أبلة بيتا ..

كلامك يدخل القلب و العقل من أوسع أبوابه ،، عشان كذا ( لجين ) كانت ترتاح لك .. بجد و الله ..

ترى فيا عيب ، إني حساسة جدا و ألوم نفسي كثير .. حتى أخاف أدخل هنا و ألاقي كلام قاسي ..
بأتأثر و اجلس أيام لحد ما أنسى .. و إنت طريقة عتابك ( مرة حلو ، و نفسي اصير مثلك ) ..

لا تتركيني ،. أبغى أتخلص من الأفكار اللي براسي ..

تدري ..؟؟؟

فكرتيني بأمي الله يرحمها و طريقة كلامها ( تحسيه من القلب ) ..
قالت لي قبل لا تموت ،. و افتكرها لحد دحين و هي راقدة و تعبانة و بدون أي مناسبة .. و لا اشتكيت لها عن شي ..
بس شكله قلبها حاسس بي ..

قالت لي .. زوجك طيب و يكفي إنه ما يجبرك على أهله .. و ما تلقي رجال زي كذا ..
عيبه ما عنده فلوس .. و خلاص عيشي حياتك كذا و أهم شي اضمني بيت لك و لأولادك عشان لا تحتاجي لأحد بعدين ..
و قالتلي ( اتمسكي بزوجك ) ، ربنا الحمد لله أعطاك فلوس ..

و معاك حق ،،
زوجي عنده ميزات ماهي موجودة بأزواج أخواتي ..

.
.

على فكرة ،، الفترة هذه اختلطت مع أهلي و أخواني و أخواتي .. و أحس رجعت أقسي مثلهم لا شعوريا ..
عشان كذا ، أمس طلعت الأفكار من راسي .. و بأحاول أتحكم بحالي و ما أتأثر بطبايع أهلي ..
أهلي فيهم عزة نفس ، لدرجة إنه ما يهمهم أحد ، و يبغوا كل الناس مثلهم ..
و لما دخلت بيت أهلي بالعيد .. رجعت حسيت بالأمان اللي افتقدته ..

أمي الله يرحمها كانت ترتاح لي كثير ، عشان كنت الوحيدة اللي أهديها إذا هي تضايقت من أحد أو كانت معصبة من شي..
كانت تقول لي ( إنت تهديني مو مثل أختك تولعني و تحط لي بنزين ) ..

عشان كذا مفتقدة أمي الله يرحمها ،، كانت متسامحة جدا و دايما تقول لي إنت العاقلة و انسي و روحي سلمي على أختك
و هي عارفة إنه أخواتي و أخواني يغلطوا علي من أيام ما كانت أمي موجودة ، بس كانت أمي تسكتهم و توقفهم عن أذيتي
بس هم يحسبوني مثلهم ، إني أحرض أمي عليهم .. لإنه أمي كانت دايم تجلس و تتكلم معاي ..

بس أمي تعرف كل واحد و وحدة فينا
و أمي تعرف إني أحب مساعدة الناس ، و أمي نفس الشي تفكر بغيرها و ما تفكر بنفسها ..

.
.

بس حابة أوضح إني ما قصدت إنه كلام صحباتي صحيح 100% ..
بس قصدت إني كنت معذورة وقتها ،، و ما ظلمته أو خنته و خدعته و استغليت ثقته ..
أقصد ردة فعلي كانت نتايج لأفعاله ، و هو ما أعطاني مبررات و لا شي ..

.
.

- زوجي لو اكشف أمام الناس ما همّه ، أهم شي ما يكونوا أصحابه ..
- يفرح إذا صابه مرض ، أحسه يتمنى إنه يكون مصاب بمرض .. عشان بس ينام و أنا أرعاه ..
زي زوج خالة قرين ..
- يعني إلا بالقوووووووة يبغى يكون مريض بالقلب ، عشان أحزن عليه و أدلعه و عشان أهله يخافوا عليه ..
يعني مو كفاية متحملة مسئولية الشغالة و الأولاد و البيت و نفسي ، كمان يبغاني اشتغل ممرضة له و اخرج و اشتغل ..
- و كل كلامه من يوم خطبني ، أنا أموت و ترتاحي مني .. يبغاني أبكي و أحزن عليه .. كمان يبغاني أترمّل .. ؟؟؟
بدل ما يقول أتعلم و أدرس و أشتغل و أفرحكم و أريحكم ..

