نقطتين بعد :

هل شخصيتي ضعيفة؟
هذا الأسبوع نعم اضعفتني مشاعري

شخصيتي كانت قوية قبل زواجي

لذلك لما اقول زوجي مد يده علي
اقرب الناس لي يسألون لي : كيف و انتي شخصيتك قوية ؟
و لما زوجي يفتري علي و يقول تعاملني ب ندية: سهل هالموضوع يتصدق عند اقرب الناس لي
لأنهم يقيسون على ردود افعالي و مواقفي قبل زواجي
حتى ان امي تصدت للرد و قالت لأخواني: ترا قص جناحاتها بعد الزواج و كسرها تكسير " وهي محقة "
اول شي كسر نفسي فيه بُخله علي في اول اسبوع
و بعدين مد اليد في ثاني شهر "هذي اضعفتني كثير داخلياً و حطمتني معنوياً وخلتني اخاف منه "

لكن لأن الأساس عندي قوي
رجعت اقوي نفسي بالله و بنفسي
قلت لازم اكسر خوفي تماما
و اقول لو رجع مد يده ب اصير اقوى و ما بخاف و حتى لو اطلع مقتولة
وفعلا رجع مد يده ب مصر و انا تصديت لها
كأننا في حلبة مصارعة
ماوقفت الين وقف
لكن بعدها انهرت اكثر ، خلاص قويت من جهة اني اقدر اتصدى له
و انكسرت من جهة اخرى: انه مو هذا الزواج اللي احلم فيه و اطمح له "المبني على الاحترام و العطف و المودة و الرحمة و العشرة بالمعروف و و "

انا اعتبر نفسي قوية في هالفترة جداً
رغم كل التذبذات اللي أمر فيها ..

ـ لأني طلعت للناس فوراً و لمجتمعي المحيط من اقارب و اعمام و اخوال
في فترة انا فيها معلقة و انا "الكل يدري اني عايشة بمنطقة ثانية "
لما يشوفوني كل اسبوع فجأة و في كل مناسبة و جاية بسيارة اهلي
خلاص واضح ان فيه مشكلة
واجهت المجتمع و بكل مرح و فرح و تفاؤل
ماكنت اروح لأي جمعة و انا مكسورة او مبهذلة
بالعكس كل شهر اغير في شكلي مرة اقص مرة اصبغ .. حتى فساتيني تعمدت تكون بألوان زاهية مبهجة كنت اقاوم ظروفي و وضعي !

لذلك مين قال ان الوظيفة هي فقط علامة القوة الوحيدة ؟
انا و صديقتي اجتمعنا قبل شهرين
انا وهي معلقات
هي موظفة و البيت باسمها
و انا طبعاً ما املك شيء من هذا
كانت تبكي طول الجلسة منهارة ، و انا العكس اضحك و ابتسم
رغم ان الوضع النفسي نفسه
لكن انا وضعي الاجتماعي اصعب و المادي
و مشكلتي نفسها مؤلمة اكثر لانه اعتدى علي و طلعني بالقوة ما طلعت ب رضاي
لو ب نعقد مقارنة انا اللي المفروض ابكي دم
خاصة اني الوحيدة اللي اتخذت قرار الزواج من غير جنسيتي و غامرت
المفروض اني املا المكان دموع و ندم
ما اقول ان صديقتي ضعيفة عموماً ، بالعكس انا اشوفها قوية في امور اخرى
القوة لها انواع ..
و انا فيني منها الكثير الحمدلله

صديقتي امس دقت علي : شافت صوتي رايح
قلت لها تعبت من زوجي و انهرت و بكيت و مرضت
قالت : كيف يصير فيك كذا وانا اللي استمد قوتي منك بعد الله
انتي كنتي في حياتي الطاقة الايجابية و الحيوية و الشغف كله
انتي مريتي بظروف اصعب
ليش خليتي هالإنسان يهزمك ؟

قلت لها قلبي اللي هزمني
لكن لا تخافين هزمني اقل من يوم
و رجعت تماسكت
الحين صوتي تعبان و جسمي تعبان
لكن قلبي حر طليق سعيد مرتاح

..
انا الى الان مريضة جسديا
وغبت اليوم بعد صحتي ما تسمح لي

لكن قلبي بأقوى حالاته الحمدلله

ـ أنا كنت بنت سكن و تغربت لوحدي ٧ سنين
اتخذت هالقرار لأني حبيت تخصصي و عشقته و كنت مستعدة اتحمل تبعات قراري هذا
وفعلا تحملت كل شي

كملت الماجستير نفس الشي بعيد عنهم
وقبل زواجي بديت بهالرحلة
و الكل عارضني و نصحني اكمل بوظيفتي
الا ابوي هو الوحيد اللي شجعني و فعلا استقلت مع اني كنت اعشق وظيفتي
لكن كان عشقي للعلم اكبر
ومشيت و كملت
و ناقشت الماجستير و انا على سريري بعد ولادتي في بنتي الثانية
و انا مخيطة و تعبانة و نجحت بمعدل عالي مع مرتبة الشرف

مريت ب ظروف و كافحت و حفرت في الصخر في اشياء كثيرة اقسى و اعمق
من كل اللي امر فيه الحين

زوجي نفسه حاربني بدراستي
في فترة من الفترات و منعني اطلع ما يقارب عام اتابع الدراسة
كنت اطلع من وراه آخذ اوبر اروح المكتبات اجيب مراجع
و ارجع قبل يجي من شغله
و كنت اقول لنفسي : حتى لو اكتشف و زعل و طلقني ما يهمني
لاني شرطت عليه بعقد الزواج اكمال الدراسة
ولانه هو نفسه جالس يكمل تعليمه
ف ليش يحرمني من هالشي و انا ماقصرت معه في بيته ولا في شؤونه

ـ اعز صديقاتي
عاشت معاي بالسكن و كنا ندرس ماجستير
و تزوجنا بفترة مقاربة
و تطلقت هي
تقول لي قبل فترة بسيطة جدا : عرفت الحين انك قوية جداً
كيف قدرتي تكملين الماجستير و تكملين دراسة العلم الشرعي
" انا وياها دخلنا نفس دفعة الماجستير
و نفس دفعة كذلك المعهد الشرعي اون لاين ، و هي انسحبت بعد زواجها من شهر "
كيف قدرتي تمشين على هالمسارين و زوجك اصعب من زوجي !

و استمريت على دراسة الماجستير و على العلم الشرعي ٣ اعوام اون لاين و زوجي يحاربني كذلك
آخر سنة صار يقول لي : تدرسين على أئمة مضلين
اقوله : اساسا انا ما ادرس الا توحيد و عقيدة كيف يكونون مضلين !

ما تدرسين ب وجودي
ضغطني ضغطني ضغطني بكل الطرق و استمريت

__________________

الحمدلله على قضاء يقربني من الله عز و جل.