بسم الله الرحمن الرحيم

والصلام والسلام على أشرف الأنبياء والمرسلين سيدنا محمد وعلى آله أجمعين

السلام عليكم ورحمة الله وبركاته .

إليكم قصتي اقصها لكم لعل وعسى ألاقي الحل معكم

كنت فتاة في السابع عشر من عمري أدمنت النت وكنت ادخل دردشة صوتية لمجرد التسلية التثقف من

خلال المسابقات الثقافيه التي تقام بها كنت اتعامل مع من في الدردشة بكل ادب وخلق وكنت اعتبرهم

أخوة وأخوات لاغير ماكنت مثل اي بنت تدخل دردشة وتتعرف على شباب وتكلمهم خاص وتاخذ إيميلاتهم

وتضيفهم وتكلم ذا وتكلم ذاك لمدة ثلاث شهور وانا على هالحال حتى الكل قام يحترمني لدرجة لما عرفوا

عمري ماصدقوا انه هالعقل والثقل يطلع من وحده في سني على قولتهم سن مراهقه واي وحده في سن

مراهق ينقدر ينلعب عليها بعد هالثلاث شهور تطورت وصرت مشرفه في احد الغرف في الدردشة وكنت

مسؤوله عن اي غلط يصير وكانت عند مسؤوليات الكل يعرفها والكل كان مايرفض لي اي طلب مرة من

المرات كنت داخله بنك الإشراف وجا واحد من الشباب يبي مساعده طبعاً هو مشرف بعد في غرفه ثانيه

وصارت بينه وبين احد المسؤولين في نفس الغرفه مشكلة وعطاه طرد جا للغرفه اللي انا مشرفه فيها

يستنجد واخذ المايك وقال مشكلته طبعاً بما اني مشرفه والكل يعرفها دخلت عليه خاص وهذي اول مره

ادخل على واحد خاص واكلمه وكان مجرد كلام عادي عن المشكله وانه انا بروح اتصرف ويا المشرف اللي

عطاه طرد وفعلاً حليت المشكله له وانفك عنه الطرد بعد هالشي قام كلما يزورني ويتكلم وياي والكلام كان

عادي عن اي اشيا تافهه دخل قلبي هالإنسان وعزيته وتعودت على انه يكلمني كل يوم وفي يوم من الأيام

عطاني ايميله واخذته لكن ماضفته على طول إلا بعد ثلاث ايام تقريباً حتى الدردشة قطعتها هالثلاث ايام

وتطورت علاقتي به على المسن وحبيته بس بعد ماقلت هالشي ولا بينت اعترف لي هو انه حبني ويبي

يتزوجني وثقت فيه وعطيت معلومات عني وعطيته إيميل خالي يتعرف عليه واتعرف بعد فترة خمس شهور

من تعرفي عليه ضميري أنبني وتركت النت كله طبعاً قبل ما اترك النت قلت له اني خلاص ماراح ادخل وإذا

هو يبيني يعرف طريقي لأني حسيت بالغلط اللي جالسه ارتكبه وفعلاً تركت النت لدرجة اني نسيت

هالإنسان مجرد ذكرى كان لي مر في حياتي وفي يوم من الأيام جا لي خالي وقال انه فلان طلب يدش انا

انصدمت معقوله سوا اللي في باله وماكان يكذب علي طبعا اهلي في البداية رفضوا لأنه هو من مكان بعيده

عن ديرتي بساعتين لكنه كان مصر علي لدرجه انه سبع مرات خطبني واهلي يردونه وآخر مره وافقوا اهلي

ووصل الخبر له جا اهله وخطبوني رسمي بالرغم اني كنت متخوفه لكني لما استخرت ربي طلعت الخير زينه

وتوكلت على الله ما ابي ابدأ من ايام الخطوبة ابي ابدأ من تزوجنا تصدقوا إنه ثاني اسبوع من زواجي ضربني

الناس يجوا يباركون لي وانا مضروبه ومتهاوش وياي حتى ماحاول انه يتأسف لي قلت في داخلي محنه

وتعدي ويتغير لكن بعد شهرين رجع وضربني وكنت وقتها توني في بداية حملي ومن الشهر الأول لين الشهر

