اختي حاولي ماتعلمين اهلك بمشاكلك مع زوجك لجيتيهم او بيني لهم انك مبسوطه عشاان تسكت امك عنك يمكن هي تتضايق ماتبيك تطلقين والاغلب كذا بس ردت فعل امك كذا حاولي تحسنين علاقتك بالهل زًوجك من اجل مصلحتك حاولي تحتوين زوجك انا اشوف اذا مقضي لك وموفر لك بيت ينصبر عليه وش تسًوين انا انصحك وانا بهم مايعلم فيه الا الله
الله يسعدك ويبدل احوالك للاحسن

__________________
استغفر الله واتوب اليه..دعواتكم لي

انا أصلا بطبيعتي كذا مااقول لحد شي غير صديقتي المقربه فقط.. ولا اشتكي واسكت ولاكن الظروف اجبرني افهمهم الوضع .. يعني لما زوجي يشتكي على اهلي مني انا هنا لازم اتكلم أتكلم وابين لهم ..
الله يفرج همك ويصلح حالك وأحوال المسلمين. .

الله يعينج و يفرج همج ويصبرج

بقولج كلام ومااقصد أبدا انج قصرتي او سويتي أشياء غلط .
شوفي حبيبتي

أحيانا تواجهنا مشاكل مع الناس و نحاول بكل الطرق انها تنحل لكن ما تنحل .
نحاول نفهم ازواجنا وجه نظرنا .. لكن ما توصلهم او توصلهم لكن ما في شي يتغير
نواجه مشاكل مع اهالينا .. أهل ازواجنا .. صديقاتنا
و وننتظر يفهمون غلطهم و يتغيرون

لكن ما بيتغيرون الا بطريقة وحده وهي مفتاح الحل و باذن الله سبب لراحتج النفسية .
الطريقة

انتي اللي تغيرين تعاملج

الاسلوب اللي مشيتي عليه ما جاب نتيجة .. خلاص غيريه .
وبيكون صعب شوي لانج مب متعودة بالاضافة لانج اطبقين أسلوب ممكن ما تكونين مقتنعه فيه 100% .

رأيي والله أعلم ...
تعاملي في حياتج على انج صاحبة القرار .. مااقصد عناد وضرابه ..لا
عجبتني طلعتج من بيت اوبج و تفكيرج بنفسج و بناتج

بالنسبة لأهل زوجج ...
أمه اتصلي فيها تحمديلها بالسلامة و خليج مرحة مب كانج تتكلمين بالغصب و بنفس الوقت رسمية .
خل لهجتج بالكلام توضح انج سعيدة .
ان حاولت تستفزج وتذكر مواقف و تهين ... قوليلها كلام يصكر الموضوع ويبين انه مب مأثر فيج الكلام او ماخذ من تفكيرج .. مثلا : حصل خير .. سهلة .. ربي ييسر .. مافي بيت يخلى من المشاكل ...الخ
او لو زودتها فجأة اقطعي كلامها و قوليلها بنتي خاطرها تكلمج كانت تسأل عنج و عطي بنتج السماعه .

هذا لو فتحت مواضيع اما انتي لاتفتحين شي و لا تناقشين .. لانه ما في نتيجة غير انج تكبرين الجروح .

زوجج ..
لما يرجع من السفر . خليج عادية معاه ووضحيله من تصرفاتج انج مرتاحة بحساتج ومب شاله هم .
وقوليله .. اوه كلمت امك و بنتك تسحب التلفون الا تكلم جدتها .. قولي السالفة بتلقائية . و اذا قال اعتذرتي .. قولي تراني كلمتها والحمدلله الامور طيبة . و الحمدلله صحتها تمام
ان زودها وتم على راسج .. قوليله اش فيك الامور تمام وشو رايك ناخذ هدية ونروح لها .

لاتعطيه جواب واضح . انج مااعتذرتي . لفي ودوري
فهمتي شو اقصد انتي صاحبة القرار
خذي حقج وسوي اللي تبينه بأسلوب يضمن حقوقج .

أهلج

شوفي ما في أحن عليج منهم وان قسوا
تحملي يااختي
سوي شي او خذيلج شي من برع .. و لبسي وكشخي وادخلي عندهم بثقة ونفسية حلوة وان كانت مصطنعه .
و خليهم يفهمون من كلامج او هيئتج انج مرتاحة في بيتج .
و اتبعي اسلوب الجواب المختصر المبهم .
لاتخلين حد يعرف تفاصيل حياتج .
امج مثلا سبت او عايرت بطلعتج من البيت .. قولي ترا كل اغراضي هناك فاريح لي .
او اي شي تسكتين السالفة .
حبيبتي حتى لو تضحكين من برع قلبج وتقولين الحمدلله بناتي مالين علي حياتي او فديتها فلانه طول الوقت تسأل عن أبوها ما هانت علي .

