شوفي حبيبتي حركات الزفات حركه مره ما تعجبني
اقصد زفات القهوه والعصير
صراحه كأنها حفلة أطفال
مرره الحركة ترى بايخه انتي بس فكري بمعناها ..
يلا افرحوا جبنا لكم قهوة وعصير
لا مره شيلي الفكره من بالك

وحتى حركة الاستقبال فيه ناس يحطون بالمدخل طاولة شعبيات
والا فواكه مقطعه ونافورة شوكلاته
بعد ما تعجبني الوحده بتدخل تسلم وبيدها حلى والا شيء تأكله
يعني الكرم والتميز ما يجي بالكثرة وبغير معنى
حتى التوزيعات سواء تذكارات او عصيرات احسها حركه مره ما تعجبني

بالنسبة لشكل القاعه : أهم شيء عندي يكون الوان القاعة والطاولة منسجمة مرتبه وكلاسيك
ألوان رايقه وراقيه بنفس الوقت

التقديم : بدون التنويع الكثير
اهتمي بنوعية الحلى وشكله اقصد الموجود على الطاولة
اختاري مكان مميز باتشي او سعد الدين
تأكدي من نوعية القهوة والشاي
الشاي بدون سكر وجيبي قوالب سكر حلوه او مغلفة مطبوع عليها اسماء العروسين
يعني اهتمي بالتفاصيل على الطاولة
انا اشوف اتقهوى على نوع او نوعين حلى افضل ألف مره من كل شوي نوع وعلى غير سنع
المعجنات نفس الشيء بالنسبة للحلى والأفضل تشكلينها وتكون من مكان كويس حتى هي
وخليها انواع معجنات ورق عنب (حبيب الكل) كبة مثلاً
وعلب مويه
طبعاً إذا ضبطتي الطاولة واخترتي كل هالأصناف ماله داعي توزعين أي شيء على المعازيم
المواعين والكاسات تكون نوعية كويسه
القهوه التركية بالله وش ميزتها بوسط الزحمه والطق
مدري عن الناس بس انها تقدم بطريقة زواجاتنا مره ما ينفع وسط الأطفال والزحمة
حتى تجي بدون طعم
العصير مره ماله موقع من الإعراب إذا كان زواجكم بالشتاء
يمكن انتي تشوفين الي ماشي بوسط عائلتكم والزواجات التي تحضرينها
وما ودك تجين أقل منهم
لكن مثل ما ذكرت الأخت ايدولوجيه خلي زواجك كلاسيك
وبالعقل

- الزفات الي ذكرتيها الاسبانية وملكة الورد هذي قصدك انها للعروس صح
إذا ملزمه عليها تكون قبل طلعة العروس
ما تكون معاها بنفس الوقت
بعد ما احس لها داعي أبد
والله انها حركات مدري وش معناها

- الطقاقات لازم يكونون كويسات ( أهم شيء )
-بوفيه العشاء حطي حيلك فيه
واهم شيء ريحة العود بالقاعة

وصلى الله وبارك