الاخت اللي تقول انها راعية طلعات ماهو صح ماتطلع البيت ولا هي راعية زيارات .
الوظيفة رئيس قسم في واحده من اكبر الشركات السعوديه .
اللي يقولون فاهم الحمد لله لدي من الخبرة في الحياة الشي الكثير الذي اتفوق ولله الحمد على من هم اكبر مني سناً فأنا عملت ولفترة طويله في وظيفة أقابل بها الجمهور بما لا يقل عن 200 شخص في اليوم رجال ونساء كبار وصغار بمختلف العقليات والطبائع يعني الصاحي والمجنون مما اثرى معرفتي الحياتية .
ومن يقول انني لا اصارحها بالعكس اصارحها واطلب منها مصارحتي بعيوبي وأقول لها انتي اصدق الناس بنظري معي قولي لي عيوبي التي قد تكون موجوده بجهل مني لأصلحها مثل ما أنا اصارحك بالأشياء التي لا تعجبني وكلي أمل ان تراجعي نفسك فيها وتصلحيها أو تقنعيني ان نظرتي خاطئة وما اقوله سوء تقدير مني فأنا لا أدعي الكمال وكانت العيوب التي قلت لها يجب ان تنتبه لها :
- ضرب الاولاد فهي تنطلق عليهم بعلاق الملابس الحديد وتضرب بلا رحمة وهذا الشي شفته بعيني وكلمتها به اكثر من مره ولكن لم تتجاوب الا بعد ان قلت ان ضربتيهم ضربتك باللي تضربينهم فيه وأقسمت على ذلك قالت هم يغلطون قلت هم اطفال وهذا يكفي لايعرفون الصح من الخطأ وبحاجة توجيه لا تعذيب واذا كان المخطأ يضرب اجل الكبار المخطئون أولى بالضرب من الصغار وقلت للاولاد اذا ضربتكم في غيابي بمجرد وصولي للبيت ابلغوني ... وانتهى الموضوع وخف ضربها لهم وشرحت لها بأن طريقتها بالضرب مرعبة قبل ان تضرب فهي تهجم هجوم تركض للغرفه وتسحب العلاق وتركض للطفل .
- عدم التكذيب لي فأي شي تسألني عنه اجاوبها عليه وبمجرد ان انتهي تقول ماهو صحيح انت تخبي ماتبي تقول حتى لو كان الموضوع تافه أو لا يخصنا ويعلم الله بأني اجاوبها باللي أعرفه وقلت لها اجل وش هو الصدق تقول مدري بس انت ماتبي تقول قلت اذا معنى كلامك انكي تعلمي الغيب ولستي بحاجة توجيه سؤال لي وانتظار اجابه مني .
- مشاكل اخواتها مع ازواجهم يجب ان لا تدخل بيتنا وتؤثر فيه فأي مشكله لأحد اخواتها تنعكس علينا كأنها تتنتقم من فعل زوج اختها باختها مني وحسيت الشي هذا ولما واجهتها فيه قالت ماهو صح وخواتي ماعمرهم قالوا لي شي لكن انت تخطي وتبي تحطها فيني وفخواتي عساه بذمتك هذا الشي وتأكدت بطريقتي انه اذا صارت مشكله عند اختها انقلب بيتنا عاليه واطيه .
- الاهتمام بنفسها داخل البيت فمن حقي انها تتزين لي ومن حقي اني اشوفها شعرها غير منكوش وحالتها حاله .
- الاهتمام بالطبخ فالأكل ليس مجرد سد جوع فالأكل حلاته اذا تلذذ فيه الواحد وان الشغاله للتنظيف والغسيل فقط ونفسي تكره حتى كاسة الشاي من الشغاله وخصوصاً انها غير موظفه والمطلوب منها شاي قهوه أكل بس .
- عدم التحجج بالتعب والتمارض اذا طلبت حقوقي الزوجيه .
اذكر مره كنت في الشرقيه لمهمة عمل ليومين وانا طالع من الشرقيه شفت سوق الراشد على طول جت في بالي قلت خل اجيب لها شي والقى ساعه حلوه مره وقيمتها غالية شوي ونويت اشتري طقم لي ولها بس شفت السعر بيزود قلت بلاش طقم عندي كم ساعه وحلوين اقيامهم قريبه من هذي ومايصير كله عشان اقنع نفسي اني ما اشتري لي ورحت شريت لها هي ومريت محل العاب واخذت للاولاد وصارت مشكله على الساعه وش عندك جايب لي ساعه وانا عندي شكلك مسوي لك شي وتبي تراضيني سكت ولا نطقت بكلمه وحده والساعه الان لها قريب 5 سنوات ولا لبستها شفتها امس بالصدفه بالدولاب وناسيها .
غير الملابس اللي اجيب لها وتقول انت تجيب لي على كيفك وذوقك اللي يشوفك يقول ماعندي ذوق وانا خواتي اذا بغوا يشترون يشاوروني عشان ذوقي وانت حتى لو رحت معي ماتخليني اخذ اللي ابي تاخذ على ذوقك قلت خلاص ماعاد اتدخل وصارت مناسبه عائليه عند اهلي قالت ابي السوق ورحنا وما تدخلت باللي تختار واختارت شي ماهو حلو وسكت المهم لما جينا من العشا كانت زعلانه دخلنا البيت الا وتقول من اليوم بالسوق معي ولا تقولي رايك بالشي اللي اباخذه قلت هذا طلبك انتي لكن اللي انتي اخذه اش فيه حلو قالت تضحك علي والا تمسخر قلت ليه احد قال ماهو حلو قالت لا بس خواتك اول مره مايسألوني منين جبتيه وبايم من نظراتهم منتقديني عليه والا اول يلصقون بحلقي لين يعرفون منين شريت وابيك بعدين تكون معي بالسوق تقولي على الزين ماهو تجيب لي من نفسك .
طولت بالرد لكن عشان اوضح الصوره صح ولا احد يقول انت ماتصارح والا يقول لي ما اشوف الا السلبيات لكن اللي احب اقوله انا مقهور واللي قهرني كلمة قالتها قبل فترة انت منت قد المسؤليه كانت كلمتها هذي قاصمة وطيحتها من عيني وجادلتها فيها وقلت لها اذا انا ماني قد المسؤليه منو اللي قد المسؤليه اللي يسافر كل شوي برا من ديره لديره والله العالم وش يسووا هناك , اذا انا مو قد المسؤليه منو اللي قد المسؤليه اللي يقصر ويقتر على عياله وانا ماعمري قصرت بشي عليكي ولا على عيالي حتى بالكماليات , اذا مو قد المسؤلية قايم بواجبي مع اهلك واوصيكي خير فيهم واذا قلتي بهدي لهم ماقلت لا , اذا مو قد المسؤليه عمري ما قلت لك اذا صاح طفل صغير بالليل وانا عندي دوام طويل روحي سكتي طفلك برا الغرفه بالعكس اقوم من النوم واتناوب معك شيل الصغير وانتي مره من شلته حطيتي راسك ونمتي وانتي ماعندك قومه الصبح وقلت لك مو معناته اني اشيله عشان اريحك تروحي تنامي , اذا مو قد المسؤليه اذا تعب طفل بالليل اروح اوديه للمستشفى لحالي وانتي نايمه بالبيت ماهمك طفلك واذا رحتي تروحي بعد الحاح مني .
وقعدت تتأسف لكن خلاص ماعاد يفيد الاعتذار .
26-08-2008, 03:40 AM
ضوابط المشاركة
العرض العادي
