هل أنت تشعري بمد وجزر بعلاقتك بزوجك هذه الفترة ؟

- بهذه الفترة ،، لأ ، بالعكس ..
أحس إني مستقرة و مرتاحة و لأول مرة بحياتي من يوم تزوجت ..
و لله الحمد و الشكر ..

( كنت ) طوااااااااال فترة زواجنا أشعر بالمد و الجزر بعلاقتي به ،، لحد ما تغيّر هو - حالياً - و أنا
سمعت نصايحكم .. شي كان كاتم فوق صدري من يوم تزوجت و أحسه انزاح ..

كنت قبل، أقول يا بنتي هذا نصيبك و اصبري و مشي و حاولي تصلحي اللي تقدري عليه ..

.
.

حابة أفكر بالحلم اللي شفت فيه أمي الله يرحمها ، و كان تفسيره ( تفريج هم ، و تعويض من الله خير )
بنفس اليوم اللي انفضح فيه زوجي ، شفت الحلم بالصبح و سألت نفسي أية همّ ياربي .. ؟؟؟

الحمد لله ، أموري تحسنت مع أهلي و أهله ، و بالعمل .. و مع زوجي ( كذا من ربنا )..
يمكن لإنه علاقتي تأثرت سلبياً بأهلي و أهله و زوجي و شغلي
( عشان كنت اضغط على أعصابي في سبيل راحة أمي و محاولة إرضائها قدر المستطاع ؟؟؟ )

.
.

أقصد بتغير زوجي
يعني صار يهتم بشغله و وظيفته و ما يتأخر عن عمله ، يحرص على صلاته و خاصة صلاة الفجر
و صار يصحيني كمان .. ما يكذب ، ينفذ وعده .. صريح .. يهتم بمصلحة أولاده ..
يساعدني برتبيتهم و يهتم ..

و فيه تغيير لاحظته فيه و تعجبت منه ..؟؟؟
صار يقول أنا ما أتراجع عن كلامي لو قلت لأ .. يعني لأ ..
( مرتين صدرت منه .. و يثبت بموقفه و ما يتزحزح لو كان يدري إنه على صواب )

.
.

بس ( المشكلة ) إني ممكن أتوقع أي شي منه ..
ممكن مثلا اكتشف إنه ما بيروح شغله و بيروح يلعب بالصالة ؟
ممكن ( بعد ) ما يسترد ثقتي به .. يبدأ يفكر إنه يستغل ثقتي به و يستغفلني ..
عادي .. ممكن أي شي أتوقعه منه بعد كذا ..

.
.

عشان كذا قلت ( ما صار يهمني ) ..
يعني لو بيكون صادق .. فراح يصدق لنفسه ..
و لو يكذب فراح يضر نفسه و ماحد بيخسر غيره ..
و لو بيهمل شغله و وظيفته ،، فلنفسه كمان ..
و لو بيصلي ، فلنفسه كمان ..
أنا لحد هنا ، و أحس إني خلاص بريت ذمتي تجاهه ..

************************************************** *

و ما صار يهمني ..

يمكن لإني أستعدت ثقتي بنفسي ، و رجعت أتفائل بالحياة من جديد زي ما كنت قبل ما أتزوج ..
و طبقت و نفذت كل اللي كتبته هنا من بداية الموضوع و قررت فعله ،.

و صارت عندي أعمدة ارتكز عليها ،.

و ما صرت أحس بتأنيب الضمير تجاه زوجي ،.
و صرت انظر له بعين الشفقة ، مو إنه عمود ارتكز عليه ..
و لإني عرفت و قفلت مداخل قلبي اللي كان يستغله لصالحه ..

و مو بس هو ما عاد يهمني .. كل اللي خذلوني بعد موت أمي ، ما عاد يهموني مثل قبل و لا أدور عليهم
يعني رجعت أنا ( الانسانة اللي قبل ما أتزوج ) ..

*. تمنيت زوجي لو كان ذكي .. و استغل الفرصة ، و وقف معاي بالفترة هذيك اللي كنت محتاجته فيها
بجانبي .. عشان كنت حأفتكره بها و اعتبرها جميل له علي طول عمري ..

طعن زوجي لي ، كانت القشة اللي قصمت ظهر البعير .. و ماكان في وقته أبدا ..
لإني كنت أمر بأصعب فترات حياتي .. و هو استغل الفترة هذيك و ضمن إنه مالي أحد غيره ..

و مثل ما قالت بيتا :
(( انشغالك وقتها خلاه يبعد ، بحيث أنه يراهق ويخوض تجربة كان مفروض انه خاضها زمان وقت
المراهقة .. وأنا واثقة ومتأكدة 100% بأنه ما عاد يعيدها لأنه وباعترافه لك ما عجبته التجربة ))

و مع العلم ، إني انتبهت لتغيره .. و حذرته من بداية شهر رمضان و قلت له ..
تصرفاتك ، تصرفات شخص يخفي شي عن زوجته بجواله ..
أنا ماني غبية .. و لا تخسر بيتك و زوجتك و أولادك و سعادتك ،.
و أنا ما راح أفتش من وراك .. بس ربي راح يكشفك ..

و لو صح ( زلة شيطان ) كان توقف من وقتها ، و رجع لعقله ..
بس قال لنفسه ،، مالها أحد دحين غيري و مصيرها أنا .. إيش بيدها تعمل ؟؟؟

(( هذا اللي جرحني .. ما تخيلته بالنذالة هذه .. نزل من نظري و مكانته نزلت كثييييييييييير ))

.
.

ما صار يهمني ..
يعني ما صرت أتأمل منه شي ..

.
.

