطلع له .. وللأسف سويتها وطلعت بدون رضى اهلي
قلت الرجال ماسوا حرام يمكن تزين الأمور انا محتاجه استقل عشان ولدي واعرف كيف اعالجه او حتى ابكي براحتي ماابغى امي تشوفني وانا مكسوره
رجعت وهو طافق فيها كانه بحياته ماشاف زوجه .. طبعا هي اجنبيه .. صبرت وصبرت كان يتصيد علي الفرص عشان يمد يده علي
يطلع من البيت بالايام ولا ندري عنه .. لايصرف ولايهتم .. طبعا توقف عن الشغل وترك شغله وقفل كل مكاتبه من الخساير اللي صارت له نقل مدينة ثانيه عند اهله وتركني مع الأولاد
عشت اتسلف واستدين وبعض صديقاتي المقربات يساعدوني باللي يقدرون عليه مرت السنين على هذي الحال تدمرت صحتي وصحة اولادي .. جلسوا اولادي بدون مدارس عشان مدارسهم كانت اهليه ومن كم سنه ماندفعت رسومها .. كنا نجلس بدون كهرب وهو عارف وعنده خبر ويردد الصبر زين
كنت اشوف رسايل زوجته تطلب كماليات لها في حين انا كنت اغلي مويه وابردها عشان اشرب اولادي
اشوف الخضار وطلبات السلطات لها وانا واولادي نجلس على الصامولي والجبنه السايله واذا تكلمت قال نعمه
ماعاد يخرجنا او يطلعنا والسبب اننا مصدر ازعاج له وعلاقتي باهله سيئه فليش يتعب نفسه
كلمت اهله كذبوني واللي تكلم قال من عمايلك السودا .. وانا مابتكلم عن هالنقطه تحديدا لان ربي هو اللي عالم ومطلع وافوض امري له سبحانه ينصرنني
لكن لو انا سيئه وش ذنب الأولاد يتعاقبون معي كنت اردد اولادكم بس بدون فايده
... اللي حصل انها حملت وجابت طفل ... وانا حملت بحوله وقوته وجبت طفل ... ماعمره دخل علي بحفايض او حليب الا كم مره للصغير او شاف طلباته بعكس طفل الثانيه والمقارنات بدات تشتغل وتتسلط على طفلي ليش الولد ضعيف ومامشى عكس طفل الثانيه اللي تغذيته كويسه وصار يتهمني اني مهمله ومااهتم
كنت أقوله كلهم اولادك حرام عليك مثل ماتجيب هنا جيب هنا
ولدي واقسم بالله اللي قايم بطلباته جارتي وربي شاهد عللى هالشي ولاعمره جاب له شي الا مره او مرتين
توظفت وربي اكرمني استاجرت بيت واخذت سياره لولدي واشتريت اثاث وسددت شي من الديون حتى ديونه هو سددتها قلت يمكن يبان بعينه ويخاف الله
راح راتبي كله قروض حتى ايجار الشقق الفندقيه اللي هو ساكن فيه من 5 سنين دفعته عنه .. صار مايبقى من راتبي شي
ومع هذا مازالت يده طويله يضربني لو أطالب بشي من حقي
حقي الشرعي يجلس بالاشهر 4 او 5 مايقرب مني وعذره اني ناشز واتعذر باني تعبانه والله شاهد ماحصل يمكن لو مره بس اخذها عذر
مصاريف مثل ماشرحت
اهله والمجتمع مو معترف في وبالاولاد ابدا مع انه يردد اهم شي بيتي واولادي بس كلام
ساكن بمدينة عند اهل زوجته وأهله وانا واولادي بمدينة عندي المراهقين والمريض مااحد من اهله قال خاف ربك اولادك
قلت ننقل عندك انا تعبت من المسؤليه بس بدون فايده
أخيرا .... طلبت الطلاااااااااااااااااااق وانا عارفه انه ماباقي شي اخسره
قالي روحي لاهلك وتنازلي عن اولادك وانا اطلقك .. تخيلوا واللي دفعته واللي مادفعته والبيت والاثاث مايصفى لي من راتبي شي لخمس سنين قدام قال اجل اصبري