السابع مافي شهر يمر علي ما انضرب منه ومو اي ضرب لدرجة انه الضرب يبين في جسمي صبرت علشان

اللي في بطني وللحين صابر بالرغم من هذا كله مايصرف علي من تزوجته ماصرف علي بابا هو اللي يصرف

ويعطني حتى المولوده اللي باقي لها شهر وتطلع كل شي اشتريته لها من عند بابا غير هذا يجيبني بيت

اهلي ويرميني بالشهر وبالأسبوعين لا يسأل عني ولا شي ولا كأنه متزوج ولما شفت هالتصرفات منه قمت

اشك واقول في قلبي مافي رجال يستغنى عن زوجته هالفترة ومايكون عنده شي اكيد السالفه فيها بنات

وفعلاً كذا مره اشوف في جواله رقم بنت وكل مره يألف لي قصه عن الرقم اللي اشوفه وانها كذا وكذا طبعاً

ماصدقته لأنه البنت اللي يكلمها تتصل في اوقات مالها داعي آخر الليل والساعه اربع الفجر في وحده تتصل

على واحد متزوج في هالوقت ومايكون بينها وبين هالشخص شي ومرة شفت رساله راسلنه هو لها كاتب

فيها اقدر اكلمك انا سالفة البنات ومن كثر ماكلمته فيها ومو راضي يتوب وفوضت امري لله ونار جهنم هو

اللي بيدخلها طلبت منه الطلاق مو راضي يطلقني يقول لي إذا تبي الطلاق انتي اللي روحي المحكمة

واطلبي خلع وترجعي لي كل ماصرفته في الزواج الكل كلمه ابوه امه اعمامه بابا خوالي مابقى احد ماكلمه

مو راضي يترك افعاله وتصرفاته وكل كلمه قال انا رجال قولولي في رجال يسوي في زوجته هالشكل لما

سألته ليش ماتبي تطلق قال لي مو حباً فيك بس علشان اللي بطنك بالرغم انه ماصرف شي ولا ريال علي

وعلى اللي في بطني قلت له طيب اللي في بطني شلون بيعيش وياك وانت اسلوبك معاي هالشكل

حقران تحقرني ضرب وتضربني نومه في غرفة النوم ماتنام وياي بنات وتكلم حالتي النفسية مت حملت

ماعمرها تحسنت ماشفت الراحة لا في راحة بال وقلب وجسم تعبت من جد تعبت انا الحين في بيت اهلي

جالسه واهلي مسافرين حتى السؤال ماسئل عني بالرغم اني وحده شكلي مافي شي الحمد لله على

هالنعمه عمري ما اهملت في نفسي ولا في بيتي ولا فيه هو بعد حتى الهدايه اجيبها له بس علشان

يتغير سئلت فيني شي مو عاجبك شكلي مو عاجبك قال لي لا إذا طلبتني امتنعت عنك قال لي لا مهمله

في بيتي ما انظف ما اغسل ما اطبخ قال لي لا طيب شاللي يخليك تسوي فيني كذا ضارب بي عرض

الجدار ولا كأني زوجته لا يشاركني في همومه يسوي اللي يبي وانا يمنعني عن كل شي سوي كذا وكذا

وياويلي إن قلت لا وانا على وشك ولادة في هالشهر تعببببببببببببببببببببببببببببت والله العظيم تعبت افكر

فيه ولا في نفسي ولا في اللي بجيبه ولا وشو ولا وشو خلاص حياتي دمرها اللي يشوفني يقول بنت 30

أو 35 سنة ماني بنت 21 سنة من الهم اللي انا فيه اكتب قصتي والدموع تطيح ماني قادره تحملت بما فيه

الكفايه احس اللي ماخذني وحش مو إنسان الله يرحم والديكم ساعدوني قولو لي شسوي شنو الحل

يجزاكم ربي خير .

انا مو تفداه روحي كنت اتوقع هالشي بس الحين لا لأنه ما يستاهل انا الحين بقااااااااايا روح .

وآسفة طولت عليكم بس ياليت ألاقي حل منكم .

تحياتي والسلام قبل الختام .