و أنا بأطبق نصيحة الأخ البليغ ،، و راضية بنصيبي ..
عشان كذا ، التغيير لازم يكون من ( داخل نفسي ) ..
و هذا اللي بيصير بالفعل .. و اللي بدأت نتائجه تظهر الآن ..

بس لازم ارضى بنصيبي و أعيش بسعادة و راحة و ثقة ،
مو أعيش بسخط و خوف و قلق ..

************************************************** *****

لماذا الهروب ؟

لإني كنت عاجزة عن فعل أي شئ أو اتخاذ أي قرار ، و لإني كنت راح أدخل لمرحلة الإكتئاب ..
و لإني كنت مصدومة و مجروحة من زوجي ، لإنه انكسر شي كبير بيني و بينه ،،
و بالإضافة إلى إني أصلاً .. كنت من قبل تعبانة من أخواني و أخواتي و اتهموني ظلم ..
و لإني كنت ماني قادرة أوقف على رجولي و لا قادرة أعمل شي أو أقدم أي شي و متأثرة بموت أمي ..

و عشان التساؤلات اللي كانت براسي و بداخلي ( عن حياتي الزوجية ) و اللي سطرتها هنا ..
كانت بتقتلني و تجنني و تهدم حياتي .. بس خرجتها كلها هنا في 20 صفحة .. و تعبتكم معاي ..
بس بإذن الله بنتائج رائعة ..

و لا شعورياً ، رجعت وقفت و استعدت ( نفسي ) ..
نصايحكم هي اللي أعطتني دافع للحياة من جديد ..

بالإضافة إلى وحدة ملتزمة ، تعرفت عليها قبل شهر و نص .. كانت دايم بالواتس تقول لي ( قومي صلي ) ..
و ساعدتني إني أرجع أحافظ على أداء الصلاة (بأوقاتها و ما أأخرها) و تخاصمني إذا تأخرت ..
و تعلمني أشياء بالدين .. كأنه ربي أرسلها لي ..

************************************************** *****

لماذا تحاربي نفسك ؟

- لإنه نحن بالأخير بشر ، ماحنا ملائكة ,, تدفعنا الكرامة و العزة بالنفس إننا نثأر لنفسنا ..
بس اجلس أحارب ( كرامتي و عزة نفسي ) و أقول ( انسي و سامحي و ارمي كل اللي فات و أعطي فرصة )
و بأحط أمام عيني كل النصايح اللي كنت أنصحها لغيري و كل الحكم و المقولات اللي أنادي بها ..

- أنا من عائلة
(أهل أبوي ، معروفين بالذكاء و الدهاء و الغطرسة و الغرور و الخباثة و شريرين ماعندهم رحمة ..
بس عندهم شرف و أمانة و كرامة و كرم و نفس عزيزة )
فجالسة أحارب الصفات اللي مو كويسة بداخلي من طفولتي، و أخلي ( الخير بداخلي ) يغلبهم ..
لإنه أمي ، إمرأة متواضعة جدا جدا و بسيطة تصاحب الفقراء و تحب مجالستهم و مساعدتهم و القرب منهم ..

فبأستغل مثلاً .. نعمة الذكاء ( بالعلم و التعلم و بأشياء ترجع بالخير عالجميع )

عشان كذا كنت أقول لزوجي بفترة الخطوبة ..
( لا تتكلم زي كذا و تعطيني حجم أكبر من حجمي ، و لا تدخل الشيطان ما بيننا ..
لإنه الشيطان راح يستغل أي وقت نتزاعل فيه .. و يكبر راسي .. فلا تقول زي كذا ، و انت اعتزّ بنفسك ..
إنت بداخل صدرك القران ، أحسن مني و من كل شي )

بس بفترة فقدت التحكم فيه بنفسي - بالفترة اللي نفسيتي كانت متعبة فيه - ، و ظهرت هذه الصفات فيا ..
( و أهنت رجولته و كرامته ) ..

و أنا ما أحب انتقم لنفسي أبدا ، و أعرف الشي هذا بنفسي من زمان ..
الدليل إنه أهلي غلطوا علي و ظلموني ، بس سامحتهم و عزمتهم عندي و عززتهم و نسييييت كل شي ..

بس مع زوجي ( أحس إني ماني قادرة أتحكم بنفسي ،، فبأحارب نفسي )

يمكن لإني إمرأة مهما كان ،.
يعني أنا ( ناكرة للعشير ) ( أنا ضلع أعوج ) ( أنا ناقصة عقل و دين )
( اللي يخرب بيتي من الشياطين ، راح يتكرم عند ابليس و يلبس تاج و يصير الكل بالكل ؟ ) ..

فأنا أحارب نفسي بطبع ربي خلقنا فيه ،، عشان أكون ( منصفة و عادلة و رحيمة )
عشان لا أظلمه و لا أظلم نفسي و لا أولادي .. و لا يكون فيه إفراط و لا تفريط ..

- و أخيراً ..
كنت فكرت الصراحة ، أرد له الصاع صاعين .. قبل يوم عرفة ..
بس استحيت من ربنا .. و ما رضيت لنفسي القذارة ..

قمت حمّلت برامج الشات كلهاااااااااا بجوالي ، أبغى أعرف إيش ممكن الواحد يلاقي هناك ؟؟؟
لقيت ضياع و مسخرة و تفاهات و قلة أدب و قلة عقل ،، بس جلست أتفرج ؟؟؟
و حذفت البرامج من نفس اليوم ، لإنه تفاهة و مسخرة ..

هذا الشي زادني ثقة بنفسي و الحمد لله .. و حمدت ربي إنه كرهني بالطريق هذا ..