السلام عليكم ورحمة الله وبركاته. .
انا سبق وطرحت مشكلتي مع زوجي..
وزي ماقلت لكم سابقاً كنت في دوامه من المشاكل مع زوجي طالعه وراجعه..
رغم اني لا ارغب بالرجوع إليه .. ولاكن اجبار اهلي لي بالرجوع إلية ..
آخر مره رجعت لزوجي وكتبت قصتي هنا لكم والسبب كان اسلوب امي معي...
هذا آخر موضوع لي..

http://www.66n.com/forums/showthread.php?t=265111
بعد رجوعي لزوجي كان لازال نفس الطبع والاسلوب وانا كنت حاطه اذن طين واذن عجين.. حاولت البي له طلباته زي مايبي ولاكن ما اشوفه الا يزيد عناد واهانه لي .. كنت ساكته ومتحملته ولا شكيت على اهلي ولا على احد غير ربي ..
يحاول يثيير غضبي بأي شي وانا سااااااااكته. . يرمي صينية القهوه والشاهي برجلة علي ويقول خليها لك بروح اتقهوى مع أمي... وانا سااااااااكته وتاركته براحته..
و أشياء كثيرة. . ومن بكرى .. اخذ البنات وقال بروح اوديهم اهلك وانتي اجلسي بالبيت يالمريضه رديت عليه البنات ماهن رايحات قال غصبن عليك بوديهم ... !
قلت خلاص ودهم لهلك لا توديهم لهلي اهلي مو بالبيت اليوم طالعين ..
قال.. غصبن عليك بوديهم لهلك يالعاقه والعاصيه بأمك انتي ماتحترمين أمك وتردين عليها انا عندي خبر كل شي واعرف كل شي...!!!!
فعرفت انه اخوي الكبير قايله عن المشاكل الي بيني وبين امي ..
عصصصبت وقلت له ملك دخل بأهلي تسمع ولا امي ولا ابوي ..
ورحت لم الغرفة ماسكه اعصابي ونمت بالفراش كنت تعبااانه ..
فجأه جاء عندي وقال انا بودي البنات غصب عنك يله وش بتسوين ... قلت ما اقدر اسوي شي ... بدأ يضحك بستهتار وصوت عالي ويقول يله صيحي يله وانا سااااااااكته. .
ويبدأ يقول كلام مثل السم ويقول صيحي يله اشوف ياصياحه يالبزر ..
انفجرت بكاء وانا منسدحه بالفراش ... وهو يضحك علي ويقول يله بعد يله اقوى ..
مااقدر تعبي اقل شي الطفل الي بطني..
رفعت راسي وصرخت بوجهه.. وقلت له انت وش تبي قلي وش تبي خلاص رح انت وبناتك للمكان الي تبيه
قال لا والا انتي بتردينن ماتقدرين .. قلت صح ما اقدر انت الي تقدر خلن رح عني.. وغطيت وجهي بالغطاء الفراش ويجي لمي ويقول من زين وجهك تغطينه عني ويمسكني مع يدي ويجرني بقوه من الفراش وانا اقوله اتركني وهو يصارخ علي ويقول قومي عن فراشي انقلعي .. قومي اطلعي من غرفتي يله هذا بيتي مو بيتك اطلعي ويدفعن بقوه برى الغرفة ويمسك يديني من الخلف ويسحبن برا الغرفه .. وانا اصارخ عليه اتركني اتركني اخر شي دفعته بقوه .. وفصخ عقالة يبي يضربني و انا ادفعه بكل قوتي و اخذ عباتي كنت بهج من البيت ومن اهلي ومن العالم كله .. رايركض ويسبقني يقفل الباب ويدق على ابوي وامي و يقول تعالو شوفو بنتكم الظاهر فيها جني ..
جاء ابوي وامي وشافو حالتي وشافو البيت معفوس و كنت منهارة بالبكاء بدت امي تبكي وابوي ماقدر يتكلم غصة بحلقه ويقولي قومي يابنتي مافيه شي يستاهل قومي ولفي كل عفشك .. كنت تعبانه اخذت الاغراض الازمه لبناتي وطلعت .. و كان يقول لابوي هي ضربتن وتكلمت علي وانا احاول اهديه بس ما ادري وش فيها.. !!!
طلعت من عنده ورحت وبيت اهلي وانا سااااااااكته مافتحت افمي ورحت غرفتي بيت اهلي ونمت ...
مع العلم انه اخوي الكبير عارض امي وابوي وقايل لهم ليش تجيبونها كان خليتوها ونصحتوهم وبس ... !!
وجدتي واقفه ضد ابوي وتلومه وتقول المرأة مالها الا بيت زوجها ووو .. وانا مو ناقصة ..
طبعاً الان صارلي فترة مارجعت لزوجي وانا رافضة الرجوع له نهائي وعطيت ابوي هالخبر وقلت له وقال على راحتك .. امي هالمره ماتضغط علي ولا كن تلمح لي انه لازم تصبرين ..
زوجي اتصل على ابوي وقاله بنتك تبي ترجع والا لا .. اذا ماهي راجعه خلها تجي تلف عفشها عشان بسلم الشقة ..
قاله ابوي سلم الشقة ..
وبعدها صار يتصل بأخوي الكبير ويقوله خل اختك ترجع انا ابغى بناتي وانا وانا ... واخوي يوصل الكلام لأبوي ..
لاكن انا معصبه من اخوي على كلامه لزوجي عني وارسلت له رسالة انه ماتوقعت هالشي منه وانا خلاص مابيه يتدخل بحياتي. .
ابوي بدأ يحاول يقنعني بالرجوع لزوجي ... ولما ارفض يعصب علي ويقول ليش ماتحترمين كلامي ..
ويحاول يسئ معاملة أمي امامي عشان يقنعني انه شي عادي ومل الازواج كذا .. قايل لعمامي انصحوها وكل واحد يجي يسرد على مشكلة مع زوجته وانه عادي وتحملي .... !
واحد من عمامي حب يتدخل ويكلم زوجي ورفضت اي شخص يتدخل وانه حياتي انا ..
اذا جلست عندهم يله يبدون يسردون قصة فلانه وعلانه الي صبرو ..
لمى يجي زوجي ياخذ بناته عشان يشوفهم وهن مشتاقين له وفرحانين تبدأ جدتي بالبكاء و الوم علي و تبدأ امي نفس الشي تلومني ويبدأ موال لا ينتهي ..
وكأنني اول مره اطلع من بيتي انا كل يومين راجعه لبيت اهلي ..
انا بحال لا يعلم فيه الا الله..
امي تقول ارجعي له وحطي شروط خليه يحطك في شقق عمك(عمي له شقق جنب بيت اهلي بالضبط) واطلبي مبلغ مادي و شغاله عشان يحسب حساب كل مره تطلعين ..... وانا رافضة انا تعبت ابين لهلي انه المشكلة مو شقه والا شغاله والا غيره المشكلة هو نفسه اخلاقه وقل احترامه لي واهانته لي .. مطلبي الاحترام والاكن انا اشوف الحياة معاه مستحيله ...
يبدون يذكروني بالطفل الي بطني وحرام عليك و و و ..
انا رافضه الرجوع والسبب كرهي الشديد له ماني قادره اتقبله واستحمله .. تقريبا صار لي 3 شهور وزيادة. .
رايكم اقتراحاتكم حلول متوقعه منكم ..?؟؟؟؟
اعتذر عن الاطالة وتعبت من الكتابه .. انتظر ردودكم واثق بها ..

