السلام عليكم ورحمة الله وبركاته
عمري 25 سنة وعلى وشك الزواج بعد 4 شهور
طفولتي مرعبه من ناحية إدمان الوالد للمخدرات وتبعيّات هالإدمان على والدتي وعلينا وعلي أنا بحكم إنّي أكبر أخواني ورحنا عشنا عند جدي كم سنه لين تعدل ورجعنا والحين عائلة ولا أروع
طبعاً يوم كنت عايش بدون ابوي فترة من 14 الى 17 سنة كنت بهالفترة في مكان دايم فيه مشاكل بين المراهقين البيض والسود وكنت اذا جيت اشتري من عند احيائهم شي وكنت مظطر دايم تجيني تحرشات بالسب والدفّ وتوصل للمضاربة ويكونون ضدي اقل شي 2 وكانوا اصدقائي دايم يشيرون علي بالهروب وان نص الشجاعه هي الهروب ولكن لم استطع ولو مرة الهروب وحتى لو انجلدت وانضربت وجتني اهانات لكن مااهرب واقعد ونصها تكون مواجهه ونصها تكون واقف اطالع فيهم وساكت ,كنت اذا جت مشاكل بيننا وبين احياء ثانية في الكورة كنت اخذ خشب والاحق واكسرها فوق روس لاعبين الفريق الثاني واستغرب الحين من نفسي اني كنت اسوي هالحاجات
ابي اذكر لكم اني انسان دمعتي تنزل بسرعه حتى بالافلام والمسلسلات ودايم احاول اخبّي هالشي لاني اشوفه علامة ضعف
ابوي وانا صغير كنت اذا جيت اشتكي له ان احد ضربني,يضربني كفّ وانا ابكي ياخذني للشخص اللي ضربني ويخليني انزل وادخل بيته واضربه كفّ وارجع له)))
وطبعاً كتبت هالمعلومات يمكن فيه رابط بينها وبين المشكلة اللي اعاني منها
كل اللي ذكرته فوق تفاصيل عني وبنبدأ الحين بالمشكلة
أنا أنسان بارد جدّاً ولكن عند الغضب أصير شخص أخر مايهمني الشخص اللي امامي او كم عمره وراح يعني اذا حصلت مشكلة مهما كان نوعها ومهما كان قوتي او ضعفي طبقاً للموقف نفسه الا اني اضرب بكل هالكلام عرض الحائط وأصبح إنسان آخر لاأخاف أبداً رغم اني اخاف
ولاأخاف المواجهه رغم اني اخافها
اسلوبي يصير زفت وانافخ وهالشي اهلي يعانون منه لكنه نادر الحصول يعني كل شهرين او ثلاثه مرّه
ادري ان كلامي ملخبط لكن راح تفهمون
اعطيكم أمثلة
1-مره جيت اتضارب مع 3 اشخاص عند مجمّع معيّن بسبب تلفظ واحد منهم علي
المشكله اني بقرارة نفسي اعرف اني راح انضرب منهم لكثرة عددهم وانا لوحدي لكن هالشي مايثنيني وفعلاً خشيت فيهم وبغيت اتضارب لكن الله ستر وفرقوا بيننا
2-قبل شهرين المشرف علي في عملي اشتد النقاش بيننا وهددني بإعلام الرئيس الكبير بماأفعله طبعا وهو يكلمني طبعاً قفلت بوجهه ورحت له مكتبه ورفعت صوتي عليه وقلت له تهدد؟اتصل على الرئيس وعلمه وأ*** ماشوف انت ويّاه واعطيته درس عن الاسلوب والتهديد والإحترام وطبعاً كل ذا بصوت عالي وبإستراتيجية هجوميّه
هذي صور من صور الغضب حقي طبعاً مو بسهولة أعصّب ونادرر جدا لكن اذا عصبت احس اني انسان متفلّت وهذا الشي يضايقني لكن المشككله مو هنا
المشكلة ان اذا حصل لي موقف زي كذا نبضات قلبي تصير سريعه جدا جدا واحس ان جسمي كامل يرتجف وهذا الشي يحرجني واحاول اني اتحرك كثير عشان اللي امامي مايشوفني مرتجف
واللي يقهر دام اني مرتجف اكيد خايف وانا صحيح ان فيني خوف لكن دامي خايف ليش ماأخاف مثل الناس الباقية اللي تسكت او تتدارك الامر او تهرب
ليش اخاف وارتجف وبنفس الوقت ماأخاف من اللي امامي وأكون في وضع الهجووم دائماً
شي حيّرني كثيرررر
اني اكون خايف يعني جسمي(ارتجف ودقات قلبي سريعه)
ولاأكون خايف من اللي امامي؟هل اللي انا فيه له علاقه بطفولتي؟
مالمشكلة التي أعاني منها؟هل هي نفسية؟إنفصام؟؟
هل انا خائف فعلاً وجبان وكل هالمحاولات من عمري 14 الى 25 الان لاكتسابي الشجاعه كما قال عضو في موضوعي بقسم المشاكل الإجتماعي؟؟؟؟؟
احس اني بداخلي خواف لكن كأن في شي مبرمج بمخي ان اذا حصل مشكلة او عصبت اتحول لشخص ثاني كانه شخصية الرجل الاخضر دكتور طيب جدا وخواف لكن اذا تحول لرجل اخضر يكسر الدنيا مدري ؟؟
انا راضي باللي تقولونه لي لان فوق كل هالإقدام واسلوبي الهجومي المشكلجي تروني جدّاً محترم ومره جا بيني وبين ابوي نقاش وقال ((هذا ورجال جماعتنا حاطينك مثل أعلى لعيالهم))<<يقصد بالاحترام لان ع كل ذا اغلب وقتي صامت وهادي جدّاً وعلى الرغم من مقدرتي العالية في تكوين الصداقات الا انني افضل الوحدة
وأعترف اني اعرف ان داخلي انسان هشّ وحسّاس زي ماسبق وكتبت لكم فوق ان اغلب الافلام اللي اشوفها ابكي
امس دخل علي ولد عمي الكبير عمره 33 منقطع عن اهله وعائلتنا ومطلق ومانشوفه الا نادر جدا
اول ماشفته ضحكت وتجمع الدمع بعيوني بغت تنزل لكن تداركت الأمر
(لاحظت شي على ابوي ,على شدته وجلفته وغلاظته وع اللي كان يسويه معنا وحنا صغار الناس كانو يعلموني انه راعي مشاكل جدا وهو صغير,الا اني مره وريته مقطع عن رئيس عربي سابق الله يرحمه وبالمقطع يذكرون محاسنه وكيف كان ..وشفت عيون والدي تدمع )
مدري اخذت هالشي منه وراثيّاً ولا لا؟؟مع العلم بأني اكره هالصفه
بالأخير خوفي الأكبر من أني اكون نسخه منه(بشدته وغلاظته ومشاكله وهواشه)
والله اكبر خوفي إني فعلاً شديد وغليظ ومشكلجي ولادريت عن نفسي
لاني ماابغى اكون كذا
ابغى اكون طبيعي
المطلوب تعلموني وش اللي اعاني منه وطمنوني
لانّ اول مره بحياتي افضفض وماخفي أعظم
ادري ان مشاكلي متشعبه لكن كلها تدور حول نقطة وحده
بإنتظاركم
01-11-2012, 07:42 PM
ضوابط المشاركة
العرض العادي
