هلابك بكر الشايب
بصرااحة .. مو مبين على لهجتك انك مو خليجية !!
انتي متربية و عايشة بالخليج من قبل .... ؟

عادة لبس البراقع بين النساء مو موجودة في مجتمعي
بس عموماً
أنا أعرف ناس يلبسون براقع
لكن بناتهم الشابات
ما يلبسون حالياً حتى في اجتماعات الأعياد و الزواجات
بس يمكن الجماعة اللي اتي عندهم متمسكين بعاداتهم جداً !


إذا فيه إمكانية تفهمي زوجك من الآن انك لسى جديدة
على هالمجتمع و يبيلك وقت تتعرفين على عاداتهم بدقة

و مثل ما قالت وحدة من الأخوات
إذا كنتي منتي منهم أصلاً ما اتوقع يعتبون عليك إذا ما لبستيه-و الله أعلم-

بالنسبة للبس
فيه ناس من اللي لهم مثل هالعادات
(خصوصاً الشابات)إذا طلعوا يلبسون فساتين راقية و طويلة مع لبسهم للبرقع
و في بيوتهم إذا استقبلوا زوار يلبسون جلابيات فخمة أو بلايز و تنانير ساترة
مع انهم في الأماكن العامة النسائية مثل المدارس و الجامعات ما يلبسون براقع
و منهم كثيرات معهم درجات علمية و موظفات

أسأل الله لكِ التوفيق

__________________
سبحان الله و الحمد لله و لا حول و لا قوة إلا بالله
.

رغم كل الصعوبات ... استمتع بجمال الحياة ...

::

يا حليلك يا بكر .. احسك مجتهدة تبين تندمجين في مجتمع زوجك



أنا سعودية بس ما عندنا كذا .. عادي نغطي بس نطلع بره البيت قدام الرجال بس

اما داخل البيت أو اي مكان بس فيه نساء عادي نفك العباة ونجلس

ونلبس الي نحب

كأن زوجك مو من سكان المدن شكله من اهل ( الهجر )

الله يعينك الوحدة كذا تنسى شكلها إذا دايما بالبرقع

يالله بالعافية عليكم

عيدك مبارك مقدماً

__________________

والله استغربت بجد
انا بحرينيه كلش ماعندنا هذه العادات الا القلييل ومعظمهم الاصل مو بحرينيات
وتوي اعرف ان عاداتهم تخليهم يلبسون البراقع حتى مع الحريم
اني فكرتهم هم مايبون احد يتعرف عليهم بس
لانه اذكر ايام الي كنت في الجامعه كانت معانه وحده كلش ماتشيل البرقع حتى لو كنا كلنا بنات هي اصلها يمنيه لانه احنا جامعتنا خلط وكانت جالسة جنبي اقول لها خاطري اشوف وجهك وكانت ماترضى اني توقعت ماتبي اتعرف على شكلها ما ادري ان هذه عادات
وبعد ايام الي كنت في المستشفى مع بنتي الله يرحمها كانت معانا وحده ماتشيل البرقع مع ان كلنا حريم وفي غرفة الرضاعه مايدخلونها الرجال وكنا احنا نغطي صدرنا وهي ماتغطي صدرها وقت شفط الحليب ووجها مغطى

اني انصحك يا اختي امشي معاهم
الي يلبسون البسي
والي يغطون غطي
صرتي وحده منهم وفيهم
وبتوفيق

__________________
ايارب تاجرني في مصيبتي وتخلف لي خيرا منها

الحمد لله على كل حال

مثل ماقالت اختي اطياف انا صديقتي عوايدهم يلبسون برقع بس الكبيرات في السن اما الشابات ماشفتهم يلبسون رحت اعزي في وفاة ابو صديقتي وحلصلت اغلبهم لابسين براقع واذكر زمان جيراننا نفس الشيء يلبسون الحريم الكبار اما الشابات مايلبسون وبالنسبه للملابس نفس لبسنا عادي ماشفت عندهم شيء غريب يعني مثلا يلبسون جلابيات فخمه وتيورات او فساتين ناعمه

