ألف مبروك حبيبتي وحمدلله على سلامتك ربي يحفظه هو واخوانه ويجعله بارا بكم ومن حفظة كتاب الله

كملي كتابة ولي عودة ان شاء الله

الله يبارك فيك نور الإيمان غاليتي .. و الله يسلمك

معليه تأخرت ،.

.
.

زوجي و الحمد لله ، مهتم بوظيفته ( وظيفة غير رسمية ) ..

عيبها :
مؤقتة و موسمية ..
راتبها ضئيل و يستلمه بعد الإنتهاء من الموسم بشهرين ..
لا توجد اجازات اسبوعية ..
يعمل بالفترة المسائية ، و حاليا اصبح بفترة العصر ..

.
.

الحلو ، و التغيير اللي حاصل و الحمد لله و أشجعه عليها :

1. أصبح لزوجي هدف في وظيفته ..
إنه يثبت وجوده و على أمل إنه يحصل على ( الترسيم ) ..

2. إنه ( يحب و يعشق ) عمله ..

3. ما يهمني مقدار الراتب ، يهمني ما يجلس عاطل و ينشغل بالسهر و أصحاب السوء و العيش بلا هدف ..

.
.

فين المشكلة ؟


مشكلة ممكن تجاوزها لكن مضايقتني .. بس الحل هو التأقلم ..

الفترة المسائية الي تمتد مرات لشهور ، تزعجني .. لكن بأتحمل عشانه ..
حتى إنه أصبح ( مميز بعمله ) و الرؤساء .. يثنوا عليه و الحمد لله ..

.
.

المشكلة فين ؟؟؟


الراتب اللي يستلمه زوجي بعد عمل و تعب لعدة شهور .. كله يروح عالفاضي ..
و غالبا ، بتسديد ديون اللي تدينها من أجل تصليحات السيارة ..

هو يسوق بسرعة جنونية ،، و هذا سبب من أسباب الأعطال للي تواجهها السيارة ..
و السبب الآخر حسب كلامه ، إنه السيارة موديلها قديم ..

مع إني قلت له حتى أخوي الصغير ..
سيارته موديلها قديم ، لكن ما عمري سمعت إنها دخلت الورشة .. و لا واحد من أخواني ..؟؟؟؟

يعني انقهر ، إنه يتعب شهور و أنا اصرف عالبيت ،، و في الأخير نص راتبه يروح عالسيارة ..؟؟؟

يقول لي :
أنا لمين أصلح السيارة ؟ مو عشانك و عشان الأولاد و عشان ما تحتاجوا لأحد ؟

هذا طبعا أسلوب زوجي .. انه عشانك ، و عشانكم ووو إلخ ؟؟

.
.

الصراحة ، هذه المرة لما استلم زوجي راتبه ..
كنت أمر بضيق مادي ، لإني تحملت رسوم مدرسة ولدي .. و دفعت لمستشفى الولادة ..
و اشتريت أساسيات الأثاث في البيت التمليك اللي انتقلنا له و الحمد لله و راتب الشغالة و غيره ..

فطلبت من زوجي إنه إذا استلم راتبه ..
يساعدني بإعطائي مبلغ 4000 ريال و أرجعها له .. لإني بجد كنت مزنوقة ..
و نفس الوقت ، كنت بأشوف ردة فعله ..

قاللي زوجي ، ما راح أعطيك و ترجعيه لي ..
خلاص اعتبري 1500 ريال تسديد ديوني السابقة لك ،، و 1500 هدية مني ..

صاروا 3000 .. و قال النص التاني بيدفعه عشان السيارة ..
و ما راح يبقى له غير 500 ريال ..

حزنت عليه بداخلي ..
و قبل لا يستلم راتبه بكم يوم ، أخد مني زوجي ( 1000 ريال ) يصلح الكفرات للسيارة ..
و لما استلم راتبه ، رجعها لي ..

.
.

كنت ناوية أرجع له بعد شهر ( 2000 ريال ) ..

لانه ما استفاد شي من راتبه اللي تعب عليه مدة شهور ..

لكن جاني ( بدل ، زيادة عالراتب ) و الحمد لله ،، و أعطيت لزوجي ( 1000 ريال ) ..
كان محتاج لتصليح شي بالسيارة ..

.
.

ما أعرف ؟
هل تصرفي صحيح ؟

و الراتب اللي راح يستلمه أيضا بعد تقريبا 4 أشهر ..
كيف ممكن اتصرف فيها مع زوجي ؟

اطلب منه يصرف عالبيت ؟
أو اتركه خلاص يسدد بها ديونه ؟
طيب كذا ، ما راح يتعود إنه يعتمد علي ؟

.
.