اول شي نبارك لج بالحمل وان شاء الله تولدين بالسلامة

هالرجال يمكن بالبداية فعلا حبج او مثلا كان معجب باسلوبج ووو فتمسك فيج ولا تنازل الا لمن تزوجج بس لمن صار الشي واقعي اذا اهو متعود على هالسوالف بنات وما ادري شنو خلاص صعب يترك هالامور وسالفة الضرب بما انه ضرب مرة اولى خلاص ممكن يضرب مرة ثانية وثالثة ورابعة لان الرجال السنع مستحيل يفكر يضرب مهما كان بوقت قهر....بس ما قلتي لنا اهو شنو الاسباب الي تدفعه الى انه يضرب؟. هل جدال حاد او بدون سبب ولا شنو؟

يبي له وقفة جدية ثانيا امور النفقة ترى يصير الواحد يشتكي على الزوج بالمحكمة انه ما ينفق ولا سمح الله حتى لو تطلقتوا همبعد من واجبه اهو ينفق على ولده بس يمكن انتي ما تبين توصلينها للمحاكم واكيد في قلبج مساحة حب له بيوم من الايام حتى لو اهو قضى هالحب بتصرفاته ومات بداخلج لكن اكيد في مساحة له بقلبج ويمكن هالشي والصدمة والخوف اهو الي منعج تتصرفين من البداية

تحركي على روحج شوفي اهله اتخذي موقف جدي وخل اهلج يتفقون مع اهله اذا ما وقف هالتصرفات في حلول كذا وكذا اذا ما كو حل ولا بد من الطلاق مع انه أبغض الحلال شتسوين بعد مع ان حرام انتي بعدج صغيرة والطلاق مو شي هين والولد حرام يتربى بين ابوين منفصلين

عموما تحملي بروحج وايد ولا تهمين روحج بالتفكير ترى يأثر على الطفل بعدين يطلع لج عصبي وشيطان ويأذيج في تربيته

الله يفرج عنج يا رب

شووفي حبيبتي انتظري الى ماتنجبين اللي في بطنك لان اغلب الازواااج يتغيرووون ميه وثمانين درجه بعد مايصبوحووون اباااااااااء..

واذا ماتغير الله يعييييييينك عمري ..الله يفكك ولايبلااااااااانا ياربي

__________________

أول حاجة احتسبي أجر ضربه لك وتعبك عند الله حتى لا يضيع عليك الأجر،
ثانيا حاولي ماتحملين مرة ثانية لين تتضح الأمور
ثالثا لا تسمحين له يمد يده عليك أبدا وإذا فعلها هدديه بأبوك وإذا ثبت فالقاضي ممكن يخلعك منه بلا عوض
رابعا لا تسمحي له بأن يكلم بنات مهما كانت المبررات، وجلوسك في بيتك أهلك خير من الجلوس مع واحد يكلم بنات!!
خامسا لا بد من تدخل أبوك لأنك كما يبدو في مرحلة ضعف والرجل استقوى عليك، فإن صلحت الأمور وتعهد لأبوك بحسن العشرة والابتعاد عن الحرام فالحمدلله، وإلا فلا ترددي في الذهاب للمحكمة وطلب الخلع ولن يحكم القاضي له بالعوض إذاثبت سوء عشرته(حاولي جمع اثبات على كل ما تتهمينه به)
سادسا إن كتب الله طلاقافاعلمي أنه ليس نهاية الدنيا ، بل قد يرزقك الله بخير منه.. من يقدرك ويحترمك،ولا تخافي على المولودة فلن يضيعها من خلقها ولا تحرقي نفسك وتذهبي شبابك لأجل من لايستحق،
أسأل الله أن يفرج كربتك ،،وطمنينا ‘ن أخبارك أولا بأول

