السلام عليكم ورحمة الله


حياج الله أختي في البحرين و تنورينا

بالنسبة للمجمعات عندج مجمعات وايد وتقريباً كلهم جنب بعض عندج السيف والعالي و البحرين والدانة و مقابل مجمع البحرين في مطاعم مرمريز و مشويات طهران و جنب مجمع السيف تلاقين مطعم زيارة و طبعاً غير المطاعم الموجودة داخل المجمعات و الي أغلبها فاست فود ومكشوفة يعني غير المطاعم الي ذكرتها الي كلها عائلية و كل عائلة لها مكان مسكر بروحهم، و طبعاً السينمات الي فيها

عندج بعد مطعم الأبراج بفروعه في فرع في السهلة و فرع في مدينة عيسى وفرع مدينة عيسى بيكون جنبه مطاعم كثيرة منها فاست فود ومنها غير بس ما جربتهم من قبل مثل الونيس و مطعم عراقي نسيت اسمه، وفي فرع للأبراج في المحرق وهذا أحدث فرع وبيكون جنبه ماك دونالدز و سينما و عندج في المحرق حديقة المحرق و تقدرون تروحون ساحل قلالي تراقبون الطائرات و هي نازلة للمطار

و عندج في المنامة مجمع مارينا مول وفيه مطعم جنغل لاند الي يقدم بوفيه و جنب مارينا في مجمع اللولو بس هذا عادي يعني

و الأسواق الشعبية سوق المحرق و المنامة

وفيه عندنا كورنيش الملك فيصل فيه قسم مفتوح للمشي و قسم فيه ألعاب للأطفال و يمه فيه مطعم يقدم بوفيه اسمه بندروزا بس ولا مرة جربته (للأمانة)
و تقدرين تزورين المتحف و تزورين بيت القرآن و محمية العرين و النادي البحري و جزر حوار بالإضافة للمنتجعات



أتمنى أكون أفدتج و حياج الله مرة ثانية في بلدج الثاني