تم تعديل العنوان ليتناسب مع المضمون

نفسي تحدثني ان ادعو عليه لكن الله ليس بغافل عما حدث لك وسينصرك بفضله وكرمه..... لكن لا ادري اختي ارى قرار العودة بشروط صائب ولو استطعت تشترطي شقة باسمك يكون افضل او ممكن يوثق تعهد بعدم اذيتك وان كررها فزجي به في السجن حتى يتادب وبناتك ارعيهن وجدي لك وظيفة واستقري معهن ان لم يرغبوا بالتكفل بك والله يغنيك من فضله بصراحة قصتك المتني ومثل هذا النوع اقصد زوجك يجب ان يتادب حتى يعرف قدره

اشكرك على ردك. .
والله يااختي احيانا ادعي علية من شي بقلبي وبعدين استغفر عشان بناتي بس لانه ابوهن ويحبنه فلذلك لا اريد ان يحصل له مكروه ..
شقة بأسمي ارى انه من المستحيل تنفيذ هذا الشرط لي او حتى اهلي ربما يشوفون انه شي تعجيزي ويعارضونني ولاكن ارجع واقول الشقه لن تغيير من طباعة معي ... بل ربما يزيد ..
نفسي ادبه واعطية درس و ابرد قلبي .. لاكن ربي اقوى من خلقه انشاالله يمهل ولايهمل

