حبيبتي روضة ورب من خلقني انا اساسا كنت مسجله في المنتدى علشان مشكله عندي ،،

لكني ماقدرت اقرا فضفضتك وردودك وما اكتب لك كلام من واقع تجربة صحيح يمكن الناس ماتتشابه بس هذا الواقع اللي يتكرر ويتكرر وانظري حولك كويس راح تشوفينه جلي وواضح ..

انا الان متزوجة بس قبل كنت مخطوبة لشخص حبيته من كل قلبي وهو بعد وبالرغم من شخصيته القوية وغروره مثل ماقلتي جاب لي اهلي وكنت اعتقد انه هالشى برهان واضح على حبه .. لكنه عند اول موقف حقيقي ومشكلة حقيقية تخلى عني وبعد سنين رتب وضعه ورجع جاني مع انه له مكان كبير بقلبي لكني رفضته لاني كنت مستعدة من البداية اوقف معاه واسانده لكنه ضعيف وتخلى عني ..

وانا ابصم لك بالمليون ان سالم مسيره بيرجع لزوجته وبيختارها وما بتستفيدين شى غير انك بتنجرحين زيادة ..

والموقف الثاني اللي مريت فيه واحد خطبني وهو كان منفصل وعنده اطفال من زود اصراره علي وقف في وجهه اهله ناسه كل من بس علشان اوافق عليه وحبني حب مو طبيعي ومثل ماقلتي عن سالم هالخاطب بعد كان انسان رائع بكل ماتحمله الكلمه من معنى ومن اصراره علي عرفت اني لو اتزوجه بكون اسعد انسانه وتمنيت لو عرفته من زمان قبل مايتزوج وعلشاني استأجر بيت واثثه كامل وارسل اخته علشان اطلع معاها وتسوي لي مفاجأة وتراويني المكان وكل يومين يتصل على امي واهلي حتى ابوه اتصل لي قال احنا نبيك انتي ..

لكني حكمت عقلي وطلبت منه يرجع زوجته واطفاله مع انه كان تارك زوجته لانها خاينته وزوجته اتصلت لاهلي تتراجهم وحسيت انها صادقه تبي ترجع لبيتها مكانها الطبيعي مع زوجها .. وكل مره كنت اطلب منه هالشى يزعل ويبكي ويتألم لحد ما وضعت له الخيارات مثلك وقلت له اسفه مااقدر اعيش مع شريكه لو بيوم رجعها (لاني متاكده كنت انه بيرجعها ) مو بس علشان الاطفال لانه اهله بعد يبون كذا ومافي اي انسان طبيعي بيقبل انه يعصي اهله مثل ما سالم عمل بس ترى ماعمل هالشى بس علشان اهله لا علشان نفسه بعد وعلشان ينجب ويعيش حياته أما انه مانساك فهذا امر طبيعي انسانه كان يحبها ماراح ينساها بسهوله وبتظل تمر في عقله من وقت للثاني او يحن لها وكل ممنوع مرغوب والاهم انه عارف انك تحبينه وراح توافقي تتكلمي معه حتى لو هو متزوج وهو مايبي غير تكوني معه روحيا ونفسيا بس المشكله بالبنت اللي تقبل انها ترخص نفسها وتخلي نفسها بموضع خيار المفروض الكرامة اكبر من كذا بكثير لانك عزيزة وغالية وانا متاكده انه في الف من يتمناك و بالنسبه للي صار معي وبعد ما رميت الكوره في ملعبه وقلت له مااقدر اعيش مع شريكه..كم يوم وكم شهر ظل يفكر بعدين صار يتهرب من هالموضوع لانه مايبي يجرحني ويحاول هو واهله يقنعوني اني اكون زوجه ثانيه ..لحد ماخبرته بيوم انه مايهمني الا راحته فاتمنى انه يسوي اللي يريحه علشان انا ضميري يرتاح لانه كان يأنبني وكنت اتالم كثير وابكي.. وبعد ما خبره ابوي بهالكلام تعرفي وش سوه رجع زوجته وفي المكان اللي كان المفروض لي أنا .. ورجع قال ابي اتزوجك ثانيه حزتها انا رفضت بكرامتي وريحت ضميري والحمد لله .

لكن تعرفي الله استجاب دعاء زوجته مع اني ورب البيت كنت ابيه يرجع لها وماكنت ابي اتزوجه ولما كلمتني هديتها ودعيت لها ترجع لزوجها وقلت لها ان شاء الله هذا اللي راح يصير لكنها دعت علي وقالت الله راح يذوقك من نفس الكاس مالمتها حزتها من قهرها اكيد .

