الأسبوع اللي فات ..

اللي بيحجز مواعيد لمقابلة القاضي الشرعي ..
قلت له ، أبغى أبلغ المحضرين عن زوجي ، إنه مختفي و ما بيحضر المحكمة ..

قال طيب خلاص استني نص ساعة ، و بعدين اعطيك خطاب و وصليه للمحضرين ..
قلت له ، طيب أبغى أعرف متى ممكن أجي عشان أقابل القاضي ؟

أنا جيت اليوم و جبت أولادي معايا و مرمطتهم ، عشان يتسجل حضوري ، و أبلغ المحضرين ..
قال لي الموظف ، احتمال الأحد أو الإثنين ، إنت تعالي و شوفي ..

قلت له ، ياخي أنا عشان أجي لازم أسحب ولدي معايا و اخد تاكسي ..
شايف شكلي كيف ؟

قال لي ، طيب نتصل عليك و نبلغك .. أو دقي و نحن نعطيك موعد ..
قلت له متى أعرف ؟

قال لي ، خلاص خدي الكرت حقتي و دقي قبل لا تجي و أقول لك إذا الأحد أو الإثنين ..
قلت له طيب ..

.
.

قلت له ، طيب و المحضرين ؟
ليش ما ترسلوا أحد يبلغهم و يوصل لهم الخطاب بما إنه المكتب تبعهم قريب منكم ؟
ليه استنى نص ساعة ؟

قال ، طيب خلاص أنا أبلغهم و لا تشيلي هم ..

.
.

المهم ، طلع الموظف ..
( ح م ا ر ) ..

دقيت الخميس عالرقم .. و ما رد عليا ..
عالعصر هو دق عليا ، و يحسبني أي وحدة غلطانة ، و باين إنه مغازلجي ..

قلت له ، لو سمحت .. أنا زوجة فلان اللي جيت أمس ..
و حبيت استفسر عن الموعد .. متى أجي ؟

.
.

المهم ، جيت الإثنين للمحكمة .. بعد ما دقيت و سألت متى القاضي يكون فاضي و موجود ؟
قل تعالي 11 ، يكون موجود و فاضي ..

جيت ، و قال لي و الله إنه مشغول و ماسك قضية من الصبح ..

سألته ، مافي أحد غيره ؟
قال لي ( لأ ) ..

سألته ، طيب زوجي ما جاء .. ماحد بلغه ؟

قال لي ( لأ .. إنت لما تقابلي القاضي ، بعدين هو يبلغنا إنه نبلغه ؟ )

قلت له ( و أن الأسبوع اللي فات ليه قطعت مشوار و جيييييت لحد المحكمة ؟
مو عشان المحضرين ؟؟؟؟؟؟؟ و إنت مو قلت لي راح تبلغوهم ؟

.
.

قال لي ( و الله شوفي ، المفترض إنهم يتبلغوا رسميا .. و هذا الشي لما تقابلي القاضي ..
و رسميا أنا ممكن احجز لك أقرب موعد مع القاضي .. في ذو القعدة !!!!!!!! )

لكن أنا دحين من عندي ، ممكن ادخلك تقابليه .. بس مو رسمي ..
قال استنيه لحد ما يخلص ..

قلت له ، و لو فرضا ما خلص من القضية اللي معاه ؟
قال تجي بكرة و كمان ..


.
.

اضطريت ( انطم و اسكت ) ..

( يتبع )