من الصح .. انا ولا هو // عاااابرة سبيل
أحبائي أعضاء المنتدى الكرام
السلام عليكم ورحمة الله وبركاته
ندخل في الموضوع .. زوجي الله يخليه لي .. جايلتله فرصة عمل ما تتفوت .. مدير تنفيذي لشركة اسلامية كبيره جديدة .. مدخوله الشهري راح يكون اكثر من ثلاثة اضعاف راتبه الحالي .. ايضا مع سيارة خاصة له مع السائق ..
اصحاب هذه الشركه .. واثقين في قدرات زوجي ثقة كبيره .. ويلحون عليه انه يوافق على تسلم زمام امور هذه الشركه .. ايضا (عشان تكونون بالصوره) هو في المراحل الاخيره لتسليم شهادة الدكتوراه في انجلترا ومجال دراسته هي نفس تخصص عمل هذه الشركه ..
زوجي .. محتار .. يوافق ولا لأ .. وقعدنا نتناقش :
انا : يا زوجي يا حبيبي .. ليش محتار .. مافي حد عاقل يرفض هالعرض
زوجي : أصحاب الشركه معلقين علي آمال كبيره وانه لازم تكون من اكبر الشركات خلال سنة مسئوليه كبيره علي ..
انا : وانت يا عمري قدها .. هم ما اختاروك من فراغ .. هم يعرفونك ومتعاملين معاك .. يعني انت تتصور يختارونك لشركه كبيره مثل هاذي .. من غير تفكير وتمحيص ؟؟
زوجي : إيه .. بس تصوري اني لازم ابني هالشركة من الصفر .. من لا شىء .. موظفين جدد .. إدارة جديدة .. من وين اجيب كفاءات عاليه .. تساعدني على شغلي ؟؟
انا : انت يا قلبي مو قاعد تستخير ؟؟ وش تحس ؟؟
زوجي : محتار .. والله مازلت محتار
انا : لازم تجدم وتشوف الامور كيف بتمشي .. كلم رئيسك الأعلى (اقصد في شغله الحالي) ..
زوجي : اخاف اكلمه .. وش بيقول .. ما ينقع بعيني .. يدرسوني على حسابهم .. ومعاملتهم معاي زينه .. واطلع عنهم
انا : (استشطت غيضا) كيف يعني .. هاي مستقبلك .. حياتك .. جدك واجتهادك .. تعبك .. سمعتك اللي انت بنيتها هالسنين .. تخاف من كلامهم عنك .. مالهم حق يقولون عنك أي شىء .. حتى المدراء التنفيذيين يطلعون من مؤسستهم .. لضعف رواتبهم .. انت نسيت انك عندك اطفال ولهم مستلزمات .. نسيت اني احتاج اقعد في بيت بروحي استقل فيه .. نسيت اني ودي اتفرغ لعيالي وبيتي واترك الشغل اللي ذابحني اطلع من الصبح وما ارد إلا العصر .. (وتصب دموعي مدرارا) ..
دخلت غرفتي وارقع بالباب .. الصراحة عورني قلبي اول مره اتنرفز عليه جذي .. بس بذمتكم قولولي في واحد عاقل يجيله مثل هاي العرض ويرفض .. زيادة على الراتب المغري اللي عارضينه عليه .. هو بيكون له مكانه في المجتمع .. هاي مو أي شركة عادية شركه كبيره ولها صيت وإسلامية بعد .. يعني فيها خدمه لدينه .. يعني العرض بالضبط مثل ما يبغي ويتمنى .. هو دراسته في هالمجال ودايم يقول ودي اخدم ديني واسلامي .. شتبغي اكثر .. جاتك لغاية عندك .. ومن يشاور أي حد يقوله هاي فرصتك الذهبيه .. ولازم تستغلها .. قاعد يقولي .. شبيقولون عني .. وما ينقع بعيني ..
والله قهرني ..
بذمتكم قولولي .. انا الصح ولا هو
__________________
الى زوجي
يهمك تعرف اوضاعي ..؟ انا مستانس وطيب
انا مثل البحر تدري .. يثور وتركد امواجه
ابد .. لا يزعجك حزني ..! تأكد .. خاطري طيب
حبيبي ذاك هو طبعي .. احب الحزن واحتاجه ..!
وتنشدني عن أوضاعي ..؟ ارد واقول: انا طيب
مع اني صدق بغيابك .. لا طيب ولا حاجه ..
09-09-2007, 10:21 AM
ضوابط المشاركة
العرض الشجري