أختي الغاليه
والله ليس لكي إلا الله ملجأ ومهربا
اكثري من الدعاء
اكثري من قول حسبي الله ونعم الوكيل
واكثري من قول لاحول ولاقوة الابالله
انتي الآن حامل وبالتأكيد متعبه جدًا ومثقله
لاتقوين على قيام الليل واطالة السجود
فأكثري من قول لاحول ولا قوة الا بالله
حسبي الله ونعم الوكيل
وانتي جالسه او مستلقيه يكفيك الله جميع همومك
لاحول لكي ولا قوه الا بالله سبحانه وتعالى
وسترين العجب وكيف ان الله سيرفع قدركويعزك
ويجبر خاطرك وكسرك
ويعطيكي ح ترضي بإذن الله
واحتسبي الاجر بصبرك على هذا البلاء

__________________
اللهم صلي على محمد وعلى آل محمد كما صليت على ابراهيم وعلى آل ابراهيم إنك حميد مجيد
وبارك على محمد وعلى آل محمد كما باركت على ابراهيم وعلى ابراهيم إنك حميد مجيد

جزاك الله خير الجزاء. . شكرا لك
ونعم بالله..
لاحول ولا قوة الا بالله
حسبي الله ونعم الوكيل.

الله يفرج همك
اذا كارهة الرجوع لزوجك انتي غير مجبرة ترجعين .

واهلك سكتيهم بكلمة قولي: اذا ولدت بالسلامة يصير خير
ولا تفتحون معي الموضوع انا تعبانة وجاية عندكم علشان ارتاح وهذة فترة نقاهة لي
اذا بأرجع لزوجي بأرجع بكيفي مأبي احد يضغطني
والي فيني مكفيني وسلامتكم ...

انتي الان كم لك شهر حامل ؟؟

__________________

ايش اسوي بأهلي !!!! يضغطون علي ويحدثون مشكلة ولجه عشان ارجع انا فكرت اني ماراح اتكلم بالموضوع لين اولد انشاالله. . لاكن خفت اقولهم ويعارضونني ..
لذالك فضلت السكووت .
انا الحين توي داخلة الشهر السادس.

__________________

اشكرك على ردك جزيل الشكر. ..
ردك اراح قلبي... جزاك الله خيرا. .
انا وضحت لوالدي كل شي شرحت له واعلم انه يعلم بظلم زوجي ولاكن أبي لايريد لي الانفصال
ليس ابي فقط كل اهلي و أمي بالخصوص. .
كثيرا قالي وضعك موطبيعي ياعين او سحر ..
ولاكن سبق وقلت له نذهب الى شيخ يقرأ علينا ويرفض بقوه ويقول انا مافيني شي انتي روحي خلي الجني الي فيك يطلع .. طلبو اهلي منه سابقاً القرأءه عند شيخ ورفض..
ولا اذكر انه عمل لي مشكلة لاني لبست بنطال ...
ولاكنه فعلا ربما يغار او انه يخاف من غروري ...
صحيح انا اجمل منه ومن اخواته وكثير من الناس يقولون له زوجتك جميلة. ..
و أمه واخواته يقولون له .. لاتمدحها عشان لا تغتر عليك لاتقول لها انتي جميلة بالعكس ..
لذالك دائما يسبني ويسب وجهي ويقول لي الي يقولك جميلة يضحكون عليك هدي نفسك يكفي غرور....!!!!
لدرجة البس اتزين ولاكنه لا يلتفت لي ويتجاهلني ولا كأني موجودة ...
حتى في يوم ذكرى زواجنا لبست وتزينت واشعلت الشموع احتفالا بذكرى زواجنا وجلست انتظره طوال الليل... وجاء من برا .. و القى علي نظرة بسخريه وذهب لفراشه ينام... جلست ابكي و ولم اعاتبه ولم اقول له شي ورتبت الاغراض وغيرت ملابسي وذهبت انام ..

اسفه جدا على الإطالة. .

لو ماعندك عيال اقول لك تطلقي
هذا انسان غير صالح يكون زوج
لكن المشكله انك ام
يعني احتماليه الرجعه واااارده
بس مو بالساهل ولا الان
ثلاث شهور مده قصيره
ريحي واولدي وخلص نفاسك
والله يكتب لك الخيره