معليه بأنقز لرد الأخت البحلة بالنفس ..
و بأرجع للردود ، لإني في كل الحالات ناوية أقدم لأمي إذا شغالتها سافرت إن شاء الله ..

البحلة بالنفس ..
أنا الصراحة ، هدفي الأول من إني أجيب العاملة المنزلية ، هو ( إني أخذها معاي إن شاء الله لهناك ) ..
يعني منها تشتغل معاي هنا لمدة سنة ، و بعدين أخذها معاي .. : (

و كلامك من جد بيخليني أنتبه أكثر و أخاف .. و خاصة بإنه لي تجارب متعبة معهم في الغربة ..
شغالتي اندونيسية و كانت بنت حلال و طيبة و يوم أخذتها لبريطانيا ، انقلبت من حالها و تغيرت ..
و كنت معطيتها الحرية الكاملة هناك ، تخرج و تدخل أي وقت و تروح مطاعم و أسواق لوحدها و لا مع أحد ، براحتها و ما أسألها ..
و يوم أسافر كنت أخلي لها البيت تعزم اللي تبغى تعزمه و تجيني فواتير بالضعف ..
و مع كذا ، في الأخير .. كانت تشوف بإني مجبرة على كذا و إنها تتمنن علي بجلوسها معاي هناك ..

فكيف لو وحدة ثانية لا أعرفها و لا تعرفني .. و على أمريكا كمان ؟

.
.

مثال بسيط على مواقفها :
تقابلت مع وحدة اندونيسية في جامعتي في بريطانيا و كانت تحضّر دكتوراة،.
و انبسطت وقتها - قلت بداخلي - خليني أخذ رقمها ، عشان أعرفها على شغالتي و تنبسط معهم إذا اجتمعوا بيوم
جيت للبيت و قلت لشغالتي ، قامت قالت لي الشغالة :
( يا سلاااااااام ؟؟؟ إيش تبغيهم يقولوا عني إذا شفتهم ؟ شغالة ؟؟؟؟ ما أبغى أقابلهم )

لإنه ماحد من جاراتي كانت معهم شغالة .. فكانت تحقد علي و تبين للجيران إنها هي الكل في الكل في البيت ؟؟؟
أسكت لها و أمشي لها .. بس أنا إيش ذنبي ؟ و من جد تعبت لي راسي ، فوق ما كان عندي هم الدراسة ..
و يوم أحكي لأمي عن شغالتها كيف كانت معاي هناك ، من جد ماحد يتوقع

كانت عند أمي تلبس النقاب من حالها و تقرا القران و شئ ..
من أول يوم أخدتها هناك ، تلبس الجنزات الضيقة مرررة و قمصان بأكمام قصيرة و تبغى تشيل الطرحة في الشارع
و ما أشوفها تصلي، و تجلس تقول لي ليش ما تروحي بارات ؟ ليش ما تمشي بشعرك ؟ ليش ما تحطي مكياج ؟
ليش ما تطلقي من زوجك و تتزوجي واحد بريطاني ؟
في الأخير ( لزمت حدها ، يوم رسمت لها حدود .. و خاصمتها يومين ) .. بس تعبت لي أعصابي من جد ..
بعدها صارت كويسة .. بس أكره إنه وحدة تجلس في بيتي و تتعب لي أعصابي ،.
ليه ما يحترموا اللي يحترمهم ؟

.
.

طيب إذا سافرت دحين مثلا و معاي طفل عمره 6 أشهر أقل شئ ..
إيش ممكن أعمل ؟؟؟ و بتكون عندي دراسة صعبة وقتها ..
من جد ، أحس نفسي شوي و أبكي ..
: (

طيب مافيش هناك عوايل معهم شغالات ؟ و اللي بتدرس و معها أطفال إيش بتعمل هناك ؟
زميلاتي اللي هناك ، يا تكون مو متزوجة أو متزوجة و معها طفل في الروضة .. يعني ما يعرفوا يجاوبوني ؟

كيف أسعار الحضانات هناك ؟؟؟ و كيف نظامهم إذا تعرفي ؟ : (

اللي بيريحني شوي و الحمد لله إنه ولدي بيكون وقتها عمره 5 سنوات
و ماشاء الله عليه من صغره علمته يساعدني مرات ، و قلبه علي حبيبي و يحب يتحمل المسؤولية

بس اللي بيتعبني زوجي ، بس يارب يتغير من دحين لحد ما نسافر ..
يارب أجيب بنوتة ، عشان زوجي يتعلق فيها و يحبها و يساعدني و ما يخليني أمسكها
و ما يحتاج أخد شغالة ..

لو جبت ولد ، بيطلعولي قرون الثلاثة ( الأب و الولد و النونو ) ..