اهم شي لا تعطين معلومات .. حاولي ما تتأثرين .. لا تناقشين .. لا تجادلين ..
لانج ما بتطلعين بنتيجة غير نفسية مدمرة .

و لا تمين مبوزة و داقه حزن .. خلج وسط يااقلبي
فالبداية مثلي الدور لكن باذن الله مع الوقت تتقنينه وترتاحين من التدخلات .
و من الدق بالكلام . و بيصير تفكيرج ايجابي و شوي شوي تنسين هالمشاكل .

اهتمي بنفسج و بناتج . اهتمي بتفاصيل كنتي غايبة عنها
حطي لج ورد من القران .. سوي حمام زيت لج وللبنات .. العبي معاهم و ابتكروا اشيا حلوة من تسريحات او لبس لون موحد .. اطبخي شي جديد .. ..الخ

اخر شي يا في بالي
هو انه تشغلين سورة البقرة في البيت و ترقين نفسج و زوجج و البنات . و فيه طريقة كتبها رجل الرجال بتلاقينها في قسم العلاقات الاجتماعية

هذا اللي عندي
واتمنى لو حد عنده رد معارض يكتبه .. مابا الحرمة تتورط بردي .

مجروحة هل وظيفتك مريحتك ماديًا ؟
سبحان الله الوظيفة بالنسبة للشخص استقرار وأمان ، ياكثر اللي اعرفهم بعد ما يتوظفون يرتاحون ويرضون ع حياتهم ويعيشون بشكل طبيعي ..

الحمدلله ربي رزقك الصحة ورزقك الوظيفة ورزقك الذرية الطبيعية .. الحمدلله اشكري ربي على هذي النعمة .. ولابد من المنغصات هذي الدنيا .

ولو أنا بمكانك بصراحة بدق .. ولاا يهمني
اول كنت اكل بنفسي واضيق خلقي واكتم ويضيق صدري .. بس الحين مطنننننشة ولا يهموني الناس

وعادي بكلمها جوال واقعد اكش ع السماعة براحتي واكشر براحتي 😂 هي كلها دقيقة حمدلله ع سلامتك ماتشوفين شر ..
ولو انا منك بدخل بعيونهم بروح مغربية واخذ معي بوكيه ورد او صينية تشوكلت واكشخ واكشخ بناتي واروح لهم ..
اكيد بيكون عندها ضيوف ومستحيل تقط لك كلمة روحي نص ساعة وتلييوقي معها واطلعي وارسلي لزوجك رسالة انو عشانك اغلى شخص عندي اخذت اكبر بوكيه ورحت ازور اهلك انا وبناتي ورضاك اهم شيء عندي وبلا بلا بلا

واهلك بعد سايسيهم ، تقولين امك تنشر حياتك خلاص بطلي تتكلمين
بطلي تنامين عندهم .. روحي زيارة خفيفة مغربية او عشاء وارجعي بدري ..
اضغطي ع نفسك لانهم اهلك ورضاهم عليك اهم من رضا اهل زوجك عليك

خلي حياتك كلها مسايسة ..

وعارفة انه مب هذا اللي تبين تسمعينه بس هذا الحل برأيي لانك جربتي تتصادمين مع زوجك ومع اهله ومع اهلك ولا استفدتي .. فجربي المسايس والذكاء الاجتماعي

أهلاً بك يا غاده
لا والله وظيفة غير مريحة ماديا..
راتبي الف ريال والحمدلله. .. بس اقول لنفسي لو هي خمس ميه تجيني كل شهر اكيد بتفك مني ازمات .. خصوصاً وضعي مظطرب .. فالحمدلله على نعمته..
بالنسبة للراحه فأنا مرتاحه بدوامي الحمدلله خصوصا اني تعرفت على ناس طيبه و الدوام بالنسبة لي متنفس الصراحه اتنفس منه..

وبالنسبة للمكالمه عادي حتى انا مثلك وبكش بكل يديني على السماعه مثلك هههه
بس ما ابغى زوجي يجبرني اروح لهم كل يوم ...!