وبعد ماتزوجت وش اكتشفت زوجي المصون كان يحب وحده وفترة كلمها حبيبتي انتي ماجربتي تكوني زوجه الزواج حاجه كبيرة وربي قرار الزواج امر واجد صعب بس قرار الانفصال اصعب بكثير مهما كانت حياتي مليانه مشاكل هالشى يهدم بيت واسره باطفال او بدون في شى بين زوجين محد يقدر يحس فيه الا الاثنين في اتصال روحاني غريب بكره تتزوجي وتحسيه .

ماتتخيلي كيف انا انكسرت وتذكرت دعوت البنت وادعي ربي انه يهديها وتسامحني مع اني ما خطأت بحقها بس هي اعتقدت اني ابي زوجها .. وماتتخلين الالم اللي ممكن تحسه البنت اذا زوجها خانها انا بنت كنت معززة مكرمه في بيت ابوي خطبني واحد ووافقت عليه وبالنهاية اكتشف انه كان يحب وحده قبل الزواج وماقدر يتزوجها لانها مريضه طيب وش ذنبي انا يظلمني معاه ووتسأل عنه بعد الزواج ويرجع يبوح بمشاعره هو اختارني وربي اختارني له انا قومت القيامه ماقعدتها والان انا وزوجي نحاول نحافظ على بيتنا مع انه ماعندنا اطفال وخبرني انه ماراح يطلقني مهما صار لاني حلاله وزوجته وبالعكس نبي نحافظ على اللي بينا ولا نزعل اهلنا ونبي نجيب اطفال .

حبيبتي انتي حره بتصرفاتك بس انتي مافتحتي هالصفحة بالمنتدى بس علشان تفضفضين انا متاكده لانك تحسي انه في شى خطأ بالموضوع واحسبي وحده وحده بتعرفين

سالم لو لك كان هو نصيبك من الاول وكان تمسك فيك ورضا بشروطك وحاول يقنع اهله هو رجال .. لكنه اختار اهله لانه شاف انه هذا الاصح وموضوع انه جاب اهله اي اكيد بسوي هالشى لانه فعلا كان يبيك وشاريك وهذا الامر الطبيعي حب شريف . لكن فكري فيها اليوم انتي كتبتي خلها تدعي علي ماتهمني انا اقولك كوني صادقه مع نفسك هل راح تكوني مرتاحة لو طلق زوجته واختارك شهرين سنه سنتين بعدين راح تخافين منه او تخافين باي دقيقه يرجع زوجته علشان اهله خاصه انه كل واحد بديرة .

وهل بنت معززة مكرمة تقبل انه ترخص نفسها وتتزوج بدون اهل زوجها هالشى بس استصغار لك ولكرامتك وش معنى هو يخاف على رضا والدته وانتي ما ترضين والدك اللي وضع شروط لمصلحة بنته هو يشوفها كيف تبين تكسرين كلام ابوك اللي رباك وكبرك ومايبي من الدنيا شى غير سعادتك تتوقعين راح يكون سعيد وحال بنته كذا الا هو يتمنى لك تتزوجي من زوج انتي كل حياته ودنيته ولا تدخلي للمشاكل برجولك ..معززة ويفرحون فيكي اهله

انتي تقولي السعادة الله قدمها لي كيف ارفضها انا انصحك اتركي شئوونك لله واتركيه لزوجته لله وشوفي صنيع الله معاك وشوفي كيف الاحساس بالراحة اللي راح تحسينه لانك ماهدمتي بيت ..وقلتي ليش بنت تقبل بزوج تدري انه يحب غيرها عادي جدا لو يحب غيرها ما جه وطق باب بيتها برضاه الزواج مو بالغصب .. الحين في بنات تقبل تتزوج مطلق تجربه وراحت من حياته ليش ماتقبل تتزوج بشخص عنده تجربه حب ..شى انتهى بدليل انه قرر يتزوج غير حبيبته وهي عليها بالظاهر .. لا تقولين ابتعدو عن الافتراضات الوهميه لا هذا واقع راح تعيشه بعدين صوره الملاك اللي مصورتها ممكن تختلف عن الواقع العشره تبين الشخص على حقيقته كل واحد أو وحده بالتلفون ممكن يكونون ملائكة ..

اتمنى الله يوفقك ويوفقنا جميعا ويكتب لك مافيه خيرك وصلاحك وخذي ورقه وقلم واكتبي كل الايجابيات والسلبيات بس بحساب العقل مو القلب واحكمي بنفسك واستشيري اللي اكبر منك مافيها شى ..

حبيبتي الحب قبل الزواج يكون متأجج لانه ماوصل لمراحل كثيره مجرد الزواج والعشره وانه يحدث كل شى بين الزوجين يفتر الحب لاشعوريا بعدين تتضح الرؤيا للامور المادية والعقلانيه واعادة حسابات ويظل طبعا الحب موجود لكنه يخف مرات ويزيد مرات الحياة مواقف بعدين يصير شى عادي وروتيني لانه بين يدينك وتبتدي تفكيري بالمستقبل .

الله يوفقك