ماعرف روّاد المنتدى اللي من نفس بيئتي و ثوبي ماراح يتخيلون مستوى البخل اللي انا عشته
لأنه اصلا نادر في بيئتنا اللي يغلب عليها الكرم
قد يكون فيه ناس يتهربون من مسؤولياتهم او يذل او يمن !
لكن البخل بمعناه الحقيقي انه انسان يعبد الفلوس
وما يصرف منها حتى على نفسه
و راتبه عااااالي عااااالي ولا يعطي احد
و سيارته تعبانة و ملابسه تعبانة و اغراضه كلها اغراض فقير معدم
هالشي عمري ماشفته ولا سمعت فيه ولا سمعت ب شي مشابه

اعرف ان فيه ناس عديمي مسؤولية او انانيين او مثلا يذل او يمن بالفلوس
لكن انه يحبها كل هالحب و ما يصرفها ابدا ويشوف انها انوجدت عشان تكون بالبنك
لا و بعد يبغى ياخذ فلوسه يخليهم سبايك ذهب عشانه ما يثق بالبنوك
و دايم عايش ب رعب !
هذا ماشفته الا ب زوجي فقط

رغم انه يخاف الله في مسألة اكل المال الحرام او الربا او اللي فيه شبهه و يحرص الشهادة لله انه ما يدخل عليه ريال حرام
لكنه بالمقابل هذا الريال اللي دخل جيبه ما يطلع ابدا ابدا ابدا
و لما يعطيني شي والله احس كأني انتزعت روحه منه !

و للأسف اللي اكتشفته انه يزيد يزيد بخل مع الايام كلما زادت فلوسه
حتى انه يجوع نفسه
كل شي ب نظره ما يسوى و ما يستاهل ينصرف عليه
والله اني ما احمل له اي مشاعر غضب او حقد او كراهية تخطيتها من زمان
رغم ان اهلي حاقدين عليه لانهم يعرفون وظيفته و شايفين شكله و مظهره الخارجي و سيارته يدعون عليه ليل نهار
لكن انا صاحبة الشأن أشفق عليه و أرحمه اشوفه انسان فعلاً مريض و مضطرب نفسياً
و أتمنى له من كل قلبي يصحى على نفسه و يتغير و ان ربي يوفقه