أخوتي وأخواتي في الله ..

والله اني لأشــكو حالي المر وكلي أسف بأني قد اتخذت طريق الشكوى لشخص ما .. حتى لو لم تكوني تعرفوني ..
فمن طبعي ألا أشكو لاحد مهما كان ..
ولكني والله بحاجه ماسه لنصيحه ومساعده من شخص فاهم وعاقل .. ينصحني ويرشدني ويدعو لي ..

لن أطيل عليكم ..

ولكني أود أن أقول ...

لقد مللت الحيــــــــــاه مع هذا الانسان عديم الاحساس ..
والله لا أقصد الاساءه اليه ولكني فعلا مللت وحتى الكلام المباشر ما أحسه ينفع معاه ولا يجيب نتيجه وما أشوف منه أي رده فعل تدل على تأثره بل بالعكس يأخذ الأمور ببساطه و ( يطنـــــش ) .. طبع اللامبالاه عنده مترسخ في أعماقه ..
ليش اتزوج مــا أدري ...؟؟؟
حتى أخته كانت تســألني عن طريقه تحميمي لطفلي فقلت حقها على كرسي الاستحمام مال الاطفال ..
قالتلي حرام بياخذ برد .. فقلت كيف أحممه في البانيو وهو بعده صغير ومحتاجه حد يمسكه وياي ويساعدني وطبعا ما عندي حد .. فقالت وين زوجج .. ..!!!

للأســــــــف .. عندي زوج وما عندي انسان ايساعدني ... كم مره طلبت منه ايساعدني ويقول مب فاضي حق هالشغلات وهو جالس على النت .. حتى لو قلت له جيب لي الشي الفلاني وانا اكون ماسكه البيبي وما أقدر أتحرك لاني أرضعه يقولي هاي شغلات حريم وانتي كله بس تبين تتأمرين علي ...؟؟؟
بذمتكم في بين الزوج وزوجته أوامر .. مع اني يوم أطلب منه أطلب بكل رقه .. مثلا مرات أحتاج كلينكس والبيبي يرضع ويوسخني وياه بس ما أقدر أتحرك عشان ما أقطع رضاعته .. أقوله حبيبي ييب لي كلينكس .. يرد علي بردوده المعتاده .. مب فاضي ..ما أقدر.. وانتي ليش تتأمرين علي .. وانتي بس تبين تشغليني بأي شي .......إلخ ..

والمشكله انه حتى البيت ما يجلس فيه الا اذا يبا يقعد على النت .. ومن ايمل ياخذله دش على السريع ويقولي انا ساير القهوه .. أو ساير ويا ربعي ... أو عندي شغل ... ............ والى آخر الليل ..

المصيبه امس يقول انه بيسير مركز من المراكز متواعد ويا واحد بيسلمه أغراض مطرشه حقه من ربيعه ..
فقلت حقه خذنا وياك بنتمشى اشوي والله مليت من جلسه البيت .. ما أطلع منه الا اذا بيوديني بيت أهلي مره في الشهر..
تدرون شو رد علي ... وين تبين تتمشين ونحن ويانا هالحشـــره ( يقصد البيبي فديته ) .. قلت ها ولدك .. اذا انت ما بتتحمله منو تباه يتحمله .. بعدين مب هذا الي كنت تتمناه .. قال صح بس ما ينسار منه مكان كله يبا يرضع ..؟؟؟
يعني شو تبوني أرد عليه .. قلت عادي لو صاح ويبا يرضع بدخل المسجد وبرضعه وخلاص .. مب مشكله ..!!

بس والله انصدمت من رده .. يعني ماخذ اجازه شهرين وما فكر ايطلعنا فيها يوم واحد.. والله لو يوم ..
قلت له أبا أطلع اتمشى والله مليت وطفرت من جلسه البيت ومن الشغل أبا أغير جو حتى لو تمشيني في فريجنا بين حارات وسكيك البيوت .. والله أبا أحس اني أشم هوا طبيعي اشوي ..

لا حول ولا قوه الا بالله ..

المشكله انه وراه امتحانات ولا فكر يمسك كتاب وكل ما اقوله ايقول لا تأذيني بذاكر ..؟؟
وحتى انا عندي امتحان في كورس تخرجي وكل ما ايشوفني أرقد البيبي وايي أذاكر يطرشني بشغله لين ينهد حيلي وما أقدر اسوي شي من عقبها ..


عسى الله يهديــه ويصلحه يا رب ..

المشكله هذا زوجــي وقدري .. بس والله تعبت منه ..
حتى أفكر أسير بيت اهلي أغير جو وياهم وعلى الأقل وياهم أقدر أطلع أتمشى وولدي ويانا وكلهم يستانسون عليه حتى لو كان مزعج ويصيح أشوفهم كلهم يتراكضون عشان يسكتونه ...

بذمتكم شو أســـوي .. ســــــــاعدوني انصحـــوني .. تعبت مليت طفرت ..

__________________