أنا انسانة مسرفة بكل ماتعنيه الكلمة من معنى .. لدرجة كانوا يقولون الله يعين اللي بيتزوجك ع مصاريفك !
أصرف وأبذخ وأشتري ولا يهمني المبلغ وطبعًا مو مني ع حساب أبوي هههههه ومكافأة الجامعة ما أرتاح أبدًا اذا ماصرفتها لدرجة اطلع للسوق واشتري فيها كلها واذا رجعت للبيت ولقيت فكة باقية منها أعطيها اخواني او الشغالة او السواق 😂 وتزوجت وانا نففس الوضع بالعكس زدت هبال مع زيادة الفلوس وكثرة الهدايا جاني هبال مو طبيعي .. وطبعًا زوجي كان يدفع ع أساس انه مامعي مصروف .. وانا بصراحة كنت اقيس ع راتبه يعني مثلا مايضر لو اطلب تشيزكيك اخذه لصديقاتي ب300 من راتبه وبعده بيومين مايضرر اطلب لي بلوزه اون لاين سعرها كذا .. وبعدها مايضرر لما اعزم خواتي بكافيه .. وبعدها اكتشف اني صرفت مبلغ كبير ! فـ جاء زوجي وطلب انه يحط لي مصروف .. وبالبداية عارضت شلون وكيف ! المهم اتفق فاتورة الجوال عليه .. ومشتريات البيت عليه طبعا حتى جلسات الليزر .. ومبلغ 1000 ريال لطلباتي من الاكل بما اني غالبًا بالجمعات ما أسوي شيء دايما اجيب من برا .. وجاب لي جدول بالراتب وحط كل شيء نصرفه من فواتير ومقاضي بيت وقرض الخ الخ .. بصراحة انصدمت صدق فتحت عيوني ! مايبقى من الراتب شيء كله بسبب الخربطة وحنا ورانا بيت ملك ومصاريف ثانية الخ .. طبعا صرت اكثر حرص ع مصروفي .. الحمدلله المبلغ حلو بس صرت استغل وقت التخفيضات السنوية واشتري لو ببالي شيء .. قللت من الشراء وصرت اسوي بالبيت فرق اقل تكلفة .. وصرت اسوي لي جدول كل شهر شيء اوفره اذا بشتري شيء غالي او اذا بباشر ع احد او قطة او اي شيء .. صراحة صرت اعرف 😅 مممم تذكرت نقطة من كثر ما انا خلاص تعودت ع المبلغ ونظمت مصروفي ماطلبت من زوجي بعدها ابدًا حتى عيادة الليزر خصصت لها مبلغ من مصروفي حمدلله .. وهدايا اهدي بسخاء حمدلله ولاحرمت نفسي .. حتى بنتي لما جبتها ماطلبت من زوجي يرفع المصروف مع اني اشتريلها دايما.. طبعا زوجي لما نطلع سوا هو يدفع حتى لو كان الشيء لي مفروض اشتريه من مصروفي .. فهالشيء خلاه يكبر بعيني وما احاسب بيني وبينه .. يعني الرجولة والكرم والنبل غالبًا يجيب نتايج ايجابية معنا احنا يالنساء بس المناسبات والاعياد وما الى ذلك يتكفل بها زوجي .. يعني باختصار بالنسبة لي لما خصص لي مصروف واطلعني ع وضعه المادي وشاورني بصرفية البيت صار عندي مسؤولية وحسيت بالفلوس . |
مواقع النشر |
أدوات الموضوع | |
انواع عرض الموضوع | |
ضوابط المشاركة |
لا تستطيع إضافة مواضيع جديدة
لا تستطيع الرد على المواضيع
لا تستطيع إرفاق ملفات
لا تستطيع تعديل مشاركاتك
BB code متاحة
الابتسامات متاحة
كود [IMG] متاحة
كود HTML معطلة
|