أكيد هذولاء اهلي وايش مايسوي يبقون اهلي صيحيح مضايقه كثير من الي صار بس رحت وخصوصا جدي ابو ابوي معصب واتصل يسأل ايش فيني وليش ما ازورهم وانه مشتاق لبناتي
فعتذرت بالدوام والتعب .. ورحت لهم ولابينت لهم شي ..
شكرآ لردك جزاك الله خير الجزاء.

شكرآ لك على ردك الجميل والنصائح الاجمل ..
مشكلتي ماحب التمثيل ابدا احب اسوي الشي بطبيعتي حتى لو مو عاجبني..
احب اسوي شي مقتنعه فيه مثلا ليش اكذب واقول بنتي تبي تكلمك.. اتصل واسلم واتحمد لها على السلامه وبس.. لاني اشوف انها ماتستاهل اني اعطيها حجم اكبر من حجمها مو قادره نفسي مو قادره تتقبلهم بسبب سوء اخلاقهم.

اشكرك على نصائحك وانشالله بعمل بها..

اذا أم زوجك عندها واتس اب ارسلي لها وتحمدي لها بالسلامه أو اتصلي عليها ..هي كلها دقيقه وخلاص, والزيارات لأهل زوجك خليها دايماً مع زوجك اتزوروهم وتجلسي معاه وتخرجي معاه اذا انتي ويا زوجك مااحد راح يقدر يتكلم عليك وهو موجود.
وأهلك روحي العزيمه وانتي كاشخه ومجهزة بناتك وملبستهم ملابس حلوة وخلك واثقة وتضحكي ولا تجيبي طاري حياتك عندهم لا بخير ولا شر أبداً واذا سألوك قولي الحمدلله وغيري الموضوع.
حاولي انك ماتكثري زيارات لهم وخليك غامضة لاتجيبي طاري زوجك او حياتك لا لأهل زوجك ولا لأهلك.
اطلعي لصديقاتك أكثر واننشغلي بهواياتك في البيت ودائماً شغلي القرآن لتهدئة النفوس ..
زوجك الحين بعد هالمشاكل عرفتي ان مالك سند غيره لك ولبناتك مع اني ماافضل تقولي له أبداً عن اللي سووه أهلك. عشان كذا سايسيه في الكلام وطيعي أوامره وحاولي يكون مرتاح في بيته..ايضاً حاولي تتدخري من الراتب واشتري لك أي شيء ملك سواء ارض او شقة تكون امان لك ماتدري وش يصير في المستقبل..

شكرآ لك على هذا الرد
بالنسبة لزيارة اهلة وهو موجود سبق وقلت له ويرفض وحتى وهو موجود معي يقللون من احترامهم لي ويتكلمون علي وهو مثل هالجدار مايرد عليهم بكلمه ولما اصارحه واقوله شفت وش سوو يقو وش تبيني اعمل اقوم اظرب اخواتي والا امي .. اقوله لا بس رد خلهم يحترمونك على الأقل.. يحترموني طيب .. يقول بكيفهم ..
وبعدين اي سند ..!!
سند وهو يجدعني بيت اهلي ويهددني بالطلاق ويهدد ابوي واهلي بالطلاق ويقول ادبو بنتكم و و و انا مارجعت له عشان اني اشوفه هو سند ..
او عشان ماعندي سند ..
رجعت عشان بناتي ونفسيتهم وبس بناتي عندي بالدنيا كلها. . وسعادتهن هي سعادتي

أنا متابع قصتك من البداية

و أظن أنك الآن ستنجحين بإذن الله

ولكن نصيحتي لك لا تزعلي من أمك و كوني باره بها ، أرأيتي حبك لبناتك صدقيني أمك تحمل نفس هذا الحب ولكن خوفها عليك جعلها تكون شديده معك لتافظي على بناتك في جو أسري و لو كان فيه ضغط عليكي قليلاً ولكن ستنجحين بإذن الله

وفقك الله أختنا الفاضلة أكثري من الإستغفار و ذكر الله

رجعت بيت أهلي .. بعد مشاكلي مع زوجي..
طردني برا البيت ورفضت اطلع سبني و طردني ولبست عباتي على اساس بهرب من زوجي والعالم كله..
دق زوجي على ابوي وامي وطلب منهم يجون للبيت.... رغم انهم من رجوعي لزوجي مافي احد رفع التلفون يسأل عني..
جاء ابوي وامي واخذوني من البيت وانا كلمه وحده مانطقت بها..
انا بيت اهلي و نفسيتي تعبانه جدا.
دعواتكم لي