السلام عليكم

عندي مشكلة واستخرت وابي استشيركم ( فماخاب من استخار ولا ندم من استشار)

صارت مشكلة بيني وبين زوجي وبصراحه هو انسان مو مقصر بشي بس مشكلته عصبي بشكل غير طبيعي ولما صارت المشكلة بينا مع انها تافهه عصب وانا غلطت لأني استفززته وكان بمكاني اسكت وتتنتهي المشكلة

وغلط علي وزعلت ورحت بيت اهلي وهذي اول مرة في حياتي ادخل ابوي بمشاكلي الزوجية وتوقعت من الوالد الحكمة في الموضوع وقلت ممكن يحل الموضوع بهدوء ويناديه وينصحني واياه ويفهم منا الاثنين اللي صار بالضبط بس للأسف الوالد عصب وقال لا ترجعين له هو مالقاك في الشارع عشان يهينك و الخ ... وكلم ابوه وقال اذا يبيها يجي ياخذها ويعرف قدره واذا ما يبي الباب يفوت جمل ومنعني ارد على اي اتصال يجين منه وقال اذا اتصل عليك قفلي في وجهه وحذرني اني اتصل عليه الين يجي يعتذر وبصراحه ابوي كبر المسألة فووووق حجمها وكان بإِمكانه يحل الموضوع بطريقه غير هذي ، والحين الوالد يشجعني اتطلق اذا ماجا واعتذر عن كلامه اللي قاله في حقي وانا اعترضت على طريقته في معالجة الموضوع وكلمته بس للأسف هاوشني وقال انتي ما عندك شخصية وتبين تعيشين منذله قلت له الحين بينا عيال وهالطريقة غلط قال اذا رحتي له ما اشوف وجهك مرة ثانيه عندي ....

وانا محتاره الحين اكلم زوجي واحل المشكلة هذي بينا ونتصافا وخلاص؟ والا اسمع كلام ابوي وانتظره يعتذر واذا مااعتذر يصير القطيعه والفراق؟

وانا استبعد زوجي يحي يعتذر لأنه يحس هذي اهانه له وشتم الوالد وكلامه فيه وفي نفس الوقت اخاف ارخص في عيون زوجي اذا جيت انا اعتذر واصلح الموضوع بنفسي ويتمادى في الايام الجايه اذا حس اني ضعيفة ومحتاجه له....

ارجوكم عطوني من تجاربكم وارائكم انتظركم بفارغ الصبر ...

تم تعديل العنوان ليتناسب مع المضمون