و الأمر الآخر ،، نفسي اشتري سيارة جديدة بالتقسيط .. من أجل أولادي ؟؟
و جلست أفكر ، بدل ما تندفع المبالغ هذه لتصليح السيارة ..
ليه ما ندفعها من أجل تسديد أقساط سيارة جديدة ؟

.
.

لي عودة ، النونو يبكي و ما بغى الرد يطير ..

محتارة بشراء سيارة جديدة .. !!!؟

ابغى اوفر لاولادي الراحة و الرفاهية .. خاصة انه عددنا ماشاءالله زاد ..

.
.

اقترحت لزوجي اني اجيب سيارة .. باسمي ..
تكون لي و للاولاد .. عشان لو نبغى نسافر او نروح مكان ..
و هو يحتفظ بسيارته ..

السبب :
زوجي يسوق بسرعة و تجيه مخالفات ساهر ..
ما احس انه حريص على السيارة ..
و لو جبت سيارة .. ماراح ارضى انه يعطيها لاحد من اصحابه او اقاربه ..

و مرات اقول خلاص اقفل عالموضوع .. بس مابغى السيارة الي نحن راكبينها و كل شوية و التاني بالورشة ..
و راتبه يروح عالتصليحات ..

و برضو لو باجبب سيارة .. اقل قسط بيكون 1400 و سيارة صغيرة ..
و انا عندي الاقساط حقة البيت التمليك .. فراح انضغط ماديا ..

اخر شي ..

لما يستلم راتبه بعد كم شهر ..
كيف ممكن اتصرف !؟؟؟؟

موضوع الراتب والأمور المالية ما أعرف فيها

نصيحتي لك نقطتين

1- خلك وسطية بموضوع التدخين والصلاة ..انصحي احيانا وارسلي مرات ..مرتين بالشهر مثلا لكن لا تزني كثير واعطيه وقته حتى يتغير للأفضل .. التغيير دايما يحتاج وقت وما دام ناوي وقلبه معاكم انا متأكدة انه بيتحسن .

2- موضوع النونو ونومتكم منفصلين أكيد له تأثير على موضوعك أخوتك معاه حاولي بأسرع وقت ترجع نومتك معاه بنفس الغرفة واعطي علاقتكم وقت نوعي .. حتى لو كانت ربع ساعة باليوم ارحصي انها تكون ربع ساعة حلوة ومسليه لكم الاثنين وراحة من مشاكل اليوم كله .

موفقة حبيبتي

__________________

بخصوص الصلاة .. ايش يضمن انه مو ممكن العكس لاسمح الله ؟؟؟؟
اذا الجمعة و مو دايما يروح ..
و لا صلى العيدين .. و لا الفروض ؟؟؟؟

.
.

ترى هذا سبب من اسباب مشاعري الباردة تجاهه ..

ما صار يهمني أمره .. ارى أمامي ..
( شخص فاشل .. من عائلة تصرفاتها همجية و الفاظهم سوقية و تربيتهم مادية )

.
.

عيلتي و اهلي ناس جادييييين بالحياة و العمل .. و كل صحباتي ..

و انا تزوجته لانه حافظ للقران و امام ..

الان هو .. الوحيد بينهم .. الي مهمل صلاته ..
اسوأ واحد في عيلتي .. ماعمره عمل مثل الي يعمله زوجي ..

كنت تزوجت اي واحد من الي تقدموا لي قبل .. و ماكنت اشترطت الالتزام ؟؟؟؟

.
.

أشعر باني حاقدة عليه .. و كارهته ..
جلوسي معاه .. لانه ابو الاولاد .. و لانه يقوم بمصالحنا ..

و أصلا ماينفع معاه تعامل .. غير التعامل هذا ..
لانه معذرة عالكلمة ..

صاير وقح .. لما اخذ و اعطي معاه بالكلام ..

يبغاني انا بس الي ادلع و اهتم و اطبطب ..
مو كفاية كل شي انا متحملته فوق راسي ؟؟؟؟

.
.

و هو بدل مايكفيني شره .. و يخفف عني و يشيل ..
اسمع كل مرة .. عنده مشاكل بالسيارة .. كأنه مراهق او طفل ..
يسوق بسرعة جنونية و ينام و هو يسوق السيارة في وسط البلد ..

.
.

و حكاية غرفة النوم .. ماني مستعجلة عليها .. لاني ماصرت ابحث عنه ..
الفترة هذه انا نفاس و ولدي مايتحمل المكيف .. يستفرغ الحليب على طول ..