__________________
أستغفر الله العظيم وأتوب إليه

السلام عليكم

اشكركم على المرور وقراءة قصتي بالنسبة لك Hr4 الله يبارك في عمرك أولاً وثانياً سؤالك عن سبب الضرب عصبية يعني مافي سبب محدد للضرب لما يكون عصبي يضربني حتى لو كان جدالنا على سبب تافه انا كفايه اللي فيني هالوقت مافيني على شدة محاكم ابيه هو يطلقني من نفسه دام انه لهدرجه عايفني ماني جابرته يضل وياي يفكني منه ومن تصرفاته صحيح حبيته لدرجة انه الفترة اللي راحة ماكنت مرتاحه وياه بس الحب اللي حبيته له مو شويه والكل يعرف عالشي زكل مشكله تصير بينا ويجلس احد وياه ويكلم يوعد انه يتغير بس ماشي فايده يرجع على عادته حاولت وياه بكل شي قالوا لي الرجال يحب وحده تلبس له كذا وكذا بالرغم اني ماني مقصره في هالشي من يوم انا بنت ومعروف عني إهتمامي في نفسي من لبس ومن نظافه ومن كل شي الحمد لله عشت في بيت بابا في عز كل شي مجاب لي كل شي ابيه احصله اخذته ماشفت منه شي غير الإهانه والمذله ومعه هذا كل ماقمت اشتكي قدرت ظروفه في كل شي يجازيني بضربه وبتصرفاته الشينه ليش انا في البداية ماكنت افكر في شي اسمه طلاق بس ما اعتقد فيه وحده تتحمل هالشي يجيبني بيت اهلي ويخليني بالأسابيع وإذا جابني يهددني مافي تطلعي مكان لا سوق لا بيت جد لا مكان وبعدين إذا انا اللي طلبت الخلع من وين بجيب له فلوس اللي صرفها على قولته
الله اعلم بالحال .
بوبولر هذي صابره واقول والكل يقول لي اصبري لين بعد الولادة يمكن يتغير بس انا ما اتوقعه يتغير لأنه هو يبيني مو علشاني انا علشان اللي في بطني بس وانا مستحيل اعيش مع إنسان مايحبني ولا يحترمني هو مو بس مايحترمني انا للأسف مايحترم احد لا كبير ولا صغير واللي مافيه خير في اهله امه وابوه ولا يطيعهم في شي ما اتوقع مثل هالإنسان يتعدل إلا بقدرة قادر سبحانه وتعالى قادر على كل شي ولادتي آخر ذي الحجه إن شاء الله يعني قريبه وبنشوف .

شكراً لكم

شكراً مرورك أختي منت عاجبني اشكرك على دعائك واتمنى ان تكثري منه لأني محتاجه فعلاً للدعاء .

سامي للأسف بابا طيب جداً على نياته مثل مايقولوا وهو مايبي لي الطلاق لأني اول بنت له وخايف من شي اسمه طلاق دايم يجلس وياه ويتكلم وياه كأب له مو عم وابو زوجته ويوعد ويقول خلاص بيترك كل شي
بس يرجع على حاله للأسف وعن الضرب شلون اخليه مايضربني وهو اقوى مني ما اقدر اسوي شي وعن انه يكلم بنات هالشي مو بيدي امنعه شقوله لا تكلم بنات قلت له ألف مره ولا سمعني وانا الحين في بيت اهلي وماراح ارجع له إلا إذا تعهد وحلف على القرآن انه مايتجرأ يسوي لي شي ولا انه يطلق .

الله يفرج عنك اختي عليكي بقراءة سورة البقرة يومياً واني أظمن لك ان حالك راح يتغير

شكراً أختي عذابة .

أختي الضرب يكون نفسي من كلامك عنه تحليلي المبدأي شخصيه ساديه بمعنى يتلذذ ويستمتع بضرب وتعذيب الآخرين والتملك لديهم فظيع أنت كنت بالنسبه له الشئ الممنوع والمرغوب في ذات الوقت حاول جاهدا تملكك فهو ربما يرفض فكره ان يقابل بالرفض من شخص ما فما بالك من قبل فتاه وحينما تزوجك ظهرت كل التراكمات النفسيه والتصرفات العدوانيه على جسدك ونفسيتك الحل هو الأرشاد النفسي وان لم ينفع فمن الأفضل الأنفصال لسلامه ابنتكما النفسيه... في رعايه الله..

__________________
كل الشكر والتقدير للمجموعه السعوديه لدعم مرضى الصلب المشقوق على ثقتهم بي وأتمنى للحمله النجاح كما الرياض (احتواء،لأننانحبهم نحتويهم)