- تحسبوا إني أبغى أتحكم بزوجي ، و أنا مو كذا ..
الدليل إنه أهله يبغوني أتحكم فيه ،، بس أنا رافضة الشي هذا ..
أعطيته حريته بالقرار ، أعطيته حريته بكل شي ، أعطيته الثقة ببداية الزواج و القيادة و كل شي ..

بس دحين اللي بديت أخليه يعطيني تفاصيل المصاريف ، و تفاصيل تحركاته ..

.
.

و أنا قصدت بلاوي وراه ، مو يعني لا سمح الله كباير ..
لإني زوجته و أكيد ما راح يغيب عني الشي هذا ..

بس مثلا ، كنت أصحيه يروح للعمل و ما كنت أطلب منه شي طول الأسبوع ..
كان يقوم الصبح ساعة 8 و يرجع يتغدى ساعة 3 و يخرج للعمل و يرجع الساعة 2 الليل ..

و فجأة ، اسمع إنه انفصل من العمل ؟؟؟
يقول لي ( عشان ما عيّدت عالمدير بعد الإجازة ، قام فصلني ) .. <-- حدث العاقل بما يعقل ؟؟؟
و مرات يقول لي ( انفصلت بسببكم ، عشان بأعمل أشغالكم و عشان بأنام و ما أروح الدوام عشانك ؟ )

قلت له ، ما أفتكر مرة طلبت منك شي بوقت دوامك أو خليتك تنام و تغيب عن العمل ؟؟؟

.
.

اكتشفت بعد الحكاية هذه ، إنه ما كان يروح الدوام ، و كان يروح يلعب بلياردوا ..

هذه هي البلاوي اللي وراه و غيرها الله أعلم بها ..
هل معناها ( إني شكاكة ) ؟؟؟

( مو بسببه صرت أشك فيه و ما أصدقه ؟ )

يعني شكوكي بسببه ..

.
.

بس دحين مريحة راسي ،، لإني أقسمت ما أتعب حالي ..
لو شكيت بشي و حسيت إنه رجع مثل قبل بأكاذيبه و اهماله ..

خلاص ( الإنفصال ) ..
عشان كذا بأعمل كل شي أقدر عليه الفترة هذه ، و ما أزعله أبدا و أداري خاطره ..
عشان ما ألوم نفسي أبدا ..

و قدامه دحين 3 أسابيع عشان يخلص الشغلة المؤقتة حقته هذه ،، و بأشيل يدي من المصاريف ..
يا يلاقي شغل و وظيفة لنفسه .. يا المرة هذه ( راح أطلب إنه أخوي الكبير أو عمي ، يتدخلوا بالموضوع ) ..

لإني رجعت له بشرط ( إنه قال لي تغيرت و صحيت و صرت انسان تاني ) ..
و ما راح أجلس مع واحد عاطل ..

لمتى يجلس عاطل ؟؟؟
دوامه الحالي من الظهر لحد الليل ..

بأتقصد الأيام هذه ،، إني أقوم الصبح ، عشان أروح العمل و يوصلني هو و ما يرجع ينام ..
عشان لا ينام لحد الظهر ، و يروح يلف عالدواير الحكومية و الشركات و يدور عن وظيفة لنفسه ..

مع إني أنا ماعندي دوام كل يوم ..

عندي يومين بالأسبوع و الباقي ( أووووف ) ..
بس بأقوم و أروح للعمل ، عشان يصحصح و ما تكون له حجة بعد كذا ..

و نفس الوقت ، أحاول استفيد من وقتي هناك بالعمل ..