الأخت الفاضلة زرقة البحر .. شاكر لك على تواصلك أما بعد ..

تقولين:
" شوف ياأخي المواقف اللي ذ كرتها مع زوجتك ، بصراحة أنت الغلطان فيها وأنت اللي تعاند..
في هالنقطة هذي بس راح اكون مع زوجتك ..!! "

طيب ولنفترض أني أنا غلطان .. أول شيء أنا لم أدعي الكمال لأنه لله وحده ولكن وجهة نظري تختلف وفيه مواقف سردها غير كافي ولو أنك عشتي المواقف اللي ذكرتها رغم أنها تافهه الا أنها تترك أثر في نفسية الطرفين !

تقولين:
"كل الأزواج والزوجات يصير بينهم هالأشياء ، أنا لو زوجي ينام في غرفة ثانية راح أنجن ..
ترى الحركة خطيرة وقوية جدا ..انتبه ..!"

طيب عادي وسواء كنت أنا أو هي غلطانين .. لو أني نايم في غرفة من باب العناد كان أقولك معها حق لكن الواحد قد ينعس وهو مو داري شفيها لو صارت مرة مرتين .. حرام يعني! لو ركزتي فيما كتبته راح تلاحظي أني أحاول أني أنام معهم ويوم أنه مايجيني نوم أحاول أن أداعب زوجتي فتردني لأنها لازم تنام عشان البنت راح تصحيها بدري .. أنا مازعلت منها لكن مافيني نوم .. أروح أناظر تلفزيون لين وما أدري عن نفسي الا وأنا نايم!! وبعدين انا نايم داخل البيت شفيها يعني .. والله ما أشوف فيها شيء خطير لهالدرجة.

تقولين:
" وحكاية القنوات ، ياأخي طيب هي موقصدها تعاندك ، ياأخي خليك سهل ولين .."

فيه شيء أسمه احترام أقل شيء تقولي قبل ماتغير ولا أنا كرسي في البيت مالي قيمة .. وفي النهاية لا تكلمت قالت: أناني وتحب نفسك.

تقولين:
"وحكاية الجوال ليش ماتشتري لها جوال ؟! ، ليش هي وش ناقصة عن الناس ؟!
الحين الشغالات والسواويق معهم جوالات وزوجتك لاء..
والله حرام ..!!!"


مرة ثانية أنا ذكرت بانه في أول زواجنا رفضت .. وبعد ماجات البنت كل مايطلع جوال جديد أشتريه لها وأنا أخذ جوالها القديم وعاد تخيلوا كم جوال نوكيا جديد يطلع في السنة.


تقولين:
"بصراحة بديت أتراجع عن نصحك بالطلاق ، شكلك حتى أنت فيك حقك ..وتعاملها بدونية وتحرمها من اشياء سهلة وبسيطة!!"

أحترم رأيك وللمرة الألف أنا ماقلت أني ملاك .. كل أنسان فيه عيوب أما المعاملة فالله وحده عالم فيها ما يحتاج أعيد وأزيد أي نعم في بعض الأحيان أمتنع عن وليس أحرمها من الأشياء البسيطة والسهلة لأني تنازلت لها عن الأشياء الأصعب وماعمري حسيت بتقدير منها.


تقولين:
"ومن اليوم فصاعدا لن أنصح أحد بالطلاق إلا بعد سماع الطرف الآخر ..
صعب جدا أن تحكم على قضية بسماع طرف واحد ، فمهما كان لن تظهر الحقيقة كاملة وبالتالي لن نستطيع الحكم بحيادية وواقعية "

أقولك والله ودي تدخل زوجتي المنتدى وتسمعون منها كل ماعندها ولكن ماباليد حيلة.


أختي زرقة البحر ..

الزواج شراكة والمفروض حد علمي أنا أستحملها وأكيد كوني بشر غير معصوم من الخطأ هي المفروض تستحملني أما أنه كل ما صارت مشكلة تافهه راحت بيت أمها .. وتقوم أمها تغلط علي وتقول فيني وتشتم مع أحترامي مو أسلوب وماصارت عيشة.

عالعموم .. المواقف اللي ذكرتها ليس لها علاقة بالمشكلة والمشكلة أكبر من أشياء أكيد تصير مع كثير من الأزواج على أختلافها معتمدة على الزوجين ومدى وعيهم بتحجيم المشاكل.