بصراحه وضعه المادي جدا سيء بدون وظيفه متخيلين ... انقهر اني اطلع واشتغل واتعب وهو زوجته نايمين وبالاخر ياخذون راتبي ويتحججون باي شي
بالاخير اعترف لي انها غلطة عمره وانه نادم ويبغاني اصبر لين يرتب وضعه ويجيب الأولاد يعيشون معي لانها حامل بالثاني واني لازم اربي الالاود مع بعض
رفضت وبكيت وصحت .. طلقها ايوه لكن وش ذنبي بعد اللي تحملته اتحمل زياده قال هذا شرع الله
كان يمر شهر وشهرين واربعه مانشوف انا والأولاد نور الشمس ... وين كان شرع الله ؟؟
الان صح اروح واغير جو بس بفلوسي ماله فضل علي
انا اسدد جواله واعطيه مصروف ابوه الشهري .. ولما يجي مسافر لهم يأخذ مني ... أقول اعملي باصلك يابنت الناس مرت عليك فتره ماقصر عليك بشي والماده ماتوقف بيني وبينه
لكن بالحقيقه قلبي يحترق من جوووه
يفترض بعد زواجه أعيش مرتاحه على الأقل ماديا .. يفترض دق الصدر وقال انا بعدد يتحمل مسؤلية لانه قادر مو يرميها علي
لما كنت أقوله كذا يقول مااحد طلبك ترجعين انتي رجعتي
..

الحاصل الان اني طالبت بطلاقي او طلاقها ... لاني بعيش حياتي رجل مايشتغل ولاعنده ماده وطاقته المعنويه والجنسيه مسخره لغيري وانا بعمر الثلاثينات .. لاحد يقولي حرام رجاااااء
الحرام اني اظلم نفسي واكمل كذا ... وهي نفسيا مستحيل اتقبلها او اسامحها لانها كانت سبب بظلم زوجي لي ولاولادي وبسببها ولدي جالس بدون علاج ؟؟ لو كانت تخاف الله حثته على العدل
لما شافني اصريت على الطلاق طلبني مهله سنه يعدل وضعه عشان اهله مايزعلون منه
ورفضت قام قال اعطيني 3 شهور اذا ماطلقتها انت حل من امرك
بس وش المطلوب مني بالشهور هذي .. يبغاني ارجع اهتم بنفسي واطوي الماضي ولااجيب له طاري شي واخذ طفله بالبيت عندي عشان يتاقلم مع اولادي .. يبغاني اهلي وارحب واسوي مساج ودلع

انا بصراحه ماعاد اقدر تعبت وتدمرت نفسيتي .. طوووول عمره يتزوج مابقى جنسيه ماجابها على راسي ولما حب يستقر ويخلف منها بدل مايكرم بيته وأولاده يقصر علينا كذا ؟؟
والله العظيم الذي لايحلف بغير جلسنا شهرين كامله بدون كهرب عشان الفواتير ولاحرك ساكن

انا احكي لكم الوضع وربي شاهد ماكذبت بحرف وقلبي مليان للاخر وانا بين نارين الان

اتطلق واختصرها لاني مو واثقه فيه .. او اعطيه فرصه اخيره على انه نفسي صعبانه علي هو المفروض يدور رضاي مو انا

او اعطوني طريقه احسسه بغلطه بحقي وحق أولاده وخصوصا المريض فيهم

أي سؤال انا حاضره بس ساعدوني لاني مااعرف كيف اتصرف

ما الذي ترجينه منه بعد 18 سنة؟!!

__________________


اللهم طِيبَ الأثر .. وحُسْنَ الرحيل.

ياليتك استقليتي انتي واولادك ببيت مستقل بعيد عن اهلك وبلا هالرجعه وهالذل....

مثل هذا وش ترجين من وراه
عزي نفسك واولادك دام عندك وظيفه
والقروض غلطة عمرك

__________________
سبحان الله وبحمده

تعطينه راتبك ؟ ليه وباي حق؟
مدري بس احسك انتي ارخيتي الحبل من اول ما ينفع الحين الشد راح ينقطع

__________________
الحمد لله الذي جعل بعد العسر يسرا... و بعد الضيق فرجا... و بعد الغم راحة ...وبعد الفراق عودة
« الْحَمْدُ للّهِ حَمْداً كَثِيراً طَيِّباً مُبَارَكاً فِيهِ »

اللي اشوفه انه قاعد يستغفلك ويخليك الصرافه حقته هو واهله وزوجته !