فانام بدون تكييف و زوجي و اولادي يناموا في الصالة عشان المكيف ..
لسى جالسين نأثث الغرف .. و الاسبوع الجاي ان شاءالله غرفة الاولاد تتركب ..

لكن يوم كنت حامل بالاشهر الاخيرة .. و كان زوجي ينام بنفس الغرفة معاي .
انا الي كنت ابحث عنه ..
و كنت تعبانة و محتاجة لوقوفه معاي و اهتمامه
بيا و انا في اضعف حالة اكون فيها ..


دحين ماصار يهمني .

صرت اهتم بنفسي .. لو صار فيا شي لاسمح الله ..
ما راح ينفعني بشي ..

اهتم باولادي .. و بيتي و شغالتي و اهلي ..
و صحباتي و قريباتي ..

و على فكرة ..
هو يهتم براحتي قبل راحة الاولاد ..

يمكن لاني ما اهتم فيه كثير !؟؟؟؟؟

.
.

انا مبسوطة من نفسي .. اني ماني متعلقة فيه جدا ..
لاني لو تعلقت و حبيت شخص .. فعاطفية جدا ..

لكن كذا .. باتعامل معاه بعقلي ..
و كل ما اهتميت بنفسي اكثر .. كل ما زادت ثقتي بنفسي اكثر ..
و هو ما حيقدر يكسرني ..

لانه زوجي بالاخير .. تربية اهله و يبحث عن اي زلة علي ..
بس ما أبين له عيوبي ..

.
.

باختصار .

ما صار يهمني أمره ..

بس بيجلس معانا .. يصلي صلواته ..
لو كنت صاحية الفجر مثلا .. ماراح اتركه نايم .. يصحى و يصلي الفجر غصبا عنه ..

.
.

حتى شغالتي بعد فترة .. راح اكلمها عن الصلاة ..
ماحد يجلس في بيتي و هو ما يصلي ..

سكتت و ساكتة عن اهماله للصلاة ..
لكن سكوتي .. لاني ابحث عن بصيص امل ..
او ابحث عن حل ؟

.
.

اما استمراره و تجاوزه للحدود باهماله للصلاة ..
ما اقدر اسكت عنه ..

راح انفجر بيوم .. و الله اعلم متى هذا اليوم !؟؟؟؟

.
.

هو يثول انه يصلي و يهتم بالصلاة .. بس انا شايفته مهمل ..

مثلا صحيته الصبح يوصل ولده المدرسة ..
ما صلى الصبح .. و المفترض يكون صلى الفجر ..
و قام لبس و خرج على طول ..

دحين يرجع و ينام و لا يفكر انه يصلي الصبح
لما يصلي الظهر .. يمكن يفتكر انه ما صلى الصبح .. !!!!؟

.
.

لكن لو لاحظت انه ما صلى .. اقول له ..
ما صليت .. قوم صلي ..

.
.

استنى اخلص فترة النفاس .. و ان شاءالله اشتري منبهين و اصحيه لصلاة الفجر غصبا عنه ..
لو مو عاجبه .. يتركنا و يروح

تويي و انا باكتب الرد .. زوجي ردع بعد ما وصل ولدي و كان بيرجع ينام ..
*رجع

.
.

قلتله .. ماراح تصلي الصبح ؟
ماقمت للفجر ..

ترى ملاحظة من ايام ماتقوم للفجر و لا تصلي الصبح ..

سكتتتت و ملامحي باردة و هادية جدا ..
حتى كلامي كان جدا هادئ ..

بصيغة استفهام كلمته .. مو صيغة امر ..

.
.

جلس شوية و طالع بجواله و قام اتوضأ و صلى ..
حتى بيتأكد .. سالني القبلة كذا مو صح ؟

.
.

و مع العلم .. اني من اكثر من شهر ما كلمته عن الصلاة .. بس مرات كذا تصير مواقف ..
او اكون لاحظت انه من فترة بيهمل .. فما اقدر اتحمل السكوت اكثر ..

يعني دحين لو ماقام صلى .. كنت راح انكد عليه نومته .. و اقول له قوم صلي ..
ماراح تنام .. صلي اول شي .. الخ

و مرات اطنششششششششششششه ..

و دحين عشانه صلى .. باقفل الجوال و اروح اجلس معاه و ادلعه شويتين ..
و اخليه ينبسط ..

الله ياجرك يا روح ... اعرف تعب نفسي اللي تسويه بس عند ربنا ما يشيع شي ومتأكدة انه بتلاقينها بالدنيا قبل الاخرة خير وبركة

__________________