أم يوسف و سما ..

مرة كانت عندنا ( أرانب + بط + وزة ) ..
كان أبويا يبغى يذبح الأرانب ، عشان جارنا و زوجته و بناته ..
اقنعوا اهلي إنه لحم الأرانب لذيذ ..

صحبتي ( بنت الجيران ) كل ما جات عندنا و شافت الأرانب ..
قالت لي ، يا سلاااااااااااام .. و الله الأرانب طعمها لذيذ لازم تجربوه ..

و أمها كانت تقنع أمي ، و تقول لها جربوا ملوخية بالأرانب ..
مرررررررررة طعمها يصير لذيذ ..

و أبو صحبتي ، جارنا يعني .. كان صاحب أبويا ..
اقنعه إنه يجرب و يذبح الأرنب ..

طبعا الأرانب تتكاثر ماشاء الله بشكل عجيب .. فكانت عندنا أرانب كثيرة ..
و كنت اهتم بالحيوانات مع أخواني و أخواتي ..

.
.

المهم ..
بيوم من الأيام ، أبوي استنى متى نكون بالمدرسة .. و ذبح أرنبين .. و باع البطة و الوزة ..
لما رجعت من المدرسة ، ما لقيت البط ، و لا الوز <--- أصلا ما كنت صحبتهم ، لإنهم جلسوا عندنا بس كم يوم ..

رحت عند الأرانب و لقيت أرنبين مختفيين ، سألت أهلي فين البط و الوز و أرنبين ؟
أبويا قال .. بعنا الأرنب ، و ذبحنا البطة ..

أمي حطت الرز ، و فوقها لحمة حمراء مثل لحم الغنم .. مو بيضا مثل الطيور ..
و عملت ملوخية ..

و شايفتهم كلهم يطالعوا فيا ، و يقولولي ( ياللا .. كلي ) ..
الإهتمام العجيب ، خلاني احس إنه فيه شي مو طبيعي ..
و اللحم لونه مو مثل لحم الدجاج ؟؟؟؟؟؟؟؟

شفت أختي الكبيرة ( تضحك و تخبي ضحكتها ) ..
الضحكة حقتها خلتني اكتشف .. إنهم بياكلوا لحم الأرانب ( أصحابي ) ..

قلت لهم ما أبغى أكل .. و صارت عيوني تدممممممع ..
قمتو قلت لهم ، ذبحتوا الأرنبين صح ؟

قالوا لي ، لا ..
هذا لحم البط ..

قلت لهم ، لا ..
ذبحتوا الأرانب و هذا لحمه ..

أخوي اللي أصغر مني ( ملقوف ، و كان يقلدني في كل شي )
قلدني و قام من السفرة و ما أكلنا أنا و هو .. و رحنا الغرفة زعلانين
و صرت ابكي ..

أختي احتفظت بالجلد حقة الأرنب ، و نظفته و شالته عندها
صرت امسح عليها و افتكر الأرانب و ازعل عليهم ..

و الله مرة زعلت عليهم
و كان عمري 10 سنوات ..

و الحمد لله ، إلى الان عمري ما ذقت لحم أرنب ..
و لا راح أكل لحم أرنب طول حياتي أبداااا ..