صحيح مبتعثه

بس حصلت لي مواقف كثير في حياتي خلتني أندم على غفلتي ..

موقف صار لي قبل ثلاثة شهور .. تعينت على منصب جديد في شغلي وأهملت اللي حولي كلهم
لما تحملت مسئولية صار تفكيري كله منصب في ذي المسئولية
سفراتي صارت كثيرة توصل في الاسبوع سفرتين أحياناً

جدتي الله يرحمها تقرب لي من بعيد مقطوعة من شجرة على قولتهم ماعندها عيال كنت أنا المتكفله بعلاجها والاهتمام فيها .. كان عندها مرض خطير ومحتاجه رعاية واهتمام

بعد ما تغيرت أمور في عملي وصار وقتي مضغوط أوكلت مهمة أدويتها لوحده من خواتي وماقصرت والله .. لكن الجده تعلقت فيني كثير وفقدت اهتمامي

وصلت انها تزورني البيت وتلاقيني نايمه من التعب لكنها ماتصحيني وتقول للأهل خبروها اني جيت أشوفها لأني فاقدتها ..

كان في نيتي ذاك الأسبوع أخلص من سفرياتي ودوراتي وأمر عليها

لكن الاتصال الهاتفي اللي جاني سبق كل تخطيطاتي ..

ألووو .. هلا يا يمه
جدتك عطاك عمرها

آآآآآه يا جده يا مسرع القدر .. توفاك الله قبل ما ازورك .. قطعتك ثلاثة أسابيع وما شفتك بسبب عملي وكرفي في الدوام

بكيت بأعلى صوتي .. صرخت ودعيت على الدوام ودعيت على الشغل اللي اخذني عن الحبايب وماتوا قبل ما اشوفهم واجلس معاهم ..

حسيت ذيك اللحظه بتفاهة الشغل وتفاهة الدوام ..

طلبت منهم ما يدفنوها لغاية ما ارجع .. وفعلاً رجعت وقبلت جبينها وتأسفت منها
وقلت سامحيني على انشغالي .. سامحيني على قسوتي على اهمالي .. سامحيني لما بعدت عنك الفترة الماضية

الله يرحمها ويغفر لها ويجعل مثواها الجنه ..

__________________

(( لا شيء يجعلنا عظماء سوى ألم عظيم ))