بأصحح نقطة قلتها .. ( علشان أكون منصفة ) ..

زوجي مو أحسن من أزواج أخواتي .. كفّتهم متساوية الآن ..
كنت زمان أشوف إنه أفضل منهم ، لإنه كان يهمني أسلوب التعامل ما أنظر للناحية المادية ..

( لا أحد يقول جالسة تقارني ، لإني ما أقارن زوجي بأي أحد و ضد المقارنة و أعرف إنه غلط ، لكن عندي مقاييس للرجولة )

- أزواج أخواتي ، ما يسمحوا لأخواتي يناموا عند بيت أهلي .. و يتضايقوا لو يروحوا كل يوم ..
زوجي كان ما همه لو أنام كل يوم ، عشان يرتاح من المصاريف و يرمي مسئوليتي على أهلي و عشان بكيفه يسهر ..
كان يقول هذا جزاتي عشان انبسط إذا شفتك مبسوطة ؟؟؟ بس كذاب ..

- زوج أختي ، لازم يخلي أختي تطبخ كل يوم و ما يحب أكل السوق .. لإنه هو اللي بيجيب المقاضي و يصرف عالبيت ..
زوجي ما همه ، لإني لو ما طبخت .. بأطلب أكل من برة .. و لو طلب إني أطبخ ، راح أطلب منه يجيب مقاضي ..
و لو مافي شي بالبيت ، بأدبر حالي و ما عمري تركته جوعان ..
و عادي عنده ( معليه عالوصف.. لكن مثل أشعب .. عادي يشوف أي واحد ياكل و يروح يشاركه الأكل بالعمل أو أي مكان )

- أزواج أخواتي يهتموا بمجاملة أهاليهم ، زوجي ما همه .. لإنه ما يبغاهم قريبين مني و ياخدوا أخباره ..
لإنهم يتحكموا فيه ، يعني مو علشاني ..

( ميزة زوجي ، إنه يهتم فيا قدامهم و ما همه أحد ، و يدافع عني و ما يخلي أحد يغلط علي )

- أخواتي كلهم عايشين ببيوت ( ملك لأزواجهم ) ماشاء الله ..
أنا عايشة ببيت أنا دافعة ثلاث أرباع إيجاره ، و السنة هذه ..
زوجي راح يدبر الإيجار بإنه يستدين من أصحابه لإني شلت يدي ..

- أخواتي يسافروا على حساب أزواجهم ، و يروحوا استراحات و مسابح و تمشيات و أزواجهم يذبحوا لهم ذبايح ..
و لما نروح عندهم ،، العشا و الحلى على حساب أزواجهم مثل بقية الناس .. و أخواتي يعتبروه شي مفروض على أزواجهم ..

أنا لو بأروح أي مدينة قريبة مننا ، أنا لازم أدفع أقل شي 200 ريال عشان يفحص السيارة ..
و 1000 إيجار السيارة و غيره .. و عقيقة ولدي زوجي ما ذبحه ..

( لا تقولي ما عنده فلوس و مسكين ،، في بريطانيا كان راتبه يزيد و كان يجيه فلوس و ما عمره ذبح ذبيحة و لا لعقيقة ولده )

و لو رحت عند أهله و حبيت أخد شي معاي ، على حسابي ..
و لو ناديت أحد من أهلي عندي أو رحت لهم ، برضو على حسابي ..

( بس إنه زوجي يوصل الأغراض بدل السواق .. و أبين قدام الكل إنه زوجي اللي متكلف بكل شي ) ..

- أخواتي كل ملابسهم و ملابس أولادهم من جيب أزواجهم ، و حتى الشغالة و السواق و مصاريفهم ..
و أخواتي ( مو عاجبهم كمان الشي هذا ، و يتحكموا إنه أزواجهم ما يصرفوا على أهاليهم ) ..
و قلت لهم ، دام زوجك يصرف عليك و مو مقصر معاك .. مالكم دخل يصرف على أهله أو لا .. بس مو عاجبهم ..

أنا ما يحتاج أحكي عن زوجي ..
و فوق هذا كله ، زوجي بيسمع مني كلام حلو .. و أكثر وحدة أنا بأخواتي اهتم بمظهري و لبسي و بأولادي ..
و أعرف و أفهم بالأتيكيت و الأصول و الحمد لله .. و احترم أهله و أقول له ( أمك و أبوك ما تقصر معاهم ) ..
و كانت أمي دايم تخليني أتواصل مع الناس نيابة عنها لإني أبيض وجهها مع الكل .. يعني مبيضة وجه حماتي و أخواته ..

.
.

الميزة اللي يشوفوها أخواتي بزوجي ،،

- إنه يدلعني أمام الكل .. بس هذه الحركات زوجي يتقصد يظهرها أمام الكل ..
عشان يحب يقهرهم ، مثلا يتقصد يدلعني قدام سلفتي .. عشان تروح و تقول لزوجها إنت ما تدلعني مثل أخوك ..

كنت أشوفها ميزة ، بس ما عاد تهمني بعد اللي صار ،، لإني ما أصدق مشاعره ..

- يتكلم معاي كأني صحبته و يهتم برأيي ، بس الفرق في الشي هذا .. بسبب أسلوبي مختلف عن أخواتي ..
وحدة من أخواتي زوجها يتضايق لإنها ما تتكلم أبدا و يسميها الجوال الصامت .. و التانية بس تحش في الناس
و كل كلامها عن فلانة و علانة و هذه اللي سببت لي مشاكل مع أهلي و سببت الفتن .. و زي كذا ..
و وحدة تقول عشان فرق العمر بيني و بين زوجي كبير ، فيعتبر كلامي ماله قيمة و ما يعجبه كلامي ..
و هذه تعليمها أقل شي فينا ، و كل كلامها .. أبغى اشتري و أبغى و أبغى .. إلخ ..

خليني أطفشه بالكلام ،، راح تطلع أخلاقه المستخبية ..
زي ما طلعت بالفترة الي كنت تعبانة فيها بسبب موت أمي ، و كنت محتاجة فيه لوقوفه ..

بس الصاحب اللي يتخلى عني بأشد وقت أكون محتاجة فيه له ، هذا مو صديق ..
أنا مابغى صديق لي ، يبغاني بس وقت ما أوقف على رجولي ،، و يبغاني بس أضحكه و أدلعه و اهتم فيه ..
و إذا طحت ، رماني بسهم الغدر و الخيانة .. و جلس يدور اللي تعطيه كلام حب ( رخيص مثله و من نفس مقداره ) ..

.
.

و فيه شي أخير يميزني عن أخواتي ..

أنا اهتم ( لدين زوجي و آخرته ) .. و أنصحه و أدله لطريق الخير ..
أخواتي ما همهم لو زوجها قام يصلي أو لا .. تقول لي وحدة من أخواتي ، بيدخل القبر لوحده ماهمني ..
و التانية كانت تسمع أغاني 24 ساعة ،، و زوجها اللي علمها كيف تهتم بصلاتها و بالقران ..

يعني زوجي ( يحمد ربه ) ..

مال + نسب + أخلاق + جمال + دين + بكر + ولود + ودود + وظيفة مرموقة + شهادة عالية ..