الله يسعدك ويوفقك مع زوجك ويرزقك الذريه الصالحه يارب

__________________
افتقدت كثير بعض الاخوات لي في هذا المنتدى ...
يارب يكونوا بافضل الاحوال ..

اناسعودية بس كلنامن تراب
انااشوف جيراننا كذا يجلسوووووووون بالبرقع وعيب تفسخ المراة عبايتهااا

عندالحريم ودي اخدمك بس ماعندي خبر
الله يووفقك وييسعد قلبك امين ويسخرلك

__________________
دعواتكم لي
الله يجزاكم خير

ماشاء الله تبارك الله
حلو انك توافقين زوجك في اي شي يبغاه
لأنه زوجي يقولي اجلسي بالشيلة مثل امي وانا اقوله انسى مستحيل اسويها
لأنه المجتمع كله مايلبس شيلات غير الكبار وبس
أما الصغار لا
تحياتي لكي

حبيباتي كلكم لي رجعة معكم واحدة واحدة الله يسعد ايامكم

شوفوا انا اليوم اول يوم العيد وهذا انا ببيت اهل زوجي

يلبسون تنانير وبدي ومفتوح كل شي عادي والمكياج حدث ولا حرج بس اذا جاهم حريم من برا البيت يحطون الجلال والبرقع والشيله

طبعا الصغار اللي مو متزوجات ما يلبسون برقع بس احنا يالمتزوجات

الحين انا في الغرفة فوق اختنقت من البرقع وطلعت اخذ بريك نص ساعة وراجعة تحت عندهم ههههههه


زوجي سألته افصخ البرقع ؟ قالي شوفي اختي شنو تسوي وسوي مثلها !


ومثل ما قلتوا .. البناطلين ممنوعه منعا باتا كله تنانير وفساتين وجلابيات فخمة مع الجلالات اللي عمري ما شفت بألوانها تبارك الرحمن


الله يسعدكم ويخليكم كلكم وكل عام والجميع بخير


على فكرة تنانيري برغم انها ماكسي وجلابياتي طبعا طويلة .. لكن بالنسبة لهم قصيرة لأنه مالها ذيل وما تغطي القدم بالكامل !!!

يا ليل مطولك ههههه

لي عودة

__________________

جاني فضول اعرف اي منطقه هذي اللي كذا عاداتها

( وجعلناكم شعوبا وقبائل)

__________________

رجعت لكم


اولا عيد الله عليكم عايد جميعا

وكل عام وانتم بخير


بالنسبة لأهل زوجي فهم من المنطقة الشرقية في السعودية لكن قبيلتهم الى الآن متمسكة جدا بالعادات القديمة.


هههههه باريسا لا عاد تتخيلين لأننا اصلا نكون فوق وما ننزل مقلط الحريم إلا اذا وصلوا الحريم وكل واحدة تنزل بالزي اللي المفروض تكون فيه

ام مودي جدا مبسوطة بلبس البرقع (من أجل عين تكرم مدينة) وبعدين انا صارلي سنة وشوي الحين فيه وتعودت بصراحة خلاص

دلوعة اسم الله عليك من الاختناق حبيبتي لا تخافي برقع الحريم غير برقع الطلعة (يكون اخف ويسمح بدخول الهواء العليل) ههههههه

الحمد الله اخذت فكرة جيدة عن عاداتهم وباذن الله العيد القادم اكون متجهزة بشكل اكبر بحيث افصل لي تنانير طويييييييييله وافصل لي عبايات وجلالات والذي منه على الستايل الجديد

تعبتكم معي كلكم واستفدت من نصايحكم والله كثير

احبكم في الله جميعا

__________________

الحمدلله احنا ارتحنا من هالعاده

بس انتبهي في بعض العوايد تلبسين البرقع والشعر يطلع مو حلو بالقوة خصوصا اذا كانو رجال موجودين

عندك الخط اللي يجي ع الذقن وحواليه نقط مرررررررره يجنن ولاتنسين الكحل بالعيون ترا مره ضروري تبرزي جمال العيون

انا اصلي بدوي بس متحضره وعارفه هالشغلات

لاتنسي العود ترا مره مهم

والذهب لازم تلبسيه هذا مهم عندنا البدو بالمناسبات نلبس الذهب

ان شاء الله افدتك مع الرغم انها متاخره

وحياك الله في عالم البداوه