يتزوج من حقه
يذلك مايعدل ! يضربك ياخذ راتبك لا ابدا مو من حقه وانتي اللي تنازلتي عن كل شيء وماتخذتي ولا موقف ويوم اتخذتي شبه موقف لعب عليك وقال عطيني فتره
ولازلتي تصدقينه !!؟
اللي ترك ولده ضناه ولا عالجه وركض ورى شهواته يبي يرجع لك انتي ي بنت الناس ويخاف الله فيك ؟؟؟
فكري بعقلك وخلي العواطف عنك
احسك تنازلتي لين قلتي ربي امين

طلاق الثانيه مو حل لان زوجك اول مايلفى فرصه للزواج بيسويها وبتكونين البيبي ستر حقته هو وعياله طول عمرك !!

__________________
أستغفر الله العظيم واتوب اليه

لا تطلبين طلاق ولا شي علشان لايلوي ذراعك بالعيال

عيشي حياتك بالطول والعرض ولا تقصرين على نفسك ولا تعطينه ولا هلله

وبقولك شي شخصيتك غير محببه وغير مفضلة لنوعية معينه من الرجال
وزوجك من ضمنهم
مايحبون اللي تتنازل وتعطي بسخاء ..وتنزل من قدر نفسها علشانهم
يحبون الواثقه من نفسها واللي تجعل نفسها رقم واحد

انت اعطيته من فلوسك بعد حركاته وزواجته كله ترجين حبه
وتنازلتي لاخر قطرة كله علشانه ولا حبك ولا بان بعينه ...

خلاص بعد هالعمر التفتي لنفسك
وخليه جاء ماجاء ماراح يفرق عندك

مع كل اسف خانك التعبير في هذي السطور
وهذا دليل عدم فهمك لشخصية لرجل
وما يعشقة ويحبة بالانثى.

يا صاحبة الموضوع

زوجك بيتزوج بكيفة ولكن يتنكر لعشرتك
ويسحب على عيالة هذا امر غير مقبول ابدا
طبعا اذا استبعدنا بعض حركات الحريم
اذا عداد عليها زوجها وماهو مقصر فيها
وفي عيالة ونسان عادل.
ومن الصعب ان ينصح اب ان يهتم في اولادة وزوجتة
اذا كان عندك دخل ثابت ومستقلة بنفسك ماديا
فستبعدي فكرة الطلاق وعيشي لنفسك و او لادك
ونصيحة لا تتسببي بطلاق زوجتة الثانية او تشترطي علية
ان يطلقها راح يبلاك الله بحوبتها لانة ظلم لها
فلا تنسى هي ام اولاد مثلك

__________________
سبحان الله وبحمده سبحان الله العظيم

لا افهم بعد كل عمايلو تصرفين عليه والله لو كنت في مكانك نجوم الظهر اقرب له من فلوسي لا اعلمه بها اطلاقا اللقمة خسارة فيه ابنه مريض ا لمفروض يسعى في علاجه راح يجري وراء شهوته اسمحيلي اختي زوجك يرفع الضغط لا تساليه طلاق ااخرى فتاثمين لكن اخرجيه من راسك وتفكيرك لانه حتى لو طلقها سيبحث عن اخرى

الله يفرج همك
ولا يجوز لها أن تطلب الطلاق لمجرد زواجه عليها، قال رسول الله صلى الله عليه وسلم: أَيُّمَا امْرَأَةٍ سَأَلَتْ زَوْجَهَا الطَّلَاقَ مِنْ غَيْرِ مَا بَأْسٍ فَحَرَامٌ عَلَيْهَا رَائِحَةُ الْجَنَّةِ. رواه أحمد و صححه الألباني
ولاتعطينه ولاريال فلوسك من حقك الله يصلح اولادك ويرزقك برهم

__________________
اللهم اني استودعك اولادي وبناتي دينهم وآمانتهم اللهم جنبهم الخمر والمسكرات والمخدرات والزنا واللواط والفتن ماظهر منها وما بطن يامن لاتضيع ودائعه